Eski ou finn lir bien bann dernie nimero Latour Degard? Alor, gete si ou kapav reponn sa bann kestion-la:

Ki ler ti bizin touy agno ki ti pou servi pou Pâque le 14 Nizan?

Sertin tradiksion Labib dir ki ti bizin touy sa agno-la “ant de swar,” setadir zis apre kouse soley​—apre kouse soley me avan fer bien nwar. (Ex. 12:6)​—15/12, paz 18-19.

Ki prinsip Labib bann zenn kapav swiv pou pran bann bon desizion?

Trwa parmi se: (1) Avan tou kitsoz, rod Rwayom Bondie ek so zistis. (Mat. 6:19-34) (2) Servi lezot fer nou gagn lazwa. (Actes 20:35) (3) Kontan pou servi Jéhovah dan to zenes. (Eccl. 12:1)​—15/1, paz 19-20.

Ki kat kavalie inn koumans rant an aksion depi 1914?

Jésus, antan ki kavalie lor enn seval blan, inn debaras lesiel ar Satan ek so bann demon. Kavalie lor seval kouler dife reprezant bann lager ki’nn fer limanite soufer. Kavalie lor seval nwar reprezant lafaminn. Kavalie lor seval blem amenn bann lepidemi ki touy plizir milyon dimounn. (Rév. 6:2-8)​—1/2, paz 6-7, an Franse.

Kan eski pou ena “maryaz Lagno”? (Rév. 19:7)

Pou ena “maryaz Lagno” apre ki Lerwa Jésus Christ konplet so viktwar, setadir apre destriksion Gran Babylone ek apre lager Har-​Maguédôn.​—15/2, paz 10.

Kifer bann Zwif dan lepok Jésus ti “pe atann” Lemesi? (Luc 3:15)

Nou pa sir si bann Zwif dan premie siek ti konpran profesi Daniel lor Lemesi parey kouma nou konpran sa profesi-la azordi. (Dan. 9:24-27) Malgre sa, kitfwa zot ti tann koz lor mesaz ki bann anz ti anons bann berze ouswa lor seki profetes Anne ti dir kan li ti trouv Jésus, ki ti enn tibaba dan tanp. Ti ena osi bann astrolog ki ti vinn rod “sa kikenn ki finn ne kouma lerwa bann Zwif la.” (Mat. 2:1, 2) Ek plitar, Jean Baptiste ti montre ki Le-Christ ti pre pou vini.​—15/2, paz 26-27.

Ki nou kapav fer pou ki nou Wi pa vedir Non? (2 Cor. 1:18)

Nou rekonet ki parfwa, akoz bann sitiasion ki nou pa kapav fer nanye, li inposib pou tini nou parol. Me si nou fer enn promes ouswa pran enn langazman, nou bizin fer tou seki nou kapav pou tini nou parol.​—15/3, paz 32.

Kouma nou kapav reziste kont tantasion pou get pornografi?

Trwa kitsoz ki kapav ed nou se: (1) Detourn nou lizie deswit si bann zimaz erotik paret devan nou. (2) Protez nou bann panse kan nou konsantre plito lor bann kitsoz pozitif ek nou priye Bondie. (3) Vey lor nou bann aksion kan nou evit get bann fim ouswa bann sit Internet kot ena pornografi.​—1/5, paz 12-14.

Kan enn Kretien kit so fami pou al enn lot pei pou gagn plis kas, ki bann konsekans ki li pa atann sa kapav ena?

Kan bann konzwin swazir pou viv separe ar zot fami, bann zanfan soufer lor plan afektif ek moral. Zot kapav mem vinn amer ek ankoler ar sa paran ki’nn ale la. Ek bann konzwin ki viv separe kapav tante pou komet limoralite sexiel.​—15/4, paz 19-20.

Kifer ti kas lazam bann kriminel ki ti exekite lor enn poto?

Pou exekit sertin kriminel, bann Romin ti met zot lor enn poto. Bann Zwif ti demann pou kas lazam bann kriminel ki ti lor poto akote Jésus. Zot ti pou gagn plis difikilte pou respire ek lerla zot ti pou mor pli vit. Koumsa, pa ti pou bizin les zot tout-lanwit lor poto. (Deut. 21:22, 23)​—1/5, paz 11, an Franse.

Ki kat kestion li bon nou rapel kan nou pe koz avek bann dimounn dan nou minister?

Ar kisannla mo pe koze? Kotsa mo pe koz ar zot? Ki moman mo pe koz ar zot? Kouma mo bizin koz ar zot?​—15/5, paz 12-15.

Ki kantite dimounn finn mor ar sigaret?

Pandan sa siek ki finn pase la, 100,000,000 dimounn finn mor ar sigaret. Sa bann dernie lane-la, anviron 6,000,000 dimounn inn mor ar sigaret par an.​—1/6, paz 3, an Franse.