1. Eski fason ki nou tret bann dimounn dan nou minister ena linportans? Donn enn lexanp. (Get zimaz koumansman lartik.)

 FINN gagn de-trwa lane, enn koup dan Fidji ti pe partisip dan enn kanpagn pou invit bann dimounn pou Memoryal lamor Jésus. Kan zot ti pe koz avek enn madam andeor kot li, lapli ti koumans tonbe. Frer-la ti donn madam-la enn parapli, alor ki li ek so madam ti kouver avek enn lot parapli. Sa koup-la ti bien kontan kan zot ti trouv sa madam-la vinn Memoryal. Madam-la ti dir ki li pa rapel tou seki bann Temwin-la ti dir li. Me li ti telman inpresione par fason ki zot ti tret li, ki li’nn bizin vinn Memoryal. Ki’nn amenn sa madam-la pou vinn Memoryal? Sa koup-la finn swiv seki souvan nou apel la Règle d’or.

2. Ki ete la Règle d’or, ek kouma nou kapav aplik li?

² Ki ete la Règle d’or? Se konsey ki Jésus ti done kan li ti dir: “Tou kitsoz ki zot anvi bann dimounn fer pou zot, zot bizin fer parey pou bannla.” (Mat. 7:12) Kouma nou kapav aplik sa konsey-la? Prinsipalman, kan nou fer de kitsoz. Premierman, nou bizin demann noumem: ‘Si mo ti dan plas sa dimounn-la, kouma mo ti pou kontan li tret mwa?’ Apre sa, nou bizin fer nou par ek fer tou seki nou kapav pou tret dimounn-la kouma nou ti pou kontan li tret nou.​—1 Cor. 10:24.

3, 4. (a) Explike kifer la Règle d’or pa konsern zis nou relasion avek nou bann konpagnon Kretien. (b) Ki nou pou examine dan sa lartik-la?

 ³ Nou souvan aplik sa konsey-la dan nou relasion avek nou bann konpagnon Kretien. Me Jésus pa ti dir ki nou bizin montre konsiderasion zis anver bann dimounn ki ena mem lafwa ki nou. An realite, li ti sit sa bann parol-la kan li ti pe koz lor fason ki nou bizin tret bann dimounn an zeneral ek mem nou bann lennmi. (Lir Luc 6:27, 28, 31, 35.) Si Jésus inn demann nou pou aplik la Règle d’or ar nou bann lennmi, eski nou pa bizin fer sa ankor plis kan nou pe rann temwaniaz ar bann dimounn​—kot boukou parmi zot kitfwa “ena latitid ki bizin pou gagn lavi eternel”?​—Actes 13:48.

⁴ Asterla nou pou examinn kat kestion lor ki nou kapav reflesi kan nou pe partisip dan nou minister: Ar kisannla mo pe koze? Kotsa mo pe koz ar zot? Ki moman li pli bon mo koz ar zot? Kouma mo bizin koz ar zot? Nou pou trouve kouma sa bann kestion-la kapav ed nou pou konpran santiman bann dimounn avek ki nou prese ek gete ki pli bon fason pou koz avek zot.​—1 Cor. 9:19-23.

5. Ki bann kestion nou kapav demann noumem?

⁵ Dan nou minister, an zeneral nou koz ar diferan kalite dimounn. Sak dimounn so sitiasion diferan, ek sakenn ena so prop problem. (2 Chron. 6:29) Kan ou pe esey partaz bonn nouvel avek enn dimounn, demann oumem: ‘Si mo ti dan so plas, kouma mo ti pou kontan li trouv mwa? Eski mo ti pou kontan ki li tir bann konklizion ouswa ziz mwa avan mem ki li konn mwa? Ouswa eski mo ti pou prefer ki li aprann konn mwa personelman?’ Kan nou reflesi lor sa bann kestion-la, sa rapel nou ki nou bizin konsider sak dimounn kouma enn dimounn apar.

6, 7. Ki nou bizin fer si dan nou minister nou zwenn enn dimounn ki paret ankoler?

⁶ Personn pa kontan ki lezot trouv li kouma “enn dimounn negatif.” Anou pran enn lexanp. Antan ki Kretien, nou fer tou seki nou kapav pou aplik konsey Labib pou ‘ki nou bann parol fer touzour plezir pou tande.’ (Col. 4:6) Selman, parski nou inparfe, parfwa nou dir bann kitsoz ki nou regrete apre. (Jacq. 3:2) Si arive nou’nn koz brit avek enn dimounn​—kitfwa parski nou’nn pas enn move lazourne​—nou pa ti pou kontan ki sa dimounn-la trouv nou kouma enn kikenn ki “dir” ouswa ki “pena manier.” Nou pou atann ki li konpran nou. Eski nou pa bizin montre mem konsiderasion anver lezot?

⁷ Si ou zwenn enn dimounn dan ou minister ki paret ankoler, eski li pa bon ki ou demann oumem kifer li pe azir koumsa? Eski se akoz li gagn bann presion dan travay ouswa dan lekol? Eski li pe bizin siport enn maladi grav? Dan boukou ka, bann dimounn ki o-koumansman ti agase, finn ekoute kan bann Temwin Jéhovah inn tret zot avek douser ek respe.​—Prov. 15:1; 1 Pierre 3:15.

8. Kifer nou bizin pa refiz pres mesaz Rwayom Bondie ar “tou sort kalite dimounn”?

⁸ Dan nou minister, nou zwenn tou sort kalite dimounn. Par exanp, sa bann dernie lane la, dan Latour Degard finn pibliye plis ki 60 lexperyans dan seri lartik “Labib Sanz Bann Dimounn.” Sertin dimounn ki’nn mansione dan sa bann lartik-la, avan ti bann voler, bann soular, form parti dan bann group bandi, ouswa esklav ladrog. Lezot ti bann politisien, bann sef relizie, ouswa bann dimounn ki ti zis interese ar zot karyer. Sertin ti pe amenn enn lavi imoral. Pourtan, tou sa  bann dimounn-la inn tann bonn nouvel, inn aksepte enn letid Labib, inn fer bann sanzman dan zot lavi, ek inn vinn dan laverite. Alor, fode pa nou panse ki sertin dimounn zame pou aksepte mesaz Rwayom Bondie. (Lir 1 Corinthiens 6:9-11.) Okontrer, nou rekonet ki “tou sort kalite dimounn” kapav aksepte bonn nouvel.​—1 Cor. 9:22.

9. Kifer nou bizin respekte plas kot bann dimounn reste?

⁹ Kotsa nou koz ar bann dimounn dan nou minister? Souvan, nou fer sa kot zot. (Mat. 10:11-13) Nou kontan kan lezot respekte nou lakaz ek nou lakour. Apre tou, plas kot nou reste ena linportans pou nou. Nou anvi ki dan sa plas-la nou ena nou lintimite ek santi nou an sekirite. Nou bizin montre mem respe anver bann dimounn dan nou teritwar. Alor, dan nou predikasion lakaz-lakaz, li bon ki nou reflesi kouma nou kapav respekte plas kot sa bann dimounn-la reste.​—Actes 5:42.

10. Kouma nou kapav evit agas bann dimounn dan nou minister?

¹⁰ Zordi, lemond telman ranpli ar violans, ki boukou dimounn mefie bann ki zot pa kone. (2 Tim. 3:1-5) Alor, nou bizin evit fer bann kitsoz ki pou fer bann dimounn mefie nou. Par exanp, fer koumadir nou ariv devan enn lakaz ek nou tap laport. Si personn pa reponn, nou kapav tante pou get par lafnet ouswa mars dan lakour pou rod dimounn-la. Eski dan ou teritwar, sa kapav agas dimounn-la? Ki so bann vwazin kapav panse? Li vre ki nou bizin fer nou predikasion afon. (Actes 10:42) Nou bien anvi partaz enn mesaz ki pozitif, ek nou ena bann bon mobil. (Rom. 1:14, 15) Selman, nou bizin azir avek sazes ek evit fer bann kitsoz ki kapav agas bann dimounn dan nou teritwar. Lapot Paul ti ekrir: “Dan ninport ki kitsoz, nou pa donn okenn lokazion ki kapav fer lezot tonbe, pou ki personn pa kritik nou minister.” (2 Cor. 6:3) Kan nou respekte lakaz ek lakour bann dimounn dan nou teritwar, nou kondwit kapav amenn sertin dan laverite.​—Lir 1 Pierre 2:12.

11. Kifer nou kontan kan lezot respekte nou letan?

¹¹ Antan ki Kretien, laplipar parmi nou, nou lavi bien ranpli. Pou akonpli nou bann responsabilite, nou fixe bann priorite ek nou organiz bien nou program. (Éph. 5:16; Phil. 1:10) Si enn kitsoz kas nou program, sa kapav agas nou. Alor nou kontan kan lezot respekte nou letan, ek montre ki zot rezonab kan zot pa pran boukou nou letan kan zot koz avek nou. Kouma la Règle d’or kapav ed nou pou respekte bann dimounn avek ki nou prese?

12. Kouma nou pou kone ki pli bon moman pou koz avek bann dimounn dan nou teritwar?

¹² Nou bizin esey kone ki pli bon moman pou koz avek bann dimounn. Dan nou teritwar, an zeneral, ki moman bann dimounn kot zot? Kan eski zot pli dispoze pou ekoute? Li bon ki nou rod bann fason pou adapte nou program ar bann dimounn dan nou teritwar. Dan sertin pei, bann proklamater gagn pli bon rezilta dan predikasion lakaz-lakaz kan zot pres dan tanto. Si dan ou teritwar li koumsa, eski detanzantan ou kapav organiz ou pou partisip dan predikasion lakaz-lakaz dan tanto? (Lir 1 Corinthiens 10:24.) Nou kapav sir ki Jéhovah pou beni bann sakrifis ki nou fer pou pres dan bann ler ki pli bon pou bann dimounn dan nou teritwar.

13. Kouma nou kapav montre respe anver bann dimounn?

¹³ Ki lot fason nou kapav montre respe  anver enn dimounn? Kan nou zwenn enn dimounn ki interese, nou bizin rann enn bon temwaniaz, me fode pa ki nou pran tro boukou so letan. Sa dimounn-la kitfwa inn rezerv sa letan-la pou fer enn lot kitsoz ki li konsider inportan. Si li dir ki li okipe, nou kapav dir li ki nou pa pou pran tro so letan​—ek nou bizin respekte nou parol. (Mat. 5:37) Kan nou pe terminn nou konversasion, li bon ki nou demann dimounn-la ki pli bon moman nou kapav repas get li. Sertin proklamater inn trouv sa efikas pou dir: “Mo ti pou kontan repas get ou. Eski ou prefer mo telefonn ou ouswa avoy enn mesaz avan mo pase?” Kan nou adapte nou ar program bann dimounn dan nou teritwar, nou pe swiv lexanp Paul, ki ‘pa ti rod so prop lavantaz me lavantaz mazorite, pou ki zot kapav sape.’​—1 Cor. 10:33.

14-16. (a) Kifer nou bizin bien explik bann dimounn kifer nou devan zot laport? Donn enn lexanp. (b) Ki metod enn sirveyan ki vizit bann kongregasion inn trouv efikas?

¹⁴ Fer koumadir enn zour nou gagn enn call telefonn me nou pa rekonet lavwa dimounn-la. Nou pa konn dimounn-la, me li demann nou ki bann manze nou kontan manze. Nou demann noumem kisannla sa dimounn-la ek ki li pe rode vremem. Kitfwa par polites, nou pou koz avek li pou enn ti moman, me apre nou pou dir li ki nou prefer aret konversasion-la lamem. Dan enn lot kote, fer koumadir dimounn-la prezant li, fer nou kone ki li travay dan domenn alimantasion ek dir nou ki li ena bann ransegnman bien itil pou nou. Kitfwa nou pou pli dispoze pou  ekout li. Apre tou, nou kontan kan bann dimounn koz avek nou dan enn fason direk ek avek tak. Kouma nou’si nou kapav montre bon manier anver bann dimounn ki nou zwenn dan nou minister?

¹⁵ Dan boukou teritwar, nou bizin bien explik bann dimounn kifer nou devan zot laport. Li vre ki nou ena bann linformasion ki ena enn gran valer ek ki dimounn-la bizin. Me fer koumadir nou pa vremem prezant nou ek nou zis koumans nou prezantasion avek enn kestion koumsa: “Si ou ti ena posibilite pou regle enn parmi bann problem ki ena dan lemond, ki problem ou ti pou regle?” Nou kone ki lobzektif sa kestion-la se pou konn seki dimounn-la panse ek apre sa, diriz nou konversasion dan Labib. Selman, dimounn-la kapav demann limem: ‘Kisannla sa dimounn-la, ek kifer li pe poz mwa sa kestion-la? Kot li pe rod vini?’ Alor, nou bizin esey met dimounn-la alez. (Phil. 2:3, 4) Kouma nou kapav fer sa?

¹⁶ Enn sirveyan ki vizit bann kongregasion inn trouv sa metod-la efikas. Apre ki li’nn dir dimounn-la bonzour, li donn li trak Eski Ou Ti Pou Kontan Konn Laverite? ek li dir: “Nou pe donn enn kopi sa trak-la tou bann dimounn dan landrwa zordi. Li examinn sis kestion ki boukou dimounn poz zotmem. Sa se pou ou.” Frer-la dir ki laplipar dimounn paret pli alez kan zot kone kifer nou pe vizit zot. Lerla, souvan li pli fasil pou kontign konversasion-la. Apre sa, sirveyan-la demann dimounn-la: “Eski ou’nn deza reflesi lor enn sa bann kestion-la?” Si dimounn-la swazir enn kestion, frer-la ouver trak-la ek examinn seki Labib dir lor sa kestion-la. Si dimounn-la pa swazir okenn kestion, frer-la swazir enn kestion ek kontign diskision-la san met dimounn-la malalez. Biensir, ena plizir fason pou koumans enn konversasion. Dan sertin landrwa, kitfwa bann dimounn atann ki nou dir zot bonzour ek pran zot nouvel avan nou dir zot kifer nou la. Seki pli inportan, se nou adapte nou prezantasion dan enn fason ki pou ankouraz bann dimounn dan nou landrwa ekout nou mesaz.

17. Dapre sa lartik-la, kouma nou kapav swiv la Règle d’or?

¹⁷ Alor, kouma nou kapav swiv la Règle d’or dan nou minister? Kan nou konsider sak dimounn kouma enn dimounn apar. Kan nou respekte lakaz ek lakour bann dimounn. Kan nou fer zefor pou partisip dan nou minister dan bann moman kot an zeneral bann dimounn kot zot ek pli dispoze pou ekout nou. Ek kan nou prezant nou mesaz dan enn fason ki pou ankouraz bann dimounn dan nou teritwar ekout nou.

18. Kan nou tret bann dimounn dan nou teritwar parey kouma nou ti pou kontan zot tret nou, ki bann bienfe nou gagne?

¹⁸ Kan nou tret bann dimounn dan nou teritwar parey kouma nou ti pou kontan zot tret nou, sa fer nou gagn boukou bienfe. Kan nou azir avek bonte ek ena konsiderasion pou lezot, nou pe les nou lalimier briye, nou pe montre ki bann prinsip Labib ena linportans, ek nou pe donn laglwar nou Papa ki dan lesiel. (Mat. 5:16) Nou kapav amenn plis dimounn dan laverite par fason ki nou koz avek zot. (1 Tim. 4:16) Mem si bann dimounn avek ki nou prese aksepte mesaz Rwayom Bondie ouswa non, sa fer nou gagn enn sertenn satisfaksion parski nou kone ki nou pe fer tou pou akonpli nou minister. (2 Tim. 4:5) Alor, sakenn parmi nou bizin fer zefor pou imit lapot Paul, ki ti ekrir: “Mo fer tou kitsoz akoz bonn nouvel, pou ki mo kapav partaz sa avek lezot.” (1 Cor. 9:23) Pou fer sa, anou touletan tret bann dimounn dan nou teritwar parey kouma nou anvi zot tret nou.