Mo ti ena zis di-z-an kan, an 1985, bann zanfan ki ti sorti Cambodge ti vinn dan mo lekol, dan Columbus, Ohio, an Amérique. Enn parmi bann garson ti konn de-trwa mo Angle. Avek bann desin, li ti koumans rakont mwa bann kitsoz orib ki ti pase dan so pei, kot ti tortir bann dimounn, ti touy zot ek sertin ti bizin sove. Toule swar mo ti plore kan mo ti pans sa bann zanfan-la. Mo ti anvi partaz avek zot lespwar ki enn zour later pou vinn enn Paradi ek ki pou ena enn rezireksion, me zot pa ti konpran mo lang. Mem si mo ti ankor enn ti garson, mo ti deside pou aprann Kanbodien pou mo kapav koz lor Jéhovah avek mo bann kamarad lekol. Sa lepok-la mo pa ti panse kouma sa desizion-la ti pou ena enn gran linflians lor mo lavi.

Li ti bien difisil pou aprann Kanbodien. De fwa, mo ti deside pou abandone, me atraver mo bann paran, Jéhovah ti ankouraz mwa pou kontigne. Plitar, mo bann profeser ek bann lezot zelev ti koumans ankouraz mwa pou fer enn gran karyer pou vinn ris. Me mo ti anvi fer pionie, ek mo ti swazir bann kour dan kolez ki ti pou permet mwa trouv enn travay a-mitan pou mo kapav realiz mo lobzektif. Apre lekol, mo ti abitie zwenn sertin pionie ek akonpagn zot dan servis. Mo ti osi port mwa volonter pou ed bann zelev ki ti pe aprann Angle. Plitar, sa desizion-la ti ed mwa boukou.

Kan mo ti ena 16 an, mo ti tann koz lor enn group Kanbodien dan Long Beach, dan Californie, an Amérique. Mo ti al laba, ek mo ti aprann Kanbodien. Deswit kouma mo ti fini lekol, mo ti koumans fer pionie ek mo ti kontign pres avek bann Kanbodien ki ti res pre ar mo lakaz. Kan mo ti gagn 18 an, mo ti pe pans pou demenaze pou al res Cambodge. Sa pei-la ti ankor enn plas danzere pou reste, me mo ti kone ki parmi dis milyon abitan ki ena laba, bien tigit dimounn ti’nn tann bonn nouvel lor Rwayom Bondie. Dan sa lepok-la, ti ena zis enn sel kongregasion kot ti ena 13 proklamater dan sa pei-la. Premie fwa ki mo ti al Cambodge, mo ti ena 19 an. De-z-an apre, mo ti swazir pou al viv laba. Mo ti trouv enn travay a-mitan kot mo ti tradir ek ansegn Angle ek sa ti soutenir mwa dan mo servis. Avek letan, mo ti marye avek enn kikenn ki ti ena mem lobzektif ki mwa dan lavi. Ansam, nou finn bien kontan pou ed boukou Kanbodien pou voue zot lavi ar Jéhovah.

Jéhovah inn donn mwa ‘seki mo leker demande.’ (Ps. 37:4) Fer bann disip, se travay ki donn plis satisfaksion dan lavi. Sa fer 16 an depi ki mo pe servi dan Cambodge. Pandan sa bann lane-la, sa group 13 serviter Jéhovah la finn vinn 12 kongregasion ek 4 group izole!​—Rakonte par Jason Blackwell.