1, 2. (a) Maryaz kisannla pou amenn enn gran lazwa dan lesiel? (b) Ki bann kestion nou pou examine?

 SA PRAN letan pou prepar enn maryaz. Me nou pou examinn enn maryaz bien spesial​—enn maryaz rwayal ki’nn pran apepre 2,000 pou prepare! Ler pe koste kot nouvo ek nouvel-marye pou selebre zot maryaz. Biento, partou dan pale Lerwa pou ena enn zoli lamizik, ek bann lafoul dan lesiel pou sante: “Loue Yah, parski Jéhovah nou Bondie ki Tou-Pwisan inn koumans regne! Anou montre nou lazwa ek montre ki nou bien kontan ek donn Li laglwar, parski maryaz Lagno inn arive ek so madam finn prepar limem.”​—Rév. 19:6, 7.

² Dan sa verse-la, “Lagno” se Jésus Christ. (Jean 1:29) Kouma li abiye pou so maryaz? Kisannla nouvel-marye? Kouma finn prepar nouvel-marye pou so maryaz? Kan pou ena sa maryaz-la? Pou ena lazwa dan lesiel pou sa maryaz-la. Me eski bann ki ena lesperans pou viv pou touletan lor later, zot osi zot pou dan lazwa? Nou bien anvi gagn repons sa bann kestion-la. Alor, anou kontign examinn Psaume 45.

3, 4. (a) Ki ekrivin psaume dir lor bann linz ki Nouvo-Marye mete pou so maryaz, ek ki kitsoz fer Lerwa-la pli kontan? (b) Kisannla “bann tifi bann lerwa” ek kisannla “larenn” ki partaz lazwa Nouvo-Marye?

³ Lir Psaume 45:8, 9. Jésus Christ, sa nouvo marye-la, met bann linz maryaz ki’nn fer pou enn Lerwa. So linz santi bon, parey kouma “bann pli bon parfin,” kouma par exanp myrrhe ek casse, ki ti parmi bann ingredian ki ti servi pou fer delwil sakre an Israël.​—Ex. 30:23-25.

⁴ Dan lesiel, ena enn zoli lamizik ki pe zwe dan pale sa Nouvo-marye-la ek sa fer li pli kontan amezir ki so maryaz pe koste. Li partaz so lazwa avek “larenn,” setadir parti lorganizasion Bondie ki dan lesiel kot ena osi bann anz. Psaume apel sa bann anz-la “bann tifi bann lerwa.” Li enn vre lazwa pou tann bann lavwa dan lesiel ki dir: “Anou montre nou lazwa ek montre ki nou bien kontan . . . parski maryaz Lagno inn arive”!

5. Kisannla sa ‘madam ki pou marye ar Lagno-la’?

⁵ Lir Psaume 45:10, 11. Nou finn trouve kisannla Nouvo-Marye, me kisannla nouvel-marye? Li pa enn dimounn, me li reprezant 144,000 Kretien ki Bondie inn swazir pou al dan lesiel. Jésus limem sef sa group Kretien-la. (Lir Éphésiens 5:23, 24.) Zot pou regne ansam avek li dan so Rwayom Mesianik. (Luc 12:32) Sa bann Kretien-la “kontign swiv Lagno ninport kot li ale.” (Rév. 14:1-4) Zot marye ar Lagno ek zot res avek li dan lesiel.​—Rév. 21:9; Jean 14:2, 3.

6. Kifer apel bann Kretien ki pou al dan lesiel “tifi lerwa,” ek kifer finn dir zot ‘bliye zot pep’?

⁶ Ekrivin sa psaume-la apel sa nouvel-marye-la “tifi” ek osi “tifi lerwa.” (Ps. 45:13) Kisannla sa ‘lerwa-la’? Se Jéhovah, parski Li adopte bann Kretien ki pou al dan lesiel kouma so “bann zanfan.” (Rom. 8:15-17) Sa bann Kretien-la pou al res dan lesiel antan ki nouvel-marye, alor zot finn gagn sa linstriksion-la: “Bliye to pep ek lakaz to papa [ki lor later].” Zot bizin “pans touzour bann kitsoz ki dan lesiel, pa bann kitsoz ki lor later.”​—Col. 3:1-4.

7. (a) Kouma Christ finn prepar so nouvel-marye? (b) Kouma nouvel-marye konsider so fitir mari?

⁷ Pandan bann siek, Christ finn prepar so nouvel-marye pou sa maryaz ki pou ena dan lesiel-la. Lapot Paul ti explike ki Christ “finn kontan kongregasion ek finn donn so lavi pou sov li, pou ki Christ kapav fer li vinn sin, pirifie li avek enn bin delo par mwayin laparol, pou ki Christ kapav prezant kongregasion devan limem dan tou so bote, san okenn tas, ni okenn rid, ni okenn kitsoz koumsa, me pou ki kongregasion-la sin ek san defo.” (Éph. 5:25-27) Lapot Paul ti dir bann Kretien ki ti ena lesperans pou al dan lesiel ek ki ti res dan ansien lavil Corinthe: “Mo zalou pou zot, enn zalouzi parey kouma Bondie ena; mo ti promet zot personelman an maryaz ar enn sel mari, pou ki mo prezant zot kouma enn vierz pou le-Christ.” (2 Cor. 11:2) Lerwa Jésus Christ bien kontan ki so fitir madam ena enn “bote” spiritiel. Nouvel-marye konsider Christ kouma so “segner” ek ‘prostern devan li.’

8. Kifer li apropriye ki ekrivin psaume dir ki sa nouvel-marye-la “extra zoli”?

⁸ Lir Psaume 45:13, 14a. Nouvel-marye “extra zoli” pou sa maryaz  rwayal-la. Révélation 21:2 konpar sa nouvel-marye-la ar enn lavil, Nouvel Jérusalem, ek “ki’nn fer li zoli pou so mari.” Sa lavil ki dan lesiel-la ena “laglwar Bondie” ek li briye parey “kouma enn pier ki ena boukou valer, kouma enn pier jaspe ki briye kouma kristal.” (Rév. 21:10, 11) Liv Révélation dekrir dan enn zoli fason gran bote ki Nouvel Jérusalem ena. (Rév. 21:18-21) Li pa etonan ki ekrivin psaume dir ki sa nouvel-marye-la “extra zoli”! Apre tou, se dan lesiel ki pe fer sa maryaz rwayal la.

9. Devan ki “lerwa” finn amenn nouvel-marye, ek kouma nouvel-marye abiye?

⁹ Finn amenn nouvel-marye kot Nouvo-Marye​—Lerwa Mesianik. Li finn prepar nouvel-marye ek ‘finn pirifie li avek enn bin delo par mwayin laparol.’ Nouvel-marye “sin ek san defo.” (Éph. 5:26, 27) Li osi li bizin bien abiye pou sa lokazion-la. Ek vremem li’nn bien abiye! Wi, “so linz dekore ar lor,” ek “li pou met bann linz ki’nn bien brode kan pou amenn li devan lerwa.” Pou maryaz Lagno, “finn permet li pou met enn linz an lin ki fin, ki briye ek ki pir​—parski lin fin reprezant bann aksion ki bann sin inn fer avek zistis.”​—Rév. 19:8.

10. Kan eski pou ena maryaz Lagno?

¹⁰ Lir Révélation 19:7. Kan eski pou ena maryaz Lagno? Mem si sa verse-la dir ki “so madam inn prepar li” pou maryaz, bann verse ki ena apre pa dekrir sa maryaz-la. Okontrer zot koz lor dernie parti gran detres. (Rév. 19:11-21) Eski sa vedir ki pou ena sa maryaz-la avan ki Lerwa konplet so viktwar? Non. Bann levennman ki anonse dan liv Révélation pa’nn ekrir dan lord ki zot pou arive. Dan Psaume 45, Lerwa Jésus Christ met so lepe dan so sintir ek ‘gagn laviktwar’ lor so bann lennmi, ek apre sa ena maryaz rwayal.​—Ps. 45:3, 4.

11. Dan ki lord Christ pou konplet so viktwar?

¹¹ Alor, dapre Labib bann levennman pou ariv dan sa lord-la: Premierman, pou ena destriksion “gran prostitie,” ki Labib apel Gran Babylone, setadir tou bann fos relizion. (Rév. 17:1, 5, 16, 17; 19:1, 2) Apre sa, Christ pou detrir leres move lemond Satan dan lager Har-Maguédôn, “lager gran zour Bondie Tou-Pwisan.” (Rév. 16:14-16; 19:19-21) Finalman, Lerwa-Gerye pou konplet so viktwar kan li pou zet Satan ek so bann demon dan labim, zot pou inaktif, setadir ki zot pa pou kapav fer personn ditor.​—Rév. 20:1-3.

12, 13. (a) Kan eski pou ena maryaz Lagno? (b) Dan lesiel, kisannla pou kontan kan pou ena sa maryaz-la?

¹² Bann Kretien ki pou al regn avek Jésus ek ki mor pandan prezans Christ, zot resisite pou al dan lesiel. Enn sertin moman apre destriksion Gran Babylone, Jésus pou rasanble avek li tou bann manb 144,000 ki pou ankor lor later. (1 Thess. 4:16, 17) Alor, avan lager Har-Maguédôn, tou bann manb 144,000 pou dan lesiel. Apre sa lager-la, pou ena maryaz Lagno. Sa pou vremem enn levennman bien zwaye! Révélation 19:9 dir: “Bann ki invite pou repa maryaz Lagno, zot ere.” Wi, bann manb 144,000 pou vremem dan lazwa. Ek Nouvo-Marye pou extra kontan ki tou bann ki pou regn ansam avek li pou ‘manze ek bwar lor so latab dan so Rwayom’ dan enn fason sinbolik. (Luc 22:18, 28-30) Me selman, pa zis Nouvo-Marye ek nouvel-marye ki pou dan lazwa kan pou ena sa maryaz-la.

¹³ Parey kouma nou ti trouve avan,  bann lafoul dan lesiel pou sante: “Anou montre nou lazwa ek montre ki nou bien kontan ek donn Li [Jéhovah] laglwar, parski maryaz Lagno inn arive ek so madam finn prepar limem.” (Rév. 19:6, 7) Me, ki nou kapav dir lor bann serviter Jéhovah lor later? Eski zot osi zot pou partaz sa gran lazwa-la?

14. Kisannla “bann kamarad vierz” nouvel-marye ki mansione dan Psaume 45?

¹⁴ Lir Psaume 45:12, 14b, 15. Profet Zekaria ti anonse ki dan lepok lafin, bann dimounn dan bann nasion pou kontan servi Jéhovah ansam avek bann manb Israël spiritiel ki ankor lor later. Li ti ekrir: “Dan sa lepok-la dis zom dan tou lang bann nasion pou trap, wi, zot pou trap linz enn Zwif bien for, ek zot pou dir: ‘Nou anvi al avek zot parski nou finn tann dir ki Bondie avek zot.’” (Zek. 8:23) Psaume 45:12 koz lor sa “dis zom” sinbolik-la kouma “tifi Tyr” ek “bann zom ki pli ris.” Zot donn bann Kretien ki ena lesperans pou al dan lesiel, bann kado, ek ‘rod faver’ ek led spiritiel sa bann Kretien-la. Depi 1935, bann Kretien ki ena lesperans pou al dan lesiel ek ki ankor later, ‘finn amenn plizir milyon dimounn ver lazistis.’ (Dan. 12:3) Sa bann kamarad ki fidel anver bann Kretien ki ena lesperans pou al dan lesiel la, finn pirifie zot lavi, ek zot vinn bann vierz spiritiel. “Bann kamarad vierz” sa nouvel-marye-la finn vwe zot lavi ar Jéhovah ek finn montre ki zot bann fidel serviter Lerwa Jésus Christ.

15. Kouma “bann kamarad vierz” lamarye inn travay ansam avek bann ki ena lesperans pou al dan lesiel?

 ¹⁵ Bann Kretien ki ena lesperans pou al dan lesiel bien rekonesan anver sa ‘bann kamarad vierz-la’ parski zot bien zele pou pres “bon nouvel lor Rwayom” partou lor later. (Mat. 24:14) Pa zis “lespri ek lamarye [ki] kontign dir: ‘Vini!’” me osi bann ki tann sa, dir: “Vini!” (Rév. 22:17) Wi, bann “lezot brebi” tann bann Kretien ki pou al dan lesiel dir: “Vini!” ek ansam avek bannla, zot dir: “Vini!” ar tou bann dimounn ki res lor later.​—Jean 10:16.

16. Ki privilez Jéhovah inn donn bann manb lezot brebi?

¹⁶ Bann Kretien ki ena lesperans pou al dan lesiel, kontan bann manb lezot brebi. Zot bien kontan ki Jéhovah inn donn osi bann lezot brebi privilez pou partisip dan lazwa ki pou ena kan Lagno pou marye. Liv Psaume dir ki ti ‘pou amenn sa bann kamarad vierz-la avek enn gran lazwa.’ Wi, bann manb lezot brebi pou partisip dan lazwa ki pou ena dan fami iniversel Jéhovah kan pou ena maryaz Lagno dan lesiel. Alor, li apropriye ki dan liv Révélation, bann manb “gran lafoul” “pe deboute devan tronn ek devan Lagno.” Zot pe ofer Jéhovah enn servis sakre lor later, dan lakour so gran tanp spiritiel. ​—Rév. 7:9, 15.

17, 18. Kouma maryaz Lagno pou amenn bann bienfe, ek pou kisannla Christ pou vinn enn papa pandan Regn Mil An?

¹⁷ Lir Psaume 45:16. “Bann kamarad vierz” nouvel-marye pou ena ankor plis lazwa kan zot pou trouv bann bienfe ki sa maryaz-la pou amene dan lemond nouvo. Lerwa Jésus Christ pou tourn so latansion ver later ek li pou resisit so bann “anset” ki pou vinn so “bann garson.” (Jean 5:25-29; Héb. 11:35) Li pou etabli sertin parmi zot kouma “bann prins partou lor later.” Pena dout ki Christ pou etabli sertin parmi bann ansien ki fidel zordi, pou zot pran latet dan lemond nouvo.​—Is. 32:1.

¹⁸ Pandan Regn Mil An, Christ pou vinn enn papa pou bann lezot dimounn osi. An realite, se tou bann dimounn ki ena lafwa dan sakrifis Jésus ki pou gagn lavi eternel. (Jean 3:16) Lerla, Christ pou vinn zot “Papa eternel.”​—Is. 9:6, 7.

19, 20. Kouma bann levennman ki mansione dan Psaume 45 konsern tou bann Kretien zordi?

¹⁹ Lir Psaume 45:1, 17. Wi, bann levennman ki ena dan Psaume 45 konsern tou bann Kretien. Bann Kretien ki ena lesperans pou al dan lesiel extra kontan ki biento zot pou al zwenn zot bann frer ek Jésus Christ, Nouvo-Marye, dan lesiel. Bann lezot brebi santi zot pouse pou soumet ankor plis ar zot gran Lerwa. Zot bien rekonesan pou privilez ki zot ena pou travay ansam avek bann Kretien ki ena lesperans pou al dan lesiel, me ki ankor lor later. Apre zot maryaz, Christ ek bann ki pou regn ansam avek li, pou fer bann dimounn ki res lor later gagn bann benediksion ki zot pa kapav mem mazine.​—Rév. 7:17; 21:1-4.

²⁰ Pandan ki nou pe atann realizasion bann profesi lor Lerwa Mesianik, eski nou pa santi nou pouse pou ‘fer konn so nom’? Alor, anou kontigne loue nou Lerwa “touletan.”