1. Kifer lafwa inportan? (Get zimaz dan koumansman lartik.)

ESKI to finn deza demann tomem: ‘Eski Zeova pou sap mwa kan pou ena gran detres?’ Lapot Pol ti dir ki lafwa se enn kalite bien inportan pou nou kapav gagn lavi sov. Li ti dir: “San lafwa, personn pa kapav fer Bondie plezir.” (Ebre 11:6) Kitfwa li paret sinp, me an realite, “pa tou dimoun ki ena lafwa.” (2 Tesalonisien 3:2) Sa de verse-la ed nou pou konpran ki kantite li inportan pou fer nou lafwa vinn pli for.

2, 3. (a) Kifer nou lafwa inportan? (b) Ki nou pou al examine?

² Lapot Pier ti koz lor lafwa ki’nn “teste.” (Lir 1 Pier 1:7.) Gran detres bien pre, ek nou anvi form parti parmi “bann ki ena lafwa pou gagn lavi sov.” (Ebre 10:39, NW.) Akoz sa nou bizin fer boukou zefor pou fer nou lafwa vinn pli for. Nou anvi form parti parmi bann disip fidel, kan Zezi Kris nou Lerwa pou vinn rekonpans zot ek pou exekit zizman Zeova lor So bann lennmi. Alor, parey kouma sa misie ki ti sipliy Zezi pou gagn plis lafwa la, nou osi nou kapav dir: “Ed mwa kot mo bizin lafwa!” (Mark 9:24, NW.) Ouswa, parey kouma bann zapot, nou kapav demande: “Donn nou plis lafwa.”—Lik 17:5, NW.

 ³ Dan sa lartik-la, nou pou reponn sa bann kestion-la: Kouma nou kapav fortifie nou lafwa? Kouma nou kapav montre ki nou ena enn lafwa for? Ek kifer nou kapav sir ki Bondie pou reponn nou kan nou demann Li pou gagn plis lafwa?

4. Ki bann lexanp kapav ankouraz nou pou fortifie nou lafwa?

⁴ Lafwa ena enn gran linportans. Akoz sa, dan Labib Zeova finn donn nou boukou lexanp bann dimounn ki ena lafwa. Sa bann lexanp-la “ti ekrir pou nou linstriksion.” (Romin 15:4) Bann lexanp kouma Abraam, Sara, Izaak, Zakob, Moiz, Raab, Gideonn, Barak, ek lezot ankor kapav ankouraz nou pou fortifie nou prop lafwa. (Ebre 11:32-35) Anplis ki nou ena bann lexanp Biblik, nou ena osi lexanp bann frer ek ser fidel dan nou lepok ki ena enn gran lafwa. * (Get not.)

5. Kouma Eliya finn montre enn lafwa for an Zeova, ek ki nou bizin demann noumem?

⁵ Labib rakont nou lexanp profet Eliya. Amezir ki to medit lor so lexanp, remark sink sitiasion kot li finn montre enn gran konfians an Zeova. (1) Kan Eliya ti dir Lerwa Ahab ki Zeova ti pou amenn lasesres, li ti dir avek konfians: “Parski Zeova Bondie Izrael, ki mo servi, Li vivan, ala seki pou arive: pandan sa bann lane-la, pa pou ena ni laroze ni lapli.” (1 Lerwa 17:1) (2) Eliya ti sir ki Zeova ti pou donn li ek lezot seki zot ti pou bizin pandan lasesres. (1 Lerwa 17:4, 5, 13, 14) (3) Eliya ti sir osi ki Zeova ti pou kapav resisit garson enn vev. (1 Lerwa 17:21) (4) Li pa ti ena okenn dout ki Zeova ti pou avoy enn dife pou bril so sakrifis lor montagn Karmel. (1 Lerwa 18:24, 37) (5) Avan mem ki lapli ti koumans tonbe, Eliya ti dir Ahab avek enn gran lasirans: “Monte, al manze ek al bwar, parski ena enn gran tapaz, tapaz enn gro lapli.” (1 Lerwa 18:41) Apre ki nou finn examinn sa bann sitiasion-la, nou kapav demann noumem: ‘Eski mo lafwa for parey kouma Eliya?’

6. Ki nou bizin demann Zeova pou fortifie nou lafwa?

⁶ Nou pa kapav fortifie nou lafwa par noumem. Akoz sa, nou bizin demann Zeova lespri sin. Kifer lespri sin? Parski lafwa li form parti dan frwi lespri sin. (Galat 5:22) Li inportan ki nou swiv konsey ki Zezi inn donn nou pou priye pou demann plis lespri sin. Zezi ti promet ki Zeova pou “donn lespri  sin bann ki demann Li.”—Lik 11:13, NW.

7. Explike kouma nou kapav gard nou lafwa for.

⁷ Enn fwa ki nou ena enn lafwa for dan Bondie, nou bizin gard li. Nou kapav konpar lafwa ar enn dife. Kan nou koumans alim enn dife, laflam-la kapav bien for. Selman, si nou pa azout dibwa dan dife-la, li normal ki li pou koumans tengn ek vinn lasann. Me si regilierman nou azout dibwa dan dife-la, li pou kontign alime. Li parey pou nou lafwa. Si nou kontign lir ek etidie Parol Bondie toulezour, nou lamour pou Labib ek pou Zeova pou grandi. Se koumsa ki nou pou gard ek nou pou fortifie nou lafwa.

8. Ki kitsoz pou ed twa pou gard to lafwa ek fortifie li?

⁸ Fode pa ki to kontant twa zis ar seki to finn aprann avan to batem. (Ebre 6:1, 2) Par exanp, li inportan ki to etidie bann profesi ki’nn fini akonpli. Sa pou ed twa pou gard to lafwa ek fortifie li. To kapav osi servi Parol Bondie pou kone si to lafwa vremem for.—Lir Zak 1:25; 2:24, 26.

9, 10. Kouma nou lafwa vinn pli for gras-a (a) bann bon kamarad? (b) bann renion? (c) predikasion?

⁹ Lapot Pol ti dir ki bann Kretien kapav “ankouraz [zot] kamarad par lafwa ki [zot] ena.” (Romin 1:12) Ki sa vedir? Kan nou pas letan avek nou bann frer ek ser, nou kapav fortifie lafwa sakenn nou kamarad. Nou trouv sa kan nou pas letan avek bann ki zot lafwa finn “pas par leprev.” (Zak 1:3) Bann move kamarad detrir nou lafwa, me bann bon kamarad fer nou lafwa vinn pli for. (1 Korintien 15:33) Akoz sa, nou bizin asiste renion regilierman. Dan renion, nou pou kapav kontign “ankouraz nou kamarad.” (Lir Ebre 10:24, 25.) Anplis, linstriksion ki nou gagne dan renion fer nou lafwa vinn pli solid. Labib dir ki “lafwa ne apartir sa kitsoz ki nou finn tande la.” (Romin 10:17, NW.) Alor, poz twa sa kestion-la: ‘Eski bann renion form parti dan mo program sak semenn?’

¹⁰ Nou fer nou lafwa vinn pli for osi kan nou prese ek kan nou ansegn bonn nouvel ki ena dan Labib avek lezot. Parey kouma bann premie Kretien, nou aprann pou ena konfians an Zeova ek pou pres avek zel dan ninport ki sitiasion.—Zistwar Bann Apot 4:17-20; 13:46.

11. Kifer Kaleb ek Zozie ti ena enn lafwa for, ek kouma nou kapav imit zot?

¹¹ Nou lafwa an Zeova grandi kan nou trouve kouma Li ed nou ek kouma Li reponn nou lapriyer. Se seki ti ariv Kaleb ek Zozie. Zot ti montre ki zot ena lafwa an Zeova kan zot ti espionn Later Promiz. Amezir ki letan ti pe  pase, zot lafwa ti vinn pli for sak fwa ki zot ti trouve kouma Zeova ti pe ed zot. Zozie finn kapav dir bann Izraelit avek lasirans: “Dan tou bann bon promes ki Zeova zot Bondie inn fer, pena enn sel ki pa finn akonpli.” Plitar li ti dir: “Alor, zot bizin ena lakrint pou Zeova ek servi Li avek lintegrite ek laverite.” Li ti dir osi: “Mwa ek mo fami, nou pou servi Zeova.” (Zozie 23:14; 24:14, 15) Kan nou met nou konfians an Zeova ek kan nou trouve kouma Li ed nou personelman, nou lafwa pou vinn pli for.—Psom 34:8.

12. Kouma nou montre ki nou ena enn lafwa for?

¹² Kouma nou kapav montre ki nou ena enn lafwa for? Disip Zak ti dir: “Mo pou [montre] twa mo lafwa par mo bann aksion.” (Zak 2:18) Nou bann aksion montre ki nou ena enn lafwa for. Anou gete kouma.

13. Kouma nou montre nou lafwa atraver predikasion?

¹³ Predikasion se enn bon fason pou montre ki nou ena lafwa. Kifer? Parski kan nou prese, nou montre ki nou krwar ki lafin li pre ek ki “li pa pou an retar!” (Abakouk 2:3) Pou kone si nou lafwa li for, nou kapav demann noumem: ‘Ki kantite predikasion li inportan pou mwa? Eski mo pe fer tou seki mo kapav pou koz lor Zeova avek lezot? Eski mo rod bann fason pou fer plis dan mo servis pou Zeova?’ (2 Korintien 13:5) Anou montre ki kantite nou lafwa for kan nou “fer deklarasion piblik pou gagn lavi sov,” setadir, kan nou pres bonn nouvel.—Lir Romin 10:10, NW.

14, 15. (a) Kouma nou kapav montre nou lafwa dan nou lavi toulezour? (b) Rakont enn lexperyans ki montre seki savedir ena enn lafwa for.

 ¹⁴ Nou osi montre nou lafwa an Zeova kan nou andir bann difikilte dan lavi. Si nou, malad, dekouraze, gagn depresion, pov, ouswa nou ena lezot problem ankor, nou bizin ena lafwa ki Zeova ek Zezi pou donn nou “led dan ler ki bizin.” (Ebre 4:16, NW.) Nou montre ki nou ena lafwa an Zeova kan nou demann Li so led. Zezi ti dir ki nou kapav demann Zeova pou donn nou “sak zour dipin ki nou bizin.” (Lik 11:3) Bann lexanp ki ena dan Labib prouve ki Zeova kapav donn nou tou seki nou bizin. Par exanp, pandan enn gran lasesres an Izrael, Zeova ti donn Eliya manze ek bwar. Labib dir ki “bann korbo ti amenn dipin ek laviann pou li gramatin, dipin ek laviann aswar, ek li ti bwar delo ki ti ena dan larivier.” (1 Lerwa 17:3-6) Nou ena lafwa ki Zeova kapav donn nou osi seki nou bizin.

¹⁵ Nou ena konfians ki si nou aplik bann prinsip Labib, nou pou kapav pran swin nou fami. Rebecca, enn ser ki’nn marye ek ki res dan l’Asie, explike kouma li avek so fami finn aplik bann prinsip ki trouv dan Matie 6:33 ek Proverb 10:4. Li dir ki so misie ti trouve ki so travay ti enn danze pou zot relasion avek Zeova. Alor so misie  ti kit sa travay-la. Me selman zot ti ena kat zanfan pou okipe, alor zot ti koumans prepar manze pou vande. Gras-a zot bann zefor, zot ti gagn ase larzan pou pran swin zot fami. Rebecca dir: “Nou ti santi ki Zeova zame pa finn abandonn nou. Zame nou pa finn mank mem enn repa.” Eski twa osi to’nn deza fer enn lexperyans koumsa ek ki’nn ranforsi to lafwa?

16. Ki pou arive si nou fer Bondie konfians?

¹⁶ Si nou swiv bann prinsip Zeova, Li pou ed nou. Fode zame ki nou ena okenn dout lor la. Pol ti sit bann parol Abakouk kan li ti dir: “Enn dimounn ki zis pou viv akoz so lafwa.” (Galat 3:11, NW; Abakouk 2:4) Akoz sa, nou bizin ena enn gran lafwa an Zeova, parski vremem Li kapav ed nou. Pol rapel nou ki Bondie pe azir dan nou lavi atraver so lafors. Kan nou demann Li enn kitsoz, Li kapav fer “boukou plis ki bann kitsoz ki nou demande ouswa panse.” (Efezien 3:20, NW.) Bann serviter Zeova fer tou seki zot kapav pou fer volonte Bondie, me zot kone ki zot ena bann limit osi. Nou bien rekonesan ki Bondie Li avek nou ek ki Li beni tou nou bann zefor.

17. (a) Kouma Zezi ti reponn so bann zapot? (b) Kifer nou kapav atann ki Zeova pou reponn nou lapriyer pou gagn plis lafwa?

¹⁷ Apre ki nou finn examinn sa lartik-la, kitfwa nou ena mem santiman ki bann zapot kan zot ti demann Zezi: “Donn nou plis lafwa.” (Lik 17:5, NW.) Zezi ti reponn so bann disip dan enn fason spesial pandan la Pentecôte lan 33. Sa zour-la, zot ti gagn lespri sin ek zot ti gagn kapasite pou konpran pli bien proze Bondie. Sa ti ranforsi zot lafwa. Rezilta: Zot ti koumans pli gran kanpagn predikasion ki ti ena dan sa lepok-la. (Kolosien 1:23) Eski nou kapav atann ki Zeova pou reponn nou lapriyer pou gagn plis lafwa? Zeova promet nou ki Li pou reponn nou lapriyer si nou demann Li “dapre so volonte.”—1 Zan 5:14.

18. Kouma Zeova beni bann ki fer zot lafwa vinn pli for?

¹⁸ Kan nou ena enn konfians total an Zeova, sa pou fer so leker kontan. Li pou reponn nou lapriyer pou gagn plis lafwa ek nou lafwa pou vinn pli for. Ek lerla nou pou “dign pou gagn Rwayom Bondie.”—2 Tesalonisien 1:3, 5, NW.