1, 2. (a) Ki ti arive kan enn berze ti pran bien swin so bann mouton? (b) Kifer boukou dimounn dan lepok Jésus ti kouma bann mouton ki pena berze?

 KAN enn berze okip bien so troupo, so bann mouton devlop bien. Dapre enn liv lor fason pou elve bann mouton, “enn misie ki zis les so bann mouton al manze dan karo ek pa pran zot kont, ena enn gran risk ki, dan de-trwa lane, boukou parmi so bann zanimo pou tom malad ek li pa pou tir okenn profi ar zot.” Parkont, kan enn berze pran swin so troupo, so bann zanimo vinn for ek ena enn bon lasante.

² Fason ki bann ansien pran swin ek interes zot ar sak brebi ki Bondie inn konfie zot, ena enn lefe lor lasante spiritiel zot tou dan kongregasion. Sirman ou rapel ki Jésus ti ena pitie pou bann lafoul parski zot “ti gagn maltrete ek zot ti santi zot perdi parey kouma bann mouton ki pena berze.” (Mat. 9:36) Kifer zot ti dan enn move kondision koumsa? Parski bann ki ti ena responsabilite pou ansegn Lalwa Bondie, ti bien brit, exizan, ek ipokrit. Olie ki zot ti ed bann manb zot troupo ek nouri zot, bann sef spiritiel nasion Israël ti met “bann lasarz ki lour” lor zot zepol.​—Mat. 23:4.

3. Ki bann ansien dan kongregasion bizin rapel kan zot okip bann brebi?

³ Dan nou lepok osi, bann ansien ena enn gran responsabilite. Jéhovah ek Jésus, zot proprieter bann brebi ki bann ansien okipe. Jésus limem li “exselan berze.” (Jean 10:11) Jésus finn “aste [bann brebi] pou enn pri” ki li’nn peye avek so “disan ki ena [enn] gran valer.” (1 Cor. 6:20; 1 Pierre 1:18, 19) Li telman kontan so bann brebi ki li’nn donn so lavi an sakrifis pou zot. Bann ansien bizin touzour rapel ki zot bann berze ki anba lotorite enn pli gran berze. Zot sef se Jésus Christ, Garson Bondie, “gran berze bann brebi.”​—Héb. 13:20.

4. Ki nou pou examine dan sa lartik-la?

 ⁴ Alor, kouma bann ansien bizin tret bann brebi dan kongregasion? Labib ankouraz bann manb kongregasion pou “obeir bann ki pe diriz zot.” Me, Labib dir osi ki fode pa ki bann ansien “dominn lor leritaz Bondie.” (Héb. 13:17; lir 1 Pierre 5:2, 3.) Alor, kouma bann ansien kapav diriz troupo Bondie san fer dominer? Kouma bann ansien kapav pran swin bann brebi san abiz lotorite ki Bondie inn donn zot?

5. Ki nou aprann lor Jéhovah dan lexanp ki ena dan Isaïe 40:11?

⁵ Profet Isaïe ti dir konsernan Jéhovah: “Parey kouma enn berze, Li pou pran swin so troupo. Avek so lebra, Li pou rasanble so bann ti mouton; ek Li pou sarye zot lor so lestoma. Avek prekosion, Li pou gid bann mouton ki ankor donn zot tipti bwar.” (Is. 40:11) Sa lexanp-la montre ki Jéhovah pran kont bann manb ki feb ek frazil dan kongregasion. Enn bon berze kone seki sak brebi dan so troupo bizin, ek li pre pou ed li. Jéhovah osi konn bien seki bann manb kongregasion bizin ek Li kontan pou donn zot seki neseser. Parey kouma enn berze sarye enn ti mouton ki’nn fek ne dan pli so linz, kan neseser, Jéhovah​—“Papa ki ena boukou mizerikord”​—pou sarye nou kan nou pe pas par bann moman difisil. Li pou rekonfort nou kan nou gagn enn gran leprev, ouswa kan nou dan enn sitiasion bien difisil.​—2 Cor. 1:3, 4.

6. Kouma enn ansien kapav imit Jéhovah?

⁶ Se vremem enn gran leson ki enn berze spiritiel kapav aprann ar nou Papa ki dan lesiel! Parey kouma Jéhovah, li bizin pran kont seki bann brebi bizin. Kan enn ansien kone ki bann difikilte zot pe gagne ek ki led presi zot bizin, li pou kapav donn lankourazman neseser ek soutenir zot. (Prov. 27:23) Alor, li kler ki enn ansien bizin ena enn bon kominikasion avek so bann frer ek ser. Li pou interes li ar seki li trouve ek seki li tande dan kongregasion. Avek amour li pou pran letan pou “ed bann feb,” me selman li pou fer bien atansion pou respekte zot lavi prive.​—Actes 20:35; 1 Thess. 4:11.

7. (a) Kouma bann berze ti pe tret bann brebi Bondie dan lepok Ézékiel ek Jérémie? (b) Jéhovah ti kondann bann berze spiritiel ki pa ti fidel, ki leson nou kapav tire ar seki ti arive?

⁷ Reflesi lor latitid bann berze ki Bondie ti kondane dan lepase. Dan lepok Ézékiel ek Jérémie, Jéhovah ti denons bann berze spiritiel ki ti bizin pran swin so bann brebi me pa ti pe fer zot travay kouma bizin. Kan personn pa ti pe vey sa bann brebi-la, bann zanimo sovaz ti atak zot ek zot ti disperse partou. Olie ki bann berze ti pe nouri bann brebi, zot ti pe “nouri zotmem,” ek zot ti pe explwat sa bann brebi-la. (Ézék. 34:7-10; Jér. 23:1) Bondie ti kondann zot ek zordi osi, Bondie inn rezet bann sef la Chrétienté. Me sa montre osi ki kantite li inportan ki bann ansien pran swin troupo Jéhovah ek donn zot latansion ki bizin.

8. Kouma bann ansien kapav imit Jésus kan zot konsey zot bann frer?

⁸ Akoz linperfeksion, sertin dan kongregasion kitfwa pran letan pou konpran seki Jéhovah demann zot pou fer. Kitfwa zot pran bann desizion ki pa baze lor bann prinsip Labib, ouswa zot azir dan enn fason ki montre ki zot pankor vinn bann Kretien mir. Kouma bann ansien bizin reazir? Zot bizin  imit pasians ki Jésus ti ena avek so bann disip. Souvan so bann disip ti diskite pou kone kisannla ki pou pli gran dan so Rwayom. Olie ki li ti perdi pasians, Jésus ti kontign ansegn zot ek avek amour, li ti donn zot bann konsey pou zot manifeste limilite. (Luc 9:46-48; 22:24-27) Kan Jésus ti lav zot lipie, li ti montre zot ki sa vedir vremem ena limilite. Zordi, bann ansien osi bizin manifeste limilite.​—Lir Jean 13:12-15; 1 Pierre 2:21.

9. Ki latitid Jésus ti ankouraz so bann disip pou ena?

⁹ Jacques ek Jean, bann zapot Jésus, pa ti ena mem fason panse ki Jésus lor rol ki enn berze spiritiel ena. Zot ti demann Jésus pou zot gagn enn gran pozision dan so Rwayom. Me Jésus ti koriz zot latitid ek ti dir zot: “Zot kone ki bann dirizan lezot nasion kontan donn lord zot bann pep. Ek ki bann gran sef ena enn gran pouvwar lor sak dimounn ki zot dirize. Me pa fer parey kouma zot. Si zot anvi vinn gran, zot bizin vinn bann serviter pou lezot.” (Mat. 20:25, 26, Contemporary English Version) Bann zapot ti bizin rezet tandans pou fer dominer ar zot konpagnon, ouswa pou ‘donn zot lord.’

10. Kouma Jésus anvi ki bann ansien tret troupo Bondie, ek ki lexanp Paul inn lese dan sa domenn-la?

¹⁰ Jésus atann ki bann ansien imit li dan fason ki zot tret troupo Bondie. Zot bizin dispoze pou servi bann frer ek ser, pa pou fer sef lor zot. Lapot Paul ti ena sa limilite-la, parski li ti dir bann ansien dan kongregasion Éphèse: “Zot konn bien kouma, depi premie zour ki mo ti met lipie dan distrik l’Asie, mo ti avek zot touletan, mo ti travay kouma enn esklav pou Lesegner, avek enn gran limilite.” Lapot Paul ti anvi ki sa bann ansien-la travay dir pou zot bann frer ek ed zot avek limilite. Li ti dir: “Mo finn montre zot dan tou kitsoz ki kan zot pe donn lapenn koumsa ki zot bizin ed bann feb.” (Actes 20:18, 19, 35) Paul ti dir bann Korintien ki li pa ti pe dominn lor zot lafwa. Okontrer, avek limilite li ti travay ansam avek zot pou ki zot ena lazwa. (2 Cor. 1:24) Paul ti manifeste limilite ek li ti travay dir pou so bann frer. Zordi, li bon ki bann ansien imit so lexanp.

11, 12. Kouma enn ansien kapav ed enn frer pou pran enn desizion?

¹¹ Kan enn ansien donn konsey, li bizin touletan apiy li lor Labib, “parol ki fidel.” (Tite 1:9) Me li bizin fer sa “avek douser.” (Gal. 6:1) Enn ansien pa pou fors so bann frer pou azir dan enn sertin fason. Okontrer, enn bon berze pou reflesi kouma li kapav tous zot leker. Li pou ed zot pou pran zot prop desizion ki baze lor lamour ki zot ena pou Jéhovah ek pou So Parol. Par exanp, enn ansien kapav ed enn frer pou reflesi lor bann prinsip Biblik avan li pran enn desizion inportan. Li kapav reget avek li enn lartik dan nou bann piblikasion. Li kapav osi ankouraz sa frer-la pou reflesi lor lefe ki so desizion pou ena lor so bann relasion avek Jéhovah. Ansien-la kapav rapel frer-la linportans pou rod direksion Jéhovah dan lapriyer avan li pran so desizion. (Prov. 3:5, 6) Apre ki ansien-la inn fini examinn tousala avek li, li pou les frer-la pran so prop desizion.​—Rom. 14:1-4.

¹² Se Labib ki donn lotorite bann ansien pou konsey zot bann frer. Alor, li bien inportan ki zot servi Labib dan enn fason efikas ek touletan baz zot  konsey lor Labib. Kan bann ansien fer sa, zot pa pou abiz lotorite ki Bondie inn donn zot. Apre tou, zot zis bann berze ki anba lotorite enn pli gran berze, ek sak manb kongregasion pou rann kont Jéhovah ek Jésus pou bann desizion ki li pran.​—Gal. 6:5, 7, 8.

13, 14. Dan ki domenn enn ansien bizin donn enn bon lexanp troupo Bondie?

¹³ Apre ki lapot Pierre ti konsey bann ansien dan kongregasion pou zot pa ‘fer dominer ar bann brebi ki Bondie inn konfie zot,’ li ti ankouraz zot pou “vinn bann lexanp pou troupo.” (1 Pierre 5:3; not) Kouma enn ansien kapav vinn enn lexanp pou troupo Bondie? Reflesi lor de kondision ki enn frer bizin ranpli si li “ena dezir pou vinn enn sirveyan.” Li bizin “montre ki li ena bon sans” ek li bizin “diriz so prop fami dan enn bon fason.” Si enn ansien ena enn fami, li bizin donn enn bon lexanp dan fason ki li diriz so fami, parski “si enn kikenn pa kone kouma pou diriz so prop lakaz, kouma li pou pran swin kongregasion Bondie?” (1 Tim. 3:1, 2, 4, 5) Pou enn frer kapav vinn enn ansien, li bizin montre ki li ena bon sans, setadir ki li bizin bien konpran bann prinsip Labib ek kone kouma pou aplik sa bann prinsip-la dan so prop lavi. Li bizin res kalm dan bann sitiasion difisil ek pa prese pou pran desizion. Kan bann manb kongregasion trouv bann ansien ena sa bann kalite-la, zot pou ena plis konfians dan bann ki pe vey lor zot.

¹⁴ Bann ansien donn enn bon lexanp kan zot pran latet dan predikasion, parey kouma Jésus. Kan Jésus ti lor later, predikasion bonn nouvel lor Rwayom Bondie ti form enn parti inportan dan so lavi. Li ti montre so bann disip kouma zot ti bizin fer sa travay-la. (Marc 1:38; Luc 8:1) Dan nou lepok, kan bann proklamater pres ansam avek bann ansien, sa bien ankouraz zot. Zot kapav trouve ki kantite bann ansien zele pou sa travay ki sov lavi bann dimounn la. Zot kapav osi aprann ar bann metod lansegnman ki bann ansien servi dan predikasion. Kan bann ansien bien deside pou konsakre zot letan ek zot lafors dan predikasion malgre ki zot bien okipe, sa ankouraz zot tou dan kongregasion pou zot zele zot osi. Bann ansien kapav osi donn enn bon lexanp kan zot prepar ek partisip dan bann renion ek lezot laktivite, kouma par exanp, netwayaz ek antretien Lasal kot nou fer renion.​—Éph. 5:15, 16; lir Hébreux 13:7.

15. Kifer bann ansien fer bann vizit pastoral?

¹⁵ Enn bon berze pa tarde pou ed enn brebi ki’nn blese ouswa ki’nn tom malad. Bann ansien osi bizin pa tarde pou ed bann ki pe soufer ouswa ki bizin led lor plan spiritiel. Kitfwa bann Kretien aze ek malad bizin led  dan zot lavi toulezour, me zot bizin led ek lankourazman sirtou lor plan spiritiel. (1 Thess. 5:14) Li posib ki bann zenn dan kongregasion pe bizin lite kont “bann dezir lazenes.” (2 Tim. 2:22) Alor, regilierman bann ansien fer bann vizit pastoral pou ed bann frer ek ser. Pandan zot vizit, zot esey konpran bann difikilte ki zot bann frer pe gagne ek ankouraz zot par bann konsey apropriye ki ena dan Labib. Kan bann ansien pa tarde pou ed zot bann frer, zot kapav regle boukou problem avan ki sa vinn pli grav.

16. Kan enn manb kongregasion ena enn problem grav, kouma bann ansien kapav ed li?

¹⁶ Ki enn ansien pou fer si enn manb kongregasion ena enn problem grav ki pe menas so spiritialite? Jacques, enn ekrivin Labib, ti ekrir: “Eski ena enn kikenn parmi zot ki malad? Ki li apel bann ansien dan kongregasion, ek ki zot priye pou li ek met delwil lor li o-nom Jéhovah. Ek lapriyer ki zot fer avek lafwa pou fer malad-la bien, ek Jéhovah pou relev li. Anplis, si li’nn fer pese, Jéhovah pou pardonn li.” (Jacq. 5:14, 15) Mem si sa dimounn ki malad lor plan spiritiel la pa “apel bann ansien,” bann ansien bizin pa tarde pou ed li deswit kouma zot konn so sitiasion. Bann ansien priye avek, ek osi pou zot bann frer. Zot osi soutenir sa bann frer-la dan bann moman difisil. Kan zot fer sa, zot montre ki zot bann bon berze ek zot ankouraz zot bann frer pou kontign servi Bondie avek lazwa.​—Lir Isaïe 32:1, 2.

17. Ki arive kan bann ansien imit nou “gran berze”?

¹⁷ Dan tou seki zot fer dan lorganizasion Jéhovah, bann ansien fer tou seki zot kapav pou imit Jésus Christ, nou “gran berze.” Gras-a led spiritiel sa bann frer-la, troupo Bondie gagn bann gran bienfe ek zot kontign vinn for. Pou tou sa bann rezon-la, nou bien rekonesan anver nou bann bon berze, ek sa pous nou pou loue nou gran Berze, Jéhovah.