1, 2. Kouma Jéhovah trouv so bann serviter ki lor later?

 KAN bann paran get zot zanfan zwe, souvan zot inpresione ar bann kapasite ki zot zanfan ena. Eski ou’si ou’nn fer sa lexperyans-la? Enn zanfan depi li’nn ne kapav paret ena enn lekor soup ouswa ena sertin kapasite pou fer spor, alor ki so frer ouswa so ser pli abil ar bann zwe kouma kart ek lido, ouswa desine ek fer bann kitsoz kreatif. Me ninport ki don bann zanfan ena, bann paran kontan pou ed zot devlop zot bann kapasite pli bien ki zot kapav.

² Jéhovah osi interese ar so bann zanfan ki lor later. Li trouv so bann serviter azordi kouma “bann kitsoz ki ena valer dan tou bann nasion.” (Hag. 2:7) Zot ena valer sirtou akoz zot lafwa ek zot latasman ar Bondie. Me kitfwa ou’nn remarke ki parmi bann Temwin azordi, ena diferan kalite talan. Ena sertin frer ki bann bon orater, alor ki lezot bann bon organizater. Boukou ser ena enn don pou aprann lezot lang ek pou servi sa bann lang-la dan zot minister, alor ki pou sertin ser li fasil pou ankouraz lezot ouswa pran swin bann malad.  (Rom. 16:1, 12) Eski nou pa kontan pou form parti dan enn kongregasion kot ena bann Kretien koumsa?

3. Ki bann kestion nou pou examine dan sa lartik-la?

³ Selman, sertin Kretien, parmi ena bann zenn frer ouswa bann frer ki’nn fek batize, kitfwa pankor trouv zot plas dan kongregasion. Kouma nou kapav ed zot pou devlop zot kapasite pli bien ki zot kapav? Kifer nou bizin fer zefor pou rod seki bon dan zot, ek lerla trouv zot parey kouma Jéhovah trouv zot?

4, 5. Kouma Juges 6:​11-16 montre ki Jéhovah trouv kapasite so bann serviter?

⁴ Dan Labib ena plizir lexanp ki montre bien ki Jéhovah pa trouv zis seki bon dan so bann serviter, me Li trouv osi zot bann kapasite. Par exanp, kan Bondie ti swazir Guidéôn pou liber So pep parski bann Madianit ti pe fer dominer ar zot, pena dout ki Guidéôn ti etone ar seki enn anz ti dir li: “Jéhovah avek twa, gerye bien for.” Li kler ki sa lepok-la, Guidéôn pa ti santi li “bien for.” Li ti ena bann dout ek ti panse ki li pena enn gran valer. Me kouma konversasion ki ti swiv montre nou, Jéhovah ti ena enn pwindevi bien pli pozitif lor Guidéôn, ki Guidéôn ti ena lor limem.​—Lir Juges 6:11-16.

⁵ Jéhovah ti ena konfians ki Guidéôn ti pou kapav delivre Israël parski Li ti trouv bien so bann kapasite. Par exanp, anz Jéhovah ti trouve kouma Guidéôn ti pe tap dible avek tou so lafors. Me ti ena ankor enn lot kitsoz ki ti atir so latansion. Dan lepok Biblik, bann fermie ti abitie tap bann sereal anplener pou ki divan pran bann lapay ale. Me Guidéôn li, kasiet-kasiet li ti pe tap bann dible dan enn preswar divin pou ki bann Madianit pa trouv so ti rekolt. Li ti servi enn bon taktik! Pena dout ki devan lizie Jéhovah, Guidéôn pa ti zis enn fermie ki ti pridan, me li ti osi enn zom ki ti ena enn bon zizman. Wi, Jéhovah ti trouv so bann kapasite ek ti ed li pou devlop sa bann kapasite-la.

6, 7. (a) Kouma fason ki Jéhovah ti trouv profet Amos li diferan ar fason ki sertin Izraelit ti trouv li? (b) Ki montre ki Amos pa ti enn dimounn inioran?

⁶ Li parey dan ka profet Amos. Jéhovah ti remark kapasite ki li ti ena, mem si pou lezot li ti paret pena gran valer ouswa enn dimounn ordiner. Amos ti enn elver mouton ek li ti pik bann fig sikomor​—enn varyete fig ki bann dimounn ti konsider kouma manze bann pov. Kan Jéhovah ti donn Amos responsabilite pou kondann rwayom dis-tribi Israël ki ti pe komet lidolatri, sertin Izraelit kitfwa ti panse ki Jéhovah pa’nn swazir dimounn ki bizin.​—Lir Amos 7:14, 15.

⁷ Amos ti sorti dan enn vilaz bien retire, me konesans ki li ti ena lor bann koutim ek bann dirizan so lepok montre ki li pa ti enn inioran. Li paret ki li ti bien konn sitiasion dan Israël, ek kitfwa li ti konn inpe seki ti pe pase dan bann nasion alantour akoz bann kontak ki li ti ena avek bann marsan. (Amos 1:6, 9, 11, 13; 2:8; 6:4-6) Sertin Biblis azordi kalifie Amos kouma enn bon ekrivin. Amos pa ti zis servi bann mo sinp ek ki ena pwa, me li ti osi bien konn servi bann konparezon ek zwe avek bann mo. Li kler ki fason bien fran ki Amos ti reponn Amatsia, enn pret koronpi, ti montre ki Jéhovah ti’nn swazir dimounn ki bizin pou anons so mesaz. Jéhovah ti trouv bann kapasite ki Amos ti ena, mem si kitfwa lezot pa ti’nn trouv sa.​—Amos 7:12, 13, 16, 17.

8. (a) Kouma Jéhovah ti rasir David? (b) Kifer bann parol Psaume 32:8 rasir bann ki mank konfians an zotmem ouswa mank enn sertenn kapasite?

 ⁸ Wi, Jéhovah remark kapasite sakenn so bann serviter. Jéhovah ti rasir Lerwa David ki touletan Li ti pou gid li, avek ‘so lizie lor li.’ (Lir Psaume 32:8.) Eski ou trouve kifer sa bizin ankouraz nou? Mem si nou mank konfians an noumem, Jéhovah kapav ed nou pou depas nou bann limit ek fer plis ki seki nou panse. Parey kouma enn profeser gid enn zelev ki pena lexperyans pou progrese, Jéhovah dispoze pou gid nou pou ki nou kontign devlop nou bann kapasite ek progrese lor plan spiritiel. Jéhovah kapav osi servi nou bann konpagnon Kretien pou ed nou devlop nou bann kapasite pli bien ki nou kapav. Kouma?

9. Kouma nou kapav aplik konsey Paul pou “rod” lintere lezot?

⁹ Paul ti ankouraz tou bann Kretien pou “rod” lintere zot bann konpagnon Kretien. (Lir Philippiens 2:3, 4.) Seki Paul ti pe rod dir, se nou bizin esey trouv bann kalite ki nou bann frer ena ek dir zot sa. Ki nou resanti kan enn kikenn interese ar progre ki nou’nn fer? Normalman, sa pous nou pou fer plis progre, ek devlop nou bann kapasite pli bien ki nou kapav. Li parey, kan nou dir nou bann konpagnon Kretien zot bann kalite, nou ed zot pou progrese ek pou grandi lor plan spiritiel.

10. Kisannla sirtou bizin nou latansion?

¹⁰ Kisannla sirtou bizin nou latansion? Biensir, nou tou nou bizin enn latansion spesial detanzantan. Me bann zenn frer ouswa bann frer ki’nn fek batize vremem bizin santi ki zot itil dan kongregasion. Sa pou ed zot konpran ki zot ena zot plas parmi nou. Parkont, si nou pa montre zot ki nou apresie zot travay, sa kapav dekouraz zot pou devlop dezir pou gagn plis privilez, alor ki Parol Bondie ankouraz zot pou fer sa.​—1 Tim. 3:1.

11. (a) Kouma enn ansien ti ed enn zenn frer pou sirmont so timidite? (b) Ki leson ou kapav tire ar lexanp Julien?

¹¹ Ludovic, enn ansien ki limem ti gagn led kan li ti zenn, dir: “Kan mo vremem interese avek enn frer, li fer bann progre pli vit.” Konsernan Julien, enn zenn frer ki ti ase timid, Ludovic dir: “Parfwa Julien ti anvi fer lezot remark li me li pa ti tro kone kouma pou fer sa, ek lerla li ti konport li dan enn fason bizar. Me mo ti trouve ki li ti bien zanti ek ti vremem anvi ed lezot dan kongregasion. Alor, olie ki mo ti met an-dout so bann mobil, mo ti fixe mo latansion lor so bann kalite ek esey ankouraz li.” Avek letan, Julien ti ranpli bann kondision pou vinn asistan ministeryel, ek asterla li pionie permanan.

12. Ki nou bizin fer pou ed enn kikenn devlop so bann kapasite pli bien ki li kapav? Donn enn lexanp.

¹² Si nou anvi ed lezot pou devlop zot kapasite pli bien ki zot kapav, nou bizin bien obzerv zot. Parey kouma lexanp Julien montre nou, li bon ki nou pa aret nou lor bann pwin feb enn dimounn, me esey trouv so bann kalite ek bann kapasite ki li kapav devlope pli bien. Se koumsa ki Jésus ti azir anver lapot Pierre. Mem si parfwa Pierre pa ti paret tro stab, Jésus ti predir ki li ti pou vinn stab kouma enn gro ros.​—Jean 1:42.

13, 14. (a) Kouma Barnabas ti azir anver Marc? (b) Kouma enn zenn frer ti gagn mem led ki Marc ti gagne? (Get zimaz dan koumansman lartik.)

¹³ Barnabas ti azir parey anver Jean, ki  ti ena osi enn nom Romin, Marc. (Actes 12:25) Kan Paul ti fer so premie vwayaz misioner avek Barnabas, Marc ti servi kouma enn “serviter,” kitfwa li ti okip bann kitsoz ki zot ti bizin. Me kan zot ti ariv Pamphylie, Marc ti abandonn zot enn kout koumsa. Paul ek Barnabas ti bizin vwayaz tousel dan enn landrwa kot ti ena bann bandi, pou al dan lenor. (Actes 13:5, 13) Malgre sa, li paret ki Barnabas pa ti aret li lor move konportman Marc ek plitar li ti sezi lokazion pou konplet Marc so formasion. (Actes 15:37-39) Sa ti ed Marc pou vinn enn serviter Jéhovah ki responsab. Li interesan pou trouve ki apre, Marc ti dan Rome avek Paul ki ti dan prizon, ek ansam zot ti avoy zot salitasion bann Kretien dan kongregasion Colosses. Ek Paul ti koz an bien lor Marc. (Col. 4:10) Mazine ki kantite Barnabas kitfwa ti satisfe kan Paul ti mem demande ki Marc vinn ed li!​—2 Tim. 4:11.

¹⁴ Alexandre, enn ansien ki’nn fek nome, dir kouma li ti tir profi ar fason ki enn frer ti ed li: “Kan mo ti pli zenn, li ti bien difisil pou mwa priye an piblik. Enn ansien ti montre mwa kouma pou prepar mwa pou priye ek pou pa strese. Olie ki li ti aret servi mwa, li ti donn mwa lokazion pou priye pli souvan dan bann renion predikasion. Avek letan, mo ti gagn plis konfians.”

15. Kouma Paul ti montre ki li apresie so bann frer?

¹⁵ Kan nou remark bon kalite ki enn lot Kretien ena, eski nou felisit li pou sa? Dan Romains sapit 16, Paul mansionn plis ki 20 so bann konpagnon Kretien ek zot bann bon kalite ki ti fer li apresie zot. (Rom. 16:3-7, 13) Par exanp, Paul ti dir ki Andronicus ek Junias ti pe servi Christ pli lontan ki li pou montre ki zot ti ena landirans. Paul ti osi koz an bien lor mama Rufus, ek kitfwa kan li ti fer sa li ti pe pans lafeksion ki mama Rufus ti’nn manifeste anver li.

16. Kan nou felisit enn zenn, ki rezilta sa kapav ena?

¹⁶ Kan nou felisit lezot sinserman, sa kapav amenn bann bon rezilta. Anou get lexanp Rico, enn zenn garson ki res la France. Rico ti dekouraze parski so papa ki pa ti ena mem krwayans ki li, ti opoze kan Rico ti anvi pran batem. Rico ti panse ki li bizin atann ki li vinn mazer pou kapav servi Jéhovah afon. Li ti osi tris parski lezot ti pe sikann li dan lekol. Frédéric, enn ansien ki ti fer so letid, rakonte: “Mo ti felisit Rico parski bann problem ki li ti pe gagne montre ki li ti ena ase kouraz pou exprim so lafwa.” Sa bann felisitasion-la ti donn Rico plis lafors pou kontign donn enn bon lexanp ek ti ed li pou vinn pli pros ar so papa. Rico ti batize kan li ti ena 12 an.

17. (a) Kouma nou kapav ed nou bann frer pou progrese? (b) Kouma enn misioner ti montre ki li interese ar bann zenn frer, ek ki rezilta sa finn ena?

¹⁷ Sak fwa ki nou felisit nou bann  konpagnon Kretien pou zot bann responsabilite ki zot inn bien akonpli ouswa pou zot bann zefor, nou motiv zot pou servi Jéhovah ankor plis. Sylvie, a enn ser ki’nn servi dan Béthel la France pandan plizir lane, ti dir ki bann ser osi kapav felisit bann frer. Li dir ki bann madam kapav plis remark bann detay ouswa bann zefor ki lezot fer. Alor zot “bann parol lankourazman kapav konplet seki bann frer ki ena lexperyans dir.” Li dir osi: “Pou mwa, felisit lezot se enn kitsoz inportan.” (Prov. 3:27) Jérôme, enn misioner dan Guyane, ti ed boukou zenn frer pou rant dan servis misioner. Li dir: “Mo’nn remarke ki kan mo felisit bann zenn frer lor enn pwin an partikilie dan zot minister ouswa felisit zot pou zot bann komanter bien reflesi, sa fer zot gagn plis konfians. Ek lerla, zot devlop zot kapasite pli bien.”

18. Kifer li bon ki nou travay ansam avek bann zenn frer?

¹⁸ Nou kapav osi motiv nou bann konpagnon Kretien pou fer bann progre spiritiel kan nou travay ansam avek zot. Enn ansien kapav demann enn zenn frer ki bien konn servi computer pou inprim depi jw.org bann linformasion ki kapav ankouraz bann aze dan kongregasion ki pena computer. Si ou bizin netwaye ouswa fer bann travay reparasion dan Lasal, kifer ou pa invit enn zenn frer pou vinn ed ou? Kan ou fer sa, sa kapav donn ou lokazion pou trouv kapasite bann zenn, felisit zot ek trouv lefe ki sa kapav ena lor zot.​—Prov. 15:23.

19, 20. Kifer nou bizin ed lezot pou progrese?

¹⁹ Kan Jéhovah ti swazir Josué pou gid bann Izraelit, Jéhovah ti osi donn Moïse lord pou “ankouraz” ek “fortifie” Josué. (Lir Deutéronome 3:28.) Deplizanpli, pli boukou dimounn pe vinn dan lorganizasion. Tou bann Kretien ki ena lexperyans​—pa zis bann ansien​—kapav ed bann zenn frer ek bann frer ki’nn fek batize pou devlop zot kapasite pli bien ki zot kapav. Koumsa, pli boukou pou pran servis aplintan, ek pli boukou pou “kalifie pou ansegn lezot.”​—2 Tim. 2:2.

²⁰ Mem si nou dan enn kongregasion bien etabli ouswa dan enn ti group ki pe progrese pou vinn enn kongregasion, anou pans lavenir. Enn fason pou fer sa se imit Jéhovah, ki touletan rod seki bon dan so bann serviter.