1, 2. Eski ou content prend bann decision, ek ki ou pensé lor certain decision ki ou finn prend?

 DECISION! Toulé-jour nou bizin prend beaucoup decision. Eski ou content prend bann decision? Certain dimoune bien content prend zot prop decision. Zot pensé ki zot ena droit prend tou decision dan zot lavi, ek zot pa content ki enn lot dimoune decide pou zot. Parkont, ena certain ki peur pou prend bann decision important. Certain rod conseil dan bann livre ou-soit avek bann conseiller ek kitfois zot mem depense beaucoup l’argent pou gagne bann conseil ki zot pensé zot bizin pou prend bann decision.

² Beaucoup parmi nou reconette ki ena certain decision ki nou pa gagne droit prend; selman nou content ki dan beaucoup domaine, nou kapav prend bann decision ki faire nou plaisir. (Gal. 6:5) Mais kan-mem, surement nou rann-nou compte ki pa touletan ki nou prend bann bon decision.

3. Ki instruction aide nou pou prend bann decision, mais ki difficulté nou kapav gagné?

³ En tant ki bann serviteur Jéhovah, nou content ki Li’nn donne nou bann instruction bien clair ki concerne bann domaine bien important dan nou lavi. Nou koné ki si nou suive sa bann instruction-la, nou pou prend bann decision ki pou faire Jéhovah plaisir ek ki pou faire nou gagne bann bienfait. Kan-mem, li possible ki nou bizin faire face ar bann situation ki pa mentionné dan la Bible. Lerla, ki nou pou faire? Par exemple, nou koné ki fodé pa nou kokin. (Éph. 4:28) Mais ki sa vedir vrai-mem kokin? Certain dire ki li pa toujours mauvais ki enn dimoune prend enn kitsoz ki pa pou li si sa kitsoz-la pena enn grand valeur, ou-soit si li bien bizin sa. Ki decision nou pou prend kan certain dire ki pena okenn instruction precis? Ki kapav aide nou?

4. Ki conseil parfois nou gagné avant nou prend enn decision?

⁴ Kan nou dire enn lot Chretien ki nou ena enn  decision pou prend, kitfois li kapav dire nou ki nou bizin servi nou capacité pou reflechi. Bien sur, c’est enn bon conseil. La Bible mette nou en garde pou nou pa prend bann decision trop vite, sans reflechi. Li dire: “Pena doute ki enn kikenn ki agir sans reflechi pou tombe dan la misere.” (Prov. 21:5) Ki sa vedir servi nou capacité pou reflechi? Eski sa vedir ki nou bizin zis prend nou le temps, reflechi bien, montré-nou raisonnable, ek ena enn bon jugement? Nou bizin faire tousala pou prend enn bon decision, mais capacité pou reflechi implik plis ki sa.​—Rom. 12:3; 1 Pierre 4:7.

5. Kifer nou pa kapav reflechi dan enn fason parfait?

⁵ Nou bizin reconette ki personne parmi nou pa finn né pou reflechi dan enn fason parfait. Kifer? Parski nou tou nou imparfait ek nou faire peché, nou pena enn l’esprit ek enn lekor parfait. (Ps. 51:5; Rom. 3:23) En plis, dan le passé beaucoup parmi nou ti “aveuglé” par Satan; nou pa ti konn Jéhovah, ni so bann principe. (2 Cor. 4:4; Tite 3:3) Alors, si nou prend bann decision ki basé lor zis seki nou pensé bon ek raisonnable, mem si nou finn reflechi bien avant, li kapav arrivé ki nou prend bann mauvais decision.​—Prov. 14:12.

6. Ki kapav aide nou pou developpe nou capacité pou reflechi?

⁶ Mem si nou pena enn lekor ek enn l’esprit parfait, Jéhovah, nou Papa ki dan le ciel, Li parfait dan tou domaine. (Deut. 32:4) Heureusement, Li finn donne nou seki nou bizin pou change nou fason pensé ek pou developpe nou capacité pou reflechi. (Lire 2 Timothée 1:7.) En tant ki Chretien, nou envie reflechi, raisonné ek agir dan enn bon fason. Alors, nou bizin controle nou bann pensée ek nou bann sentiment. Nou bizin aussi imite fason ki Jéhovah reflechi, agir ek ena mem sentiment ki Li.

7, 8. Raconte enn l’experience ki montré couma nou kapav prend enn bon decision malgré bann pression ou-soit bann difficulté.

⁷ Anou prend enn l’exemple. Souvent, certain dimoune ki al travail dan enn lot pays, ena l’habitude pou envoye zot ti-baba dan zot pays, pou zot parent occupe li. Lerla zot, zot kapav contigne travail pou gagne l’argent. a Enn madame ki ti al reste dan enn lot pays, ti gagne enn joli ti-garson. Sa lepok-la, li ti’nn commence etudié la Bible ek li ti’nn faire bann bon progré. So bann camarade ek so bann famille ti mette pression lor li ek lor so mari pou envoye zot ti-baba dan zot pays, kot bann grand-parent. Selman, a travers so letid, sa madame-la ti aprann ki Jéhovah finn donne li ek so mari responsabilité pou elevé zot zenfant. (Ps. 127:3; Éph. 6:4) Mem si beaucoup ti pensé ki li raisonnable pou suive sa coutume-la, eski li ti pou faire sa? Ou-soit, eski li ti pou suive seki li ti pé aprann dan la Bible, mem si li ti pou gagne moins l’argent ek ki certain ti pou critik li? Ki ou ti pou faire dan so place?

⁸ Sa madame-la ti bien stressé a cause bann pression ki li ti gagné. Li ti prié Jéhovah avek tou so leker pou gagne So direction. Li ti koz avek sa soeur ki ti faire so letid-la ek avek lezot dan congregation, ek li ti commence comprend seki Jéhovah pensé lor so situation. Li ti aussi realisé ki sa ti pou kapav affecté so ti-garson si ti separe-li ar so bann parent pendant ki li ti pé grandi. Li ti reflechi bien lor seki la Bible dire concernant so situation, ek apré li ti comprend ki li pa ti enn bon l’idée pou envoye so ti-baba dan so pays. Kan so mari ti trouvé couma  bann membre congregation ti aide zot, ek ki so ti-baba ti heureux ek ti ena enn bon la santé, li ti accepté enn letid la Bible ek ti commence assisté reunion.

9, 10. Ki sa vedir servi nou capacité pou reflechi, ek couma nou kapav faire sa?

⁹ Sa c’est zis enn l’exemple. Mais, pou nou kapav servi nou capacité pou reflechi, li pa assez ki nou zis faire seki nou, ou-soit lezot pensé raisonnable. Nou l’esprit ek nou leker zot imparfait. Nou kapav compare zot ar enn montre ki al trop vite ou-soit trop doucement. Si nou faire confiance sa montre-la, nou kapav gagne bann grand probleme. (Jér. 17:9) Pou evite gagne probleme, nou bizin laisse bann principe Bondié guide nou l’esprit ek nou leker.​—Lire Isaïe 55:8, 9.

¹⁰ La Bible ena raison pou donne nou sa conseil-la: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” (Prov. 3:5, 6) Remark sa l’expression-la, “pa fié lor to prop l’intelligence.” Zis apré, ena l’expression “prend [Jéhovah] compte.” C’est Li tousel ki ena capacité pou reflechi dan enn fason parfait. Sa vedir ki, n’importe kan nou bizin prend enn decision, nou bizin guetté ki la Bible dire pou koné seki Jéhovah pensé. Lerla nou kapav prend nou decision. C’est sa-mem ki vedir servi nou capacité pou reflechi: imite fason pensé Jéhovah.

11. Ki enn dimoune bizin faire pou prend bann bon decision?

¹¹ Li pa fasil pou prend bann bon decision ek pou faire seki nou finn decidé. Sa kapav difisil surtout pou bann ki’nn fek prend bapteme ou-soit bann ki pé faire progré asterla. Selman, li possible ki sa bann dimoune ki la Bible appel bann ti-baba-la, faire bann bon progré. Anou prend l’exemple enn zenfant ki pé aprann marché. Au commencement, plusieurs fois, li faire bann tipti pas, ziska ki li reussi marché sans tombé. Li pareil aussi pou enn dimoune ki couma enn ti-baba lor plan spirituel kan li bizin prend bann bon decision. L’apotre Paul ti decrire bann dimoune ki mur lor plan spirituel couma bann dimoune ki “a force inn  pratiké, ena bann capacité mental ki finn entrainé pou faire difference entre seki bon ek seki mauvais.” Bann l’expression “a force inn pratiké” ek “entrainé” montré ki nou bizin contigne faire bann zeffort, ek c’est sa-mem ki bann nouveau bizin faire pou prend bann bon decision.​—Lire Hébreux 5:13, 14.

12. Couma nou kapav developpe nou capacité pou prend bann bon decision?

¹² Pareil couma nou finn trouvé avant, toulé-jour nou ena beaucoup decision pou prend​—bann grand ou-soit bann ti decision. Dapré enn rapport, plis ki 40 pour cent bann decision ki nou prend, basé lor nou bann l’habitude ek pa parski nou finn bien reflechi avant. Par exemple, kitfois toulé gramatin ou bizin decidé ki linge ou pou metté. Li possible ki ou considere sa couma enn kitsoz banal ek ou pa reflechi beaucoup avant ou decidé, surtout si ou pressé. Mais li important ki ou reflechi si ou l’habillement pou montré ki ou enn serviteur Jéhovah. (2 Cor. 6:3, 4) Kan ou al acheté enn linge, kitfois ou pense lor bann dernier la mode, mais eski ou reflechi si linge-la li convenable pou enn Chretien ek si ou ena assez kass pou acheté li? Si ou faire bann bon choix, sa pou aide ou pou entraine ou bann capacité mental ek ou pou prend bann bon decision dan bann domaine beaucoup pli important.​—Luc 16:10; 1 Cor. 10:31.

13. Ki pou aide nou faire bann kitsoz ki nou finn decidé?

¹³ Nou tou koné ki ena enn grand difference entre prend enn bon decision ek faire seki nou finn decidé. Par exemple, certain ki envie arrete fumé, pa reussi, parski zot pena assez volonté. Alors, li important ki nou bien determiné pou faire seki nou finn decidé. Certain pensé ki determination ki nou ena dan nou leker, li pareil couma enn muscle. Plis nou servi li, plis li vinn fort. Si nou pa servi li souvent, li pou affaibli. Alors, ki kapav aide nou pou faire sa volonté ki nou ena-la vinn pli fort ek pou faire seki nou finn decidé? Nou bizin compte lor Jéhovah pou aide nou.​—Lire Philippiens 2:13.

14. Kifer Paul ti ena la force pou faire seki li ti koné li bizin faire?

¹⁴ Par experience, Paul ti koné ki li pa ti toujours fasil pou li faire seki droite. Li ti dire avek regret: “Mo envie faire seki bon, mais mo pa kapav faire li.” Li ti koné seki li ti envie ek seki li ti bizin faire, mais parfois enn kitsoz ti empeche li faire sa. Li ti reconette: “Dan mo leker, mo vrai-mem content la loi Bondié, mais, mo trouve enn lot la loi dan mo bann membre ki pé faire la guerre kont la loi mo l’esprit, ek ki pé faire moi vinn esclave la loi peché ki dan mo bann membre.” Eski so situation ti desesperé? Non! Li ti dire: “Mo remercié Bondié, par Jésus Christ nou Seigneur!” (Rom. 7:18, 22-25) Li ti ecrire aussi: “Pou tou kitsoz mo ena courage grace a celui ki donne moi la force.”​—Phil. 4:13.

15. Kifer nou bizin bien decidé pou faire seki droite?

¹⁵ Alors, li clair ki pou faire Bondié plaisir, nou bizin bien determiné pou faire seki nou finn decidé. Rappel seki Éliya ti dire lor Montagne Carmel kan li ti koz avek bann adorateur Baal ek bann Israélite ki ti infidele: “Ziska kan zot pou hesité entre deux l’opinion diferan? Si Jéhovah Li-mem vrai Bondié, suive Li; mais si c’est Baal, alors suive Baal.” (1 Rois 18:21) Bann Israélite ti koné ki zot ti bizin faire, mais zot ti “hesité” pou prend enn decision. Josué ti bien diferan. Plusieurs l’année avant, li ti laisse enn bon l’exemple kan li ti dire bann Israélite: “Si zot trouvé ki li pa bon ki zot  servi Jéhovah, choisir pou zot-mem zordi kisannla zot pou servi . . . Mais, moi ek mo famille, nou pou servi Jéhovah.” (Jos. 24:15) Ki benediction Josué ek bann dimoune ki ti fidele avek li ti gagné? Jéhovah ti laisse zot rente dan Later Promise, “enn pays kot di-lait ek di-miel coulé.”​—Jos. 5:6.

16, 17. Raconte enn l’experience ki montré bann bienfait ki nou gagné kan nou prend bann decision ki en accord avek volonté Bondié.

¹⁶ Anou prend enn l’exemple dan nou lepok. Enn frere ti fek prend bapteme. Li ti marié ek li ti ena trois zenfant. Li ti ena enn travail ki pa ti paye beaucoup mais li ti choisir sa parski li pa ti bizin travail dan week-end. Sa ti permette li assisté bann reunion ek sorti predication avek so famille. Enn jour, so camarade travail ti propose li pou ki zot toulé-deux quitte travail ek al dan enn lot compagnie kot zot ti pou gagne plis kass ek bann lezot l’avantage. Nou frere ti bien reflechi ek ti prié Jéhovah lor la. Li ti koné ki si li prend sa nouveau travail-la, kitfois li pa ti pou libre dan week-end, au moins pendant enn certain temps. Ki ou ti pou faire dan so place?

¹⁷ Frere-la ti reflechi couma so decision ti pou affecté so bann relation avek Jéhovah. Alors, li pa ti accepté sa nouveau travail-la. Eski ou pensé ki plitar li ti regretté? Non! Parski pou li, seki ti pli important, seki li ek so famille gagne bann benediction spirituel au lieu ki gagne plis kass. Li ek so madame ti extra content kan so pli grand tifi, ki ti ena dix an, ti dire zot ki li bien content so bann parent, bann frere ek soeur ek Jéhovah. Li ti dire zot ki li ti envie voué so lavi ar Jéhovah ek prend bapteme. Pena doute li ti bien apprecié l’exemple so papa ki finn mette l’adoration Jéhovah en premier dan so lavi!

18. Kifer li important ki nou prend bann bon decision toulé-jour?

¹⁸ Pareil couma Moïse ti dirige bann Israélite a travers enn desert, pendant plusieurs siecle, Jésus Christ inn dirige bann adorateur Jéhovah a travers le monde Satan. Bientot sa le monde-la pou detruire. Pareil couma Josué ti faire bann Israélite rente dan Later Promise, Jésus pou faire so bann disciple rente dan le monde nouveau kot pou ena la justice. (2 Pierre 3:13) Alors, pa’nn ler pou nou retourne ar fason ki nou ti pensé longtemps, nou bann vié l’habitude, valeur moral, ek bann projet ki nou ti ena. Inn plutot ler pou nou comprend pli bien couma Bondié envie nou vive. (Rom. 12:2; 2 Cor. 13:5) Anou prend bann bon decision ek faire bann bon choix toulé-jour pou montré ki nou digne pou gagne benediction Jéhovah pou touletan.​—Lire Hébreux 10:38, 39.