1, 2. (a) Kifer li bien inportan ki nou ‘res lor nou gard pou nou kapav priye’? (b) Ki kestion an rapor avek lapriyer li bon nou demann noumem?

 ENN dimounn ki ti travay gardien aswar dir: “Moman pli difisil dan lanwit pou pa dormi, se zis avan ki soley leve gramatin.” Sirman bann dimounn ki bizin veye enn nwit pou dakor avek li. Zordi, nou pe viv dan dernie zour lemond Satan. Nou kapav konpar sa lepok-la ar moman pli difisil dan enn lanwit. Akoz sa, bann Kretien bizin fer atansion pou zot pa dormi lor plan spiritiel. (Rom. 13:12) Li pou bien danzere si nou gagn somey asterla! Li bien inportan ki nou ‘gard nou bon sans’ ek ki nou ‘res lor nou gard pou nou kapav priye.’​—1 Pierre 4:7.

² Nou pe viv dan bann dernie zour lemond Satan. Alor, li bon nou demann noumem: ‘Eski mo pe vey bien lor kalite mo bann lapriyer? Eski mo fer diferan kalite lapriyer, ek mo priye touletan? Eski li dan mo labitid pou priye pou lezot, ouswa eski mo priye zis pou seki mo bizin ek seki mo anvi? Ki linportans lapriyer ena pou mo gagn lavi sov?’

3. Ki diferan kalite lapriyer nou kapav fer?

³ Dan let ki li ti ekrir bann Efezien, lapot Paul ti mansionn “tou sort kalite lapriyer.” (Éph. 6:18) Dan nou bann lapriyer, kitfwa souvan nou demann Jéhovah pou donn nou seki nou bizin ek pou ed nou fer fas ar nou bann problem. Labib dir ki Bondie “ekout lapriyer” ek parski Li kontan nou, Li ekoute kan nou demann Li so led. (Ps. 65:2) Selman nou bizin osi fer zefor pou fer diferan kalite lapriyer, setadir bann louanz, bann remersiman ek bann siplikasion.

4. Kifer nou bizin loue Jéhovah souvan dan nou lapriyer?

⁴ Ena plizir rezon kifer nou bizin loue Jéhovah  dan nou lapriyer. Par exanp, kan nou reflesi lor so “bann travay extraordiner” ek lor so “grander extraordiner,” sa pous nou pou loue Li. (Lir Psaume 150:1-6.) Sis verse ki ena dan Psaume 150 ankouraz nou 13 fwa pou loue Jéhovah! Avek enn gran respe pou Bondie, enn lot ekrivin Psaume ti sante: “Set fwa par zour mo finn loue twa akoz to bann zizman ki drwat.” (Ps. 119:164) Jéhovah merite ki nou loue Li. Alor, nou bizin loue Li dan nou lapriyer “set fwa par zour,” setadir, bien souvan.

5. Kouma sa protez nou kan nou montre nou rekonesans dan lapriyer?

⁵ Bann remersiman, se enn lot kalite lapriyer ki nou kapav fer. Paul ti ankouraz bann Kretien dan Philippes kan li ti dir zot: “Pa trakase pou okenn kitsoz, me dan tou kitsoz, par lapriyer ek siplikasion avek bann remersiman, demann Bondie seki zot bizin.” (Phil. 4:6) Nou pe viv dan bann dernie zour lemond Satan ek nou antoure ar bann dimounn “ingra.” Kan nou remersie Jéhovah pou tou bann benediksion ki Li donn nou, sa protez nou parski nou pa pou vinn ingra parey kouma sa bann dimounn-la. (2 Tim. 3:1, 2) Dan lemond, boukou dimounn pena rekonesans. Si nou pa fer atansion, sa latitid-la kapav detin lor nou. Kan dan lapriyer, nou montre ki nou ena rekonesans, sa ed nou pou ena enn santiman satisfaksion, ek sa anpes nou vinn “bann dimounn ki mirmire, [ek] ki plengn zot sor dan lavi.” (Jude 16) Anplis, kan bann sef fami remersie Bondie dan zot lapriyer, sa ankouraz zot madam ek zot zanfan pou ena rekonesans.

6, 7. Ki sa vedir siplikasion, ek konsernan ki kitsoz nou kapav sipliy Jéhovah?

⁶ Siplikasion se enn lapriyer sinser kot nou exprim nou bann santiman bien profon. Konsernan ki kitsoz nou kapav sipliy Jéhovah? Nou kapav sipliy Li kan nou gagn persekision ouswa kan nou bizin fer fas ar enn maladi grav. Dan sa bann moman-la, li normal ki nou fer bann siplikasion pou demann Bondie so led. Me eski se zis dan sa bann moman-la ki nou bizin sipliy Jéhovah?

⁷ Anou examinn lapriyer model ki Jésus ti fer, ek remark seki li ti dir konsernan nom Bondie, So Rwayom ek So volonte. (Lir Matthieu 6:9, 10.) Lemond ranpli ar lemal ek bann gouvernman pa mem kapav donn zot bann sitwayen seki zot bizin pou viv. Alor, pena dout ki nou bizin priye pou ki nom Bondie sanktifie ek ki so Rwayom debaras later ar dominasion Satan. Se osi ler pou sipliy Jéhovah pou ki so volonte fer lor later parey kouma dan lesiel. Alor, nou bizin res lor nou gard ek fer diferan kalite lapriyer.

8, 9. Kifer fode pa nou ziz Pierre ek bann lezot zapot parski zot ti gagn somey dan zardin Gethsémané?

⁸ Mem si lapot Pierre ti ankouraz bann Kretien “pou res lor zot gard pou zot kapav priye,” limem li pa ti reisi fer sa dan omwin enn lokazion. Li ti enn parmi bann disip ki ti gagn somey kan Jésus ti pe priye dan zardin Gethsémané. Mem apre ki Jésus ti dir zot “kontign veye ek priye touletan,” zot pa ti fer sa.​—Lir Matthieu 26:40-45.

⁹ Selman, olie ki nou ziz Pierre ek lezot zapot dan enn fason sever parski zot ti gagn somey, li bon nou rapel ki sa zour-la zot ti bien fatige. Zot ti fer bann preparasion pou selebre Pâque sa swar-la. Apre, Jésus ti etabli Repa nou Segner, li ti les enn model lor fason ki so bann  disip ti pou bizin selebre Memoryal so lamor dan lavenir. (1 Cor. 11:23-25) “Apre ki zot ti fini sant bann kantik, zot ti sorti pou al ver Mont des Oliviers,” zot ti mars enn distans dan bann ti semin dan Jérusalem. (Mat. 26:30, 36) Kan zot ti ariv laba, kitfwa ti’nn fini minwi. Si nou ti dan zardin Gethsémané sa swar-la, kitfwa nou osi nou ti pou gagn somey. Olie ki Jésus ti kritik so bann zapot ki ti fatige, avek amour, li ti rekonet ki “lespri for, me laser feb.”

10, 11. (a) Ki leson Pierre ti tire ar seki ti pase dan zardin Gethsémané? (b) Ki ou aprann ar seki ti ariv Pierre?

¹⁰ Pierre ti tir enn bon leson ar lexperyans ki li ti fer dan zardin Gethsémané. Pli boner, Jésus ti dir: “Zot tou pou tonbe akoz seki pou ariv mwa sa lanwit-la.” Me Pierre ti reponn: “Mem si zot tou tonbe akoz seki pou ariv twa, mwa zame mo pa pou tonbe!” Jésus ti dir ki Pierre ti pou renie li trwa fwa. Me Pierre pa ti krwar li ek li ti dir: “Mem si mo bizin mor avek twa, zame mo pa pou renie twa.” (Mat. 26:31-35) Me, parey kouma Jésus ti anonse, Pierre ti renie li. Kan Pierre ti realize seki li ti fer, li ti “bien plore.”​—Luc 22:60-62.

¹¹ Pena doute ki Pierre ti tir enn leson ar seki ti ariv li ek li ti travay lor so tandans pou ena enn tro gran konfians an limem. Nou sir ki lapriyer ti ed Pierre dan sa domenn-la. An realite, nou remarke ki se Pierre ki finn donn sa konsey pou ‘res lor nou gard pou nou kapav priye.’ Eski nou pe swiv sa konsey Biblik-la? Eski nou “priye touletan” ek nou montre ki nou kont lor Jéhovah? (Ps. 85:8) Anou rapel osi sa konsey ki Paul ti done la: “Si enn kikenn krwar li debout, li bizin fer atansion ki li pa tonbe.”​—1 Cor. 10:12.

12. Kifer Nehémia enn bon lexanp pou nou?

¹² Anou get lexanp Nehémia ki ti servi divin, lerwa Perse, Artaxerxès, dan sinkiem siek Avan Nou Lepok. Nehémia ti priye avek tou so leker ek li finn les enn bon lexanp pou nou. Pandan plizir zour, Nehémia ‘ti kontign gard karem ek ti kontign priye Bondie’ konsernan sitiasion difisil bann Juif dan Jérusalem. (Neh. 1:4) Kan Artaxerxès ti demann li kifer li ti paret tris, “deswit [Nehémia] ti priye Bondie ki’nn kree lesiel.” (Neh. 2:2-4) Ki ti arive apre? Jéhovah ti reponn so lapriyer ek ti diriz bann levennman an faver So pep.  (Neh. 2:5, 6) Pena dout ki sa ti fortifie lafwa Nehémia!

13, 14. Ki nou bizin fer pou gard nou lafwa solid ek pa les Satan dekouraz nou?

¹³ Si nou kontign priye, parey kouma Nehémia, sa pou ed nou pou gard enn lafwa solid. Satan pena pitie ek souvan li atak nou kan nou feb. Par exanp, si nou pe fer fas ar enn maladi ouswa nou pe lite kont depresion, kitfwa nou ena santiman ki letan ki nou pase sak mwa dan predikasion pena valer pou Bondie. Li posib osi ki sertin parmi nou ena bann panse negatif akoz bann move lexperyans ki zot inn fer dan lepase. Satan anvi fer nou krwar ki nou pena valer. Li servi sa bann panse negatif la pou dekouraz nou ek lerla afebli nou lafwa. Me nou kapav ena enn lafwa solid kan nou ‘res lor nou gard pou nou kapav priye.’ Wi, ‘gran boukliye lafwa pou kapav tengn tou bann fles anflame ki sa kikenn ki move la, avoye.’​—Éph. 6:16.

¹⁴ Si nou res lor ‘nou gard pou nou kapav priye,’ nou pa pou etone mem si enn leprev arive san ki nou atann, ek nou pou res fidel anver Jéhovah. Kan nou fer fas ar bann leprev ek bann difikilte, anou rapel lexanp Nehémia ek deswit tourn nou ver Bondie dan lapriyer. Se selman avek led Jéhovah ki nou pou reisi reziste kont bann tantasion ek fer fas ar bann leprev ki teste nou lafwa.

15. Ki nou bizin demann noumem konsernan bann lapriyer ki nou fer pou lezot?

¹⁵ Jésus ti sipliy Bondie pou ki lafwa Pierre pa diminie. (Luc 22:32) Épaphras, enn Kretien fidel dan premie siek  ti imit Jésus dan sa domenn-la ek ti fer bann lapriyer sinser ek profon pou so bann frer dan Colosses. Paul ti ekrir: “Li ti touzour pe lite pou zot dan so bann lapriyer, pou ki finalman zot vinn konple ek zot ena enn konviksion solid dan tou seki konsern volonte Bondie.” (Col. 4:12) Li bon ki nou demann noumem: ‘Eski mo pe lite dan mo bann lapriyer pou mo bann frer ek ser ki viv partou dan lemond? Eski souvan dan mo lapriyer mo mansionn mo bann frer ek ser ki pe soufer akoz bann katastrof natirel? Kan dernie fwa mo finn priye pou bann frer ki ena bann gran responsabilite dan lorganizasion Jéhovah? Kan dernie fwa mo finn priye pou enn manb kongregasion ki pe fer fas ar bann leprev?’

16. Eski li inportan ki nou priye pou lezot? Explike kifer.

¹⁶ Bann lapriyer ki nou fer pou nou bann frer ek ser kapav vremem ed zot. (Lir 2 Corinthiens 1:11.) Jéhovah pa oblize azir parski boukou parmi so bann adorater pe priye Li souvan pou enn kitsoz. Me kanmem, Li bien kontan pou trouv lintere sinser ki zot ena sakenn pou zot kamarad ek Li reponn zot lapriyer. Alor, nou bizin konsider sa kouma enn privilez ek enn responsabilite pou priye pou lezot. Parey kouma Épaphras, nou bizin montre nou lamour ek nou lintere sinser pou nou bann frer ek ser kan nou lite pou zot dan nou lapriyer. Si nou fer sa, nou pou trouv lazwa parski “ena plis lazwa kan done ki kan gagne.”​—Actes 20:35.

17, 18. Kan nou ‘res lor nou gard pou nou kapav priye,’ kouma sa ed nou?

¹⁷ Zis avan ki Paul ti dir ki ‘lanwit pe al fini ek lizour pe koste,’ li ti ekrir: “Zot konn sa lepok-la, ki’nn fini ariv ler pou zot leve ek aret dormi, parski asterla nou delivrans pli pre ki letan nou ti vinn krwayan.” (Rom. 13:11, 12) Lemond nouvo ki Bondie promet bien pre, ek nou delivrans pli pre ki nou panse. Fode pa nou dormi lor plan spiritiel ek fode zame nou les bann distraksion ki ena dan lemond kokin letan ki nou bizin pase tousel avek Jéhovah dan lapriyer. Okontrer, nou bizin ‘res lor nou gard pou nou kapav priye.’ Lerla, sa pou ed nou pou fer ‘bann aksion ki montre ki nou kondwit sin ek ki nou atase ar Bondie’ pandan ki nou pe atann zour Jéhovah. (2 Pierre 3:11, 12) Alor, fason ki nou viv montre ki nou pa pe dormi lor plan spiritiel ek ki nou vremem krwar ki lafin sa move sistem-la pre pou vini. Akoz sa, nou bizin “priye touletan.” (1 Thess. 5:17) Nou bizin osi imit Jésus ek trouv enn moman kot nou tousel pou priye Jéhovah. Si nou pas boukou letan pou priye Jéhovah, sa pou fer nou vinn pli pros ar Li. (Jacq. 4:7, 8) Ek sa pou vremem enn gran benediksion!

¹⁸ Labib dir: “Kan li ti enn zom lor later, Christ ti fer bann siplikasion ek osi bann demann ar vre Bondie ki ti kapav sap li dan lamor, li ti kriye for ek li ti plore, ek Bondie ti ekout so lapriyer parski li ti ena lakrint pou Li.” (Héb. 5:7) Jésus ti fer bann siplikasion, li ti demann Bondie so led ek li ti res fidel anver Bondie ziska lafin so lavi lor later. Lerla Jéhovah ti resisit so Garson ki Li bien kontan ek ti donn li lavi imortel dan lesiel kouma enn rekonpans. Nou osi nou kapav res fidel ar nou Papa ki dan lesiel, devan ninport ki tantasion ek leprev ki nou kapav gagne dan lavenir. Wi, nou kapav gagn lavi eternel, a kondision ki nou ‘res lor nou gard pou nou kapav priye.’