1, 2. (a) Ki traka sertin paran ki ena bann adolesan gagne? (b) Kouma bann zanfan kapav profit bien zot adolesans?

ENN parmi bann moman pli zwaye pou bann paran se kan zot zanfan pran batem. Berenice ena kat zanfan ek toule kat inn batize avan ki zot ti gagn 14 an. Li dir: “Sa ti vremem enn lexperyans ki ti tous nou boukou. Biensir, nou ti bien kontan ki nou bann zanfan ti’nn desid pou servi Zeova. Me nou ti kone osi ki, kan nou bann zanfan pou vinn adolesan, zot pou bizin fer fas ar boukou difikilte.” Si to garson ouswa to tifi enn adolesan ouswa pre pou vinn enn adolesan, kitfwa twa osi to ena mem traka.

² Enn exper ki etidie sikolozi bann zanfan dir ki peryod adolesans kapav difisil pou paran ek zanfan toulede. Me fode pa bann paran panse ki zot bann zanfan ki adolesan, bet ouswa ankor ena lespri zanfan. Okontrer, exper-la dir ki bann adolesan zot kreatif, zot ena bann santiman bien for, ek zot bizin pas letan avek bann kamarad. Alor, se pandan ladolesans ki to zanfan kapav devlop enn pli bon  lamitie avek Zeova, parey kouma Zezi ti fer kan li ti zenn. (Lir Lik 2:52.) Li kapav osi amelior so kapasite pou prese ek devlop enn gran dezir pou fer plis dan servis Bondie. Ek li kapav pran bann desizion par limem, kouma par exanp, vwe so lavi ar Zeova ek obeir Li. Me antan ki paran, ki to kapav fer pou form to adolesan pou servi Zeova? To kapav imit Zezi ki ti ansegn so bann disip avek amour, limilite, ek disernman.

3. Kouma bann zapot ti kone ki Zezi ti zot kamarad?

³ Zezi ti plis ki enn Ansegnan pou so bann zapot. Li ti osi zot kamarad. (Lir Zan 15:15.) Dan lepok Biblik, an zeneral, enn met pa ti dir seki li panse ni exprim so bann santiman ar so bann esklav. Me Zezi pa ti tret so bann zapot kouma bann esklav. Li ti kontan zot ek ti pas letan avek zot. Li ti kontan pou partaz so bann panse ek so bann santiman avek zot. Me li ti osi ekout zot bien kan zot ti dir li seki zot panse ek seki zot resanti. (Mark 6:30-32) Sa bon kominikasion ki ti ena ant Zezi ek so bann disip la ti fer zot vinn bann kamarad bien pros. Sa ti osi permet Zezi pou prepar zot pou travay ki ti pe atann zot apre.

4. Paran, kouma to kapav vinn kamarad ar to zanfan? (Get zimaz dan koumansman lartik.)

⁴ Mem si to ena lotorite lor to zanfan, to kapav osi vinn so kamarad. Bann kamarad pas letan ansam. Kitfwa to kapav pas mwins letan pou travay ouswa pou fer lezot kitsoz ek koumsa to kapav pas plis letan avek to zanfan. To kapav priye ek reflesi bien lor la. Bann kamarad ena osi mem gou. Alor fer zefor pou kone ki to adolesan kontan, par exanp so lamizik, fim ouswa spor prefere. Apre sa, esey kontan seki li kontan. Ilaria, ki res l’Italie, dir: “Mo bann paran ti interes zot ar lamizik ki mo ti ekoute. Ofet, mo papa ti vinn mo pli bon kamarad, ek mo ti alez pou koz avek li mem lor bann kitsoz anbarasan.” Kan to vinn enn kamarad pou to zanfan ek ed zot pou vinn kamarad ar Zeova, to pa pou perdi to lotorite antan ki paran. (Psom 25:14) To zanfan pou trouve ki to kontan li ek respekte li, ek koumsa li pou pli fasil pou li vinn koz ar twa lor ninport ki size.

5. Kouma bann disip Zezi ti pou zwaye kan zot ti pou travay pou Zeova?

⁵ Zezi ti kone ki si so bann disip ti servi Zeova avek lazwa ek ti res bien okipe pou pres bonn nouvel, zot ti pou vremem ere. Akoz sa, li ti ankouraz zot pou travay dir dan predikasion, ek li ti promet zot ki li ti pou ed zot.—Matie 28:19, 20.

6, 7. Kouma to montre to lamour pou to zanfan kan to ansegn li pou fer bann aktivite spiritiel regilierman?

⁶ Biensir, to anvi ki to zanfan res pros ar Zeova. Ek Zeova anvi ki to form ek disiplinn to zanfan. Li’nn donn twa lotorite pou fer sa. (Efezien 6:4) Alor, fer tou pou ki to zanfan gagn sa formasion-la regilierman. Reflesi lor la: To avoy to zanfan lekol parski to kone ki so ledikasion inportan ek to anvi ki li kontan aprann bann nouvo kitsoz osi. Dan mem fason, to fer tou pou ki li asiste bann renion, lasanble, ek ladorasion  an fami. Apre tou, formasion ki Zeova donn li kapav sap so lavi. Alor, ed li pou aprann konn Zeova ek pou trouve ki Zeova kapav fer li gagn sazes. (Proverb 24:14) To bizin osi form to zanfan pou prese regilierman. Imit lexanp Zezi kan to ed to zanfan pou kontan ansegn lezot Parol Bondie.

⁷ Kouma sa ed bann adolesan kan regilierman, zot etidie, al renion, ek prese? Erin, enn ser ki res l’Afrique du Sud, dir: “Bien souvan nou, bann zanfan, nou ti plengne pou etidie Labib, al renion ek prese. Parfwa, par expre nou ti deranz nou ladorasion an fami zis pou ki nou kapav ale. Me nou bann paran pa ti sede.” Erin bien rekonesan anver so bann paran ki’nn ed li pou realize ki kantite sa bann kitsoz-la inportan. Asterla, kan li ena pou rat enn renion ouswa kan li pa kapav al predikasion, li atann avek inpasians kan li pou kapav rekoumans fer so bann laktivite spiritiel pli vit posib.

8. (a) Kouma Zezi ti montre ki li ti ena limilite? (b) Kouma limilite Zezi ti ed so bann disip?

⁸ Mem si Zezi ti parfe, li ti ena limilite ek li ti dir so bann disip ki li ti bizin led Zeova. (Lir Zan 5:19.) Eski sa ti fer bann disip ena mwins respe pou Zezi? Non. Okontrer, kan zot ti trouve kouma li ti kont lor Zeova, zot ti ena plis konfians an Zezi. Plitar, zot ti imit so limilite.—Zistwar Bann Apot 3:12, 13, 16.

9. Kan to rekonet to erer ek to demann exkiz, kouma sa kapav ed to adolesan?

⁹ Me nou, nou pa parey kouma Zezi parski nou inparfe ek nou fer bann erer. Alor, to bizin ena limilite. To bizin rekonet ki ena boukou kitsoz ki to pa kapav fer, ek li bon ki to rekonet to bann erer. (1 Zan 1:8) Lerla to adolesan pou aprann rekonet so prop erer, ek li pou ena plis respe pou twa. Apre tou, pou kisannla to ena plis respe: Pou enn patron ki rekonet so erer ouswa enn patron ki zame demann exkiz? Rosemary, ki ena trwa zanfan, dir ki li avek so misie ti dispoze pou rekonet zot erer. Li explike: “Sa ti pous nou bann zanfan pou vinn ver nou kan zot ti ena enn problem.” Li azoute: “Nou finn montre nou bann zanfan kotsa meyer plas zot kapav gagn solision pou zot bann problem. Kan zot ti bizin led, touletan nou ti diriz zot ver bann piblikasion ki baze lor Labib, ek nou ti priye ansam.”

10. Kouma Zezi ti montre so limilite mem kan li ti pe dir so bann disip seki zot ti bizin fer?

¹⁰ Zezi ti ena lotorite pou dir so bann disip seki zot ti bizin fer. Me parski li ti ena limilite, souvan li ti explik zot kifer zot ti bizin fer sa. Par exanp, li pa ti zis dir zot ki avan tou kitsoz zot bizin rod Rwayom Bondie ek so lazistis. Li ti dir osi: “Ek zot pou gagn osi tou  sa bann lezot kitsoz-la.” Kan Zezi ti dir so bann disip aret zize, li ti explik zot: “Aret zize pou ki pa ziz zot; parski se avek zizman ki zot zize ki pou ziz zot.”—Matie 6:31–7:2, NW.

11. Kouma sa pou ed to adolesan kan to explik li kifer to’nn etabli enn reg ouswa to’nn pran enn desizion?

¹¹ Trouv enn moman apropriye pou explik to adolesan kifer to’nn etabli enn reg ouswa to’nn pran enn desizion. Kan li konpran rezon deryer tousala, li pou pli dispoze pou obeir twa. Barry ki’nn elve kat zanfan, dir: “Kan to dir kifer to’nn etabli enn reg ouswa to’nn pran enn desizion, sa ed to adolesan pou fer twa konfians.” To adolesan pou trouve ki to pa’nn etabli enn reg ouswa pran enn desizion zis parski to ena lotorite, me parski to ena enn bon rezon pou fer sa. Apre, pa bliye ki bann adolesan nepli bann ti zanfan. Zot pe aprann pou reflesi par zotmem, ek zot anvi pran zot prop desizion. (Romin 12:1) Barry explike: “Olie ki zot reazir par lemosion, bann adolesan bizin aprann pou pran bann bon desizion apre ki zot inn bien reflesi.” (Psom 119:34) Alor, montre to limilite ek explik to adolesan kifer to’nn pran enn desizion. Koumsa, li pou aprann pou pran so prop desizion. Li pou kone osi ki to respekte li ek ki to konsian ki li pe vinn enn adilt.

12. Gras-a disernman ki Zezi ti ena, kouma li ti servi sa pou ed Pier?

¹² Zezi ti ena disernman ek li ti konpran ki led so bann disip ti bizin. Par exanp, kan Zezi ti dir so bann disip ki so bann lennmi ti pou touy li, Pier ti dir li: “To bizin bon avek tomem Segner!” Zezi ti kone ki Pier ti kontan li, me li ti kone osi ki Pier pa ti ena enn bon rezonnman. Kouma Zezi ti ed Pier ek lezot disip? Premierman, li ti koriz Pier. Apre, Zezi ti explike seki pou ariv bann ki refiz pou fer volonte Zeova dan bann moman difisil. Zezi ti dir osi ki Zeova pou rekonpans bann ki pa egois. (Matie 16:21-27, NW.) Pier ti tir leson.—1 Pier 2:20, 21.

13, 14. (a) Ki kitsoz pou montre twa ki to adolesan bizin led pou fortifie so lafwa? (b) Kouma to kapav kone ki led to garson ouswa to tifi bizin vremem?

¹³ Priye Zeova pou ki to gagn disernman. Sa pou ed twa konpran ki led to adolesan bizin. (Psom 32:8) Kitfwa to finn remarke ki li pa tro zwaye kouma li ti abitie ouswa li koz dan enn fason negatif lor bann frer. Ouswa to ena linpresion ki ena enn kitsoz ki li pa pe dir twa. Fode pa ki deswit to panse li pe fer enn kitsoz bien pa bon an kasiet. * (Get not.) Me pa fer koumadir pa’nn ariv nanye ouswa panse ki avek letan li pou korek. Li posib ki to bizin ed li pou fortifie so lafwa.

¹⁴ Pou to kone kouma to kapav ed to adolesan, poz li bann kestion dan enn fason zanti ek avek respe. Se koumadir to pe tir delo dan enn pwi. Si to tir delo tro vit, to pa pou gagn kantite delo ki to anvi. Li parey osi, si to prese pou to poz bann kestion, ouswa fors to adolesan pou koze, to pa pou reisi kone seki  li panse ek resanti vremem. (Lir Proverb 20:5. *) Ilaria rapel ki kan li ti ankor enn adolesan, li ti anvi pas plis letan avek so bann kamarad lekol, mem si li ti kone ki sa pa ti enn bon kitsoz. So bann paran ti remarke ki enn kitsoz ti pe trakas li. Ilaria rakonte: “Enn swar, zot ti zis dir mwa ki zot finn remarke ki mo ti paret inpe tris, ek zot ti demann mwa seki ti pe trakas mwa. Mo ti koumans plore, apre mo ti explik zot mo sitiasion, ek mo ti demann zot led. Zot ti may mwa, zot ti dir mwa ki zot konpran mwa, ek zot ti promet pou ed mwa.” Deswit, bann paran Ilaria ti koumans ed li pou fer bann bon kamarad dan kongregasion.

15. Sit enn lot fason kouma Zezi ti montre ki li ena disernman.

¹⁵ Gras-a disernman ki Zezi ti ena, li ti kapav trouv bann bon kalite ki so bann disip ti ena. Par exanp, kan Natanael ti tann dir ki Zezi ti’nn grandi dan Nazaret, li ti dir: “Eski kiksoz de bon kapav sorti Nazaret?” (Zan 1:46) Si to ti laba, eski to ti pou panse ki Natanael ti negatif, ti ena prezize, ouswa ki li pa ti ena lafwa? Zezi pa ti pans sa. Okontrer, li ti ena disernman ek li ti kone ki Natanael ti enn dimounn fran. Akoz sa, Zezi ti dir: “Sa enn vre Izraelit, sa. Pena [“foste,” NW] dan li.” (Zan 1:47) Zezi ti kapav lir dan leker, ek li ti servi sa kapasite-la pou rod seki bon dan bann dimounn.

16. Kouma to kapav ankouraz to adolesan pou progrese?

¹⁶ Mem si to pa kapav lir dan leker parey kouma Zezi, to kapav ena disernman. Zeova kapav ed twa pou trouv bann kalite ki to adolesan ena. Mem si li pa fer seki to ti pe atann, fode zame to dir ki li move ouswa li zis kree problem.  Fode mem pa ki sa pas dan to lespri. Okontrer, dir li ki to trouv so bann kalite ek ki to sir li anvi fer seki bon. Remark zefor ki li pe fer pou ameliore, ek felisit li. Ed li pou travay so bann kalite. To pou kapav fer sa kan to donn li plis responsabilite kan li posib. Zezi ti fer sa avek so bann disip. Enn an edmi apre ki Zezi ti zwenn Natanael (ki apel osi Bartelemi), Zezi ti donn li enn responsabilite inportan. Li ti fer Natanael vinn enn parmi so bann zapot, ek avek fidelite Natanael ti fer travay ki Zezi ti donn li. (Lik 6:13, 14; Zistwar Bann Apot 1:13, 14) Alor, olie ki to fer to adolesan santi ki zame li fer seki bon, to bizin felisit li ek ankouraz li. Fer li santi ki li kapav fer twa ek Zeova kontan ek ki li kapav servi so kapasite pou servi Zeova.

17, 18. Ki rezilta to pou gagne si to kontign form to adolesan pou servi Zeova?

¹⁷ Kitfwa to ena mem santiman ki lapot Pol. Li ti trakas li boukou pou bann ki li ti ede pou konn Zeova parski li ti konsider zot kouma so bann zanfan. Li ti bien kontan zot. Akoz sa, li ti sagrin kan li ti panse ki kitfwa sertin pa ti pou kontign servi Zeova. (1 Korintien 4:15; 2 Korintien 2:4) Victor ena trwa zanfan. Li rakonte: “Ladolesans ti enn peryod bien difisil. Selman, nou plis rapel bann bon moman ki nou ti pase ki bann difikilte ki nou ti fer fas. Avek led Zeova, nou ti ena enn gran lamitie avek nou bann zanfan.”

¹⁸ Paran, to fer boukou zefor pou form to zanfan parski to bien kontan li. Alor, pa bes lebra. Reflesi lor lazwa ki to pou gagne kan to zanfan pou desid pou servi Bondie ek pou kontign servi Li avek fidelite.—3 Zan 4.