1. Ki kalite sakrifis boukou dimounn fer, ek kifer?

 BANN dimounn dispoze fer bann sakrifis pou bann kitsoz ki inportan pou zot. Bann paran donn zot letan, zot larzan ek zot lafors pou zot zanfan dan bien. Bann zenn atlet ki anvi partisip dan bann Jeux Olympiques, pas boukou letan ek fer boukou zefor toulezour pou antrene, alor ki zot bann kamarad zwe ek amize. Jésus osi ti fer bann sakrifis pou bann kitsoz ki ti inportan pou li. Li pa ti ena lobzektif pou gagn bann kitsoz ki ena valer ni pou ena zanfan. Okontrer, li ti swazir pou servi tou so lafors pou soutenir Rwayom Bondie. (Mat. 4:17; Luc 9:58) So bann disip osi parey, zot ti fer tou pou soutenir Rwayom Bondie. Seki ti pli inportan dan zot lavi, se pres Rwayom Bondie, ek zot ti fer bann sakrifis pou fer sa. (Mat. 4:18-22; 19:27) Alor, li bon nou demann noumem: ‘Ki kitsoz ki inportan dan mo lavi?’

2. (a) Ki sakrifis tou bann vre Kretien bizin fer? (b) Ki lezot sakrifis sertin Kretien kapav fer?

² Ena sertin sakrifis ki tou bann vre Kretien bizin fer ek ki inportan pou nou gard bann bon relasion avek Jéhovah. Parmi sa bann sakrifis-la, nou bizin rezerv nou letan ek nou lafors pou priye, pou lir Labib, pou fer nou ladorasion an fami, pou asiste renion ek pou al prese. a (Jos. 1:8; Mat. 28:19, 20; Héb. 10:24, 25) Gras-a nou bann zefor ek benediksion Jéhovah, laktivite predikasion pe ogmante, ek boukou dimounn pe mont ver “montagn lakaz Jéhovah.” (Is. 2:2) Pou soutenir bann laktivite ki an rapor avek Rwayom Bondie, boukou fer bann sakrifis pou servi dan Béthel, pou ede dan konstriksion bann Lasal kot nou fer renion ek bann Lasal Lasanble, pou organiz bann lasanble ouswa pou ed bann dimounn ki pe soufer akoz bann katastrof natirel. Sa bann travay ki nou fer apar la, zot  pa enn kondision pou gagn lavi eternel, me zot inportan pou soutenir Rwayom Bondie.

3. (a) Ki bienfe nou gagne kan nou fer bann sakrifis pou Rwayom Bondie? (b) Ki bann kestion nou bizin poz noumem?

³ Zordi plis ki avan, li bien inportan ki nou fer tou seki nou kapav pou soutenir Rwayom Bondie. Se enn gran lazwa pou trouv boukou Kretien fer volonterman bann sakrifis pou Jéhovah! (Lir Psaume 54:6.) Si nou fer sa nou osi, nou pou gagn boukou lazwa pandan ki nou pe atann Rwayom Bondie vini. (Deut. 16:15; Actes 20:35) Alor, nou tou nou bizin bien examinn noumem. Eski ena bann domenn kot nou kapav fer plis sakrifis pou Rwayom Bondie? Kouma nou pe servi nou letan, nou larzan, nou lafors ek nou bann kapasite? Ki fode pa nou neglize kan nou fer bann sakrifis? Anou examinn sertin sakrifis volonter ki bann Izraelit ti fer dan lepase. Nou pou trouve ki leson nou kapav tire ek kouma sa pou ogmant nou lazwa.

4. Kouma bann Izraelit ti gagn bann bienfe kan zot ti fer bann sakrifis?

⁴ Bann Izraelit ti bizin fer bann sakrifis pou ki Bondie pardonn zot pese. Sa bann sakrifis-la ti neseser pou zot gagn faver Jéhovah. Sertin sakrifis ti obligatwar; lezot ti volonter. (Lév. 23:37, 38) Bann Izraelit ti kapav fer bann sakrifis ki bril net kouma bann sakrifis volonter, setadir bann don pou Jéhovah. Nou trouv enn lexanp sa bann sakrifis-la kan Salomon ti fer inogirasion tanp Jéhovah.​—2 Chron. 7:4-6.

5. Ki dispozision Jéhovah ti pran pou bann pov?

⁵ Avek lamour Jéhovah ti konpran ki pa tou dimounn ti kapav donn mem kalite sakrifis. Akoz sa, Li ti demann sak Izraelit pou donn seki li ti kapav. Dapre lalwa Jéhovah, ti bizin vers disan bann zanimo kan ti fer sakrifis. Sa ti pou “enn lonbraz bann bon kitsoz ki [ti] pou vini” atraver Garson Bondie, Jésus. (Héb. 10:1-4) Selman, Jéhovah ti rezonab dan fason ki bann Izraelit ti bizin obeir sa lalwa-la. Par exanp, Bondie ti pou aksepte ki enn Izraelit ofer bann tourtrel an sakrifis si li pa ti kapav ofer enn ti zanimo ouswa enn gro zanimo. Lerla, mem bann pov ti pou ena lazwa ofer Jéhovah bann sakrifis. (Lév. 1:3, 10, 14; 5:7) Mem si bann sakrifis ti diferan, ti  ena de kitsoz ki sak dimounn ti bizin fer kan li ti ofer bann sakrifis volonter.

6. Ki de kondision enn dimounn ti bizin ranpli kan li ti fer bann sakrifis, ek kifer li ti inportan ki li respekte sa de kondision-la?

⁶ Premierman, enn dimounn ki ti fer sakrifis ti bizin donn pli bon kitsoz ki li ti ena. Jéhovah ti dir bann Izraelit ki, pou zot ‘gagn so faver,’ ti bizin pena okenn defo dan bann sakrifis ki zot ti ofer. (Lév. 22:18-20) Si ti ena enn defo dan sa zanimo ki zot ti ofer la, Jéhovah pa ti pou aksepte zot sakrifis. Deziemman, sa dimounn ki ti pe ofer sakrifis la ti bizin pa koupab okenn pese ek pa kontamine. Si enn dimounn ti inpir, li ti bizin fer enn sakrifis pou so pese ouswa enn sakrifis parski li koupab, pou li kapav regagn faver Jéhovah avan ki li fer enn sakrifis volonter. (Lév. 5:5, 6, 15) Sa ti enn kitsoz bien serye. Jéhovah ti dir ki si enn dimounn inpir ti manz enn sakrifis kominion, parmi ti ena bann sakrifis volonter, ti pou bizin touy li. (Lév. 7:20, 21) De lot kote, si enn dimounn ti ena bann bon relasion avek Jéhovah ek pa ti ena okenn defo dan so sakrifis, li ti pou kapav ena enn bon konsians ek enn gran lazwa.​—Lir 1 Chroniques 29:9.

7, 8. (a) Ki lazwa nou gagne kan nou fer bann sakrifis pou soutenir Rwayom Bondie? (b) Ki bann sakrifis nou kapav donn Jéhovah?

⁷ Zordi, boukou parmi nou bann frer ek ser ena dezir pou travay dir dan servis Jéhovah ek sa fer Li plezir. Kan nou travay pou nou bann frer ek ser, sa donn nou lazwa. Enn frer ki partisip dan konstriksion bann Lasal kot nou fer renion ek ki ede apre bann katastrof natirel, dir ki kantite li kontan kan li ed so bann frer. Li azoute: “Kan mo trouv lazwa ek rekonesans ki bann frer ek ser ena kan zot rant dan zot nouvo Lasal ouswa kan zot gagn led apre enn katastrof natirel, sa fer mwa trouve ki li vremem vo lapenn pou fer tou sa bann zefor-la.”

⁸ Parti vizib lorganizasion Jéhovah inn touletan rod bann lokazion pou soutenir Rwayom Bondie. An 1904, Frer Charles Russell ti ekrir: “Sakenn parmi nou bizin rapel ki Lesegner finn etabli li kouma enn administrater so prop letan, linflians, larzan, etc., ek li bizin fer tou seki li kapav pou servi sa bann kapasite-la pou donn laglwar Lemet.” Li vre ki nou bizin fer bann sakrifis pou  Jéhovah, me sa fer nou gagn boukou benediksion. (2 Sam. 24:21-24) Eski nou kapav servi pli bien seki nou ena, dan servis Jéhovah?

9. Ki prinsip ena dan Luc 10:2-4 nou kapav aplike lor fason ki nou bizin servi nou letan?

⁹ Nou letan. Pou tradir ek inprim nou bann piblikasion, pou konstrir bann Lasal, pou organiz bann lasanble, pou ede apre bann katastrof natirel, ek pou partisip dan lezot aktivite neseser, tousala demann boukou letan ek zefor. Nou ena zis 24 er dan enn zour. Jésus ti donn nou enn prinsip ki kapav ed nou pou bien servi nou letan. Kan Jésus ti avoy so bann disip dan predikasion, li ti dir zot: “Lor semin, pa may personn dan zot lebra pou dir bonzour.” (Luc 10:2-4) Kifer Jésus ti donn zot sa lord-la? Enn spesialis lor Labib dir: “Bann dimounn ki ti res dan lwes l’Asie pa ti dir bonzour zot kamarad parey kouma nou, zis fer enn ti sign ar zot latet ouswa donn lame. Me zot ti may zot kamarad plizir fwa, zot ti kourbe ek zot ti mem prostern zot anba. Tousala ti pran boukou letan.” Alor, lord ki Jésus ti donn so bann disip pa vedir ki li ti pe ankouraz zot pou pena manier. Okontrer, li ti pe ed zot pou konpran ki zot pa ti ena boukou letan ek ki zot ti bizin servi sa letan-la pou fer bann kitsoz ki ti pli inportan. (Éph. 5:16) Eski nou kapav aplik sa prinsip-la pou ki nou ena plis letan pou fer bann aktivite an rapor avek Rwayom Bondie?

10, 11. (a) Sit sertin fason ki pe servi bann donasion ki nou fer pou soutenir laktivite mondial. (b) Ki prinsip ki ena dan 1 Corinthiens 16:1, 2 kapav ed nou?

¹⁰ Nou larzan. Bizin boukou larzan pou soutenir bann aktivite ki an rapor avek Rwayom Bondie. Sak lane, depans plizir dizenn milyon dolar pou soutenir bann sirveyan, bann pionie spesial, ek bann misioner. Depi 1999, plis ki 24,500 Lasal kot fer renion finn konstrir dan bann pei ki pena boukou mwayin. Selman, bizin ankor 6,400 Lasal. Sak mwa, inprim apepre 100 milyon kopi Latour Degard ek Réveillez-vous ! Tousala fer gras-a bann donasion volonter.

¹¹ Lapot Paul inn donn enn prinsip ki nou kapav swiv kan nou fer bann donasion. (Lir 1 Corinthiens 16:1, 2.) Li ti ankouraz so bann frer dan Corinthe pou pa atann lafin lasemenn pou gete komie kas zot reste pou zot fer donasion. Me okontrer, dan koumansman lasemenn mem, zot ti bizin deside ki kantite zot kapav done. Parey kouma dan premie siek, bann frer ek ser deside alavans komie zot pou kontribie, dapre zot posibilite. (Luc 21:1-4; Actes 4:32-35) Jéhovah apresie zenerozite so bann serviter.

12, 13. Kifer sertin panse ki zot pa kapav fer plis dan servis Jéhovah, me kouma Jéhovah pou ed zot?

¹² Nou lafors ek nou bann kapasite. Jéhovah soutenir nou bann zefor kan nou servi nou lafors ek nou kapasite pou so Rwayom. Li promet ki Li pou ed nou kan nou fatige. (Is. 40:29-31) Eski ou ena linpresion ki ou pena ase kapasite pou soutenir bann aktivite an rapor avek Rwayom Bondie? Eski ou panse ki lezot pli kalifie ki ou? Li bon nou rapel ki Jéhovah kapav amelior kapasite natirel ninport kisannla, parey kouma Li ti fer avek Betsalel ek Oholiab.​—Ex. 31:1-6; get zimaz dan koumansman lartik.

¹³ Jéhovah ankouraz nou pou pa les nanye anpes nou fer nou maximum pou Li. (Prov. 3:27) Kan ti pe rekonstrir tanp, Jéhovah ti dir bann Zwif dan Jérusalem pou bien reflesi lor seki zot ti pe fer konsernan sa konstriksion-la. (Hag. 1:2-5) Zot pa ti pe pran kont sa konstriksion-la ek sa ti nepli zot priorite. Li bon ki nou  demann noumem: Eski volonte Jéhovah pli inportan ki tou lezot kitsoz dan nou lavi? Eski nou kapav ‘fixe nou leker lor seki nou pe fer’ pou ki nou kapav partisip plis pou soutenir Rwayom Bondie dan bann dernie zour?

14, 15. (a) Ki lankourazman nou gagne ar nou bann frer ek ser ki pov? (b) Ki dezir nou bizin ena?

¹⁴ Boukou dimounn res dan bann landrwa kot lavi bien difisil ek kot bann dimounn bien mizer. Nou lorganizasion fer zefor pou ed bann frer dan sa bann pei-la. (2 Cor. 8:14) Pourtan, mem bann frer ki pena boukou mwayin, konsider sa kouma enn privilez pou fer bann kontribision. Jéhovah kontan kan Li trouv sa bann frer-la donn seki zot kapav avek lazwa.​—2 Cor. 9:7.

¹⁵ Dan enn pei bien pov an Afrique, sertin frer ti rezerv enn bout terin dan zot zardin kot zot fer plantasion. Kan zot vann bann prodwi ki zot rekolte lor sa bout terin la, zot servi sa larzan-la pou soutenir Rwayom Bondie. Dan mem pei, ti ena enn proze pou konstrir enn Lasal kot fer renion. Bann frer ek ser ti anvi ede dan sa konstriksion-la. Selman, ti pou fer sa konstriksion-la zis dan sezon kot zot ti bizin plante. Me kanmem, zot ti bien deside pou partisip ladan. Alor, zot ti al travay lor konstriksion pandan lazourne ek tanto zot ti al plante dan zot karo. Zot ti ena vremem enn lespri sakrifis! Sa fer nou rapel bann Kretien Macédoine dan premie siek. Zot ti “bien mizer,” pourtan zot ti sipliy Paul pou zot kapav donn larzan zot bann frer. (2 Cor. 8:1-4) Nou osi parey, anou ‘donn dapre benediksion ki Jéhovah finn donn nou.’​—Lir Deutéronome 16:17.

16. Ki nou kapav fer pou ki nou bann sakrifis akseptab pou Jéhovah?

¹⁶ Kan nou fer bann sakrifis, nou bizin fer atansion ki nou pa negliz bann kitsoz ki pli inportan, kouma par exanp, nou fami. Parey kouma bann Izraelit, nou bizin fer sir ki Jéhovah aksepte bann sakrifis volonter ki nou fer. Nou bizin ekilibre parski nou ena bann responsabilite pli inportan, kouma par exanp nou fami ek nou ladorasion pou Jéhovah. Fode pa ki letan ek bann resours ki nou donn lezot fer nou negliz nou fami lor plan spiritiel ouswa fizik. Si nou fer sa, se koumadir nou pe donn seki nou pena. (Lir 2 Corinthiens 8:12.) Anplis, nou bizin fortifie nou prop spiritialite. (1 Cor. 9:26, 27) Me nou kapav sir ki kan nou viv dapre bann prinsip Biblik, nou bann sakrifis pou fer nou gagn lazwa ek satisfaksion, ek zot pou “akseptab” pou Jéhovah.

17, 18. Ki nou resanti pou bann ki pe fer bann sakrifis pou Rwayom Bondie, ek lor ki kitsoz nou tou nou bizin reflesi?

¹⁷ Boukou parmi nou bann frer ek ser volonterman donn zot letan, zot lafors, ek zot larzan pou soutenir bann aktivite an rapor avek Rwayom Bondie. (Phil. 2:17) Nou bien apresie bann Kretien ki manifeste enn latitid koumsa. Nou felisit bann madam ek bann zanfan ki manifeste enn lespri sakrifis pou permet zot mari ouswa zot papa diriz bann aktivite teokratik.

¹⁸ Sa demann bann gran zefor pou soutenir Rwayom Bondie. Anou reflesi dan lapriyer kouma nou kapav fer plis dan nou servis pou Jéhovah. Si nou fer sa, nou kapav sir ki nou pou gagn bann gran benediksion asterla ek ankor plis benediksion “dan lemond ki pe vini.”​—Marc 10:28-30.