1, 2. Ki l’influence fason ki nou finn elevé ek nou l’environnement ena lor nou?

 NOU tou, nou influencé par fason ki nou finn elevé ek par nou l’environnement. Nou habillé ek nou comporte-nou dan enn certain fason; nou content certain mangé. Kifer? Parski parfois, bann dimoune autour nou ek bann situation ki ena dan nou lavi ena enn l’influence lor nou.

² Mais ena certain kitsoz ki beaucoup pli important ki mangé ek linge ki nou choisir. Par exemple, a mesure ki nou grandi, nou aprann ki ena certain kitsoz ki bon, mais ki ena lezot kitsoz ki mauvais ek ki nou bizin rejeté. Mais pa tou dimoune ki ena mem fason pensé lor seki bon ek mauvais. Nou conscience aussi kapav influence nou bann choix. La Bible dire ki souvent “bann dimoune dan bann nation ki pena la loi, par zot-mem zot faire bann kitsoz ki ena dan la loi.” (Rom. 2:14) Mais si pena okenn la loi precis ki Bondié inn donné, eski nou kapav zis suive bann principe ki nou finn aprann depuis ki nou tipti, ou-soit ki bien populaire dan nou l’endroit?

3. Cite deux raison kifer bann Chretien pa suive bann principe ki ena dan le monde.

³ Ena au moins deux raison important kifer bann Chretien pa agir dan sa fason-la. Premierement, la Bible dire: “Ena enn chemin ki droite devant enn dimoune, mais apré, dan so boute ena chemin lamor.” (Prov. 16:25) En tant ki bann dimoune imparfait, nou pena capacité pou dirige nou bann pas dan enn fason parfait. (Prov. 28:26; Jér. 10:23) Deuxiemement, la Bible montré ki c’est Satan, “bondié sa systeme-la,” ki pé controle bann tendance ek bann principe ki ena dan le monde. (2 Cor. 4:4; 1 Jean 5:19) Alors, si nou envie gagne benediction ek faveur Jéhovah, nou bizin suive conseil ki trouve dan Romains 12:2.​—Lire.

4. Ki nou pou examiné dan sa lartik-la?

⁴ Ena bann point important dan Romains 12:2  ki li bon nou examiné. (1) Kifer nou bizin ‘transforme-nou’? (2) Ki sa transformation-la impliké? ek (3) Couma nou kapav transforme-nou? Anou reponn sa bann question-la.

5. Pou kisannla Paul ti ecrire bann parole ki ena dan Romains 12:2?

⁵ Kan Paul ti ecrire bann Romain, li pa ti ecrire so lettre pou tou bann dimoune en general, mais pou bann Chretien oint. (Rom. 1:7) Li ti encourage zot pou transforme-zot ek pou “arrete faire pareil couma sa systeme-la.” Pou bann Chretien ki ti reste dan Rome vers l’an 56 Nou Lepok, sa “systeme-la” ti implik bann principe, bann coutume, bann l’habitude, ek fason habillé ki ti ena dan sa lepok-la. Paul servi mot ‘arreté’ pou montré ki certain parmi bann Chretien ti ankor pé laisse sa systeme-la influence zot. Ki qualité l’influence sa ti ena lor nou bann frere ek soeur dan sa lepok-la?

6, 7. Dan lepok Paul, kifer li ti difisil pou enn Chretien vive dan Rome?

⁶ Zordi, bann touriste ki visite Rome kapav trouve ruine bann temple, bann tombe, bann monument, bann stade, bann theatre, ek plusieurs lezot kitsoz. Certain sa bann monument-la finn construire dan premier siecle. Sa bann ruine-la faire nou koné couma lavi social ek religieux ti été dan Rome longtemps. Nou kapav lire aussi dan bann livre zistoire lor bann combat gladiateur, le course bann char, bann piece theatre ek bann la musik ki parfois ti bien immoral. Rome ti aussi enn lavil bien commercial, alors bann dimoune ti ena beaucoup l’occasion pou faire business ek vinn riche.​—Rom. 6:21; 1 Pierre 4:3, 4.

⁷ Malgré sa quantité temple ek bondié ki zot ti ena-la, bann Romain pa ti ena vrai-mem enn relation personnel avek bann bondié ki zot ti pé adoré. Zot ti pratik bann coutume zot religion zis kan ti ena bann naissance, bann mariage, ek bann l’enterrement​—sa ti forme parti dan zot lavi toulé-jour. Ou kapav maziné couma sa ti difisil pou bann Chretien ki ti reste dan Rome. Beaucoup parmi zot ti pé faire sa bann kitsoz-la avant, alors li ti clair ki zot ti’nn bizin transforme-zot pou vinn bann vrai Chretien. Sa transformation-la ti pou bizin contigné mem apré zot bapteme.

8. Couma le monde li enn danger pou bann Chretien zordi?

⁸ Zordi aussi pareil, le monde li enn danger pou bann Chretien. Kifer? Parski l’esprit sa le monde-la li partout. (Lire Éphésiens 2:2, 3; 1 Jean 2:16.) Toulé-jour, le monde essaye influence nou bann desir, nou fason pensé, nou bann principe ek nou moralité, ek a cause sa, ena enn grand danger ki nou forme parti dan le monde. Alors, nou ena bann bon raison pou suive conseil inspiré ki Paul ti donné pou “arrete faire pareil couma sa systeme-la” ek pou ‘transforme-nou.’ Ki nou bizin faire?

9. Avant ki enn dimoune prend bapteme, ki changement li bizin faire?

⁹ Kan enn dimoune etudié la Bible ek applik seki li aprann, li commence faire bann progré lor plan spirituel. Li montré ki li pé progressé kan li faire bann changement dan so lavi. Li arrete faire bann pratik ki ena dan fausse religion, li rejette bann defaut ki li ti ena avant, ek li imite Christ. (Éph. 4:22-24) Nou bien content pou trouve plusieurs centaine millier dimoune faire sa qualité progré-la toulé l’année. Zot voué zot lavi ar Jéhovah ek zot prend bapteme. Pena doute ki sa faire Jéhovah plaisir. (Prov. 27:11) Selman, li bon ki nou examine sa question-la: Eski c’est zis sa bann changement-la ki enn dimoune bizin faire?

10. Ki difference ena entre enn dimoune ki transforme-li ek enn dimoune ki ameliore-li?

¹⁰ En realité, pou nou transforme-nou-mem, sa implik plis ki faire progré ou-soit ameliore-nou. Par exemple, kitfois lor enn produit ena enn l’etiquette kot inn ecrire “amelioré,” mais selman, li reste mem produit. Li possible ki finn ajoute zis enn nouveau ingredient ek finn change so l’emballage pou faire li parette pli attirant. Mais concernant l’expression “transforme-zot,” enn note dan enn dictionnaire (Vine’s Expository Dictionary) expliké ki ‘Romains 12:2 montré ki ena enn difference entre enn dimoune ki, par l’apparence, pé faire pareil couma sa systeme-la ek enn dimoune ki au fond li-mem pé transforme-li ek ki pé change so fason pensé grace a pouvoir l’Esprit Saint.’ Alors, transformation ki enn Chretien bizin faire c’est pa zis rejette bann mauvais l’habitude, enn mauvais fason kozé ou-soit enn conduite immoral. Mem certain dimoune ki pa konn nanyé lor la Bible faire zeffort pou pa pratik sa bann kitsoz-la. Alors, ki bann kitsoz enn Chretien bizin faire pou transforme-li?

11. Dapré Paul, ki enn dimoune ti bizin faire pou transforme-li?

¹¹ Paul ti ecrire: “Renouvelé zot fason pensé.” Nou “fason pensé” ena enn rapport avek capacité ki nou ena pou reflechi. Mais dan la Bible, sa implik aussi tendance ki nou l’esprit ena, nou l’attitude, ek nou capacité pou raisonné. Dan commencement lettre ki li ti ecrire bann Romain, Paul ti koz lor bann dimoune ki ti ena “enn mentalité ki [Bondié] pa approuvé.” Sa bann dimoune-la “zot ti rempli ar tou qualité l’injustice, bann mauvais kitsoz, convoitise, mechanceté; zot rempli ar bann l’envie, crime, laguerre, desir pou embete lezot,” ek lezot kitsoz ki faire di-tort. (Rom. 1:28-31) Nou comprend kifer Paul ti conseil bann ki finn grandi dan enn l’environnement coumsa ek ki ti vinn bann serviteur Bondié, pou “transforme-zot” ek “renouvelé zot fason pensé.”

12. Ki l’attitude beaucoup dimoune ena zordi, ek couma sa l’attitude-la kapav enn danger pou bann Chretien?

¹² Malheureusement, nou entouré avek bann dimoune ki ena mem mentalité ki Paul ti decrire. Kitfois zot pensé ki  li nepli la mode pou vive dapré bann la loi ek bann principe ek ki fodé pa force personne pou faire sa. Beaucoup professeur ek parent laisse bann zenfant faire seki zot envie. Zot mem enseigne bann zenfant ki chaque dimoune ena liberté pou decidé par li-mem seki bon ek seki mauvais. Mem bann ki dire ki zot croyant, croire ki zot libre pou faire seki zot pensé bon, sans ki zot obligé obeir bann commandement Bondié. (Ps. 14:1) Sa l’attitude-la kapav dangereux pou bann vrai Chretien. Bann ki pa faire attention riské ena mem fason pensé concernant bann disposition theocratik. Kitfois zot pou arrete suive bann instruction ki zot gagné dan l’organisation Jéhovah ek mem commence critik tou kitsoz ki zot pa content. Ou-soit, zot pa trop d’accord avek bann conseil Biblik ki zot gagné en rapport avek bann divertissement, fason pou servi Internet, ek bann longue letid.

13. Kifer li bon ki nou analyse-nou-mem dan enn fason honnete?

¹³ Si nou pa envie contigne faire pareil couma sa le monde-la, nou bizin analyse nou l’attitude ek nou bann sentiment profond, nou bann l’objectif ek bann principe moral ki nou ena, ek faire sa dan enn fason honnete. Kitfois bann dimoune pa koné ki nou été au fond nou-mem. Li possible ki certain dire nou ki nou pé bien faire. Selman, c’est nou tousel ki koné si nou finn laisse seki nou finn aprann dan la Bible transforme nou ek si nou pé contigne faire sa.​—Lire Jacques 1:23-25.

14. Ki kapav aide nou pou koné ki changement nou bizin faire?

¹⁴ Pou nou kapav transforme-nou, nou bizin change seki ena dan nou leker setadir, seki nou été vrai-mem. Ki kapav aide nou pou faire sa changement-la? Kan nou etudié la Bible, nou aprann ki qualité dimoune Jéhovah envie nou vini. Fason ki nou reagir ar seki nou lire, montré seki ena vrai-mem dan nou leker ek ki bann changement nou bizin faire pou nou vive en accord avek ‘volonté Bondié, ki parfait.’​—Rom. 12:2; Héb. 4:12.

15. Kan Jéhovah forme nou, ki qualité transformation nou faire?

¹⁵ Lire Isaïe 64:8. L’exemple ki prophete Isaïe ti servi enseigne nou enn leson important. Nou pareil couma l’argile ek Jéhovah, nou Grand Potier, forme nou. Couma Li faire sa? Bien sur, Li pa change nou lor plan physik pou faire nou parette pli joli. Mais Jéhovah forme nou lor plan spirituel. Si nou laisse Li faire sa, nou pou transforme seki nou été au fond nou-mem, setadir, nou pou change nou l’attitude ek nou fason pensé. C’est exactement seki nou bizin pou resisté kont bann l’influence ki ena dan le monde. Couma Jéhovah forme nou?

16, 17. (a) Ki enn potier faire avek l’argile ki li servi pou faire bann bon recipient? (b) Couma Parole Bondié aide nou pou vinn bann recipient ki ena valeur pou Jéhovah?

¹⁶ Pou ki enn potier kapav faire bann bon recipient, li bizin servi enn bon qualité l’argile. Selman, ena deux kitsoz ki li bizin faire. Premierement, li bizin lave sa l’argile-la pou tire tou bann saleté. Apré, li bizin melange sa l’argile-la avek quantité de l’eau ki bizin, pou ki li contigne garde so forme kan li travail ar li.

¹⁷ Remarké ki enn potier servi de l’eau pou tire tou bann saleté ki ena dan l’argile-la, ek aussi pou faire li vinn fasil pou travail. Lerla li kapav faire n’importe ki qualité recipient ki li envie, mem bann recipient fragile. Eski nou trouvé couma Parole Bondié aussi kapav faire mem travail dan nou lavi? Sa kapav change fason pensé ki nou ti ena avant, kan nou ti dan le monde ek transforme-nou pou nou ena mem fason pensé ki Bondié. Lerla, nou pou vinn bann recipient ki  ena valeur pou Li. (Éph. 5:26) Reflechi comié fois finn encourage nou pou lire la Bible toulé-jour ek pou assisté reunion regulierement kot nou examine Parole Bondié. Kifer nou gagne l’encouragement pou faire sa bann kitsoz-la? Parski kan nou faire sa, nou pé laisse Jéhovah forme nou.​—Ps. 1:2; Actes 17:11; Héb. 10:24, 25.

18. (a) Kifer li bien important ki nou medité si nou envie ki Parole Bondié influence nou ek transforme nou? (b) Ki bann question kapav aide nou?

¹⁸ Pou ki Parole Bondié transforme nou, nou bizin faire plis ki zis lire ek etudié la Bible regulierement. Beaucoup dimoune de temps en temps lire la Bible ek zot koné ki ena ladan. Kitfois ou finn zwenn sa qualité dimoune-la dan predication. Certain kapav mem recite bann passage la Bible par coeur. a Pourtant, li possible ki sa pena enn grand l’effet lor zot fason pensé ek lor zot lavi. Ki zot manké? Pou ki Parole Bondié influence enn dimoune ek transforme li, li bizin laisse sa touche so leker. Pou li kapav faire sa, li bizin medite lor seki li aprann dan la Bible. (Gal. 6:6, note) Alors, nou bizin prend le temps pou reflechi lor seki nou pé aprann. Li bon ki nou demann-nou-mem: ‘Eski mo sur ki seki mo pé aprann, li plis ki enn simple l’enseignement religieux? Eski mo sur ki c’est la verité? En plis, eski mo trouvé couma mo kapav applik seki mo pé aprann dan mo prop lavi? Ou-soit eski mo considere sa zis couma enn kitsoz ki mo kapav servi pou enseigne lezot? Eski mo ena sentiment ki Jéhovah pé koz avek moi personnellement?’ Si nou reflechi ek medite lor sa bann question-la, sa kapav aide nou pou vinn pli proche ar Jéhovah. Nou lamour pou Li pou grandi. Kan nou leker touché coumsa, sa pou pousse nou pou faire bann changement.​—Prov. 4:23; Luc 6:45.

19, 20. Ki conseil Biblik kapav faire nou gagne bann bienfait?

¹⁹ Si nou lire Parole Bondié ek nou medite lor la, sa pou aide nou faire seki Paul ti dire: “Tire vié personnalité lor zot ensam avek so bann pratik, ek mette nouveau personnalité, ki grace a connaissance exact pé contigne renouvelé.” (Col. 3:9, 10) Oui, si nou comprend seki la Bible enseigné ek nou mette en pratik seki nou aprann, sa pou pousse nou pou mette nouveau personnalité lor nou ek pou protege nou kont bann piege Satan.

²⁰ L’apotre Pierre donne nou sa rappel-la: “Pareil couma bann zenfant ki obeir, arrete suive bann desir ki zot ti ena avant,” mais “vinn saint zot aussi dan tou zot conduite.” (1 Pierre 1:14, 15) Si nou faire tou seki nou kapav pou rejette fason pensé ek l’attitude ki nou ti ena avant ek nou transforme-nou, Jéhovah pou beni nou. C’est seki nou pou examiné dan prochain lartik.