Ena enn bon raison pou croire ki sa l’expression-la faire reference ar bann garson spirituel Bondié. Kifer?

Premier parmi sa bann verset-la dire: “Bann garson vrai Bondié ti commence remark sa bann tifi-la ek ti trouvé ki zot bien joli; ek zot ti commence prend bann madame pou zot, setadir tou seki zot ti choisir.”​—Gen. 6:2.

Dan bann l’Écritures Hébraïques, nou trouve l’expression “bann garson vrai Bondié” ek “bann garson Bondié” dan sa bann verset-la: Genèse 6:2, 4; Job 1:6; 2:1; 38:7; ek dan Psaume 89:6. Ki sa bann texte-la montré concernant sa “bann garson Bondié[-la]”?

Li clair ki “bann garson vrai Bondié” ki mentionné dan Job 1:6 ti bann creature spirituel ki ti rassemblé devant Bondié. Parmi zot ti ena Satan ki ti pé “allé-vini partout lor later.” (Job 1:7; 2:1, 2) Li pareil dan Job 38:4-7 kot nou lire ki “bann garson Bondié” ‘ti loué Bondié bien fort’ kan Li ti ‘pose roche principal fondation’ later. Pena okenn doute ki sa bann garson Bondié-la ti bann ange, parski Bondié pa ti ankor crée bann humain. Alors, nou trouvé ki “bann garson Bondié” ki mentionné dan Psaume 89:6, c’est bann creature spirituel ki avek Bondié dan le ciel, pa bann humain.

Alors, kisannla “bann garson vrai Bondié” ki mentionné dan Genèse 6:2, 4? En accord avek seki nou finn fek examiné dan la Bible, li logik pou dire ki sa recit-la pé faire reference ar bann garson spirituel Bondié ki ti vinn lor later.

Certain trouve sa difisil pou croire ki bann ange kapav interessé pou gagne bann relation sexuel. Bann parole Jésus dan Matthieu 22:30 montré ki mariage ek bann relation sexuel pa existé dan le ciel. Pourtant, dan certain l’occasion bann ange ti prend lekor humain, zot ti mem mangé ek boire avek bann dimoune. (Gen. 18:1-8; 19:1-3) Alors, li raisonnable pou croire ki avek enn lekor humain coumsa, zot ti kapav gagne bann relation sexuel avek bann madame.

Ena bann raison Biblik pou croire ki c’est seki certain ange ti faire. Jude verset 6 ek 7 compare peché bann zom dan Sodome, ki ti faire bann kitsoz kont nature, avek peché “bann ange ki pa ti reste dan position ki zot ti ena au commencement, mais ki ti quitte sa place kot zot ti’nn crée pou resté-la.” Dan toulé-deux cas, ena enn point en commun, sa bann ange-la ek bann Sodomite ti “commette fornication avek excès ek zot ti poursuive bann desir la chair pou faire bann kitsoz kont nature.” Pareil, enn lot passage ki trouve dan 1 Pierre 3:19, 20 montré ki ena enn lien entre bann ange ki ti desobeir, ek “lepok Noé.” (2 Pierre 2:4, 5) Alors, kapav compare conduite bann ange ki ti desobeir dan lepok Noé avek peché ki ti ena dan Sodome ek Gomorrhe.

Sa conclusion-la li logik kan nou comprend ki “bann garson vrai Bondié” ki mentionné dan Genèse 6:2, 4, ti bann ange ki ti prend lekor humain ek ti commette l’immoralité avek bann madame.

L’apotre Pierre expliké ki sa bann l’esprit-la, c’est bann ki “dan le passé, pa ti obeir kan patience Bondié ti pé attann dan lepok Noé.” (1 Pierre 3:20) Li clair ki Pierre ti pé faire reference ar bann creature spirituel ki ti al avek Satan kan li ti rebellé kont Bondié. Jude mentionne bann ange ki “pa ti reste dan position ki zot ti ena au commencement, mais ki ti quitte sa place kot zot ti’nn crée pou resté-la” ek li dire ki Bondié “finn garde zot prisonnier pou touletan dan enn grand noirté, pou jugement so grand jour.”​—Jude 6.

Dan ki fason bann creature spirituel ti desobeir dan lepok Noé? Avant Deluge, sa bann mauvais l’esprit-la ti prend lekor humain​—enn kitsoz ki Bondié pa ti ena dan so projet pou zot. (Gen. 6:2, 4) En plis, sa bann ange ki ti gagne relation sexuel avek bann madame-la, zot ti pé pratik enn kitsoz kont nature. Bondié pa ti crée bann creature spirituel pou ena bann relation sexuel avek bann madame. (Gen. 5:2) Bondié pou detruire sa bann mauvais ange ki’nn desobeir-la dan ler ki Li’nn fixé. Mais pou asterla, Jude dire ki zot “dan enn grand noirté”​—coumadir dan enn prison spirituel.

Kan ek couma Jésus ti preche avek sa bann “l’esprit dan prison[-la]”? Pierre ecrire ki sa ti arrivé apré ki “[Jésus] ti ressuscité en tant ki enn l’esprit.” (1 Pierre 3:18, 19) Remarké aussi ki Pierre dire ki Jésus “ti al preche” ar bann l’esprit. Pierre servi verbe ‘preché’ dan le passé, alors sa vedir ki, kan Pierre ti pé ecrire so premier lettre, Jésus ti’nn fini preche avek sa bann l’esprit-la. Li parette alors, ki apré so resurrection, Jésus ti faire enn declaration ar sa bann mauvais l’esprit-la concernant punition ki zot bien merité, ki pé attann zot. Jésus pa ti preche ar zot pou donne zot enn l’espoir. Mais li ti preche enn jugement kont zot. (Yona 1:1, 2) Enn fois ki Jésus finn montré so la foi ek so fidelité ziska lamor ek ki li finn ressuscité​—sa ti montré ki Satan le Diable ti nepli ena okenn pouvoir lor li​—lerla Jésus ti dan enn bon position pou proclame enn condamnation coumsa.​—Jean 14:30; 16:8-11.

Dan lavenir Jésus pou attache Satan ek aussi sa bann ange-la ek pou jette zot dan l’abime. (Luc 8:30, 31; Rév. 20:1-3) Mais en attendant, sa bann l’esprit ki finn desobeir-la, zot dan enn grand noirté spirituel, ek pena doute ki pou extermine zot net.​—Rév. 20:7-10.