1. Kifer nou kapav perdi pasians?

 KAN Rwayom Mesianik ti etabli an 1914, lemond Satan ti’nn rant dan so bann dernie zour. Sa lane-la, ti ena enn lager dan lesiel ek Jésus ti pous Satan ek so bann demon lor later. (Lir Révélation 12:7-9.) Satan kone ki li ena zis “enn tigit letan mem.” (Rév. 12:12) Selman, sa fer plizir dizenn lane ki sa ‘letan-la’ pe dire ek sertin parmi nou kapav ena linpresion ki bann dernie zour pa pe fini. Pandan ki nou pe atann ki Jéhovah azir, eski nou pe perdi pasians?

2. Ki nou pou examine dan sa lartik-la?

² Li kapav danzere pou perdi pasians. Kifer? Parski kan nou pena pasians, nou kapav fer bann kitsoz san reflesi. Alor, kouma nou kapav kontign atann? Dan sa lartik-la, nou pou examinn trwa kestion ki pou ed nou fer sa. (1) An rapor avek pasians, ki nou kapav aprann ar lexanp ki profet Mika inn lese? (2) Ki bann levennman pou montre ki lafin pre? (3) Kouma nou kapav montre nou rekonesans pou pasians Jéhovah?

3. Dan lepok Mika, dan ki kondision spiritiel bann Izraelit ti ete?

³ Lir Mika 7:2-6. Mika, ki ti enn profet Jéhovah, ti trouv kondision spiritiel bann Izraelit deteriore ziska ki sa vinn pli pir pandan regn Lerwa Ahaz. Mika ti konpar bann Izraelit ki ti infidel ar enn “pie ki ranpli ar pikan” ek ar “enn baraz pikan.” Parey kouma enn pie pikan ouswa enn baraz pikan kapav bles enn dimounn, sa bann Izraelit infidel la ti fer ditor tou dimounn ki ti rant an kontak avek zot. Zot sitiasion ti telman move ki mem ant bann manb enn fami, pa ti ena lamour. Mika ti kone ki li pa ti kapav fer nanye pou sanz sa sitiasion-la, alor, li ti priye Jéhovah avek tou so leker. Lerla li ti atann avek pasians  ki Jéhovah azir. Mika ti ena konfians ki Jéhovah ti pou koriz sa sitiasion-la dan ler ki Li ti deside.

4. Ki bann difikilte nou gagne?

⁴ Parey kouma Mika, nou pe viv parmi bann dimounn egois. Boukou dimounn ‘ingra, zot pa fidel, zot pena okenn lafeksion natirel.’ (2 Tim. 3:2, 3) Kan nou trouv nou bann kamarad travay, kamarad lekol, ek nou bann vwazin montre enn latitid egois, sa kapav rann nou lavi difisil. Me selman, sertin serviter Bondie ena enn pli gran difikilte dan zot lavi. Jésus ti dir ki so bann disip ti pou gagn lopozision dan zot fami. Li ti servi bann parol ki resanble seki’nn ekrir dan Mika 7:6 pou montre ki lefe so mesaz ti pou ena. Jésus ti dir: “Mo’nn vinn met divizion, enn zom kont so papa, enn tifi kont so mama, enn zenn fam kont so belmer. Wi, bann lennmi enn zom pou sorti dan so prop lakaz.” (Mat. 10:35, 36) Sa kapav vremem bien difisil kan bann manb nou fami ki pa servi Jéhovah boufonn nou ek opoze ar nou, pa vre? Si nou pe fer fas ar enn difikilte koumsa, fode pa nou sede. Okontrer anou res fidel ek kontign atann ki Jéhovah azir. Si nou kontign demann Li so led, Li pou donn nou lafors ek sazes neseser pou andire.

5, 6. Kouma Jéhovah ti rekonpans Mika, me ki Mika pa ti trouve?

⁵ Jéhovah ti rekonpans Mika pou so pasians. Mika ti ankor vivan kan move Lerwa Ahaz ti mor ek kan so dominasion ti fini. Li ti trouv Hizqiya, garson Ahaz, vinn lerwa. Hizqiya ti enn bon lerwa ek li ti retabli vre ladorasion. Kan bann Asirien ti anvayir rwayom lenor Israël, Mika ti trouv mesaz zizman ki li ti ekrir kont Samarie, realize.​—Mika 1:6.

⁶ Selman, Mika pa ti trouv tou bann profesi ki Jéhovah ti fer li ekrir, realize. Par exanp, Mika ti ekrir: “Dan peryod final bann zour, montagn ladorasion Jéhovah pou bien etabli lao lor bann montagn, wi li pou vinn pli ot ki bann kolinn; ek bann pep pou bizin al ver li. Wi boukou nasion pou ale ek pou dir: ‘Vini, anou mont lor montagn Jéhovah.’” (Mika 4:1, 2) Mika ti mor bien avan ki sa profesi-la ti realize. Me li ti bien deside pou res fidel anver Jéhovah ziska lamor, ninport ki bann dimounn otour li ti fer. Li ti ekrir: “Tou bann pep zot, zot pou mars sakenn lor nom zot bondie, me nou, nou pou mars lor nom Jéhovah nou Bondie pou touletan, wi pou touzour.” (Mika 4:5) Mika ti kapav atann avek pasians pandan bann moman difisil parski li ti sir ki Jéhovah ti pou realiz tou So bann promes. Sa profet fidel la ti ena konfians an Jéhovah.

7, 8. (a) Pou ki rezon nou ena konfians an Jéhovah? (b) Ki pou fer letan pas pli vit?

⁷ Eski nou osi nou ena mem konfians an Jéhovah? Nou ena bann bon rezon pou ena sa kalite konfians-la. Nou trouv profesi Mika pe realize. Pandan “peryod final bann zour,” plizir milyon dimounn ki sorti dan tou nasion, tribi, ek lang pe vinn ver “montagn ladorasion Jéhovah.” Mem si zot sorti dan bann nasion ki lager ant zot, sa bann adorater-la finn “forz zot bann lepe ek fer sa vinn bann zouti pou travay later,” ek zot refiz “pou aprann lager.” (Mika 4:3) Li vremem enn gran privilez pou form parti dan pep Jéhovah, enn pep kot ena lape!

⁸ Li normal ki nou anvi ki Jéhovah pa tarde pou detrir sa move sistem-la. Selman, si nou anvi kontign atann avek pasians, nou bizin pans parey kouma Jéhovah. Li’nn fixe enn zour kot Li pou ziz limanite par “enn zom ki Li finn swazir,”  Jésus Christ. (Actes 17:31) Me avan sa zour-la vini, Bondie pe donn tou sort kalite dimounn lokazion pou gagn “enn konesans exakt lor laverite,” pou met an pratik seki zot aprann ek pou gagn lavi sov. Nou bizin rapel ki lavi bann dimounn an danze. (Lir 1 Timothée 2:3, 4.) Si nou bien okipe pou ed bann dimounn gagn enn konesans exakt lor Bondie, letan ki reste avan zizman Jéhovah, pou pas pli vit. Lafin pe vini, li pe vini bien vit. Kan sa zour-la arive, nou pou extra kontan ki nou finn res bien okipe dan predikasion.

9-11. Eski 1 Thessaloniciens 5:3 finn realize? Explike.

⁹ Lir 1 Thessaloniciens 5:1-3. Biento, bann nasion pou dir: “Lape ek sekirite!” Si nou pa anvi ki sa zour-la vinn lor nou kouma enn sirpriz, nou bizin “res lor nou gard ek gard nou bon sans.” (1 Thess. 5:6) Pou nou kapav res lor nou gard lor plan spiritiel, nou pou examinn bann levennman ki’nn arive ek bann levennman ki pe amenn ver sa deklarasion inportan la.

¹⁰ Apre toulede lager mondial, bann nasion ti bien anvi ki ena lape. Apre premie lager mondial, sertin pei ti form Société des Nations avek lintansion pou fer lape. Plitar, apre deziem lager mondial, bann dimounn ti ena lespwar ki Nations Unies ti pou kapav amenn lape lor later. Bann gouvernman ek bann sef relizie ti ena konfians ki sa bann lorganizasion-la ti pou amenn lape pou tou dimounn. Par exanp, Nations Unies ti proklam 1986, Lane Internasional pou Lape. Sa lane-la, bann sef plizir nasion ek relizion ti rasanble avek sef Legliz Katolik, dan Assise, an Italie, pou priye pou lape.

¹¹ Selman, ni sa deklarasion pou lape ek sekirite la, ni lezot deklarasion koumsa pa finn akonpli profesi ki trouv dan 1 Thessaloniciens 5:3. Kifer? Parski sa verse-la ti anonse osi ki “enn sel kou  pou ena enn destriksion,” ek sa pankor arive.

12. Ki nou kone lor deklarasion “Lape ek sekirite”?

¹² Kisannla pou fer deklarasion “Lape ek sekirite”? Ki rol bann sef la Chrétienté ek lezot relizion pou ena ladan? Kouma bann sef diferan gouvernman pou inplike dan sa deklarasion-la? Labib pa dir nou. Seki nou kone, seki ninport kouma pou fer sa deklarasion-la, ek mem si li pou paret bien konvinkan, li pou zis enn laparans. Sa vie sistem-la pou res anba kontrol Satan. So sistem inn pouri net ek pa pou sanze. Li pou vremem tris si nou krwar dan propagann Satan ek nou pa gard nou netralite!

13. Kifer bann anz pe tini bann divan destriksion?

¹³ Lir Révélation 7:1-4. Pandan ki nou pe atann ki 1 Thessaloniciens 5:3 realize, bann anz pwisan pe tini bann divan destriksion gran detres. Ki zot pe atann? Enn levennman inportan. Lapot Jean ti ekrir ki bann “esklav nou Bondie” setadir bann Kretien ki’nn swazire, pou sele dan enn fason definitif. a Enn fwa ki sa inn fini, bann anz pou les sa bann divan destriksion la soufle. Ki pou arive apre?

14. Kouma nou kone ki destriksion Gran Babylone pe koste?

¹⁴ Gran Babylone, lanpir mondial fos relizion pou detrir, ek li bien merit sa. “Bann pep, bann lafoul ek bann nasion ek bann lang” pa pou kapav soutenir li. Nou pe deza trouve ki so destriksion pe koste. (Rév. 16:12; 17:15-18; 18:7, 8, 21) An realite, dan televizion, lagazet, radio, ek Internet, bann dimounn souvan atak bann relizion ek zot sef. Malgre sa, bann sef Gran Babylone panse ki zot pa vremem an danze. Zot pe fer enn grav erer! Apre deklarasion “Lape ek sekirite!” enn sel kou bann gouvernman pou atak fos relizion ek pou detrir li net. Zame ankor nou pa pou retrouv Gran Babylone! Alor, li vo lapenn ki nou atann avek pasians sa bann moman extraordiner la.​—Rév. 18:8, 10.

15. Kifer Jéhovah pa finn azir vit?

¹⁵ Malgre ki bann nasion pe zet dezoner lor nom Jéhovah, Li pe atann avek pasians enn bon moman pou azir. Jéhovah pa’le ki bann dimounn sinser detrir. (2 Pierre 3:9, 10) Eski ou pans parey kouma Li? Avan ki zour Jéhovah vini, nou kapav montre nou rekonesans pou so pasians dan bann fason ki nou pou examine asterla.

16, 17. (a) Kifer nou anvi ed bann inaktif? (b) Kifer li bien irzan ki bann inaktif retourn ver Jéhovah?

¹⁶ Ed bann inaktif. Jésus ti dir ki ena lazwa dan lesiel kan retrouv enn sel mouton ki’nn perdi. (Mat. 18:14; Luc 15:3-7) Li kler ki Jéhovah bien interese ar tou bann dimounn ki montre lamour pou so nom, mem si zot pa pe servi Li dan enn fason aktif asterla. Kan nou ed sa bann dimounn-la pou retourn dan lorganizasion Jéhovah, nou fer leker Jéhovah ek so bann anz kontan.

¹⁷ Eski ou parmi bann ki pa pe servi Jéhovah dan enn fason aktif asterla? Kitfwa enn kikenn dan kongregasion finn ofans ou ek akoz sa ou finn aret asiste renion. Li posib ki letan inn pase, alor demann oumem: ‘Eski mo lavi pli bon asterla, ek mo pli ere? Eski se  Jéhovah ki finn ofans mwa, ouswa enn dimounn ki inparfe? Eski Jéhovah finn deza fer mwa ditor?’ An realite, Li finn touletan bon anver nou. Mem si asterla nou pa pe viv an akor avek promes ki nou finn fer pou servi Li, Li les nou profit bann bon kitsoz ki Li done. (Jacq. 1:16, 17) Biento, zour Jéhovah pou vini. Inn ariv ler pou retourn ver nou Papa ki dan lesiel ek dan kongregasion​—sel plas kot ena sekirite dan sa bann dernie zour-la.​—Deut. 33:27; Héb. 10:24, 25.

18. Kifer nou bizin soutenir bann ki pran latet?

¹⁸ Soutenir avek fidelite bann ki pran latet dan kongregasion. Jéhovah Li kouma enn Berze ki ena lamour, alor Li gid nou ek Li protez nou. Li finn etabli so Garson kouma Sef bann Berze lor So troupo. (1 Pierre 5:4) Bann ansien dan plis ki 100,000 kongregasion pran swin sak brebi Bondie. (Actes 20:28) Kan nou soutenir avek fidelite bann ki pran latet, nou montre nou rekonesans pou Jéhovah ek Jésus pou tou seki zot fer pou nou.

19. Kouma nou kapav vinn pli pros avek nou bann frer ek ser?

¹⁹ Vinn pros ar nou bann frer ek ser. Ki sa vedir sa? Kan bann lennmi atak enn larme ki’nn bien antrene, sak solda dan sa larme-la, koste pli pre sakenn ar so kamarad. Koumsa, zot form enn defans ki pa kapav kase. Satan pe ogmant so bann latak lor pep Bondie. Alor, pa’nn ler pou lager avek nou bann frer. Okontrer, inn ariv ler pou nou vinn pli pros sakenn avek nou kamarad, pou pas lor zot linperfeksion, ek pou montre ki nou ena konfians dan direksion Jéhovah.

20. Ki nou bizin fer asterla?

²⁰ Alor, anou res lor nou gard lor plan spiritiel ek kontign atann. Anou atann avek pasians proklamasion “Lape ek sekirite!” Anou atann osi kan bann Kretien ki ena lesperans pou al dan lesiel, sele dan enn fason definitif. Apre sa, kat anz pou les bann divan destriksion soufle, ek Gran Babylone pou detrir. Pandan ki nou pe atann ki sa bann levennman extraordiner la arive, anou swiv direksion bann ki’nn etabli pou pran latet dan lorganizasion Jéhovah. Vinn pli pros avek nou bann frer ek ser pou nou kapav opoz nou ar Satan ek so bann demon. Inn ariv ler pou swiv sa konsey enn ekrivin Psaume ki ti dir: “Pran kouraz ek fer ki zot leker vinn for, zot tou ki pe atann Jéhovah.”​—Ps. 31:24.