AN REALITE, sa pa ti deranz mwa ki ti ena sa ti lasistans-la pou mo diskour an 1957, parski touletan mo ti bien timid. Ofet, kan mo ti zenn, mo ti ena labitid kasiet kan bann invite vinn kot nou, mem si mo ti konn zot.

Li vre ki ou kapav etone pou aprann ki laplipar mo bann responsabilite dan lorganizasion Jéhovah inn amenn mwa pou gagn kontak avek boukou lezot dimounn​—bann kamarad ek bann etranze toulede. Pourtan, mo’nn kontign lite pou vink mo timidite ek pou ena plis konfians an momem. Alor, si mo’nn reisi akonpli mo bann responsabilite, mo pa kapav dir ki se gras-a mwa. Okontrer, mo’nn trouve kouma sa promes Jéhovah la li vre: “Mo pou fortifie twa, wi, mo pou ed twa, mo pou vremem tini twa ferm avek mo lame drwat lazistis.” (Is. 41:10) Enn fason pli inportan ki Jéhovah finn ed mwa se par mwayin bann konpagnon Kretien ki’nn soutenir mwa. Les mo rakont ou kouma depi ki mo tipti, sertin parmi zot finn ed mwa.

An 1940, enn Dimans gramatin kot ti ena soley, Elsie Huntingford ti vinn dan nou laferm dan sid-wes  Ontario. Mo mama ti al ouver laport pandan ki mo papa​—ki ti timid parey kouma mwa​—ti asize andan ansam avek mwa ek ti pe ekoute. Mo papa ti panse ki Ser Huntingford ti pe vann bann kitsoz ek ki mo mama ti pou aste enn kitsoz ki pa bizin. Alor, finalman li ti al kot laport ek li ti dir ki nou pa interese. Ser Huntingford ti demande: “Eski zot pa interese pou gagn enn letid Labib?” Mo papa ti reponn: “Biensir nou interese avek sa.”

Ser Huntingford ti vizit nou dan enn bon moman. Mo bann paran ti bann manb aktif dan l’Église unie du Canada, me zot ti fek desid pou kit sa legliz-la. Kifer? Parski dan legliz, dan enn plas kot tou dimounn ti kapav trouve, pret ti met enn lalis bann ki ti fer donasion dapre kantite ki zot ti done. Mo bann paran, ki pa ti ris, souvan ti preske dernie lor sa lalis-la parski zot pa ti donn boukou kas, ek bann responsab legliz ti met presion lor zot pou donn plis. Parski li ti anvi gard so travay, enn lot pret ti rekonet ki li pa ti ansegn bann kitsoz dan ki li ti vremem krwar. Alor, nou ti kit sa legliz-la, me nou ti ankor pe rod enn mwayin pou satisfer nou bezwin spiritiel.

Parski sa lepok-la dan Canada ti interdi travay predikasion bann Temwin Jéhovah, Ser Huntingford ti servi zis Labib ek sertin not ki ti ena dan enn ti karne nwar pou fer nou letid. Plitar kan li ti realize ki nou pa ti pou devwal li ar bann lotorite, li ti amenn bann piblikasion baze lor Labib pou nou. Nou ti kasiet bien sa bann piblikasion-la sak fwa ki nou ti fini fer letid. a

Malgre persekision ek lezot difikilte, Ser Huntingford ti pres bon nouvel avek zel. So zel ti inpresionn mwa ek ti pous mwa pou pran pozision pou laverite. Enn an apre ki mo bann paran ti’nn batize kouma Temwin Jéhovah, mo’si mo ti pran batem pou montre ki mo ti vwe mo lavi ar Bondie. Mo ti batize le 27 Fevriye 1949, dan enn manzwar an metal dan ki bann fermie ti pe donn zot bann zanimo bwar. Mo ti ena 17 an. Apre sa, mo ti bien deside pou rant dan servis aplintan.

Mo ti ezite pou fer pionie deswit. Pou enn sertenn letan, mo ti pe travay dan enn biro ek dan  labank parski mo ti konvink momem ki mo ti bizin ramas inpe kas pou mo kapav fer pionie. Me mo ti zenn ek mo pa ti ena lexperyans, ek deswit mo ti pe depans kas ki mo ti pe gagne. Alor, enn frer ki ti apel Ted Sargent ti konsey mwa pou ena kouraz ek pou fer Jéhovah konfians. (1 Chron. 28:10) Avek sa ti koutpous-la, mo ti koumans fer pionie Novam 1951. Mo ti ena zis 40 dolar (apepre 1,200 roupi), enn bisiklet segonnme, ek enn valiz nef. Me Jéhovah touletan inn donn mwa seki mo ti bizin. Mo vremem ena rekonesans pou Ted ki’nn ankouraz mwa pou fer servis pionie! Sa ti fer mwa gagn lezot benediksion.

Ver lafin Out 1952, enn tanto mo ti gagn enn call depi Toronto. Biro nasional bann Temwin Jéhovah dan Canada ti invit mwa pou koumans servi dan Béthel apartir mwa Septam. Mem si mo ti timid ek ki zame mo’nn vizit biro nasional, mo ti bien kontan parski lezot pionie ti dir mwa bann kitsoz extraordiner lor Béthel. Deswit kouma mo ti rant laba, mo ti santi mwa kot mwa.

De-z-an apre ki mo ti rant Béthel, mo ti ranplas Bill Yacos kouma kordinater komite bann ansien dan enn kongregasion dan Toronto. Mo ti ena zis 23 an ek mo ti santi mwa kouma enn sinp garson ki ti travay dan laferm. Me avek limilite ek lamour, Frer Yacos ti montre mwa seki mo bizin fer. Ek Jéhovah ti vremem ed mwa.

Frer Yacos​—enn ti frer bien kosto ki touletan ena enn sourir lor so figir​—ti interese avek bann dimounn. Li ti kontan bann frer ek bann frer ti kontan li. Regilierman li ti al vizit bann frer kot zot. Li pa ti fer sa zis kan zot ti dan problem. Bill Yacos ti ankouraz mwa pou fer parey ek pou travay avek bann frer ek ser dan predikasion. Li ti dir mwa: “Ken, montre bann frer ki to interese avek zot. Sa pou kouver boukou defo.”

Jéhovah finn ed mwa dan enn fason spesial depi Zanvie 1957. Sa mwa-la mo ti marye avek Evelyn, ki ti’nn asiste 14^em klas Lekol Guiléad ek ki ti’nn gagn so diplom. Avan nou maryaz, li ti pe servi dan provins Québec kot koz Franse. Sa lepok-la, Legliz Katolik Romin ti kontrol enn bon parti Québec. Alor li ti bien difisil pou Evelyn fer so servis, me li ti kontign res atase ar so servis ek ar Jéhovah.

Evelyn ti osi res fidel anver mwa. (Éph. 5:31) Ofet, so fidelite ti pas par enn test zis apre nou maryaz! Nou ti fer plan pou al an vwayaz an Floride, États-Unis, me landemin nou maryaz, biro nasional ti demann mwa pou asiste enn renion ki ti pou dir enn semenn dan Béthel Canada. Li vre ki sa renion-la ti kas nou plan, me Evelyn ek mwa ti anvi fer tou seki Jéhovah ti demann nou. Alor, nou ti kennsel nou linndemiel. Pandan sa semenn-la, li ti pres dan teritwar pre ar biro nasional. Mem si teritwar-la ti bien diferan ar teritwar Québec, li ti persevere.

Alafin sa semenn-la, mo ti gagn enn sirpriz​—ti avoy mwa fer sirveyan sirkonskripsion dan lenor Ontario. Mo ti enn nouvo-marye, mo ti ena zis  25 an ek mo pa ti ena lexperyans, me kanmem sa nou ti fer Jéhovah konfians ek nou ti al dan nou servis. Canada ti anplin liver kan aswar nou ti pran enn trin ansam avek plizir sirveyan ki ena lexperyans ek ki ti pe retourn dan zot servis. Zot ti bien ankouraz nou! Enn frer ti mem insiste ki nou pran so kabinn ki li ti rezerve ek kot ti ena enn lili, pou ki nou pa res asize tout-lanwit. Landemin gramatin, zis 15 zour apre nou maryaz, nou ti pe vizit enn ti group frer-ser dan Hornepayne kouma mo ti mansione avan.

Ti ena ankor lezot sanzman ki ti pe atann Evelyn ek mwa. Ver lafin 1960 kan mo ti pe servi kouma sirveyan distrik, mo ti gagn linvitasion pou asiste 36^em klas Lekol Guiléad, enn kour dis mwa ki ti pou koumanse an Fevriye 1961 dan Brooklyn, New York. Biensir mo ti bien kontan pou asiste sa kour-la, me mo ti sagrin osi ki Evelyn pa ti invite. Ofet, parey kouma lezot madam ki ti dan sa sitiasion-la, Evelyn ti bizin ekrir enn let pou dir ki li ti dakor ki nou res separe pou omwin dis mwa. Mem si sa ti fer Evelyn plore, nou ti tom dakor pou ki mo asiste sa lekol-la, ek li ti kontan parski mo ti pou profit formasion Lekol Guiléad ki ena enn gran valer.

An-atandan, Evelyn ti servi dan biro nasional Canada. Li ti ena enn gran privilez pou partaz mem lasam ar Margaret Lovell, enn ser ki ti ena lesperans pou al viv dan lesiel. Biensir, Evelyn ek mwa nou ti bien mank nou kamarad. Me avek led Jéhovah, nou ti reisi adapte ar nou bann responsabilite tanporer. Kan li ti dispoze pou sakrifie letan ki nou ti pou pase ansam pou ki nou vinn pli itil pou Jéhovah ek So lorganizasion, sa ti bien tous mwa.

Apre ki mo ti’nn fer anviron trwa mwa dan Lekol Guiléad, Frer Nathan Knorr, ki ti responsab travay predikasion dan lemond sa lepok-la, ti ofer mwa enn linvitasion extraordiner. Li ti demann mwa pou kit Lekol Guiléad deswit ek retourn Canada. Laba mo ti pou servi dan enn fason tanporer kouma instrikter pou l’École du ministère du Royaume dan biro nasional. Frer Knorr ti dir mwa ki mo pa ti oblize aksepte sa linvitasion-la. Si mo ti anvi, mo ti kapav terminn kour Lekol Guiléad ek apre kitfwa ti pou avoy mwa dan servis misioner. Li ti osi dir mwa ki si mo ti desid pou retourn Canada, kitfwa zame mo ti pou regagn linvitasion pou vinn Guiléad ek avek letan, kitfwa ti pou avoy mwa dan teritwar Canada. Li ti les mwa koz sa avek mo madam pou mo kapav pran enn desizion.

Parski Evelyn ti’nn fini dir mwa kouma li konsider bann responsabilite teokratik, deswit mo ti dir Frer Knorr: “Nou kontan pou fer tou seki lorganizasion Jéhovah anvi nou fer.” Nou’nn touletan panse ki mem si nou ena nou bann prop preferans, nou bizin al ninport kotsa lorganizasion Jéhovah avoy nou.

Alor an Avril 1961, mo ti kit Brooklyn ek mo ti retourn Canada pou ansegne dan l’École du  ministère du Royaume. Plitar nou ti koumans servi kouma bann manb fami Béthel. Apre sa mo ti sirpri pou gagn enn linvitasion pou asiste 40^em klas Lekol Guiléad, ki ti pou koumanse an 1965. Ankor enn fwa, Evelyn ti bizin ekrir enn let pou dir ki li ti aksepte nou separe. Me de-trwa semenn plitar, nou toulede nou ti bien kontan, parski Evelyn ti gagn so prop linvitasion pou asiste sa lekol-la ansam avek mwa.

Apre ki nou ti ariv dan Lekol Guiléad, Frer Knorr ti dir nou ki bann zelev ki ti pe swiv klas an Franse, parey kouma nou, ti pou al l’Afrique. Me pandan seremoni kot nou ti gagn nou diplom, ti fer nou kone ki nou ti pou al servi Canada! Mo ti ena zis 34 an kan mo ti nome kouma nouvo sirveyan biro nasional (ki asterla nou apel kordinater Komite Biro Nasional). Ek mo ti dir Frer Knorr: “Mo bien zenn.” Me li ti rasir mwa. Ek depi koumansman mem, mo ti esey koz avek bann frer dan Béthel ki ti pli aze ek ki ti ena plis lexperyans avan ki mo pran bann desizion inportan.

Mo servis dan Béthel inn donn mwa bann bon lokazion pou aprann ar lezot. Mo respekte ek mo ena enn gran ladmirasion pou lezot manb Komite Biro Nasional. Bon lexanp bann santenn frer ek ser Kretien​—zenn ek vie​—ki nou’nn zwenn dan Béthel ek dan diferan kongregasion kot nou’nn servi, finn osi ena enn bon linflians lor mwa.

Mo servis dan Béthel inn osi permet mwa ansegn lezot ek fortifie zot lafwa. Lapot Paul ti dir Timothée: “Pa abandonn bann kitsoz ki to’nn aprann.” Li ti dir osi: “Bann kitsoz ki to finn tande ar mwa ki boukou finn temwin, konfie sa bann kitsoz-la ar bann zom fidel, ki an retour, pou bien kalifie pou ansegn lezot.” (2 Tim. 2:2; 3:14) Parfwa sertin frer ek ser demann mwa ki bann leson mo finn aprann pandan mo 57 an dan servis Béthel. Mo repons li sinp: “Deswit ou bizin dispoze pou fer seki lorganizasion Jéhovah anvi ou fer, ek kont lor Jéhovah pou ed ou.”

Mo ankor rapel bien premie fwa ki mo ti vinn Béthel. Mo ti enn zenom timid ek ki pa ti ena lexperyans. Me tou sa bann lane-la, Jéhovah finn ‘atrap mo lame drwat bien for.’ Sirtou, gras-a bonte ek led ki mo bann konpagnon Kretien donn mwa dan ler ki bizin, Jéhovah kontign rasir mwa: “Pa per. Mo pou ed twa.”​—Is. 41:13.