Eski ou finn lir bien bann dernie nimero Latour Degard? Alor, gete si ou kapav reponn sa bann kestion-la:

Kan eski Jésus “ti al pres ar bann lespri dan prizon”? (1 Pierre 3:19)

Li paret ki apre so rezireksion, Jésus ti fer enn deklarasion ar bann move lespri ki zot ti pou gagn enn pinision ki zot bien merite.​—15/6, paz 23.

Eski Bondie “fer preferans”? (Actes 10:34)

Non, mo Grec ki’nn servi pou tradir “preferans” literalman vedir “get figir.” (The Kingdom Interlinear Translation of the Greek Scriptures) Bondie pa donn enn dimounn plis preferans ki enn lot akoz so ras, so nasionalite, so ran sosial, ouswa enn lot kitsoz ki konsern so laparans.​—1/7, paz 14.

Kan eski Jésus ziz bann dimounn kouma bann mouton ouswa bann kabri? (Mat. 25:32)

Jésus pou ziz bann dimounn pandan la grande tribulation, apre destriksion fos relizion.​—15/7, paz 6.

Kan eski bann dimounn ki pratik seki kont lalwa, ki mansione dan parabol dible ek move lerb, pou plore ek pou grins zot ledan? (Mat. 13:36, 41, 42)

Zot pou fer sa pandan la grande tribulation kan zot pou realize ki zot pa pou kapav sape kan pou ena destriksion.​—15/7, paz 13.

Kan bann parol Jésus konsernan lesklav fidel ek saz inn realize? (Mat. 24:45-47)

Zot ti koumans realize, pa zour la Pentecôte 33 Nou Lepok, me apre 1914. An 1919, Jésus ti etabli sa esklav-la lor bann domestik, ki reprezant tou bann Kretien ki gagn nouritir spiritiel.​—15/7, paz 21-23.

Kan eski Jésus etabli lesklav fidel lor tou so bann dibien?

Sa pou arive dan lavenir, pandan la grande tribulation kan bann manb lesklav fidel gagn zot rekonpans dan lesiel.​—15/7, paz 25.

Apar pwisans ki Bondie ti donn zot, ki ti ed 230 Temwin pou sirviv enn long lamars kan ti fors zot pou kit kan konsantrasion Sachsenhausen?

Mem si zot ti feb parski pa ti ena manze ek akoz maladi, sakenn ti kontign ankouraz so kamarad pou kontign marse.​—15/8, paz 18.

Kifer nou kapav dir avek konviksion ki Jéhovah ena laenn pou pornografi?

Parmi bann rezon, se parski Jéhovah kone ki pornografi kapav detrir lavi bann dimounn. Li kontan nou ek Li anvi protez nou kont bann kitsoz ki kapav fer nou ditor, ek Li anvi protez bann maryaz ek bann fami.​—1/9, paz 4.

Ki trwa kitsoz enn koup kapav fer pou reisi enn deziem maryaz?

Pa donn plis linportans ou premie maryaz; ou bizin kone kouma pou azir kan ou avek bann kamarad ki pa tro konn ou nouvo konzwin; fer konfians ou nouvo konzwin mem si ou premie konzwin ti infidel.​—1/9, paz 11-12.

Kifer resi konsernan bann Izraelit ki ti travers Larivier Jourdain pou rant dan Later Promiz, ankouraz nou?

Mem si delo larivier ti bien ot, Jéhovah ti fer delo larivier-la aret desann pou ki so pep kapav pase. Sa ti sirman fer zot lafwa vinn pli for ek ti fer zot ena plis konfians an Jéhovah. Sa resi-la kapav ankouraz nou.​—15/9, paz 16.

Kifer nou bizin pardonn avek tou nou leker? (Col. 3:13)

Rezon pli inportan kifer nou bizin pardonn lezot avek tou nou leker, se parski Bondie pardonn nou avek tou So leker. Enn lot rezon, se ki kitfwa nou osi nou pou bizin demann lezot pou pardonn nou.​—1/11, paz 11.

Kouma profesi Mika 5:5 konsernan bann duc ek bann berze pe realize zordi?

Nou konpran ki ‘set berze ek wit duc’ ki mansione dan Mika 5:5 reprezant bann ansien ki’nn etabli dan bann kongregasion, ki pe fortifie pep Bondie pou ki zot tini ferm dan lavenir, kan pou ena enn latak kont zot.​—15/11, paz 20.