Se enn kestion inportan sirtou pou bann ki finn perdi zot konzwin. Kitfwa zot bien anvi reviv avek li kan li pou resisite dan lemond nouvo. Enn vef ti dir: “Mo madam ek mwa nou ti anvi viv pou touletan ansam. Pli gran dezir ki nou ti ena se pou kontign ador Jéhovah kouma mari ek fam pou touletan. Mo ankor ena sa bann santiman-la.” Eski ena bann bon rezon pou atann ki bann ki pou resisite lor later pou kapav marye? Avredir, nou pa konn repons sa kestion-la.

Pandan plizir lane, nou bann piblikasion finn explike ki seki Jésus ti dir lor rezireksion ek lor maryaz, kitfwa konsern rezireksion ki pou ena lor later ek ki bann ki pou resisite dan lemond nouvo sirman pa pou marye. a (Mat. 22:29, 30; Marc 12:24, 25; Luc 20:34-36) Selman, san ki nou kategorik lor sa size-la, eski li posib ki bann parol Jésus konsern rezireksion ki ena dan lesiel? Anou examinn seki Jésus ti dir.

Ar kisannla Jésus ti pe koze kan li ti pe koz lor rezireksion? (Lir Luc 20:27-33.) Jésus ti pe koz avek bann Sadiseen ki pa ti krwar dan rezireksion. Zot ti pe esey piez Jésus avek enn kestion lor rezireksion ek lor koutim ki ti ena pou enn madam vev marye avek frer so mari. b Jésus ti reponn zot: “Bann zanfan sa sistem zordi la marye ek donn zot an maryaz, me bann ki dign pou gagn sa sistem ki pou vini la ek rezireksion parmi bann mor, pa marye ek pa donn zot an maryaz. An realite, zot nepli kapav mor, parski zot parey kouma bann anz, ek zot bann zanfan Bondie parski zot bann zanfan rezireksion.”​—Luc 20:34-36.

Kifer nou bann piblikasion ti dir ki Jésus kitfwa ti pe koz lor rezireksion ki pou ena lor later? Pou de rezon prinsipal. Premierman, li posib ki bann Sadiseen ti pe fer referans ar rezireksion lor later kan zot ti pe koz ar Jésus, ek alor, nou panse ki kan Jésus ti reponn zot, li ti koz lor mem rezireksion. Deziemman, kan Jésus ti terminn so repons, li ti koz lor Abraham, Isaac, ek Jacob ki pou resisite lor later.​—Luc 20:37, 38.

Selman, li posib ki Jésus ti pe fer referans ar rezireksion bann ki pou viv dan lesiel. Kifer nou dir sa? Anou examinn de fraz bien inportan ki Jésus ti dir.

“Bann ki dign pou gagn . . . rezireksion parmi bann mor.” Bann Kretien ki ena lesperans pou al dan lesiel, Bondie ‘ziz zot dign pou gagn so Rwayom.’ (2 Thess. 1:5, 11) Lor baz sakrifis Jésus, Bondie finn deklar zot kouma bann dimounn zis, ki pou gagn lavi; akoz sa, zot pa mor kouma bann dimounn ki’nn fer pese ek ki’nn kondane. (Rom. 5:1, 18; 8:1) Sa bann Kretien-la zot “ere ek sin” ek Bondie konsider zot dign pou resisite ek pou viv dan lesiel. (Rév. 20:5, 6) Parkont, parmi bann ki pou resisite pou gagn lavi lor later, pou ena “bann dimounn inzis.” (Actes 24:15) Eski nou kapav dir ki sa bann  dimounn-la, Bondie finn “ziz zot dign” pou resisite?

“Zot nepli kapav mor.” Jésus pa ti dir: “Zot pa pou mor ankor.” Me li ti dir: “Zot nepli kapav mor.” Lezot tradiksion tradir sa fraz-la par: “Zot nepli pou pas par lamor ankor,” ek “lamor pena okenn pouvwar lor zot.” Bann Kretien ki ena lesperans pou al dan lesiel ek ki res fidel ziska lamor lor later, pou resisite pou al viv dan lesiel ek zot pou gagn lavi imortel, setadir lavi pou touletan ek ki pa kapav detrir. (1 Cor. 15:53, 54) Lamor nepli ena okenn pouvwar lor bann ki resisite pou al dan lesiel. c

Dapre seki nou finn fek examine, ki konklizion nou kapav tire? Li posib ki bann parol Jésus lor maryaz ek lor rezireksion aplik ar rezireksion dan lesiel. Si seki nou pe dir li exakt, alor seki Jésus ti dir, fer nou konpran plizir kitsoz lor bann ki resisite pou al dan lesiel: Zot pa marye, zot pa kapav mor, ek dan sertin domenn, zot resanble bann anz​—bann kreatir ki viv dan lesiel. Selman sa konklizion-la fer nou poz plizir kestion.

Premierman, kifer Jésus ti pou fer referans ar rezireksion bann ki pou viv dan lesiel alor ki kitfwa bann Sadiseen ti pe pans rezireksion lor later? Pa touletan ki Jésus ti reponn so bann lennmi dapre seki zot ti pe panse. Par exanp, kan sertin Zwif ti demann Jésus pou fer enn mirak, li ti dir: “Kraz sa tanp-la ek dan trwa zour mo pou relev li.” Sirman Jésus ti kone ki zot ti pe pans batiman lamem, “me li ti pe koz lor tanp so lekor.” (Jean 2:18-21) Kitfwa Jésus pa ti trouv neseser pou reponn sa bann Sadiseen ipokrit ki pa ti krwar ni dan rezireksion, ni dan bann anz. (Prov. 23:9; Mat. 7:6; Actes 23:8) Okontrer, kitfwa li ti anvi donn so bann disip ki ti sinser bann detay lor rezireksion dan lesiel, parski enn zour zot ti pou gagn sa rezireksion-la.

Deziemman, kifer Jésus ti pou terminn so konversasion lor Abraham, Isaac ek Jacob, alor ki zot pou resisite lor later? (Lir Matthieu 22:31, 32.) Remarke ki avan ki Jésus ti koumans koz lor sa bann zom fidel la, li ti dir: “Konsernan rezireksion bann mor.” Li posib ki Jésus ti servi sa fraz-la pou amenn enn sanzman dan bann lide ki li’nn fek dir avan ek pou koz lor enn lot size. Li ti nepli pe koz lor rezireksion dan lesiel, me lor rezireksion lor later. Apre sa, Jésus ti fer referans ar bann liv ki Moïse ti ekrir, ki bann Sadiseen ti pretann aksepte. Jésus ti servi seki Jéhovah ti dir Moïse kan li ti trouv enn ti-pie ki ti pe brile, pou donn plis prev ki rezireksion lor later se enn proze Bondie ki vremem pou arive.​—Ex. 3:1-6.

Trwaziemman, si seki Jésus ti dir lor rezireksion ek maryaz aplik ar rezireksion dan lesiel, eski savedir ki bann ki pou resisite lor later pou kapav marye? Parol Bondie pa donn enn repons kler pou sa kestion presi-la. Si Jésus ti pe koz lor rezireksion dan lesiel, alor seki li ti dir pa donn okenn ransegnman si bann ki pou resisite lor later pou kapav marye dan lemond nouvo.

Antretan, nou kone ki Parol Bondie dir dan enn fason kler ki kan enn konzwin mor, so maryaz nepli valid. Alor, fode pa enn vef ouswa enn vev santi li koupab si li desid pou remarye. Se enn desizion personel ek fode pa ki personn kritik li si li santi li tousel ek li anvi remarye.​—Rom. 7:2, 3; 1 Cor. 7:39.

Li normal ki nou ena bann kestion konsernan lavi dan lemond nouvo. Olie ki nou rod devinn bann repons pou sa bann kestion-la, nou bizin zis atann ek dekouver seki Jéhovah pou fer. Me, ena enn kitsoz ki nou kapav sir: Bann dimounn obeisan pou ere, parski Jéhovah pou satisfer tou seki zot bizin ek zot bann dezir, dan pli bon fason posib.​—Ps. 145:16.