1. Bondie inn kree nou dan so resanblans, alor, ki kapasite nou ena?

 “SA GARSON-LA resanble net so papa.” Souvan nou tann bann dimounn dir sa kan zot trouv bann zanfan resanble zot paran. Apre tou, bann zanfan gagn bann kalite ek bann manier zot paran ek resanble zot. Jéhovah, nou Papa ki dan lesiel, Limem ki’nn donn nou lavi. (Ps. 36:9) Antan ki so bann zanfan, nou resanble Li dan enn sertin fason. Li finn kree nou dan so resanblans, akoz sa nou ena kapasite pou rezone, pou pran bann desizion ek pou devlop bann bon lamitie.​—Gen. 1:26.

2. Kouma Jéhovah kapav vinn nou Kamarad?

² Jéhovah kapav vinn nou pli bon Kamarad. Sa kalite lamitie-la li baze lor lamour ki Bondie ena pou nou ek lor lafwa ki nou ena an Li ek an so Garson. Jésus ti dir: “Bondie finn telman kontan lemond ki Li finn donn so sel Garson ki Li finn kree direk, pou ki tou seki ena lafwa an li pa detrir, me gagn lavi eternel.” (Jean 3:16) Ena lexanp boukou dimounn ki finn ena bann relasion bien pros avek Jéhovah. Anou examinn de lexanp ladan.

3, 4. Konsernan lamitie avek Jéhovah, ki diferans ti ena ant Abraham ek so bann desandan?

³ Kan Jéhovah ti koz lor sef fami ek anset bann Izraelit, Li ti apel li “Abraham, mo kamarad.” (Is. 41:8) Nou trouv sa osi dan 2 Chroniques 20:7 kot Labib apel Abraham kamarad Bondie.  Kouma sa zom fidel la inn kapav gard enn lamitie solid avek so Kreater? Se gras-a so lafwa.​—Gen. 15:6; lir Jacques 2:21-23.

⁴ O-koumansman, Jéhovah ti Papa ek Kamarad bann desandan Abraham ki ti vinn nasion Israël. Malerezman, zot ti perdi zot lamitie avek Bondie. Kifer? Parski zot ti nepli ena lafwa dan bann promes Jéhovah.

5, 6. (a) Kouma Jéhovah inn vinn ou Kamarad? (b) Ki bann kestion li bon nou poz noumem?

⁵ Plis ou pou aprann lor Jéhovah, plis ou lafwa pou grandi ek ou lamour pou Li pou vinn pli for. Mazinn lepok kan ou ti aprann ki Bondie Li enn Kikenn ki reel ek ki ou ti kapav devlop enn gran lamitie avek Li. Ou ti aprann osi ki nou tou nou finn ne inparfe akoz dezobeisans Adam. Ou ti konpran ki limanite an zeneral inn elwagne ar Bondie. (Col. 1:21) Ou ti realize ki nou Papa dan lesiel Li pa lwin ar nou, me ki Li interese ar nou. Kan nou ti aprann ki Jéhovah inn donn so Garson an sakrifis, ek kan nou ti koumans ena lafwa dan sa sakrifis-la, nou ti devlop lamitie avek Bondie.

⁶ Asterla, kan nou reflesi lor lepase, kitfwa nou kapav demann noumem: ‘Eski mo pe kontign amelior mo lamitie avek Bondie? Eski mo ena enn gran konfians an Li, ek eski mo lamour pou mo bon Kamarad, Jéhovah, pe ogmante toulezour?’ Dan lepase, ti ena enn lot dimounn ki ti ena gran lamitie avek Jéhovah, li ti apel Guidéôn. Asterla, anou gete ki nou kapav aprann lor li ek kouma nou kapav swiv so bon lexanp.

7-9. (a) Ki lexperyans extraordiner Guidéôn ti fer, ek ki lefe sa ti ena lor li? (Get zimaz dan koumansman lartik.) (b) Kouma nou kapav vinn kamarad ar Bondie?

⁷ Ziz Guidéôn ti servi Jéhovah pandan enn lepok difisil apre ki bann Izraelit ti rant dan la Terre Promise. Juges sapit 6 rakonte kouma anz Jéhovah ti vizit Guidéôn dan Ophra. Sa lepok-la, bann Madianit ti enn menas pou bann Izraelit ek plizir fwa zot ti anvayir pei Israël. Akoz sa, Guidéôn pa ti pe bat dible dan enn karo an plener, me plito dan enn preswar divin kot li ti pou kapav kasiet bann lagrin-la bien vit. Guidéôn ti etone kan enn anz ti aparet ar li ek ti apel li “gran gerye.” Li ti demann anz-la si vremem Jéhovah ti pou ed zot sa fwa-la, parey kouma Li ti sov bann Izraelit dan l’Égypte. Anz-la ti koz pou Jéhovah ek li ti rasir Guidéôn ki Jéhovah ti pou ed li.

⁸ Guidéôn ti demann limem kouma li ti pou kapav “sov Israël dan lame Madiân.” Repons ki li ti gagne ti bien kler. Jéhovah ti dir li: “Parski mo pou avek twa, ek to pou touy bann Madianit koumadir zot ti enn sel zom.” (Juges 6:11-16) Kitfwa ki Guidéôn ti pe demann limem kouma sa ti pou arive ek li ti demann Bondie enn sign. Remarke ki dan sa konversasion-la, Guidéôn pa ti ena okenn dout ki Bondie ti enn Kikenn ki reel.

⁹ Seki ti arive apre, ti fortifie lafwa Guidéôn ek ti fer li vinn pli pros ar Bondie. Guidéôn ti prepar enn repa ek li ti donn sa, sa anz-la. Anz-la ti fer enn mirak, kan li ti tous sa repa-la avek so baton, repa-la ti brile. Lerla, Guidéôn ti konpran ki sa anz-la ti enn reprezantan Jéhovah. Guidéôn ti per ek li ti kriye: “Ayo, Souverin Segner Jéhovah, parski mo finn trouv anz Jéhovah anfas!” (Juges 6:17-22) Me eski sa lexperyans-la ti afebli lamitie ki Guidéôn ti ena pou Jéhovah? Non! Se lekontrer ki’nn arive. Guidéôn ti aprann pou konn Jéhovah ek li ti santi li anpe avek Bondie. Nou konn sa akoz lotel ki Guidéôn ti fer dan sa landrwa-la, li ti apel sa “Jéhovah-Shalom.” Sa nom-la vedir “Jéhovah Li Lape.” (Lir Juges 6:23, 24; not) Kan nou medit lor seki Jéhovah fer pou  nou sak zour, nou realize ki Li enn vre Kamarad. Kan nou priye Bondie regilierman, nou resanti plis lape ek nou lamitie avek Li vinn pli for.

10. Dapre Psaume 15:3, 5, ki bann kondision nou bizin ranpli si nou anvi vinn bann kamarad Jéhovah?

¹⁰ Selman, ena bann kondision ki nou bizin ranpli si nou anvi ki Jéhovah vinn nou Kamarad. Dan Psaume 15, David ti montre dan enn kantik seki nou bizin fer pou ‘invite dan latant Jéhovah,’ setadir pou vinn so kamarad. (Ps. 15:1) Nou get de parmi sa bann kondision-la: Pa koz manti pou gat repitasion nou prosin ek azir dan enn fason onet dan tou domenn nou lavi. Konsernan enn invite dan latant Jéhovah, David ti dir: “Li pa koz manti avek so lalang pou gat repitasion personn . . . Li pa aksepte gous pou fer ditor enn inosan.”​—Ps. 15:3, 5.

11. Kifer fode pa nou koz manti pou gat repitasion personn?

¹¹ Dan enn lot psaume, David ti donn sa lavertisman-la: “Vey to lalang pou pa dir seki move.” (Ps. 34:13) Si nou pa swiv sa konsey-la, sa pou fer ditor nou relasion avek Jéhovah, nou Papa ki dan lesiel. An realite, koz manti pou gat repitasion lezot form parti dan personalite Satan, gran lennmi Jéhovah. Lexpresion “Diab” sorti dan enn mo Grek ki vedir “kalomniater,” setadir enn kikenn ki koz manti pou gat repitasion so prosin. Kan nou fer atansion ar seki nou dir ar lezot ek lor lezot, sa pou ed nou pou res pros ar Jéhovah. Nou bizin sirtou fer atansion ar latitid ki nou ena anver bann frer ki Jéhovah inn etabli dan kongregasion.​—Lir Hébreux 13:17; Jude 8.

12, 13. (a) Kifer nou bizin onet dan tou kitsoz? (b) Kan nou onet, ki lefe sa ena lor lezot?

¹² Bann serviter Jéhovah ena repitasion ki zot bann dimounn onet; zot pa explwat zot prosin. Lapot Paul ti ekrir: “Kontign priye pou nou, parski nou sir ki nou ena enn konsians drwat, akoz nou anvi res onet dan tou kitsoz.” (Héb. 13:18) Nou pa abiz lor nou bann frer, parski nou bien deside pou “res onet dan tou kitsoz.” Par exanp, si zot travay pou nou, nou pou tret zot bien ek nou pou pey zot an-akor avek laranzman ki nou finn fer avek zot. Antan ki Kretien, nou pou azir dan enn fason onet avek nou bann anplwaye ek avek ninport kisannla. Ek si nou travay pou enn Kretien, nou bizin fer atansion ki nou pa abiz lor so bonte ek rod bann faver spesial.

¹³ Souvan bann dimounn dan lemond felisit bann Temwin Jéhovah parski zot onet. Par exanp, direkter enn gran konpagni konstriksion ti remarke ki bann Temwin Jéhovah tini zot parol, li ti dir: “Zot touletan fer seki zot dir.” (Ps. 15:4) Enn kondwit onet koumsa ed nou pou gard nou lamitie avek Jéhovah. Anplis, sa donn loner nou Papa ki dan lesiel.

14, 15. Dan predikasion, kouma nou kapav ed bann dimounn pou vinn bann kamarad Jéhovah?

¹⁴ Mem si zot krwar ki Bondie existe, boukou dimounn ki nou zwenn dan predikasion pa konsider Li kouma zot pli bon Kamarad. Kouma nou kapav ed zot? Remark bann instriksion ki Jésus ti donn 70 parmi so bann disip kan li ti avoy zot prese de par de: “Ninport ki kote, kan zot rant dan enn lakaz, dabor zot bizin dir: ‘Lape dan sa lakaz-la.’ Ek si la ena enn dimounn ki kontan lape, zot lape pou repoz lor li. Me sinon, lape-la pou retourn ar zot.” (Luc 10:5, 6) Nou kapav atir enn dimounn ver laverite si nou montre nou amikal. Si nou bon anver bann dimounn  ki opoze ar nou, sa kapav kalme zot ek kitfwa zot pou pli dispoze pou ekout nou enn lot fwa.

¹⁵ Kan nou zwenn bann dimounn ki bien relizie ouswa ki swiv bann tradision ki pa Biblik, nou kontign manifeste enn latitid amikal ek nou favoriz lape. Nou bien akeyir tou dimounn ki vinn renion, sirtou bann dimounn ki dekouraze ar bann kondision ki ena dan lemond zordi ek ki anvi aprann plis lor Bondie ki nou adore. Nou trouv boukou lexanp koumsa dan seri lartik “Labib Sanz Bann Dimounn.”

16. Dan ki sans Jéhovah konsider nou kouma so bann kamarad ek bann ki “travay ansam” avek Li?

¹⁶ Bann dimounn ki travay ansam, souvan vinn bann bon kamarad. Jéhovah konsider tou bann ki’nn pran batem kouma so bann kamarad ek osi bann ki “travay ansam” avek Li. (Lir 1 Corinthiens 3:9.) Kan nou partisip dan predikasion ek kan nou fer bann disip, nou aprann plis lor bann kalite extraordiner nou Papa ki dan lesiel. Nou trouve kouma so lespri sin ed nou pou pres bon nouvel lor Rwayom Bondie.

17. Kouma nouritir spiritiel ki nou gagne dan nou bann lasanble montre ki Jéhovah Li nou Kamarad?

¹⁷ Plis nou partisip dan predikasion, plis nou santi nou pros avek Jéhovah. Par exanp, nou trouve kouma Jéhovah anpes nou bann adverser pou aret laktivite predikasion. Reflesi lor seki’nn arive dan bann lane ki’nn pase. Eski nou pa finn trouve kouma Bondie inn gid nou? Nou kontan ki Jéhovah kontign ansegn nou atraver bann renion ek bann piblikasion. Dan bann lasanble nou trouve kouma Jéhovah konpran nou bann problem ek Li kone ki nou bizin. Apre enn lasanble, enn fami ti ekrir enn let pou exprim zot rekonesans. Zot ti dir: “Sa program-la ti vremem tous nou leker. Nou ti santi ki kantite Jéhovah kontan sakenn parmi nou ek ki Li anvi nou reisi.” Enn koup ki sorti l’Allemagne ek ki ti asiste enn lasanble spesial an Irlande, ti apresie ki bann frer ti bien akeyir zot ek ti pran zot kont. Zot ti dir osi: “Me nou pli gran remersiman al ver Jéhovah ek so Lerwa Jésus Christ. Zot finn invit nou pou form parti dan so pep kot ena vremem linite. Nou pa pe zis koz lor linite, me nou pe viv sa toulezour. Bann lexperyans ki nou’nn fer kan nou ti al lasanble spesial dan Dublin pou touletan rapel nou ki nou ena enn gran privilez pou servi nou gran Bondie ansam avek zot.”

18. Ki nou kapav demann noumem konsernan nou kominikasion avek Jéhovah?

¹⁸ Bann lamitie vinn pli solid kan ena enn bon kominikasion. Bann rezo sosial ek bann sms inn vinn bien popiler dan nou lepok kot bann dimounn servi Internet ek lezot teknolozi pou kominike. Me an konparezon, kouma ou personelman ou kominikasion ete avek Jéhovah, ou pli bon Kamarad? Li vre ki Jéhovah, Li enn Bondie ki “ekout lapriyer.” (Ps. 65:2) Me ou, eski souvan ou pran letan pou koz avek Li?

19. Ki led nou ena si nou trouv sa difisil pou ouver nou leker ar Jéhovah?

¹⁹ Sertin serviter Bondie trouv sa difisil pou ouver zot leker ek pou exprim zot bann santiman profon. Me pourtan, se sa ki Jéhovah anvi nou fer kan nou priye Li. (Ps. 119:145; Lam. 3:41) Mem si li difisil pou nou trouv bann mo pou exprim nou bann santiman, Bondie kapav ed nou. Paul ti ekrir bann Kretien dan Rome: “Problem ki nou ena, se ki nou pa kone kouma pou priye pou sa kitsoz ki nou bizin la, me lespri sin limem pled pou nou avek bann soupir ki nou pa kapav exprime an parol. Me sa kikenn ki examinn leker la konn bann panse ki dan nou lespri, parski se dapre volonte Bondie ki li pled pou bann sin.” (Rom. 8:26, 27) Kan nou medit lor bann parol ki trouv dan bann liv Labib kouma Job, Psaume, ek Proverbes, sa pou ed nou pou exprim nou bann santiman pli profon avek Jéhovah.

20, 21. Ki rekonfor nou gagne kan nou lir seki Paul ti dir dan Philippiens 4:6, 7?

²⁰ Kan nou gagn bann problem grav, li bon nou rapel bann parol ki Paul ti dir bann Kretien dan lavil Philippes: “Pa trakase pou okenn kitsoz, me dan tou kitsoz, par lapriyer ek siplikasion avek bann remersiman, demann Bondie seki zot bizin.” Nou pou resanti enn vre rekonfor kan nou priye Jéhovah dan sa fason-la. Paul ti azoute: “Lape Bondie ki depas tou panse, pou protez zot leker ek zot lespri, par mwayin Christ Jésus.” (Phil. 4:6, 7) Nou bizin touletan ena rekonesans pou ‘lape ki Bondie donn nou,’ enn lape extraordiner ki vremem protez nou leker ek nou lespri.

²¹ Lapriyer ed nou pou devlop lamitie avek Jéhovah. Alor, anou “priye touletan.” (1 Thess. 5:17) Nou swete ki sa letid ki nou finn fer la kontign fortifie nou lamitie avek Bondie ek pous nou pou fer seki Li demande. Anou pran letan pou reflesi lor bann benediksion ki nou gagne gras-a Jéhovah, ki vremem nou Papa, nou Bondie, ek nou Kamarad.