1, 2. Ki Rwayom Bondie pou fer, ek kifer nou kapav sir ki sa Rwayom-la pou vini?

 LOR enn montagn pre ar Capernaüm, dan printan lane 31 Nou Lepok, Jésus Christ ti ansegn so bann disip pou priye: “Ki to Rwayom vini.” (Mat. 6:10) Zordi, boukou dimounn doute ki Rwayom Bondie pou vini enn zour. Selman, nou sir ki Bondie pou reponn nou bann lapriyer sinser pou ki Rwayom Bondie vini.

² Gras-a so Rwayom, Jéhovah pou fer ki ena linite dan so fami ki dan lesiel ek lor later. Sa proze Bondie la pou realize. (Is. 55:10, 11) An realite, Jéhovah inn fini vinn Lerwa dan nou lepok! Bann levennman extraordiner ki’nn pase dan sa 100 dernie lane-la, prouv sa. Bondie pe realiz bann gran kitsoz pou so bann serviter ki pe servi Li par milyon. (Zek. 14:9; Rév. 15:3) Pourtan, ena enn diferans kan Labib dir ki Jéhovah vinn Lerwa ek kan Rwayom Bondie pou vini. Kouma sa de levennman-la zot diferan, ek ki lefe sa ena lor nou?

3. (a) Kan eski Jésus inn vinn Lerwa, ek ki kote? (b) Ki prev ou ena ki Rwayom Bondie inn etabli an 1914? (Get not.)

³ Ver lafin 19^e siek, bann serviter Bondie ti koumans konpran  enn profesi ki Daniel ti ekrir inn gagn plis ki 2,500 an: “Dan lepok sa bann lerwa-la, Bondie ki dan lesiel pou etabli enn rwayom ki zame pa pou detrir.” (Dan. 2:44) Bann Etidian Labib ti pas plizir dizenn lane pou anonse ki lane 1914 ti pou enn lane inportan. Dan sa lepok-la, boukou dimounn ti bien pozitif konsernan lavenir. Enn ekrivin ti ekrir: “Lemond ki ti existe an 1914 ti ranpli ar lespwar ek promes.” Selman, inpe plitar dan sa lane-la, kan Premie Lager Mondial ti koumanse, bann profesi Labib ti realize. Lafaminn, tranbleman-de-ter, maladi ek realizasion lezot profesi Labib ti prouve ki Jésus Christ ti’nn koumans regne dan lesiel antan ki Lerwa dan Rwayom Bondie an 1914. a Kan Jéhovah finn etabli so Garson antan ki Lerwa Mesianik, Jéhovah finn vinn Lerwa dan enn fason diferan.

4. Ki premie kitsoz Jésus ti fer kan li ti vinn Lerwa, ek ki li ti fer apre?

⁴ Premie kitsoz ki sa nouvo Lerwa-la ti fer, li ti lager kont Satan, pli gran Lennmi so Papa. Jésus ek so bann anz ti tir Satan Lediab ek so bann demon dan lesiel. Sa ti amenn enn gran lazwa dan lesiel, me bann maler lor later kouma zame pa finn ena avan. (Lir Révélation 12:7-9, 12.) Apre sa, Lerwa ti koumans pirifie, ansegn, ek organiz so bann serviter lor later pou fer volonte Bondie. Anou gete kouma zot inn les enn bon lexanp kan zot inn bien reazir dan sa trwa domenn-la.

5. Ki pirifikasion finn ena ant 1914 ek koumansman 1919?

⁵ Apre ki Jésus ti tir move linflians ki Satan ek so bann demon ti ena dan lesiel, Jéhovah ti donn li lord pou inspekte ek pou pirifie kondision spiritiel so bann disip lor later. Profet Malaki ti dekrir sa pirifikasion spiritiel la. (Mal. 3:1-3) Listwar montre ki sa ti arive ant 1914 ek koumansman 1919. b Pou nou kapav form parti dan fami iniversel Jéhovah, nou bizin prop lor plan spiritiel, setadir sin. (1 Pierre 1:15, 16) Fode pa nou les nou kontamine ar fos relizion ouswa ar politik.

6. Kouma eski nou gagn nouritir spiritiel, ek kifer sa nouritir-la bien inportan?

⁶ Apre, Jésus ti servi so lotorite antan ki Lerwa pou etabli “lesklav fidel ek saz.” Sa esklav-la ti bizin donn regilierman enn bon nouritir spiritiel tou bann ki form parti dan “sel troupo” ki anba proteksion Jésus. (Mat. 24:45-47; Jean 10:16) Depi 1919, avek fidelite sa esklav-la finn ranpli sa gran responsabilite-la, li finn nouri bann “domestik.” Sa esklav fidel la donn nou nouritir spiritiel an abondans pou nou lafwa vinn pli solid. Sa ed nou osi pou res prop lor plan spiritiel, fizik, dan nou kondwit ek dan nou fason panse. Sa nouritir-la ed nou ek prepar nou pou partisip dan travay pli inportan ki pe fer lor later, setadir pres bon nouvel lor Rwayom Bondie. Eski ou pe profit bien sa bann dispozision-la?

7. Ki travay inportan Jésus ti koumanse kan li ti lor later ek ziska kan sa travay-la pou kontigne?

⁷ Kan Jésus ti koumans so minister lor later, li ti anonse: “Mo bizin osi anons bon nouvel lor Rwayom Bondie dan lezot lavil, parski se pou sa ki finn avoy mwa.” (Luc 4:43) Pandan trwa-z-an  edmi, Jésus ti konsider so minister kouma kitsoz pli inportan dan so lavi. Li ti donn sa instriksion-la so bann disip: “Kan zot ale, prese ek dir: ‘Rwayom ki dan lesiel finn aprose.’” (Mat. 10:7) Apre so rezireksion, Jésus ti anonse ki so bann disip ti pou pres sa mesaz-la dan “rezion pli lwin lor later.” (Actes 1:8) Li ti promet zot ki li ti pou soutenir personelman sa travay inportan la ziska nou lepok.​—Mat. 28:19, 20.

8. Kouma Lerwa finn ankouraz so bann disip lor later pou prese?

⁸ Depi 1919, “bon nouvel lor Rwayom Bondie” inn ena enn pli gran sinifikasion. (Mat. 24:14) Jésus Christ ti pe regne dan lesiel, ek lor later li ti rasanble enn ti group disip ki li ti pirifie. Sa ti group-la ti fer tou seki zot kapav pou obeir komannman Jésus. Partou lor later, zot ti pres bonn nouvel konsernan Rwayom Bondie ki’nn etabli dan lesiel! (Actes 10:42) Par exanp, an Septam 1922, preske 20,000 dimounn ki ti soutenir Rwayom Bondie, ti asiste lasanble internasional ki ti fer dan Cedar Point, Ohio, an Amérique. Mazine ki kantite zot ti kontan kan Frer Rutherford ti fer diskour “Rwayom” ek ti dir: “Pran kont, Lerwa pe regne! Zot so bann mesaze. Alor, proklam, proklam, proklam Lerwa ek so rwayom.” Landemin, 2,000 dimounn parmi bann asistan, ti fer ziska 72 kilomet depi landrwa kot ti ena lasanble, pou sorti dan predikasion. Enn frer ki ti bien motive, ti dir: “Zame mo pou bliye lankourazman pou al proklam Rwayom [Bondie] ek zel ki sa lafoul-la ti ena.” Pa li tousel ki ti ena sa santiman-la.

9, 10. (a) Ki bann dispozision inn pran pou form bann proklamater? (b) Kouma eski personelman ou finn profit sa formasion-la?

⁹ An 1922, plis ki 17,000 proklamater ti pe pres dan 58 pei partou lor later. Selman, zot ti bizin gagn enn formasion. Dan premie siek, Lerwa ki Jéhovah ti swazir ti donn bann instriksion bien kler so bann disip lor ki kitsoz, ki kote ek kouma zot ti bizin prese. (Mat. 10:5-7; Luc 9:1-6; 10:1-11) Zordi osi parey, Jésus pe veye ki tou bann proklamater gagn bann instriksion ek tou seki zot bizin pou pres dan enn fason efikas. (2 Tim. 3:17) Atraver kongregasion, Jésus pe form so bann disip pou zot kapav prese. Enn fason ki li fer sa, se atraver Lekol Minister Teokratik, ki ena dan plis ki 111,000 kongregasion dan lemond. Plis ki set milyon proklamater pe profit sa linstriksion-la ek zordi zot bien ekipe pou prese ek pou ansegn “tou sort kalite dimounn.”​—Lir 1 Corinthiens 9:20-23.

¹⁰ Apar Lekol Minister Teokratik, ena osi lezot lekol Biblik, ki finn etabli pou donn enn formasion bann ansien, bann  pionie, bann frer selibater, bann koup, bann manb Komite Biro Nasional ek zot madam, bann sirveyan ek zot madam, ek bann misioner. c Enn klas zelev ki’nn asiste Lekol Biblik pou Bann Koup Kretien ti dir zot lapresiasion pou sa lekol-la: “Sa formasion spesial ki nou finn gagne la finn fer nou lamour pou Jéhovah vinn pli for ek finn bien ekip nou pou ed lezot.”

11. Kouma bann proklamater finn kapav kontign prese malgre lopozision?

¹¹ Satan, lennmi Bondie, trouv tou bann gran zefor ki bann proklamater pe fer pou prese ek pou ansegn Rwayom Bondie. Li servi bann latak direk ek osi bann latak sournwa pou anpes bann proklamater pres mesaz lor Rwayom Bondie. Me, tou bann zefor ki Satan pe fer pe tom dan delo. Jéhovah finn plas so Garson “pli lao ki tou gouvernman, tou lotorite, tou pouvwar ek tou dominasion.” (Éph. 1:20-22) Antan ki Lerwa, Jésus servi so lotorite pou protez ek pou gid so bann disip pou zot fer volonte so Papa. d So bann disip pe pres bon nouvel lor Rwayom Bondie ek plizir milyon dimounn sinser pe aprann pou ador Jéhovah. Nou ena vremem enn gran privilez pou partisip dan sa gran travay-la!

12. Dekrir sertin ameliorasion ki finn ena dan lorganizasion depi ki Rwayom Bondie inn etabli.

¹² Depi ki Rwayom Bondie inn etabli an 1914, Lerwa finn amelior fason ki bann serviter Bondie organize pou fer volonte so Papa. (Lir Isaïe 60:17.) An 1919, ti etabli enn direkter servis dan sak kongregasion pou diriz laktivite predikasion. An 1927, bann kongregasion ti koumans prese lakaz par lakaz regilierman dan Dimans. An 1931, bann serviter Jéhovah ti pran enn nom ki sorti dan Labib: Temwin Jéhovah, ek sa ti motiv zot pou fer plis dan predikasion. (Isaïe 43:10-12) Apartir 1938, ti nepli fer bann eleksion pou swazir bann frer ki ti pou responsab dan kongregasion. Okontrer, zot ti bizin ranpli bann kondision Biblik pou zot kapav nome ansien. An 1972, se enn Komite bann ansien ki ti ena responsabilite pou pran swin kongregasion olie ki enn sel frer. Tou bann ansien ek bann asistan ministeryel ti ankouraze pou “pran bien swin troupo Bondie ki’nn konfie zot.” (1 Pierre 5:2) An 1976, bann manb Komite Santral ti form parti dan sis diferan komite pou organiz  predikasion dan lemond antie. Depi sa, tigit par tigit, Jésus finn organiz so bann disip dan enn fason teokratik.

13. Kouma seki Rwayom Mesianik inn akonpli pandan 100 an, konsern ou?

¹³ Reflesi lor seki Lerwa Mesianik finn akonpli pandan 100 premie lane so regn. Li finn pirifie enn pep pou nom Jéhovah. Li finn diriz laktivite predikasion dan 239 pei ek li finn ansegn plizir milyon dimounn bann prinsip Jéhovah. Li finn etabli linite parmi plis ki set milyon disip, sakenn finn ofer zot lavi volonterman pou fer volonte so Papa. (Ps. 110:3) Vremem, Jéhovah finn fer bann kitsoz extraordiner atraver Rwayom Mesianik! Me ena ankor lezot levennman extraordiner ki pou arive dan lavenir.

14. (a) Ki nou demann Bondie pou fer kan nou priye: “Ki to Rwayom vini”? (b) Ki text pou lane 2014, ek kifer li bien apropriye?

¹⁴ Mem si Jéhovah finn fer so Garson Jésus Christ vinn Lerwa Mesianik an 1914, sa pa finn realiz net lapriyer ki nou fer pou ‘ki Rwayom Bondie vini.’ (Mat. 6:10) Labib ti anonse ki Jésus ti pou “al regne parmi [so] bann lennmi.” (Ps. 110:2) Bann gouvernman imin ki dirize par Satan ankor touzour opoze ar Rwayom Bondie. Kan nou priye pou ki Rwayom Bondie vini, nou pe demann Bondie ki Lerwa Mesianik ek bann dirizan ki pou regn ansam avek li, detrir tou bann gouvernman ek tou bann dimounn ki opoze ar Rwayom Bondie. Sa destriksion-la pou realiz Daniel 2:44 ki dir ki Rwayom Bondie “pou kraz tou sa bann rwayom-la ek li pou fini zot.” Lerla, tou bann lennmi politik sa Rwayom-la pou disparet. (Rév. 6:1, 2; 13:1-18; 19:11-21) Sa levennman-la pre pou arive. Alor, li bien apropriye ki nou text pou lane 2014 se Matthieu 6:10 ki dir: “Ki to Rwayom vini,” parski sa lane-la fer 100 an depi ki Rwayom Bondie inn etabli dan lesiel!

15, 16. (a) Ki bann levennman extraordiner pou ena pandan Regn Mil An Christ? (b) Ki dernie kitsoz Jésus pou fer antan ki Lerwa Mesianik, ek ki sinifikasion sa pou ena an rapor avek proze ki Jéhovah ena pou so kreasion?

¹⁵ Apre ki Jésus pou detrir bann lennmi Bondie, li pou zet Satan ek so bann demon dan labim pou mil an. (Rév. 20:1-3) San sa linflians demoniak-la, Rwayom Bondie pa pou tarde pou ed bann dimounn gagn bann bienfe ar sakrifis Jésus ek pou tir net bann konsekans ki nou gagne akoz pese ki Adam finn fer. Jésus pou resisit plizir milyon dimounn ki’nn mor ek pou organiz enn gran program dan lemond antie pou ansegn sa bann dimounn-la lor Jéhovah. (Rév. 20:12, 13) Later antie pou vinn enn Paradi parey kouma zardin Éden. Tou bann dimounn fidel pou vinn parfe.

¹⁶ Ver lafin Regn Mil An Christ, Rwayom Mesianik pou fini realiz so lobzektif. Lerla, Jésus pou remet Rwayom ar so Papa. (Lir 1 Corinthiens 15:24-28.) Li pou nepli neseser pou ena enn intermedier ant Jéhovah ek so bann zanfan lor later. Tou bann garson Bondie ki dan lesiel ek so bann zanfan lor later pou servi zot Papa ki dan lesiel, dan linite ek zot tou pou form parti dan so fami iniversel.

17. Ki ou bien deside pou fer an rapor avek Rwayom Bondie?

¹⁷ Bann levennman extraordiner ki finn pase pandan sa 100 an ki Rwayom Bondie finn regne la, donn nou lasirans ki Jéhovah pe kontrol tou ek ki so proze pou later pou realize. Anou kontign res fidel ek kontign proklam Lerwa ek so Rwayom. Nou sir ki biento Jéhovah pou reponn nou lapriyer: “Ki to Rwayom vini”!