DAN lepok sa istorien-la, bann dimounn pa ti kapav fer konfians tou seki ti ekrir dan zournal. Azordi osi nou pa kapav krwar tou seki nou lir ouswa trouve lor Internet. Ena enn kantite linformasion lor Internet, ek gras-a bann teknolozi modern nou gagn akse ar sa bann linformasion-la pli fasilman. Boukou linformasion vre, itil, ek pa fer ditor, me boukou linformasion fos, initil ek danzere. Akoz sa nou bizin bien swazir seki nou lir. Kan sertin koumans servi Internet, zot kapav panse ki enn linformasion bizin vre zis parski li lor Internet ouswa parski enn kamarad inn avoy zot sa par e-mail. Zot kapav krwar enn zistwar, mem si li paret bien bizar. Me Labib donn nou sa lavertisman-la: “Enn dimounn naif krwar tou seki li tande, me enn dimounn ki ena enn bon zizman, fer atansion kot li met so lipie.”—Proverb 14:15.

Lekontrer enn dimounn naif, ouswa enn dimounn ki krwar tou seki li tande san reflesi, se enn dimounn ki ena bon zizman. Kan nou ena bon zizman, nou fer bien atansion ek nou krwar enn zafer zis kan nou sir li laverite. Nou pa pou les bann dimounn anbet nou ni nou pou krwar enn fos zistwar ki nou lir lor Internet, mem ki kantite sa zistwar-la finn fane partou. Ki kapav ed twa pou ena bon zizman? Dabor, demann tomem: ‘Eski mo’nn lir sa zistwar-la lor enn sit ofisiel ek ki mo kapav fer konfians? Ouswa mo’nn lir sa lor enn sit kot ninport kisannla kapav ekrir seki li panse? Ouswa mem lor enn sit ki pa kone kot sorti? Eski enn sit ki nou kapav fer konfians inn prouve ki sa zistwar-la fos?’ * (Get not.) Apre, nou bizin servi nou “bon sans.” (Proverb 7:7) Si enn zistwar paret fos, sirman vremem li fos. Anplis, kan nou lir enn kitsoz negatif lor lezot, reflesi kisannla pou kontan ki sa nouvel-la fane ek kifer enn kikenn pou anvi fann sa nouvel-la.

Sertin dimounn kapav forward bann linformasion ar tou zot bann kontak san mem verifie si linformasion-la  vre. Kitfwa zot pa’nn mem reflesi lor seki pou arive apre ki zot inn avoy sa. Li posib ki zot fer sa parski zot anvi touletan gagn latansion kan zot fann bann nouvel an premie. (2 Samiel 13:28-33) Me enn kikenn ki ena bon zizman pou reflesi lor konsekans ki sa kapav amene. Par exanp, sa kapav gat repitasion enn dimounn ouswa enn lorganizasion.

Kitfwa sa dimounn ki avoy bann linformasion-la pa verifie si li vre parski sa demann letan ek zefor. Li zis met dan so latet ki bann dimounn ki pou gagn so e-mail, zot, zot kapav al verifie sa. Me sa bann dimounn-la osi zot letan bien inportan. (Efezien 5:15, 16) Alor, olie ki nou avoy bann kitsoz ki nou pa sir, li bon nou reflesi lor la: “Si mo ena kit dout, mo bizin delete sa linformasion-la!”

Demann tomem: ‘Eski touletan mo pe forward bann e-mail? Eski li’nn deza arive ki mo’nn bizin demann exkiz parski mo’nn avoy bann fos linformasion? Eski kikenn inn deza dir mwa aret forward li bann e-mail?’ Rapel ki si to bann kamarad ena enn ladres e-mail, alor zot osi zot gagn akse ar Internet ek zot pa bizin twa pou al rod bann kitsoz ki interes zot. Zot pa anvi gagn enn kantite e-mail ki ena bann zistwar komik, video, ouswa foto. Li pa bon osi ki nou avoy bann lanrezistreman ouswa bann not detaye konsernan bann diskour Biblik. * (Get not.) Ek pa bliye ki si enn kikenn fer so prop resers, rod bann verse Labib ek prepar so bann repons pou renion par limem, li pou tir plis profi ki kan to avoy li tou sa bann linformasion-la.

Ki to bizin fer si to trouv kitsoz lor Internet ki pe koz manti ek pe gat repitasion lorganizasion Zeova? Kit sa sit-la deswit! Pa krwar sa bann foste-la. Li pa bon ki to partaz seki to’nn lir avek lezot ek demann zot ki zot panse lor la. Kifer? Parski an realite, to pou zis fann sa linformasion plis ankor. Si enn kitsoz ki to’nn trouve lor Internet pe trakas twa, priye Zeova pou gagn lasazes ek al koz sa ar bann frer ki ena lexperyans. (Zak 1:5, 6; Zid 22, 23) Fode pa nou etone ki bann dimounn koz manti lor nou. Bann dimounn ti koz manti lor Zezi, ek li ti averti so bann disip ki zot bann lennmi pou persekit zot ek pou “koz manti pou dir tou sort kalite move kitsoz lor  zot.” (Matie 5:11, NW; 11:19; Zan 10:19-21) Alor, si to ena sazes ek to reflesi bien, to pou reisi kone kan enn dimounn pe koz manti, ek pe rod anbet lezot.—Proverb 2:10-16.

Nou bizin osi fer atansion avan ki nou donn ninport ki linformasion lor nou bann frer ouswa avan ki nou rakont bann lexperyans ki nou finn tande. Parfwa, li pli bon nou pa partaz bann linformasion, mem si zot vre. (Matie 7:12) Par exanp, li pa bon ni ankourazan si to fann bann koze negatif lor lezot. (2 Tesalonisien 3:11; 1 Timote 5:13) Ek ena sertin linformasion ki kapav konfidansiel. Kitfwa dimounn konserne-la anvi dir sa linformasion-la apre ouswa dan enn fason presi. Alor nou bizin respekte so drwa ki li ena pou deside kan ek kouma li pou fer konn sa linformasion-la. An realite, si nou dir lezot sa bann linformasion-la avan li, sa kapav fer boukou ditor.

Azordi, bann nouvel fane bien vit, ki zot vre ouswa fos, ki zot itil ouswa initil, ki zot danzere ouswa non. Mem si to pe avoy mesaz enn kikenn, dan zis de-trwa segonn sa dimounn-la kapav avoy sa lezot dimounn dan lemond antie. Alor pa prese pou avoy bann linformasion vit-vit ek pou partaz sa ar tou dimounn ki to kone. Mem si lamour “krwar tou” ek li pa mefian, fode pa nou vinn enn dimounn naif ek krwar tou nouvo zistwar ki interesan. (1 Korintien 13:7, NW.) Ek nou pa pou krwar tou bann foste ek bann move koze konsernan lorganizasion Zeova ek lor nou bann frer ek ser, parski nou kontan zot. Rapel ki bann dimounn ki koumans fann bann foste, zot fer plezir Satan Lediab, “papa bann manter.” (Zan 8:44) Alor anou montre nou bon zizman ek touletan reflesi lor fason ki nou servi sa kantite linformasion ki nou gagn akse toulezour la. Labib dir: “Bann ki naif pou erit bann kitsoz bet, me bann ki ena bon zizman pou kourone ar konesans.”—Proverb 14:18.