Pena okenn raison pou tracassé kot sa enn dimoune ki’nn exclu assizé dan la Salle du Royaume. Sa periodik-la finn donne beaucoup l’encouragement bann parent Chretien pou aide lor plan spirituel, zot zenfant ki’nn exclu ek ki ankor vive kot zot, si li possible pou faire sa. Pareil couma La Tour de Garde 15 Novembre 1988, page 19 ek 20, en Français, ti montré, bann parent kapav mem etudié la Bible avek enn zenfant mineur ki’nn exclu ek ki pé contigne vive kot zot. C’est enn fason kot zenfant-la kapav gagne l’encouragement necessaire pou corrige so conduite.

Dan la Salle du Royaume, li pa enn probleme ki enn zenfant mineur ki’nn exclu assize trankil kot so bann parent. Enn dimoune ki’nn exclu pa obligé assize par derriere dan la salle, alors, pena okenn probleme ki enn zenfant ki’nn exclu assize kot so bann parent, n’importe ki coté zot assizé. Bann parent prend soin spiritualité zot zenfant, alors pena doute ki zot envie ki li profite bien bann reunion. Zot pou kapav faire sa kan zot faire zenfant-la assize kot zot, au lieu ki laisse li assize tousel.

Mais, ki pou arrivé si enn zenfant ki’nn exclu nepli vive avek so bann parent? Eski sa vedir ki li pa kapav assize kot zot? Dan le passé, sa periodik-la ti expliké ki bon l’attitude enn Chretien bizin ena concernant frequentation enn membre so famille ki’nn exclu ek ki nepli vive kot li. a Selman, kan enn exclu assize trankil kot enn membre so famille pendant reunion, sa pa vedir ki sa famille-la pé rod frequente li. Si bann membre la famille ki fidele ena l’attitude ki bizin envers sa exclu-la ek zot pé faire zeffort pou suive bann conseil Biblik pou pa frequente li, pena okenn raison pou tracassé.​—1 Cor. 5:11, 13; 2 Jean 11.

Alors, si enn exclu assize kot enn membre so famille ou-soit kot enn lot membre congregation, sa pa bizin derange nou tant ki li conduire-li bien. Kan empeche enn dimoune assize dan enn certain place dan la salle, sa kapav crée tou qualité probleme, dependant lor bann circonstance. Concernant place kot bann assistant assizé dan la Salle du Royaume, fodé pa nou faire sa vinn enn probleme, tant ki tou bann ki present ek bann membre la famille ki fidele faire zeffort pou respecté bann conseil Biblik concernant bann exclu, ek tant ki place kot enn exclu assizé pa sok personne. b