1. Rakont enn lexanp Biblik ki montre ki sertin serviter Bondie finn anbet zotmem par bann fos rezonnman. (Get zimaz dan koumansman lartik.)

 ENN gramatin, Gran Pret Aaron ti pe deboute kot lantre tabernak Jéhovah, ek dan so lame ti ena enn resipian dife kot bril lansan. Enn tipe pli lwin, ti ena Qorah ansam avek 250 zom. Zot osi zot ti pe ofer lansan Jéhovah ek sakenn ti ena so resipian dife. (Nomb. 16:16-18) Kan get zot, sa bann zom-la ti paret bann fidel adorater Jéhovah. Me zot ti diferan ar Aaron. Zot ti rebel ek arogan ek ti pe rod pran plas bann pret. (Nomb. 16:1-11) Zot ti’nn anbet zotmem ek zot ti panse ki Bondie ti pou aksepte zot ladorasion. Me an realite, zot ti pe insilte Jéhovah ki ti kapav lir dan zot leker ek ti trouve ki zot bann ipokrit.​—Jér. 17:10.

2. Ki Moïse ti’nn predir, ek eski so bann parol ti realize?

² An rapor avek sa, so lavey, Moïse ti’nn predir: “Gramatin Jéhovah pou fer kone kisannla ki pou Li.” (Nomb. 16:5) Ek vremem, Jéhovah ti fer kone kisannla ti bann vre adorater ek kisannla ti bann fos adorater kan “enn dife ti sorti kot Jéhovah ek ti bril net [Qorah ek] bann 250 zom ki ti pe ofer lansan.” (Nomb. 16:35; 26:10) Me, Jéhovah pa ti touy Aaron  pou montre ki se Aaron ki ti vre pret ek ki ti enn vre adorater Bondie.​—Lir 1 Corinthiens 8:3.

3. (a) Ki sitiasion ti ena dan lepok lapot Paul? (b) Ki nou aprann ar fason ki Jéhovah ti azir avek bann rebel dan lepok Moïse?

³ Anviron 1,500 an plitar, dan lepok lapot Paul, ti re-ena enn sitiasion koumsa. Sertin ki ti pretann zot Kretien ti koumans swiv bann fos lansegnman; pourtan, zot ti kontign frekant kongregasion. Pou enn sinp obzervater, kitfwa sa bann aposta-la pa ti diferan ar lezot dan kongregasion. Me zot bann fos lansegnman ti reprezant enn danze pou bann Kretien fidel. Sa bann loulou ki ti’nn abiy kouma mouton la ti pe “boulvers lafwa sertin.” (2 Tim. 2:16-18) Me, Jéhovah pa ti enn sinp obzervater, ek Paul ti konn sa par fason ki Bondie ti azir kan plizir siek avan, Qorah ek bann ki ti soutenir li ti rebele. An rapor avek sa, anou examinn bann parol interesan ki Paul ti ekrir Timothée ek gete ki bann leson pratik nou kapav aprann.

4. Ki lasirans Paul ti ena, ek kouma li’nn montre Timothée ki li ti ena sa lasirans-la?

⁴ Paul ti sir ki Jéhovah kapav trouv bann ki pe ador Li dan enn fason ipokrit, ek li ti osi sir ki Jéhovah konn bann ki pe obeir Li. Paul ti montre ki li ena sa lasirans-la par bann mo ki li ti servi pou ekrir Timothée. Apre ki li ti koz lor bann ditor spiritiel ki bann aposta ti pe deza fer sertin dan kongregasion, Paul ti inspire par Bondie pou ekrir: “Malgre tou, sa fondasion solid ki Bondie inn poze la, pe tini ferm, ek ena sa sele-la lor la: ‘Jéhovah konn bann dimounn ki pou Li,’ ek ‘Fode ki tou dimounn ki invok nom Jéhovah zot rezet linzistis.’”​—2 Tim. 2:18, 19.

5, 6. Kan Paul ti servi lexpresion “fondasion solid ki Bondie inn poze,” kifer sa ti ena linportans ek ki lefe sa ti ena lor Timothée?

⁵ Kifer bann mo ki Paul inn servi dan 2 Timothée 2:19 ena linportans? Se sel plas dan Labib kot mansionn “fondasion solid ki Bondie inn poze.” Labib konpar plizir kitsoz ar enn “fondasion,” parmi ena Jérusalem ki ti kapital Israël dan lepase. (Ps. 87:1, 2) Labib dekrir osi rol ki Jésus ena dan proze Bondie kouma enn fondasion. (1 Cor. 3:11; 1 Pierre 2:6) Me ki Paul ti pe panse kan li ti ekrir konsernan “fondasion solid ki Bondie inn poze”?

⁶ Paul ti mansionn “fondasion solid ki Bondie inn poze” dan mem kontex ki li ti sit bann parol ki Moïse ti dir Qorah ek bann ki ti dan so kote, ek ki trouv dan Nombres 16:5. Li kler ki Paul ti pe fer referans ar bann levennman ki ti’nn arive dan lepok Moïse pou ankouraz Timothée ek pou rapel li ki Jéhovah ena kapasite pou trouv ek pou pran bann aksion kont bann ki rebel kont Li. Bann aposta dan kongregasion pa ti pou kapav anpes Jéhovah realiz so proze parey kouma plizir siek avan Qorah pa’nn kapav anpes Jéhovah realiz so proze. Paul pa ti explik an detay seki “fondasion solid ki Bondie inn poze” reprezante. Me, pena dout ki bann mo ki li’nn servi ti pous Timothée pou ena konfians an Jéhovah ek dan So fason azir.

7. Kifer nou kapav sir ki Jéhovah pou azir avek zistis ek fidelite?

⁷ Jéhovah so bann prinsip elve pa sanze. Psaume 33:11 dir: “Bann desizion Jéhovah pou dir pou touletan; bann panse so leker zot dire zenerasion an zenerasion.” Lezot verse dir ki regn Jéhovah, so lamour fidel, so zistis, ek so fidelite dir pou touletan. (Ex. 15:18; Ps. 106:1; 112:9; 117:2) Malaki 3:6 dir: “Momem  Jéhovah; mo pa sanze.” Parey, Jacques 1:17 dir ki Jéhovah “pa sanze kouma mouvman lonbraz sanze.”

8, 9. Ki leson nou aprann lor “sele” ki Paul ti mansione dan so lexanp?

⁸ Seki Paul ti dir dan 2 Timothée 2:19 dekrir enn fondasion avek enn mesaz lor la, ki koumadir inn grave. Dan lepase, souvan ti grav enn mesaz lor fondasion enn batiman, kitfwa pou montre kisannla inn konstrir sa batiman-la ouswa pou kisannla li ete. Paul ti premie ekrivin Labib ki ti servi sa lexanp-la. a Sele ki trouv lor “fondasion solid ki Bondie inn poze” ena de mesaz inportan. Premierman, “Jéhovah konn bann dimounn ki pou Li” ek deziemman, “Fode ki tou dimounn ki invok nom Jéhovah rezet linzistis.” Sa rapel nou seki nou lir dan Nombres 16:5.​—Lir. b

⁹ Ki leson nou aprann lor “sele” ki Paul ti mansione? Pou bann ki pou Bondie, bann prinsip Jéhovah zot baze lor de verite bien inportan: (1) Jéhovah kontan bann ki fidel anver li, ek (2) Jéhovah pa kontan linzistis. Ki rapor sa ena avek lapostazi ki ena dan kongregasion?

10. Kouma seki bann aposta ti pe fer ti afekte bann Kretien fidel dan lepok Paul?

¹⁰ Timothée ek lezot Kretien fidel sirman ti trakase ar seki bann aposta ti pe fer parmi zot. Sertin Kretien kitfwa ti pe demande kifer ti pe les sa bann aposta-la dan kongregasion. Bann ki fidel kitfwa ti demann zotmem si vremem Jéhovah kapav fer diferans ant bann ki bien deside pou res fidel anver Li ek bann aposta ki ti pe ador Li dan enn fason ipokrit.​—Actes 20:29, 30.

11, 12. Kouma let Paul ti fortifie lafwa Timothée?

¹¹ Pena dout ki let Paul ti fortifie lafwa Timothée. Sa ti rapel li ki Jéhovah ti konsider Aaron kouma enn dimounn zis ek ki Li ti devwal lipokrizi Qorah ek so bann konpagnon, ti rezet zot ek ti detrir zot. An realite, Paul ti pe dir ki mem si ena bann fos Kretien dan kongregasion, Jéhovah ti pou kone kisannla ki fidel anver Li, parey kouma dan lepok Moïse.

 ¹² Jéhovah zame sanze; nou kapav touletan kont lor Li. Li pa kontan linzistis, ek dan ler ki bizin Li koriz bann ki fer pese ek ki pa repanti. Timothée ti “invok nom Jéhovah,” alor Paul ti osi rapel li linportans pou rezet move linflians bann fos Kretien. c

13. Ki konfians nou kapav ena?

¹³ Bann parol inspire ki Paul ti dir kapav fortifie nou’si lor plan spiritiel. Premierman, sa rasir nou kan nou kone ki Jéhovah bien kone kisannla ki fidel anver Li. Jéhovah pa zis gete san fer nanye. Okontrer, Jéhovah bien interese ar bann ki fidel anver Li. Labib dir: “Lizie Jéhovah pe get partou lor later pou montre so lafors an faver bann dimounn ki ena enn leker konple anver Li.” (2 Chron. 16:9) Alor, nou kapav ena enn konfians total ki seki nou fer pou Jéhovah avek “enn leker pir,” zame dan vid.​—1 Tim. 1:5; 1 Cor. 15:58.

14. Ki kalite dimounn Jéhovah pa tolere?

¹⁴ Li bon pou kone osi ki Jéhovah pa toler bann ki ador Li dan enn fason ipokrit. Parski so lizie “pe get partou lor later,” Li kapav trouv bann ki pena enn leker “konple anver Li.” Proverbes 3:32 dir: “Jéhovah deteste enn dimounn ipokrit,” kouma par exanp enn dimounn ki volonterman pretann ouswa fer sanblan pe obeir Li, me ki pe fer pese an kasiet. Enn dimounn ipokrit kapav bien doue pou anbet lezot pandan enn sertenn tan, me parski Jéhovah Li tou-pwisan ek Li zis, sa donn nou garanti ki “sa kikenn ki kasiet so bann pese la pa pou reisi.”​—Prov. 28:13; lir 1 Timothée 5:24; Hébreux 4:13.

15. Ki nou bizin evit fer, ek kifer?

¹⁵ Laplipar bann serviter Jéhovah zot sinser dan zot ladorasion. Bien rar enn kikenn dan kongregasion volonterman pou ador Jéhovah dan enn fason ipokrit. Me selman, si sa inn arive dan lepok Moïse ek dan premie siek, sa kapav arive zordi osi. (2 Tim. 3:1, 5) Me, eski savedir ki nou bizin soupsonn nou bann konpagnon Kretien ek esey devine si zot vremem fidel ar Jéhovah? Non! Li pa bon ki nou soupsonn nou bann frer ek ser alor ki nou pena prev. (Lir Romains 14:10-12; 1 Corinthiens 13:7.) Anplis, si nou ena tandans pou dout lintegrite lezot dan kongregasion, sa pou fer noumem ditor lor plan spiritiel.

16. (a) Ki sakenn parmi nou kapav fer pou anpes lipokrizi pran rasinn dan nou leker? (b) Ki bann leson nou kapav aprann dan lankadre “ Kontign Teste . . . Kontign Examine . . .”?

¹⁶ Sak Kretien bizin “examinn so bann prop aksion.” (Gal. 6:4) Parski nou ena tandans pou fer pese, li kapav arive ki san nou rann nou kont nou pa fer bann kitsoz avek enn leker sinser. (Héb. 3:12, 13) Alor, detanzantan li bon nou examinn noumem pou kone ki motiv nou pou servi Jéhovah. Nou kapav demann noumem: ‘Eski mo pe ador Jéhovah parski mo kontan Li ek parski mo anvi ki Li diriz mwa? Ouswa mo pe pans plis bann benediksion ki mo pe atann pou gagne dan Paradi?’ (Rév. 4:11) Pena dout, nou tou nou pou kapav tir profi si nou examinn nou bann aksion ek tir tou ti tras lipokrizi ki ena dan nou leker.

17, 18. Kifer nou bizin ador Jéhovah avek fidelite ek dan enn fason sinser?

¹⁷ Kan nou fer zefor pou ador Jéhovah avek fidelite ek avek enn leker sinser, nou gagn boukou bienfe. Enn ekrivin  Psaume ti dir: “Ere sa dimounn ki Jéhovah pa demann enn kont pou so pese, ek ki pena okenn tronpri dan so lespri.” (Ps. 32:2) Wi, bann ki tir tou tras lipokrizi dan zot leker zot pli ere, ek zot pou kapav profit enn lazwa parfe dan lavenir.

¹⁸ Biento, Jéhovah pou fer kone kisannla pe fer seki move ouswa pe amenn enn doub lavi, ek pou fer trouv bien “diferans ant enn bon dimounn ek enn move dimounn, ant enn dimounn ki pe servi Bondie ek enn dimounn ki pa pe servi Li.” (Mal. 3:18) Antretan, sa rasir nou kan nou kone ki “lizie Jéhovah lor bann dimounn drwat, ek so zorey ekout zot bann siplikasion.”​—1 Pierre 3:12.