1. Ki lorganizasion ki ti ranplas nasion Israël ki ti vinn aposta, ek ti vinn enn pep pou nom Jéhovah? (Get zimaz koumansman lartik.)

 SE GRAS-A Jéhovah ki kongregasion Kretien inn etabli dan premie siek ek vre ladorasion inn retabli dan nou lepok. Kouma nou ti trouve dan lartik avan, lorganizasion kot ti ena bann premie disip Christ ti ranplas nasion Israël ki ti vinn aposta, ek sa lorganizasion-la ti vinn enn pep pou nom Jéhovah. Sa nouvo lorganizasion ki ti ena faver Bondie la, pa ti detrir kan Jérusalem ti detrir an 70 Nou Lepok. (Luc 21:20, 21) Bann levennman dan premie siek ti montre alavans seki ti pe atann bann serviter Jéhovah azordi. Nou pe viv dan bann dernie zour. Lemond Satan biento pou fini, me lorganizasion Bondie pa pou detrir. (2 Tim. 3:1) Kouma nou kapav sir ki sa pou arive?

2. Ki Jésus ti dir konsernan “gran detres,” ek kouma sa pou koumanse?

² Kan Jésus ti koz lor so prezans ki invizib ek konklizion sa sistem-la, li ti dir: “Pou ena enn gran detres kouma zame inn ena depi koumansman lemond ziska asterla, non, ek ki pa pou ena ankor.” (Mat. 24:3, 21) Sa gran detres-la pou koumanse kan Jéhovah pou servi bann dirizan politik pou detrir “Gran Babylone,” lanpir mondial fos relizion. (Rév. 17:3-5, 16) Ki pou arive apre?

3. Apre ki fos relizion pou detrir, ki latak pou ena kont pep Jéhovah?

³ Apre ki fos relizion pou detrir, Satan ek so lemond pou atak bann serviter Jéhovah. Par exanp, konsernan “Gog dan pei Magog,” bann Lekritir anonse: “To pou vinn kont zot kouma enn tanpet, ek to pou kouver sa pei-la kouma bann niaz, twa ek tou to bann larme, ek boukou pep pou avek twa.” Parski bann Temwin Jéhovah pena okenn larme ek se zotmem pep ki viv plis anpe lor later, li pou paret fasil pou atak zot. Me, bann ki pou atak zot pou fer enn gran erer!​—Ézék. 38:1, 2, 9-12.

4, 5. Kouma Jéhovah pou reazir kan Satan pou rod detrir So bann serviter?

⁴ Kouma Bondie pou reazir kan Satan pou rod detrir So pep? Jéhovah pou servi so drwa antan ki Souverin Liniver pou sov so pep. Jéhovah konsider bann latak kont so bann serviter kouma bann latak kont Limem. (Lir Zekaria 2:8.) Alor, deswit nou Papa ki dan lesiel pou pran bann aksion pou sap nou. Kan Jéhovah pou delivre so pep, sa pou deklans Har-Maguédôn, “lager gran zour Bondie Tou-Pwisan” kot Li pou detrir lemond Satan.​—Rév. 16:14, 16.

⁵ Konsernan Har-Maguédôn, enn profesi Labib anonse: “Jéhovah dir: ‘Jéhovah ena enn dezakor avek bann nasion. Limem Li pou rann enn zizman lor tou dimounn. Ek Li pou fer bann move dimounn mor par lepe.’ Ala seki Jéhovah, Sef bann larme dir: ‘Gete! Enn gran maler pe vinn lor bann nasion enn deryer lot, ek enn gran tanpet pou sorti depi bann parti pli lwin lor later. Ek bann dimounn ki Jéhovah pou touye sa zour-la pou depi enn bout later ziska lot bout. Pa pou plor lor zot, ni pou ramas zot ouswa anter zot. Zot pou vinn kouma fimie lor later.’” (Jér. 25:31-33) Sa move lemond-la pou detrir pandan Har-Maguédôn. Lemond Satan pou detrir, me parti vizib lorganizasion Jéhovah pa pou detrir.

6, 7. (a) Bann dimounn ki form parti dan sa gran lafoul-la, kotsa zot sorti? (b) Pandan sa bann dernie lane-la, ki ogmantasion finn ena?

⁶ Parti vizib lorganizasion Bondie pe kontign prospere parski bann dimounn ki form parti dan sa lorganizasion-la zot ena faver Bondie. Labib donn nou sa lasirans-la: “Lizie Jéhovah lor bann dimounn drwat, ek so zorey ekout zot bann siplikasion.” (1 Pierre 3:12) Parmi sa bann dimounn drwat la ena “enn gran lafoul” ki “sorti dan gran detres.” (Rév. 7:9, 14) Zot pa zis “enn lafoul,” me “enn gran lafoul,” setadir enn gran kantite dimounn. Eski ou pe trouv oumem parmi sa bann dimounn ki pou sape dan “gran detres” la?

⁷ Bann dimounn ki form parti dan sa gran lafoul-la, kotsa zot sorti? Pe rasanble zot, parski Jésus ti anonse ki sa form parti dan sign so prezans. Li ti dir: “Sa bon nouvel lor Rwayom la pou prese partou kot dimounn reste lor later kouma enn temwaniaz pou tou bann nasion, ek lerla lafin pou vini.” (Mat. 24:14) Dan bann dernie zour, se travay pli inportan ki lorganizasion Bondie pe fer. Gras-a travay predikasion ek lansegnman ki bann Temwin Jéhovah pe fer dan lemond antie, plizir milyon dimounn inn aprann pou ador Bondie “avek lespri ek laverite.” (Jean 4:23, 24) Par exanp, pandan sa dernie di-z-an-la​—pandan bann lane servis 2003 ziska 2012​—plis ki 2,707,000 dimounn inn vwe zot lavi ar Bondie ek inn batize. Dan lemond antie,  asterla ena plis ki 7,900,000 Temwin, ek plizir milyon dimounn pe zwenn ansam avek zot, sirtou pandan selebrasion Memoryal ki fer toule lane. Nou pa flat nou pou kantite dimounn ki ena dan lorganizasion Jéhovah, parski se Jéhovah ki pe fer sa ogmante. (1 Cor. 3:5-7) Selman, sak lane ki pe pase, li kler ki sa gran lafoul-la pe kontign ogmante.

8. Kifer kantite dimounn dan lorganizasion Jéhovah azordi pe ogmante dan enn fason extraordiner?

⁸ Kantite serviter Bondie finn ogmante dan enn fason extraordiner parski se Jéhovah Limem ki pe soutenir so bann Temwin. (Lir Isaïe 43:10-12.) Labib ti fini anonse ki bann serviter Bondie pou ogmante kan li ti dir: “Seki tipti pou vinn enn milye ek seki tigit pou vinn enn nasion for. Mwa, Jéhovah, mo pou akseler sa dan so ler.” (Is. 60:22) Pandan enn tan, bann Kretien ki ti ena lesperans pou al viv dan lesiel ek ki ti ankor lor later ti “tipti,” me zot kantite finn ogmante amezir ki Jéhovah ti fer lezot Izraelit spiritiel vinn dan so lorganizasion. (Gal. 6:16) Amezir ki bann lane pase, kantite dimounn dan lorganizasion Jéhovah pe kontign ogmante parski Jéhovah pe beni travay pou rasanble gran lafoul.

9. Ki nou bizin fer si nou anvi konn lavenir extraordiner ki Parol Bondie promet?

⁹ Ki nou ena lesperans pou al viv dan lesiel ouswa nou bann manb gran lafoul, nou kapav konn lavenir extraordiner ki Parol Bondie promet. Selman, pou konn sa lavenir-la, nou bizin fer seki Jéhovah demann nou. (Is. 48:17, 18) Par exanp, Jéhovah ti demann bann Izraelit pou obeir Lalwa Mozaik, kot ti ena bann lalwa konsernan kondwit sexiel, biznes, kouma elve bann zanfan, bon fason pou tret lezot, ek lezot lalwa ankor. Kan zot ti obeir sa bann lalwa-la, sa ti protez zot ek ti fer zot gagn bann bienfe. (Ex. 20:14; Lév. 19:18, 35-37; Deut. 6:6-9) Li parey, kan nou fer seki Bondie demann nou, sa fer nou gagn bann bienfe​—ek pena dout ki nou pa trouv sa kouma enn fardo pou fer so volonte. (Lir 1 Jean 5:3.) An realite, parey kouma Lalwa Mozaik ti protez bann Izraelit, kan nou obeir bann lalwa ek bann prinsip Jéhovah, sa pa zis protez nou me osi kontign fer nou vinn “for dan lafwa.”​—Tite 1:13.

10. Kifer nou bizin rezerv enn letan pou etidie Labib ek rezerv enn sware sak semenn pou nou Ladorasion an Fami?

¹⁰ Parti lorganizasion Jéhovah ki lor later pe avanse dan diferan fason. Par exanp, fason ki nou konpran laverite ki ena dan Labib pe vinn deplizanpli kler. Se seki Labib ti promet: “Semin bann dimounn drwat li parey kouma lalimier ki eklere ek ki briye pli for, ziska ki’nn fer gran lizour.” (Prov. 4:18) Me kitfwa li bon nou demann noumem: ‘Eski mo a-zour avek bann eklersisman ki nou gagne konsernan fason ki nou konpran laverite ki ena dan Labib? Eski mo ena labitid pou lir Labib toulezour? Eski mo bien kontan lir nou bann piblikasion? Eski mwa ek mo fami nou ena enn sware sak semenn pou nou Ladorasion an Fami?’ Laplipar parmi nou pou dakor ki li pa tro difisil pou fer sa bann kitsoz-la. Souvan, nou bizin zis rezerv enn letan pou fer zot. Alor, li vremem inportan pou gagn enn konesans exakt lor Labib, aplik sa konesans-la, ek fer bann progre lor plan spiritiel​—sirtou asterla ki gran detres pe koste!

11. Ki bienfe bann Izraelit ti gagne gras-a bann fet ki ti fer dan lepase, ek azordi osi ki bienfe nou gagne gras-a bann renion ek bann lasanble?

¹¹ Se pou nou prop profi ki lorganizasion Jéhovah ankouraz nou pou swiv sa  konsey lapot Paul la: “Anou interes nou sakenn ar nou kamarad, pou ankouraz sakenn parmi nou pou montre lamour, ek fer bann bon aksion, san ki nou negliz nou bann rasanbleman, kouma sertin ena labitid, me anou ankouraz sakenn parmi nou, ek ankor plis kan zot trouv zour-la pe koste.” (Héb. 10:24, 25) Bann fet ki bann Izraelit ti pe fer toule lane ek lezot rasanbleman pou ador Jéhovah ti fortifie zot lor plan spiritiel. Anplis, bann levennman spesial kouma par exanp la fête des Huttes ki ti fer dan lepok Nehémia ti bann levennman bien zwaye. (Ex. 23:15, 16; Neh. 8:9-18) Li parey, nou gagn bann mem bienfe dan nou bann renion, ek nou bann lasanble. Alor, anou profit bien bann dispozision ki lorganizasion Jéhovah inn pran pou ki nou res for lor plan spiritiel ek pou ki nou ere.​—Tite 2:2.

12. Kouma nou bizin konsider travay predikasion?

¹² Antan ki manb lorganizasion Bondie, nou ena lazwa pou partisip dan “enn travay sakre pou anons bon nouvel Bondie.” (Rom. 15:16) Kan nou partisip dan sa “travay sakre” la, sa fer nou “travay ansam avek” Jéhovah, “Bondie ki Sin.” (1 Cor. 3:9; 1 Pierre 1:15) Kan nou pe pres bon nouvel, sa sanktifie nom Jéhovah ki sakre. Ek pena dout, se enn gran privilez ki’nn konfie nou responsabilite pou pres “bon nouvel ki ranpli ar laglwar ki konsern nou Bondie ere.”​—1 Tim. 1:11.

13. Pou ki nou res for lor plan spiritiel ek pou nou gagn lavi sov, ki nou bizin fer?

¹³ Bondie anvi ki nou res for lor plan spiritiel. Pou nou kapav fer sa, nou bizin res atase ar Li ek soutenir so lorganizasion kan nou partisip dan diferan laktivite sa lorganizasion-la. Moïse ti dir bann Izraelit: “Zordi, mo pran lesiel ek later kouma bann temwin kont zot, ki mo finn met lavi ek lamor devan twa, benediksion ek malediksion; ek to bizin swazir lavi pou ki to kontign viv, twa ek to desandans, kan to kontan Jéhovah to Bondie, kan to ekout so lavwa, ek kan to res atase ar Li; parski Limem to lavi ek par Li to pou res lontan dan pei ki Jéhovah ti fer serman pou donn to bann anset, Abraham, Isaac, ek Jacob.” (Deut. 30:19, 20) Pou nou gagn lavi sov nou bizin fer volonte Jéhovah, kontan Li, ekout ek obeir Li, ek res atase ar Li.

14. Ki enn frer ti panse konsernan parti vizib lorganizasion Bondie?

¹⁴ Frer Pryce Hughes, ki ti konn laverite avan 1914, ti res fidel ar Jéhovah ek So lorganizasion toutlong so lavi. Li ti ekrir: “Si ti ena enn kitsoz ki ti pli inportan pou mwa, se kontign res pros ar lorganizasion vizib Jéhovah. Bann lexperyans ki mo’nn fer o-koumansman inn aprann mwa kouma li danzere pou kont lor bann rezonnman imin. Enn fwa ki mo’nn konpran sa, mo ti bien determine pou res atase ar sa lorganizasion fidel la. Eski ena enn lot fason kot nou kapav gagn faver ek benediksion Jéhovah?”

15. Donn enn lexanp Biblik ki montre kouma nou bizin konsider bann eklersisman ki nou gagne dan fason ki nou konpran bann size Biblik.

¹⁵ Si nou anvi gagn faver ek benediksion Jéhovah personelman, nou bizin soutenir so lorganizasion ek aksepte bann sanzman dan fason ki nou konpran bann Lekritir. Anou pran enn lexanp: Apre lamor Jésus, ti ena plizir milye Kretien Zwif ki ti bien atase ar Lalwa ek ti trouv sa difisil pou aret swiv Lalwa. (Actes 21:17-20) Me, gras-a let ki Paul ti avoy bann Ebre, zot ti aksepte ki se pa par mwayin bann sakrifis ki ti  “ofer dapre Lalwa” ki zot ti’nn pirifie, me “gras-a lekor Jésus Christ ki finn ofer enn fwa pou tou.” (Héb. 10:5-10) Pena dout, laplipar sa bann Kretien Zwif la ti amenn bann sanzman dan zot fason panse ek ti kontign progrese lor plan spiritiel. Nou’si nou bizin etidie avek serye ek ena enn lespri ouver kan ena bann sanzman dan fason ki nou konpran Parol Bondie ek bann sanzman dan nou travay predikasion.

16. (a) Kifer lavi dan lemond nouvo pou extraordiner? (b) Ki benediksion ou pe atann pou profite dan lemond nouvo?

¹⁶ Tou bann ki res fidel ar Jéhovah ek so lorganizasion pou kontign gagn so benediksion. Bann Kretien ki ena lesperans pou al viv dan lesiel pou ena gran privilez pou vinn bann lerwa ansam avek Christ dan lesiel. (Rom. 8:16, 17) Si nou ena lesperans pou viv lor later, mazine ki kantite lazwa nou pou gagne pou viv dan Paradi. Antan ki manb lorganizasion Jéhovah, azordi nou vremem ena lazwa pou koz ar lezot lor nouvo lemond ki Bondie inn promet! (2 Pierre 3:13) Psaume 37:11 dir: “Bann ki ena limilite pou erit later, ek vremem zot pou trouv enn gran lazwa dan labondans lape.” Bann dimounn “pou ranz bann lakaz ek zot pou res ladan” ek zot pou profit “travay ki zot lame fer.” (Is. 65:21, 22) Pou nepli ena bann ki fer dominer ar lezot, bann dimounn pov, ek bann ki mank manze. (Ps. 72:13-16) Gran Babylone pou nepli tronp personn, parski li pou nepli existe. (Rév. 18:8, 21) Bann dimounn mor pou resisite ek pou gagn posibilite pou viv pou touletan. (Is. 25:8; Actes 24:15) Plizir milyon dimounn ki’nn vwe zot lavi ar Jéhovah pou vremem profit bann benediksion extraordiner! Pou ki personelman nou profit sa bann promes Labib la, nou bizin kontign fer bann progre lor plan spiritiel, avans ansam avek lorganizasion Bondie, ek touletan mars mem pa ar Li.

17. Ki latitid nou bizin ena anver nou ladorasion pou Jéhovah ek anver so lorganizasion?

¹⁷ Parski lafin sa sistem-la bien pre, anou kontign res ferm dan lafwa ek montre enn gran rekonesans pou bann dispozision ki Jéhovah inn pran pou nou ador Li. David ki ti ena sa latitid-la, ti sante: “Mo finn demann Jéhovah enn kitsoz​—se samem ki mo pou rode: Ki mo res dan lakaz Jéhovah toulezour dan mo lavi, pou apresie bann kalite Jéhovah ek pou get so tanp avek admirasion.” (Ps. 27:4) Alor, sakenn parmi nou bizin res atase ar Bondie, mars mem pa avek so pep, ek kontign avanse avek so lorganizasion.