Anou mazinn enn lot senario: Enn koup dan kongregasion invit enn mama ki elve tousel so de zanfan pou pas enn lasware avek zot. Kan mama-la dir sa so bann zanfan, zot extra kontan. Zot atann avek inpasians kan sa lasware-la pou arive. Selman lavey, sa koup-la dir mama-la ki finn ariv enn sitiasion ki zot pa ti atann ek ki zot pou bizin kennsel linvitasion-la. Plitar, mama-la aprann pou ki rezon sa koup-la ti kennsel zot linvitasion. Apre ki sa koup-la ti invit li, zot ti gagn linvitasion ar zot bann kamarad pou sa mem lasware-la ek zot ti aksepte.

Biensir, antan ki Kretien nou bizin tini nou parol. Fode zame nou parol li koumadir “‘wi’ ek pourtan ‘non.’” (2 Cor. 1:18) Selman, parey kouma sa de lexanp-la montre, pa tou sitiasion ki parey. Parfwa li paret ki nou pena swa ek ki nou bizin kennsel laranzman ki nou finn fer. Enn fwa lapot Paul ti dan enn sitiasion koumsa.

An 55 Avan Nou Lepok, kan Paul ti dan Éphèse pandan so trwaziem vwayaz misioner, li ti ena lintansion pou travers La Mer Égée pou al Corinthe ek apre, pou al Macédoine. Kan li ti pou retourn Jérusalem, li ti ena lintansion pou vizit enn deziem fwa kongregasion Corinthe, sirman pou ramas bann don ki zot ti fer pou bann frer dan Jérusalem. (1 Cor. 16:⁠3) Nou trouv sa bien kan nou lir 2 Corinthiens 1:​15, 16 ki dir: “Se avek sa konfians-la ki mo ti ena lintansion pou vinn kot zot avan, pou ki enn deziem fwa zot gagn lazwa; parski mo ti ena lintansion pou vizit zot avan ki mo al Macédoine, ek kan mo sorti Macédoine, pou retourn kot zot, ek apre, zot ti pou ed mwa pou al Judée.”

Li paret ki Paul, dan enn let ki li ti avoye avan, ti inform bann frer dan Corinthe lor so proze. (1 Cor. 5:⁠9) Selman, enn tipe apre  ki li ti ekrir sa let-la, Paul ti aprann atraver bann manb fami Chloé ki ti ena bann gran dezakor dan kongregasion. (1 Cor. 1:​10, 11) Paul ti desid pou sanz proze ki li ti ena, ek li ti ekrir let ki zordi apel 1 Corinthiens. Dan sa let-la, Paul ti donn bann konsey ek li ti disiplinn bann frer dan Corinthe avek amour. Li ti osi dir zot ki li ti sanz proze, ek li ti inform zot ki dabor li ti pou al Macédoine ek apre, li ti pou vinn Corinthe.​—⁠1 Cor. 16:​5, 6. a

Li paret ki, kan bann frer dan Corinthe ti gagn so let, sertin parmi “bann siper-zapot” dan kongregasion ti akiz Paul ki li enn dimounn ki pa ti tini parol, ki li pa ti tini so bann promes. Pou defann li, Paul ti demande: “Alor, kan mo ti ena sa lintansion-la, mo pa ti pran sa kouma enn kitsoz banal, pa vre? Ouswa, eski mo desid bann kitsoz dapre laser, pou ki mo dir ‘Wi, wi’ ek apre mo dir ‘Non, non’?”​—⁠2 Cor. 1:17; 11:⁠5.

Nou kapav demande: ‘Dan sa sirkonstans-la eski vremem lapot Paul ti “pran sa kouma enn kitsoz banal”?’ Non, nou pa kapav pans sa! Mo ki’nn tradir par “banal” vedir ki pa serye, koumadir enn dimounn ki nou pa kapav fer konfians ek ki pa tini so bann promes. Paul ti demande: “Eski mo desid bann kitsoz dapre laser?” Par sa kestion-la, bann Kretien dan Corinthe ti bizin konpran ki si Paul ti desid pou sanz so proze, se pa parski li ti enn dimounn ki lezot pa ti kapav fer konfians.

Paul ti reponn sa akizasion-la dan enn fason bien ferm. Li ti ekrir: “Me osi vre ki Bondie Li fidel, parol ki nou finn anons zot, li pa ‘wi’ ek pourtan ‘non.’” (2 Cor. 1:18) Pena dout ki Paul ti pran kont lintere so bann frer ek ser dan Corinthe kan li ti sanz so proze. Dan 2 Corinthiens 1:​23, nou lir ki “se pou zot prop di-bien” ki li ti sanz proze ki li ti ena o-koumansman pou al Corinthe. Wi, li ti donn zot lokazion pou regle bann problem ki ti ena dan kongregasion, avan li vinn kot zot. Parey kouma li ti swete, kan li ti dan Macédoine, Paul ti aprann par Tite ki so let ti’nn vremem fer bann Korintien sagrin ek ti pous zot pou repanti, ek sa ti fer li bien kontan.​—⁠2 Cor. 6:11; 7:​5-7.

Sertin ti akiz Paul ki li ti enn dimounn ki pa ti tini parol. Sa akizasion-la ti kapav fer krwar ki, si dan lavi toulezour, pa ti kapav kont lor li pou tini so parol, sa vedir ki pa ti kapav osi kont lor li konsernan so predikasion. Selman, Paul ti rapel bann Kretien dan Corinthe ki li ti pres Jésus Christ ar zot. “Garson Bondie, Jésus Christ, ki nou finn anonse parmi zot setadir par mwa ek Silvain ek Timothée, pa’nn vinn ‘wi’ ek pourtan ‘non,’ me ‘wi’ inn vinn ‘wi’ dan so ka.” (2 Cor. 1:19) Eski dan sertenn fason, Jésus Christ, Lexanp ki Paul ti swiv, ti’nn deza montre ki pa ti kapav fer li konfians? Non, zame! Toutlong so lavi ek so minister, Jésus ti touletan dir laverite. (Jean 14:6; 18:37) Si seki Jésus ti prese ti laverite ek bann Kretien ti kapav ena konfians ladan, ek ki Paul ti pres mem mesaz, alor bann Kretien ti kapav ena konfians lor seki Paul ti prese osi.

Biensir, Jéhovah Li “Bondie laverite.” (Ps. 31:⁠5) Nou trouv sa par seki Paul ekrir apre: “Ninport ki kantite promes ki Bondie inn fer, zot inn vinn ‘wi’ par so mwayin,” setadir par Christ. Fidelite ki Jésus ti montre lor later, inn efas tou dout ki ti kapav ena konsernan bann promes Jéhovah. Paul kontigne: “Alor, se osi par li [Jésus] ki dir Bondie ‘Amen,’ ek sa fer li gagn laglwar par nou mwayin.” (2 Cor. 1:20) Jésus li enn garanti ouswa “Amen,” ki tou bann promes ki Jéhovah inn fer pou realize!

Parey kouma Jéhovah ek Jésus Christ touletan dir laverite, alor Paul osi touletan  ti dir laverite. (2 Cor. 1:19) Li ti touletan tini so parol, li pa ti fer bann promes “dapre laser.” (2 Cor. 1:17) Okontrer, li “ti mars par lespri.” (Gal. 5:16) Dan so rapor avek lezot, li ti pran kont zot lintere. So Wi ti vedir Wi!

Zordi, li normal pou bann dimounn ki pa viv an akor avek bann prinsip Labib fer bann promes ek apre pa tini zot si ariv enn ti problem ouswa si enn sitiasion pli interesan prezant devan zot. Dan biznes, “wi” pa vedir touletan “wi,” mem si finn sign bann lakor. Boukou nepli konsider maryaz, ki enn langazman ant de dimounn, kouma enn langazman pou lavi. Okontrer, divors inn bien ogmante, ek sa montre ki boukou konsider maryaz kouma enn badinaz, ki zot kapav kase kan zot anvi.​—⁠2 Tim. 3:​1, 2.

Ki ou kapav dir lor ou? Eski ou Wi vedir Wi? Li vre ki kouma nou ti trouve dan koumansman lartik, li kapav arive ki ou bizin kennsel enn randevou, pa parski ou enn dimounn ki pa ti tini parol, me akoz enn sitiasion kot ou pa kapav fer nanye. Me antan ki Kretien, si ou fer enn promes ouswa ou pran enn langazman, ou bizin fer tou seki ou kapav pou tini ou parol. (Ps. 15:4; Mat. 5:37) Si ou fer sa, ou pou vinn enn kikenn lor ki lezot kapav konte, enn dimounn ki tini so parol, enn kikenn ki touletan dir laverite. (Éph. 4:​15, 25; Jacq. 5:12) Kan bann dimounn trouve ki kapav fer ou konfians dan lavi toulezour, zot pou pli dispoze pou ekout ou kan ou partaz avek zot bann verite lor Rwayom Bondie. Alor, nou bizin fer sir ki nou Wi vremem vedir Wi!