PIERRE ti bien plore apre ki li ti renie Jésus. Mem si sa zapot-la ti pou bizin lite pou regagn so lekilib lor plan spiritiel, Jésus ti anvi servi li pou ed lezot. Alor, Jésus ti dir li: “Enn fwa ki to retourne, fortifie to bann frer.” (Luc 22:32, 54-62) Pierre ti vinn enn parmi bann kolonn dan kongregasion premie siek. (Gal. 2:9) Dan mem fason, enn frer ki avan ti pe servi kouma ansien kapav regagn sa responsabilite-la ek lazwa pou fortifie so bann konpagnon Kretien lor plan spiritiel.

Sertin ki avan ti servi kouma ansien finn perdi sa responsabilite-la ek sa kapav fer zot ena santiman ki zot pa’nn reisi. Julio, a ki ti enn ansien an Amérique Di-sid pandan plis ki 20 an, ti dir: “Prepar bann diskour, vizit bann frer ek ser, ek pran swin kongregasion ti ena enn gran plas dan mo lavi! Enn kout, tou ti’nn fini, mo ti santi enn vid dan mo lavi. Mo kapav dir ki sa ti enn peryod bien difisil.” Zordi, Julio pe reservi kouma ansien.

Disip Jacques ti ekrir: “Konsider sa kouma enn gran lazwa mo bann frer, kan zot konn tout sort kalite leprev.” (Jacq. 1:2) Jacques ti pe koz lor bann leprev ki nou gagne akoz persekision ek parski nou inparfe. Li ti mansionn bann dezir egois, tandans pou fer preferans, ek lezot kitsoz ankor. (Jacq. 1:14; 2:1; 4:1, 2, 11) Kan Jéhovah disiplinn nou, sa kapav fer nou bien soufer. (Héb. 12:11) Me fode pa sa kalite leprev la fer nou perdi nou lazwa.

Mem si nou finn perdi nou privilez dan kongregasion, nou ankor ena posibilite pou examinn kalite nou lafwa ek montre nou lamour pou Jéhovah. Nou kapav osi reflesi lor seki ti pous nou pou vinn ansien dan kongregasion. Eski se pou nou prop lintere, ouswa se parski nou ti kontan Jéhovah ek nou  ti sir ki kongregasion pou Li ek ki bann manb kongregasion merit ki pran zot swin? (Actes 20:28-30) Bann frer ki avan ti servi kouma ansien ek ki pe kontign ofer Jéhovah enn servis sakre avek lazwa, montre tou dimounn, ek Satan osi, ki zot ena enn vre lamour pou Jéhovah.

Kan Jéhovah ti disiplinn Lerwa David parski li ti fer bann pese grav, li ti aksepte sa disiplinn-la ek Jéhovah ti pardonn li. Dan enn kantik, David ti dir: “Ere sa dimounn ki’nn gagn pardon pou so fot, ek ki so pese finn kouver. Ere sa dimounn ki Jéhovah pa deklar koupab, ek ki pena okenn tronpri dan so lespri.” (Ps. 32:1, 2) Disiplinn ki David ti gagne ti fer li vinn meyer ek pena dout ki sa ti form li pou vinn enn pli bon berze pou pep Bondie.

Souvan bann frer ki rekoumans servi kouma ansien vinn bann pli bon berze ki avan. Enn frer ki dan sa ka-la ti dir: “Asterla mo konpran pli bien kouma pou ed bann ki fer enn erer.” Enn lot ansien ti dir: “Asterla mo akord enn pli gran valer ar mo responsabilite pou servi mo bann frer ek ser.”

Enn ekrivin Psaume ti ekrir ki ‘Jéhovah pa pou fer bann repros touletan.’ (Ps. 103:9) Alor, fode pa nou panse ki zame ankor Jéhovah pou fer konfians enn dimounn ki finn fer enn pese grave. Ricardo, enn frer ki’nn perdi so bann responsabilite apre ki li ti servi pandan boukou lane kouma ansien, dir: “Mo ti bien dekouraze akoz mo bann erer. Pandan lontan, mo ti ena santiman ki mo pa ti dign pou revinn enn ansien ek sa ti anpes mwa pou servi mo bann frer kouma ansien. Mo pa ti sir ki mo kapav gagn konfians lezot. Me parski mo kontan ed lezot, mo ti kapav kondir bann letid Labib, ankouraz bann frer ek ser dan Lasal, ek travay avek zot dan predikasion. Sa ti ed mwa pou regagn konfians an momem, ek asterla mo pe reservi kouma ansien.”

Si enn frer vinn amer, sa kapav anpes li servi kouma ansien. Li ti pou pli bon ki li reazir parey kouma David, enn serviter Jéhovah, ki ti bizin sove devan Lerwa Saül ki ti zalou li! David ti refiz pou  tir vanzans ek touy Saül, mem kan li ti gagn plizir lokasion pou fer sa. (1 Sam. 24:4-7; 26:8-12) Kan Saül ti mor dan lager, David ti bien sagrin, li ti dir ki Saül ek so garson Yonathân ti ‘bann dimounn ki li ti bien kontan.’ (2 Sam. 1:21-23) David pa ti gard okenn rankinn.

Si ou panse ki bann frer pa finn konpran ou ouswa ki ou viktim enn linzistis, pa les rankinn dominn ou bann panse. Par exanp, an Grande-Bretagne, William ti perdi so privilez apre ki li ti servi kouma enn ansien pandan apepre 30 an. Sa ti fer li vinn amer kont sertin ansien. Ki ti ed William pou koriz so fason panse ek regagn so lekilib lor plan spiritiel? Li ti dir: “Kan mo’nn lir liv Job, sa finn ankouraz mwa boukou. Si Jéhovah ti ed Job pou fer lape avek so trwa kamarad, pena dout ki Li ti pou ed mwa pou fer lape avek bann ansien!”​—Job 42:7-9.

Si ou finn deside pou aret servi kouma ansien, li bon ki ou reflesi kifer ou finn pran sa desizion-la. Eski se akoz bann problem personel ki ti pe akable ou? Eski sertin kitsoz ti vinn pli inportan dan ou lavi? Eski ou ti dekouraze akoz linperfeksion lezot? Ninport ki finn arive, rapel bien ki ou ti pli kapav ed lezot dan plizir fason kan ou ti pe servi kouma ansien. Ou bann diskour ti fortifie zot, ou lexanp ti ankouraz zot, ek ou bann vizit pastoral ti ed zot pou andir bann leprev. Seki ou ti fer antan ki enn ansien fidel, ti fer leker Jéhovah kontan, ek sa ti fer ou osi gagn lazwa.​—Prov. 27:11.

Jéhovah finn ed bann frer pou regagn zot lazwa ek zot dezir pou ranpli zot responsabilite dan kongregasion antan ki ansien. Si ou ti demande pou aret servi kouma ansien ouswa si ou finn perdi ou privilez, ou kapav regagn “dezir pou vinn enn sirveyan.” (1 Tim. 3:1) Paul “pa finn aret priye” pou ki bann Kretien dan Colosses ranpli ar konesans exakt konsernan volonte Bondie, “pou ki zot mars dan enn fason ki Jéhovah aprouve, pou fer Li bien plezir dan tou kitsoz.” (Col. 1:9, 10) Si ou regagn responsabilite pou servi kouma ansien, priye Jéhovah pou ki Li donn ou lafors, pasians ek lazwa. Dan sa bann dernie zour-la, pep Bondie bizin soutien spiritiel bann berze ki kontan zot. Eski ou kapav ek ou dispoze pou fortifie ou bann frer?