1. Ki bann imin bizin, ek kisannla kapav konble sa?

 LI DAN bann imin ki zot bizin santi zot pros avek lezot dimounn. Normalman nou dir ki de dimounn “pros ar zot kamarad kan zot bien kontan zot kamarad ek bien konn sakenn zot kamarad.” Sa fer nou ere kan nou ena bann fami ek bann kamarad ki vremem kontan nou, apresie nou ek konpran nou. Selman, se avek nou Gran Kreater ki nou bizin devlop enn lamitie pli pros.​—Eccl. 12:1.

2. Ki Jéhovah promet nou, me kifer boukou dimounn pa krwar sa promes-la?

² Dan so Parol, Jéhovah ankouraz nou pou “vinn pros” ar Li, ek Li promet nou ki si nou fer sa, “Li pou vinn pros” ar nou. (Jacq. 4:8) Sa vremem ankouraz nou! Pourtan, boukou dimounn panse ki li pa realist pou krwar ki Bondie anvi vinn pros ar zot. Zot panse ki zot pa dign pou apros ar Li ouswa ki Li tro lwin pou kapav apros ar Li. Eski vremem nou kapav vinn pros ar Jéhovah?

3. Ki nou bizin rekonet konsernan Jéhovah?

³ Ofet, Jéhovah “pa lwin ar” bann ki rod Li; nou kapav aprann konn Li. (Lir Actes 17:26, 27; Psaume 145:18.) a Nou  Bondie ti anvi ki mem bann imin inparfe vinn pros ar Li, ek Li pre ek dispoze pou aksepte zot kouma so bann kamarad pros. (Is. 41:8; 55:6) Gras-a so lexperyans, enn ekrivin Psaume ti kapav ekrir konsernan Jéhovah: “Twa ki ekout lapriyer, ver twa, tou sort kalite dimounn pou vini. Ere sa kikenn ki to swazir la ek ki to fer vinn pre.” (Ps. 65:2, 4) Par exanp, Labib montre kouma Asa, lerwa Juda, ti enn kikenn ki ti vinn pros ar Jéhovah ek li montre osi kouma Jéhovah ti azir anver li. b

4. Ki lexanp Lerwa Asa ti les pep Juda?

⁴ Lerwa Asa ti montre enn gran zel pou vre ladorasion, kan li ti eliminn prostitision dan tanp ek lidolatri ki ti’nn ogmante dan pei. (1 Rois 15:9-13) Akoz sa, li ti kapav ankouraz lepep “pou rod Jéhovah, Bondie zot bann anset ek pou obeir Lalwa ek bann komannman.” Jéhovah ti beni dis premie lane regn Asa ek ti ena lape partou. Ek Asa ti kone ki se gras-a Jéhovah ki ti ena sa lape-la. Li ti dir lepep: “Pei-la ankor pou nou, parski nou finn rod Jéhovah nou Bondie. Nou finn rod Li ek Li finn fer nou gagn trankilite toutotour.” (2 Chron. 14:1-7) Anou gete ki ti arive apre.

5. Ki sitiasion ti teste konfians ki Asa ti ena dan Bondie, ek ki ti arive apre?

⁵ Met ou dan plas Asa. Zérah, enn Etiopien inn vinn lager kont Juda avek 1,000,000 zom ek 300 kales. (2 Chron. 14:8-10) Ki ou ti pou fer si ou ti trouv enn gran larme koumsa pe vinn atak ou rwayom? Dan ou larme ena zis 580,000 zom! Eski ou ti pou demann oumem kifer Bondie pe permet enn larme ki ena de fwa plis zom ki ou, vinn atak ou? Dan enn sitiasion koumsa, eski ou ti pou kont lor ou prop sazes? Fason ki Asa ti reazir ti montre ki li ti bien pros ar Jéhovah ek ti fer Li konfians. Li ti priye avek tou so leker: “A Jéhovah nou Bondie, ed nou, parski nou pe kont lor twa, ek lor to nom nou’nn al kont sa lafoul-la. A Jéhovah, to nou Bondie. Pa les enn dimounn mortel gagn viktwar kont twa.” Kouma Bondie ti reponn so lapriyer? “Jéhovah ti gagn viktwar lor bann Etiopien.” Pena okenn lennmi ki ti res vivan dan sa lager-la!​—2 Chron. 14:11-13.

6. Kouma nou kapav imit Asa?

⁶ Ki ti permet Asa ena enn konfians total dan direksion ek proteksion Bondie? Labib dir ki “Asa ti fer seki drwat devan lizie Jéhovah” ek ki so “leker ti konple anver Jéhovah.” (1 Rois 15:11, 14) Nou’si nou bizin servi Bondie avek enn leker konple. Li bien inportan ki nou fer sa pou ki nou kapav ena enn relasion pros avek Jéhovah asterla ek dan lavenir. Eski nou pa vremem ena rekonesans ki Jéhovah inn pran bann dispozision pou fer nou vinn pros ar Li ek ed nou devlop ek gard enn bon lamitie avek Li? Anou get de fason kouma Jéhovah inn fer sa.

7. (a) Ki Jéhovah inn fer pou ki nou vinn pros ar Li? (b) Sit fason pli inportan ki Jéhovah fer nou vinn pros ar Li.

⁷ Jéhovah inn montre so lamour pou bann imin kan Li’nn kree later ki enn zoli plas pou reste. Li kontign montre lamour pou nou par bann kitsoz extraordiner ki Li donn nou pou gard nou vivan. (Actes 17:28; Rév. 4:11) Seki pli inportan, Jéhovah donn nou seki nou bizin lor plan spiritiel. (Luc 12:42) Li osi rasir nou ki Li ekout nou personelman kan nou priye Li. (1 Jean 5:14) Selman, fason pli inportan ki Jéhovah atir nou  ver Li ek ki nou vinn pros ar Li se atraver lamour ki Li’nn montre par mwayin laranson. (Lir 1 Jean 4:9, 10, 19.) Jéhovah ti avoy so “sel Garson ki Li finn kree direk” lor later pou delivre nou ar pese ek lamor.​—Jean 3:16.

8, 9. Ki rol Jésus ena dan proze Jéhovah?

⁸ Jéhovah inn fer an-sort ki mem bann dimounn ki’nn viv avan lepok Jésus Christ gagn bann bienfe gras-a laranson. Pou Jéhovah, depi moman ki Li’nn profetize ki pou ena enn Sover pou limanite, se koumadir ti’nn fini pey laranson, parski Li ti kone ki so proze pou realize. (Gen. 3:15) Plizir siek apre, lapot Paul ti exprim so rekonesans anver Bondie pou “liberasion par ranson ki Christ Jésus inn peye.” Paul azoute: “Dan so pasians Bondie ti pe pardonn pese ki bann dimounn ti’nn fer dan lepase.” (Rom. 3:21-26) Vremem, Jésus inn zwe enn rol bien inportan pou ki nou vinn pros ar Bondie!

⁹ Se zis atraver Jésus ki bann dimounn inb kapav aprann konn Jéhovah ek vinn pros ek intim ar Li. Kouma eski Labib met laksan lor sa verite-la? Paul ti ekrir: “Bondie prouv so prop lamour anver nou, kan Christ finn mor pou nou, alor ki nou ti ankor bann dimounn ki fer pese.” (Rom. 5:6-8) Si Jéhovah finn donn Jésus an sakrifis, se pa parski nou merit sa, me se parski Li telman kontan nou. Jésus ti dir: “Personn pa kapav vinn ver mwa, si mo Papa ki finn avoy mwa pa atir li.” Dan enn lot lokazion, li ti dir: “Personn pa kapav vinn kot mo Papa san ki li pas par mwa.” (Jean 6:44; 14:6) Kouma Jéhovah atir bann dimounn ver Li atraver Jésus ek ed zot pou res dan So lamour avek lespwar pou viv pou touletan? Se gras-a so lespri sin. (Lir Jude 20, 21.) Anou get enn lot fason kouma Jéhovah atir nou ver Li.

10. Kouma Labib fer nou vinn pli pros ar Bondie?

¹⁰ Ziska ler dan sa lartik-la, nou’nn sit ouswa mansionn bann verse ki trouv dan 14 liv Labib. Si pa ti ena Labib, kouma nou ti pou kone ki nou kapav vinn pros ar nou Kreater? San Labib, kouma nou ti pou kapav aprann lor laranson ek lor kouma nou kapav vinn pros ar Jéhovah atraver Jésus? Par mwayin so lespri, Jéhovah inn inspir bann dimounn pou ekrir Labib. Dan Labib, nou aprann lor so bann kalite atiran ek so proze pou limanite. Par exanp, dan Exode 34:6, 7, Jéhovah ti dir Moïse ki Li “enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans, ki gard lamour fidel pou bann milye dimounn, ki pardonn erer, fot, ek pese.” Kisannla pa pou anvi vinn pros ar enn kikenn koumsa? Jéhovah kone ki plis nou aprann konn Li atraver Labib, plis Li pou vinn reel pou nou ek nou pou santi nou pros ar Li.

11. Kifer nou bizin fer zefor pou aprann lor bann kalite ki Bondie ena ek lor so fason azir? (Get zimaz dan koumansman lartik.)

¹¹ Lintrodiksion liv Approchez-vous de Jéhovah explike kouma nou kapav ena enn relasion pros avek Bondie. Li dir: “Pou ki nou devlop lamitie ar enn dimounn, nou’nn bizin konn li, admir li ek apresie so personalite. Labib koz lor bann kalite ki Bondie ena ek lor So fason azir. Alor, li bien inportan ki nou etidie sa bann kitsoz-la.” Wi, nou vremem ena rekonesans anver Jéhovah ki’nn fer ekrir so Parol dan enn fason ki nou kapav konpran!

12. Kifer Jéhovah inn servi bann imin pou ekrir Labib?

¹² Jéhovah ti kapav fer bann anz  ekrir Labib. Apre tou, zot bien interese ar nou ek seki nou fer. (1 Pierre 1:12) Pena dout ki bann anz ti pou kapav ekrir mesaz ki Bondie ena pou limanite. Me eski zot ti pou trouv bann kitsoz parey kouma bann imin? Eski zot ti pou konpran seki nou bizin, nou bann febles, ek nou bann dezir? Non, Jéhovah ti kone ki bann anz diferan ar bann imin. Alor, kan Jéhovah inn fer bann imin ekrir Labib, Li’nn fer sa liv-la vinn pli personel pou nou. Nou kapav konpran fason panse ek santiman bann ki’nn ekrir Labib ek lezot dimounn ki’nn mansione ladan. Nou kapav konpran zot bann desepsion, dout, laper, ek zot bann erer ek osi resanti zot lazwa. Parey kouma profet Éliya, tou bann ki’nn ekrir Labib ti ena “bann santiman parey kouma nou.”​—Jacq. 5:17.

13. Kouma lapriyer Yona tous ou leker?

¹³ Par exanp, eski enn anz ti pou kapav exprim pli bien bann santiman Yona kan sa profet-la ti sove ek pa ti rod akonpli travay ki Bondie ti donn li? Erezman Jéhovah inn fer Yona ekrir so prop zistwar, ek osi lapriyer sinser ki li ti fer kan li ti dan fon lamer! Yona ti dir: “Kan mo lavi ti pe ale, se Jéhovah ki mo ti rapel.”​—Yona 1:3, 10; 2:1-9.

14. Kifer nou kapav konpran seki Isaïe ti ekrir lor limem?

¹⁴ Get osi seki Jéhovah ti fer Isaïe ekrir lor limem. Apre ki profet Isaïe ti trouv laglwar Bondie dan enn vizion, sa ti pous li pou realize ki kantite li fer pese, ek li ti dir: “Maler lor mwa! Mo koumadir enn dimounn ki’nn mor, parski mo enn zom ki ena lalev inpir, ek ki viv parmi enn pep ki ena lalev inpir; parski mo lizie inn trouv Lerwa, Jéhovah sef bann larme Limem!” (Is. 6:5) Ki anz ti pou kapav  dir bann parol koumsa? Me Isaïe ti kapav fer sa, ek nou kapav konpran seki li ti resanti.

15, 16. (a) Kifer nou kapav konpran santiman lezot dimounn? Donn bann lexanp. (b) Ki pou ed nou vinn pli pros ar Jéhovah?

¹⁵ Eski bann anz ti pou kapav dir ki zot “pa dign,” parey kouma Jacob ti dir lor limem, ouswa ki zot “fer pese,” parey kouma Pierre ti dir lor limem? (Gen. 32:10; Luc 5:8) Eski bann anz ti pou gagn “per” parey kouma bann disip Jésus, ouswa eski zot ti pou bizin “ pran boukou kouraz” pou anons bonn nouvel akoz bann persekision, parey kouma Paul ek lezot ti fer? (Jean 6:19; 1 Thess. 2:2) Non, bann anz zot parfe ek zot pli siperyer ki bann imin. Me, kan bann imin ki inparfe exprim bann santiman koumsa, deswit nou konpran zot, parski nou’si nou bann imin. Kan nou lir Parol Bondie, nou kapav vremem “partaz lazwa bann ki zwaye [ek] plore avek bann ki plore.”​—Rom. 12:15.

¹⁶ Kan nou medit lor seki Labib dir konsernan fason ki Jéhovah ti azir anver so bann fidel serviter dan lepase, nou pou aprann boukou kitsoz extraordiner lor nou Bondie, ki avek pasians ek lamour ti vinn pros ar sa bann imin inparfe la. Lerla nou pou konn Jéhovah pli bien ek nou pou kontan Li avek tou nou leker. Alafin, nou pou kapav vinn pli pros ar Li.​—Lir Psaume 25:14. c

17. (a) Ki bon konsey Azaria ti donn Asa? (b) Kouma Asa pa ti pran kont konsey Azaria, ek ki konsekans sa finn ena?

¹⁷ Apre ki Lerwa Asa ti gagn enn gran viktwar lor larme Etiopien, Azaria, enn profet Bondie, ti dir li ek so pep bann parol ranpli ar sazes. Azaria ti dir: “Jéhovah avek zot tanki zot avek Li; ek si zot rod Li, Li pou les zot trouv Li, me si zot abandonn Li, Li pou abandonn zot.” (2 Chron. 15:1, 2) Selman, plitar dan so lavi, Asa pa ti pran kont sa bon konsey-la. Kan rwayom lenor Israël ti menas pou atak li, Asa ti al rod led avek bann Sirien. Olie ki li ti rod led Jéhovah ankor enn fwa, li ti rod fer enn lalians avek bann payin. Akoz sa Jéhovah ti dir Asa: “To finn azir dan enn fason bet dan sa sitiasion-la; apartir zordi pou ena bann lager kont twa.” Apartir sa moman-la, finn touletan ena lager ziska lafin regn Asa. (2 Chron. 16:1-9) Ki leson nou aprann?

18, 19. (a) Ki nou bizin fer si nou’nn elwagn nou ar Bondie? (b) Kouma nou kapav vinn pli pros ar Jéhovah?

¹⁸ Fode zame nou elwagn nou ar Jéhovah. Me si nou’nn fer sa, nou bizin azir an-akor avek seki Hoshéa 12:6 dir: “Retourn ver to Bondie, ek gard lamour fidel ek lazistis, ek touletan gard lespwar dan to Bondie.” Alor, anou vinn pli pros ar Jéhovah kan nou medit avek rekonesans lor laranson ek kan nou etidie so Parol Labib avek serye.​—Lir Deutéronome 13:4. d

¹⁹ Enn ekrivin Psaume ti ekrir: “Vinn pros ar Bondie, sa li bon pou mwa.” (Ps. 73:28) Anou kontign aprann bann nouvo kitsoz lor Jéhovah ek koumsa nou pou ena ankor plis rezon pou kontan Li. Ek Jéhovah pou vinn pli pros ar nou asterla ek pou leternite!