1. (a) Couma bann dimoune reagir kan zot gagne bann rappel, ek kifer? (b) Couma enn dimoune ki ena l’orgueil reagir kan li gagne conseil?

 BANN dimoune reagir dan diferan fason ar bann conseil ki zot gagné. Li possible ki li pli fasil pou accepté enn conseil ki enn dimoune ki ena l’autorité donne nou. Mais kitfois nou rejette conseil enn camarade ou-soit enn dimoune ki ena moins l’autorité ki nou. Kan certain gagne enn discipline ou-soit enn conseil, kitfois zot senti-zot triste, deprimé ou-soit embarrassé. Mais li possible ki ena lezot ki reagir bien ek envie ameliore zot. Kifer ena sa difference-la? Enn raison c’est l’orgueil. Oui, kan enn dimoune ena l’orgueil, li pensé ki conseil-la pa applik ar li, li rejette sa ek lerla li pa gagne okenn bienfait.​—Prov. 16:18.

2. Kifer bann vrai Chretien apprecié bann conseil ki sorti dan Parole Bondié?

² Mais bann vrai Chretien apprecié kan zot gagne bann bon conseil, surtout kan sa bann conseil-la basé lor Parole Bondié. Bann rappel Jéhovah aide nou pou ena enn bon jugement. Zot enseigne nou ek aide nou pou evite bann danger couma par exemple materialisme, l’immoralité sexuel, la drogue ek boire trop beaucoup. (Prov. 20:1; 2 Cor. 7:1; 1 Thess. 4:3-5; 1 Tim. 6:6-11) En plis, kan nou obeir bann rappel Bondié, nou gagne bann bon resultat ek sa faire nou ‘leker content.’​—Is. 65:14.

3. Ki l’attitude enn psalmiste ti ena ki li bon nou imité?

³ Pou garde bann bon relation avek nou Papa ki dan le ciel, nou bizin contigne mette en pratik dan nou lavi, bann instruction ki Jéhovah donne nou. Li bon ki nou imite l’attitude enn psalmiste ki ti ecrire: “Mo finn faire to bann rappel vinn mo l’heritage pou touletan, parski zot faire mo leker content”! (Ps. 119:111) Eski nou  aussi nou content bann commandement Jéhovah, ou-soit eski parfois nou considere zot couma enn fardeau? Mem si parfois nou trouve certain conseil difisil pou accepté, fodé pa nou decouragé. Nou kapav developpe enn grand confiance dan sagesse Bondié, parski so sagesse pli grand ki pou nou! Anou examine trois fason couma nou kapav faire sa.

4. Ki kitsoz pa ti changé dan lavi David?

⁴ Le Roi David ti konn bann bon ek bann mauvais moment dan so lavi, mais enn kitsoz pa ti changé. Li ti ena enn confiance total dan so Createur. Li ti dire: “O Jéhovah, mo prié toi avek tou mo leker. Ah mo Bondié, mo finn mette mo confiance en toi.” (Ps. 25:1, 2) Ki ti aide David pou developpe enn grand confiance coumsa en Jéhovah?

5, 6. Ki Parole Bondié dire nou lor bann relation ki David ti ena avek Jéhovah?

⁵ Zordi, beaucoup dimoune prié Bondié zis kan zot ena enn grand probleme. Ki ou pou pensé si enn camarade ou-soit enn famille vinn guette ou zis kan li bizin kass ou-soit ou service? Avek le temps, kitfois ou pou pose-ou bann question lor so mobile. Mais David pa ti coumsa. Bann bon relation ki li ti ena avek Jéhovah ti montré la foi ek lamour ki li ti ena pou so Bondié pendant tou so lavi​—dan bann bon ek bann mauvais moment.​—Ps. 40:8.

⁶ Remarké couma David ti loué Jéhovah ek ti remercié Li: “O Jéhovah nou Seigneur, to nom vrai-mem bien grand partout lor later, dan bann place pli haute ki le ciel, pé raconte to dignité!” (Ps. 8:1) Eski ou kapav trouvé ki quantité David ti proche avek so Papa ki dan le ciel? David ti bien impressionné ar grandeur ek la gloire Bondié ek sa ti pousse li pou loué Jéhovah “toute longue la journée.”​—Ps. 35:28.

7. Ki bann bienfait nou gagné kan nou vinn proche ar Bondié par la priere?

⁷ Pareil couma David, nou aussi nou bizin koz ar Jéhovah regulierement pou nou kapav ena plis confiance en Li. La Bible dire: “Vinn proche ar Bondié, ek Li pou vinn proche ar zot.” (Jacq. 4:8) Kan nou prié Jéhovah sa faire nou vinn proche ar Li ek c’est aussi enn fason important pou nou kapav gagne so l’esprit saint.​—Lire 1 Jean 3:22.

8. Kifer fodé pa nou dire mem kitsoz chaque fois kan nou prié?

⁸ Kan ou prié, eski ou ena tendance pou repete mem phrase ou-soit servi mem mot touletan? Si oui, avant ou faire la priere, prend inpé le temps pou reflechi lor seki ou envie dire. Par exemple, si nou dire touletan mem kitsoz ar enn camarade ou-soit enn famille chaque fois ki nou koz ar li, eski li pou content? Kitfois li pou nepli ecoute nou. Bien sur, Jéhovah jamais pa pou rejette la priere sincere ki enn serviteur fidele faire. Mais li bon ki nou evite dire touletan mem kitsoz chaque fois kan nou prié Li.

9, 10. (a) Ki nou kapav dire dan nou la priere? (b) Ki kapav aide nou pou faire bann la priere profond?

⁹ Bien sur, si nou envie vinn proche ar Bondié, fodé pa ki nou faire bann la priere en-l’air-en-l’air. Plis nou devide nou leker ar Jéhovah, plis nou pou vinn proche ar Li ek lerla nou pou ena plis confiance en Li. Alors, ki nou bizin dire dan nou la priere? Parole Bondié reponn: “Dan tou kitsoz, par la priere ek supplication avek bann remerciement, demann Bondié seki zot bizin.” (Phil. 4:6) En realité, ou kapav prié pou tou kitsoz ki ena enn rapport avek ou bann relation avek Bondié ou-soit ki affecté ou lavi.

¹⁰ Dan la Bible, nou kapav aprann beaucoup ar la priere ki bann zom ek bann femme fidele ti faire. (1 Sam. 1:10, 11; Actes 4:24-31) Dan bann Psaume, ena  beaucoup la priere sincere ki bann dimoune ti faire ek bann cantik ki zot ti chanté pou Jéhovah. Dan sa bann Psaume-la, ena toute sorte qualité sentiment, couma par exemple l’angoisse, enn grand la joie ek lezot sentiment ankor. Si nou examine bann sentiment ki bann serviteur fidele Jéhovah finn dire dan sa bann la priere-la, sa kapav aide nou pou faire bann la priere pli profond.

11. Kifer nou bizin medite lor bann conseil Biblik?

¹¹ David ti dire: “Nou kapav ena confiance dan rappel Jéhovah, li faire enn dimoune ki pena l’experience gagne la sagesse.” (Ps. 19:7) Oui, mem si nou pena l’experience, nou kapav vinn sage kan nou obeir bann commandement Bondié. Selman, ena certain conseil Biblik lor ki nou bizin medité pou nou kapav gagne bann bienfait. Par exemple, bann conseil ki ena enn rapport avek nou fidelité kan nou gagne bann pression dan lekol ou-soit dan travail, ek concernant nou l’obeissance ar la loi Bondié lor di-sang. Ena aussi bann conseil pou reste separé ar politik, ek pou applik bann principe Biblik en rapport avek nou l’habillement ek nou coiffure. Si nou ena mem fason pensé ki Bondié dan sa bann domaine-la, nou pou prepare-nou a l’avance ek nou pou koné ki pou faire kan bann probleme arrivé. Si nou faire sa, nou pou evite faire bann erreur ki pou faire nou souffert.​—Prov. 15:28.

12. Ki bann question kapav aide nou pou garde bann rappel Bondié?

¹² Pendant ki nou pé attann ki bann promesse Bondié realisé, eski nou pé montré par fason nou vive ki nou pé reste lor nou garde lor plan spirituel? Par exemple, eski nou vrai-mem croire ki bientot Babylone la Grande pou detruire? Eski bann benediction couma par exemple, lavi eternel dan Paradis lor later ankor réel pou nou pareil couma sa ti été kan nou ti tann zot premier fois? Eski nou ankor zelé dan predication ou-soit nou pé mette bann kitsoz personnel en premier dan nou lavi? Eski l’esperance resurrection ankor ena valeur pou nou? Eski li toujours important pou nou ki nom Jéhovah sanctifié ek ki so droit pou gouverné justifié? Kan nou medite lor sa bann question-la, sa kapav aide nou pou faire seki sa psalmiste-la ti dire, setadir pou faire bann ‘rappel Bondié vinn nou l’heritage pou touletan.’​—Ps. 119:111.

13. Kifer bann Chretien dan premier siecle ti trouve certain kitsoz difisil pou comprend? Donne enn l’exemple.

¹³ Li possible ki zordi, nou pa bien comprend certain kitsoz ki mentionné dan la Bible parski pankor arrive ler pou ki Jéhovah donne nou bann eclaircissement lor la. Plusieurs fois, Jésus ti dire so bann zapotre ki li ti pou souffert ek mor. (Lire Matthieu 12:40; 16:21.) Mais zot pa ti comprend seki li ti pé rod dire. Zot ti bien comprend sa apré so lamor ek so resurrection kan li ti apparette ar zot. Lerla, li ti “ouvert zot l’esprit pou ki zot comprend signification bann l’Ecriture.” (Luc 24:44-46; Actes 1:3) Li ti pareil aussi pou bann Chretien dan premier siecle. C’est selman kan zot ti gagne l’esprit saint jour la Pentecôte l’an 33 Nou Lepok ki zot ti comprend ki Royaume Bondié ti pou etabli dan le ciel.​—Actes 1:6-8.

14. Ki bon l’exemple beaucoup frere inn laissé dan commencement 20^eme siecle, mem si zot ti ena bann fausse l’espoir concernant bann dernier jour?

¹⁴ Dan commencement 20^eme siecle aussi, bann vrai Chretien ti ena bann fausse l’espoir concernant seki ti pou arrivé dan “bann dernier jour.” (2 Tim. 3:1) Par exemple, en 1914, certain ti pensé ki zot ti pou al dan le ciel. Kan zot l’espoir pa finn realisé desuite, zot ti ré-examine bann l’Écritures ek zot ti trouvé ki ti ena enn  grand travail predication ki zot ti pou bizin faire avant. (Marc 13:10) Alors, en 1922, Joseph Rutherford, ki ti dirige l’activité predication sa lepok-la, ti dire dan l’assemblée international ki ti faire dan Cedar Point, Ohio en Amérique: “Prend compte, le Roi pé regné! Zot so bann messager. Alors, proclame, proclame, proclame le Roi ek so Royaume.” Depuis sa lepok-la ziska zordi, beaucoup dimoune konn bann serviteur Jéhovah parski zot preche “la bonne nouvelle lor royaume” Bondié.​—Mat. 4:23; 24:14.

15. Ki bienfait nou gagné kan nou medite lor fason ki Bondié inn agir avek so peuple?

¹⁵ Li bon ki nou medite lor fason extraordinaire ki Jéhovah inn agir avek so peuple dan le passé ek dan nou lepok. Sa aide nou pou ena plis confiance dan capacité ki Jéhovah ena pou realise so projet dan lavenir. En mem temps, kan nou medite lor bann rappel Bondié, sa aide nou pou ena confiance dan bann prophetie ki pankor realisé.

16. Ki bienfait nou gagné kan nou reste actif dan nou ministere?

¹⁶ Nou Bondié Jéhovah, Li enn Bondié bien actif. Enn psalmiste ti demandé: “Kisannla ki fort couma toi, O Yah? To la main fort, to la main droite levé bien haute.” (Ps. 89:8, 13) Jéhovah, Li enn Bondié actif, alors Li content kan nou faire tou seki nou kapav dan so service, ek Li beni nou. Li veillé ki so bann serviteur​—bann zom ou-soit bann femme, jeune ou-soit vié​—pa assizé ek mange “di-pain la paresse.” (Prov. 31:27) Pareil couma nou Createur, nou reste bien occupé dan bann activité theocratik. Kan nou servi Bondié avek tou nou leker, nou gagne bann bienfait. Sa faire Jéhovah plaisir ek Li beni nou ministere.​—Lire Psaume 62:12.

17, 18. Kifer nou kapav dire ki nou bann action dan service Bondié aide nou pou ena plis confiance dan so direction? Donne enn l’exemple.

 ¹⁷ Dan ki fason nou bann action dan service Bondié aide nou pou ena plis confiance en Jéhovah? Reflechi lor seki ti arrivé kan bann Israélite ti pé rente dan Later Promise. Jéhovah ti donne l’ordre bann pretre ki ti sarié l’arche l’alliance pou traverse la Riviere Jourdain. Selman, kan le peuple ti arrive pré ar la riviere, zot ti trouvé ki de l’eau ti bien haute ek ti ena enn courant bien fort a cause gros la pluie ki ti tombé sa saison-la. Ki bann Israélite ti pou faire? Eski zot ti pou etabli zot camp dan bord la riviere ek attann plusieurs semaine ou-soit pli longtemps, pou ki la riviere-la baissé? Non, zot ti mette tou zot confiance en Jéhovah ek zot ti suive so bann instruction. Resultat? La Bible dire: “Couma lipié bann pretre ti touche de l’eau, la riviere ti arrete coulé, . . . ek bann pretre ti deboute au milieu la riviere ki ti’nn sec, pré ar Jéricho, pendant ki tou dimoune ti traversé.” (Jos. 3:12-17, Contemporary English Version) Maziné couma bann Israélite ti content kan zot ti trouve sa gros la riviere-la arrete enn sel coup! Oui, la foi bann Israélite ti vinn pli fort parski zot ti ena confiance dan bann instruction ki Jéhovah ti donne zot.

¹⁸ Li vrai ki zordi Jéhovah pa faire bann mirak coumsa pou so peuple, mais Li beni bann action ki nou faire dan so service. L’esprit saint donne nou la force pou contigne preche Royaume Bondié partout dan le monde. Apré so resurrection, Jésus Christ, pli grand Témoin Jéhovah, ti donne so bann disciple l’assurance ki li pou soutenir zot dan sa travail important-la. Li ti dire zot: “Alors, allé ek faire bann disciple parmi bann dimoune dan tou bann nation . . . Mo avek zot toulé-jour ziska lafin sa systeme-la.” (Mat. 28:19, 20) Beaucoup Témoins, ki kitfois ti timide, kapav dire personnellement couma l’esprit saint finn donne zot courage pou koz avek bann dimoune ki zot pa ti koné dan predication.​—Lire Psaume 119:46; 2 Corinthiens 4:7.

19. Ki l’assurance nou ena, mem si nou pa kapav faire beaucoup dan service Jéhovah?

¹⁹ Certain frere ek soeur pa kapav faire beaucoup dan service Bondié parski zot malade ou-soit zot agé. Pourtant, zot kapav sur ki Jéhovah, “Papa ki ena beaucoup misericorde ek Bondié ki donne tou consolation” comprend zot situation. (2 Cor. 1:3) Li apprecié tou seki nou faire dan so service. Nou tou, nou bizin rappel ki c’est surtout grace a nou la foi dan sacrifice Christ ki nou pou kapav gagne lavi sauve.​—Héb. 10:39.

20, 21. Couma nou kapav montré ki nou ena confiance en Jéhovah?

²⁰ Nou l’adoration implik ki nou servi nou le temps, nou la force, ek nou bann kitsoz materiel autant ki possible dan service Bondié. Oui, nou envie “faire travail enn evangelisateur” avek tou nou leker. (2 Tim. 4:5) En realité, nou bien content pou faire sa, parski sa aide lezot pou “gagne enn connaissance exact lor la verité.” (1 Tim. 2:4) Li clair ki, kan nou honore ek nou loué Jéhovah, sa faire nou gagne bann benediction lor plan spirituel. (Prov. 10:22) Ek sa aide nou pou ena enn grand confiance dan nou Createur, n’importe ki arrivé.​—Rom. 8:35-39.

²¹ Pareil couma nou finn examiné, li pa automatik ki nou ena confiance dan direction ki Jéhovah donne nou; nou bizin faire zeffort pou gagne sa confiance-la. Alors, a travers la priere, faire tou seki ou kapav pou ena confiance en Jéhovah. Medite lor fason ki Jéhovah finn realise so bann promesse dan le passé, ek couma Li pou faire pareil dan lavenir. Ek contigne ena plis confiance en Jéhovah par bann action ki ou faire dan so service. Pa blié ki bann rappel Jéhovah pou duré pou touletan, ek si ou obeir zot, ou pou kapav vive pou touletan ou aussi!