BIOGRAFI
Mo’nn Trouv Lape Avek Bondie ek Avek Mo Mama
MO MAMA ti demann mwa: “Kifer to pa ador to bann anset? To pa realize ki se gras-a zot ki to la zordi? To pa pou montre okenn rekonesans anver zot? Kouma to kapav rezet bann koutim ki nou bann anset ti swiv ek ki nou sipoze swiv nou’si? Si to pe refiz donn loner to bann anset, se koumadir to pe dir ki nou ladorasion dan vid.” Apre ki mo mama finn dir sa, li’nn koumans plore.
De-trwa mwa avan sa, bann Temwin Zeova ti demann mo mama si li ti pou kontan etidie Labib. Li pa ti anvi etidie, me pou pa refiz zot, li ti fer laranzman pou ki zot fer letid avek mwa. Ek asterla li pe ankoler ar mwa. Me li pa ti abitie reazir koumsa parski touletan mo’nn obeir li. Selman, parski mo ti anvi fer Zeova plezir, sa fwa-la mo pa ti kapav obeir li. Sa pa ti fasil, me Zeova ti donn mwa lafors.
APRANN KONN ZEOVA
Mo fami ti Boudis, parey kouma laplipar dimounn dan Japon. Me apre de mwa ki mo’nn etidie avek bann Temwin Zeova, mo ti sir ki seki ena dan Labib li vre. Kan mo ti aprann ki mo ena enn Papa ki dan lesiel, mo ti vremem anvi aprann konn Li pli bien. O-koumansman, mwa ek mo mama nou ti kontan koz lor seki mo ti pe aprann. Mo ti koumans asiste bann renion Dimans dan lasal bann Temwin Zeova. Amezir ki mo ti pe aprann plis, mo ti dir mo mama ki mo ti pou aret partisip dan bann seremoni ki bann Boudis fer. Enn sel kout, so latitid ti sanze. Li ti dir mwa: “Se enn dezoner pou ena enn manb lafami ki pena okenn lamour pou so bann anset.” Li ti demann mwa pou aret etidie Labib ek aret al renion. Zame mo ti panse mo mama ti pou dir mwa sa! Mo ti nepli rekonet mo mama.
Mo papa ti dakor avek mo mama. Mo ti aprann dan Efezien sapit 6 ki Zeova anvi mo obeir mo bann paran. Mo ti anvi ki re-ena lape dan mo fami, ek mo ti panse ki si mo ti ekout zot, kitfwa apre, zot osi zot ti pou ekout mwa. Sa lepok-la, mo ti pe revize pou mo lexame, alor mo ti aksepte pou fer seki mo bann paran ti dir mwa, pandan trwa mwa. Me mo ti promet Zeova ki apre sa trwa mwa-la, mo ti pou rekoumans al renion.
Mo ti pran enn move desizion. Kifer? Premierman, parski mo ti panse ki apre sa trwa mwa-la, mo ti pou ankor ena enn gran dezir pou servi Zeova. Me okontrer, bien vit mo
lamitie avek Zeova ti vinn pli feb. Deziemman, mo mama ek mo papa ti fer plis zefor pou esey konvink mwa pou aret servi Zeova.LED EK PERSEKISION
Kan mo ti al renion, mo ti zwenn boukou Temwin ki ti pe gagn persekision ar zot fami. Zot ti rasir mwa ki Zeova ti pou donn mwa lafors. (Matie 10:34-37) Zot ti explik mwa ki, si mo res fidel anver Zeova, mo bann fami pou kapav aprann konn Li. Mo ti anvi kont lor Zeova, alor mo ti koumans priye Li avek tou mo leker.
Mo fami ti persekit mwa dan diferan fason. Mo mama ti sipliy mwa pou aret etidie ek ti esey fer mwa rezone. Laplipar ditan, mo ti res trankil. Kan mo ti dir kitsoz, souvan sa ti deklans enn lager, parski nou toule-de nou ti pe rod montre nou kamarad ki nou ti ena rezon. Asterla mo realize ki, si mo ti plis respekte santiman ek krwayans mo mama, nou pa ti pou lager sa kantite-la. Mo bann paran ti donn mwa plis louvraz pou ki mo res lakaz. Parfwa, zot ti ferm mwa dan lakaz ouswa zot pa ti kit nanye pou mo manze.
Mo mama ti rod led ar lezot pou esey konvink mwa. Li ti koz ar mo profeser, me sa pa ti marse. Mo mama ti amenn mwa al get so patron pou ki li explik mwa ki okenn relizion pa servi nanye. Li ti osi telefonn nou bann fami ek ti plor ar zot pou sipliy zot pou ed li. Sa ti fer mwa bien ankoler. Me dan renion, bann ansien ti rapel mwa ki si mo mama pe koz lor nou sitiasion avek lezot, ofet li ti pe rann zot temwaniaz.
Mo bann paran ti anvi mo al liniversite pou ki mo kapav gagn enn bon travay. Me nou ti
telman ankoler ar nou kamarad ki nou pa ti pou kapav asize trankil ek koz lor la. Alor, mo ti ekrir zot plizir let pou explik zot mo bann lobzektif. Mo papa ti bien ankoler ek ti dir mwa: “Si to panse ki to pou kapav gagn enn travay, fer enn manier gagn enn demin mem. Sinon to kit sa lakaz-la.” Mo ti priye Zeova ek mo ti demann Li so led. Landemin mem, kan mo ti dan predikasion, de ser ti demann mwa pou donn leson zot zanfan. Mo papa pa ti kontan, alor li ti aret koz ar mwa ek ti koumans inior mwa. Mo mama ti dir mwa ki li ti pou prefer mo enn kriminel ki enn Temwin Zeova.Zeova finn ed mwa pou koriz mo fason panse ek pou kone ki mo bizin fer
Defwa mo ti demann momem si Zeova ti vremem anvi ki mo reziste kont mo bann paran sa kantite-la. Alor mo ti priye Zeova ek mo ti medit lor seki Labib dir konsernan so lamour. Sa ti ed mwa pou vinn pli pozitif ek pou konpran ki mo bann paran ti pe persekit mwa parski zot ti gagn mo traka. Zeova finn ed mwa pou koriz mo fason panse ek pou kone ki mo bizin fer. Anplis, kan mo ti pas plis letan dan predikasion, mo ti gagn plis lazwa pou prese. Mo ti anvi fer pionie!
SERVI ANTAN KI PIONIE
Kan sertin ser ti tann dir ki mo ti pe rod fer pionie, zot ti konsey mwa pou les mo bann paran kalme avan. Mo ti priye Zeova pou gagn sazes, mo ti fer bann resers, mo ti reflesi lor bann rezon kifer mo ti anvi fer pionie, ek apre mo ti koz sa avek bann frer ek ser ki ena lexperyans. Lerla, mo ti desid pou fer Zeova plezir. Mo ti konpran osi ki mem si mo ti atann inpe letan avan ki mo fer pionie, kitfwa mo bann paran ti pou kontign persekit momem.
Mo ti koumans fer pionie pandan mo dernie lane lekol. Apre ki mo ti’nn fer pionie pandan enn tan, mo ti anvi al servi dan enn teritwar kot ti bizin plis led. Me mo mama ek mo papa pa ti anvi ki mo kit lakaz. Alor, mo ti atann ziska ki mo gagn 20 an. Apre mo ti demann biro nasional pou avoy mwa dan enn teritwar pa tro lwin ar mo fami dan lesid Japon. Koumsa, mo mama pa ti pou tro trakase pou mwa.
Kan mo ti al servi dan sa teritwar kot zot ti avoy mwa la, mo ti bien kontan pou trouv mo bann letid pran batem. Mo ti koumans aprann Angle parski mo ti anvi fer plis dan mo minister. Apre sa, kan mo ti trouve kouma de pionie spesial dan mo kongregasion ti bien zele ek kouma zot ti ed lezot, mo’si mo ti anvi vinn enn pionie spesial. Pandan sa letan-la, de fwa mo mama ti tom bien malad, ek toule-de fwa mo ti retourn lakaz pou ed li. Li ti bien etone, ek li ti koumans azir dan enn pli bon fason ar mwa.
ZEOVA INN BIEN BENI MWA
Set-an apre, Atsushi, enn parmi bann pionie spesial ki mo ti mansione avan, ti avoy mwa enn let. Li ti anvi marye ek li ti demann mwa si mo ti interese ar li. Mo pa ti ena okenn santiman amoure pou Atsushi, ek mo pa ti panse ki li ti ena kit santiman pou mwa. Enn mwa apre, mo ti dir li ki mo ti dispoze pou aprann konn li. Nou ti realize ki nou ti ena bann mem lobzektif. Nou ti anvi kontign servi Zeova aplintan ek nou ti pre pou aksepte ninport ki afektasion. Finalman, nou ti marye. Mo ti bien kontan kan mo mama, mo papa, ek lezot fami ti vinn asiste nou maryaz.
Népal
Enn tipe apre, kan nou ti pe fer pionie permanan, Atsushi ti nome antan ki ranplasan sirveyan sirkonskripsion. Plitar, ti demann nou pou servi kouma pionie spesial ek apre pou servi dan sirkonskripsion. Apre ki nou ti
fini vizit tou bann kongregasion dan nou sirkonskripsion pou enn premie fwa, biro nasional ti telefonn nou. Zot ti demann nou si nou ti dispoze pou al servi dan Népal ek pou kontign servi dan sirkonskripsion laba.Kan mo finn servi dan diferan pei, sa finn ansegn mwa boukou kitsoz lor Zeova
Mo ti gagn traka kouma mo bann paran ti pou reazir si mo al lwin koumsa. Kan mo ti telefonn zot, mo papa ti dir mwa: “To pou al dan enn zoli landrwa.” Zis enn semenn avan, enn parmi so bann kamarad ti donn li enn liv ki koz lor Népal, ek mo papa ti mem panse ki sa ti pou enn zoli plas pou vizite.
Nou ti bien kontan pou servi dan Népal, parmi bann dimounn bien amikal. Plitar, ti azout Bangladesh dan nou sirkonskripsion. Mem si Bangladesh ti pre avek Népal, li ti bien diferan. Nou ti ena enn varyete teritwar pou prese. Apre sink an, ti demann nou pou retourn Japon, kot asterla nou pe servi avek lazwa dan sirkonskripsion.
Mo’nn aprann boukou lor Zeova kan mo’nn servi dan Japon, Népal ek Bangladesh. Bann dimounn dan sa bann pei-la ena diferan kiltir, labitid ek koutim. Ek sak dimounn ena so personalite ki pa parey kouma lezot. Mo finn trouve kouma Zeova pran swin sakenn parmi zot, aksepte zot, ed zot ek beni zot.
Mo ena boukou rezon pou remersie Zeova. Li’nn permet mwa konn Li ek travay pou Li, ek Li’nn donn mwa enn bon mari ki servi Zeova. Zeova finn ed mwa pou pran bann bon desizion, ek asterla mo ena enn bon relasion avek Li ek avek mo fami. Gras-a Zeova, mwa ek mo mama nou’nn revinn de bon kamarad. Mo bien rekonesan ki mo’nn trouv lape avek Bondie ek avek mo mama.
Nou bien kontan pou servi dan sirkonskripsion