1, 2. Dan lepok Biblik, ki Bondie ti fer, ek ki kestion kitfwa sertin kapav poze kan zot malad?

SI TO’NN deza tom bien malad, kitfwa to finn poz tomem sa kestion-la: ‘Eski mo pou geri?’ Oubien kitfwa enn manb to fami ouswa enn kamarad inn tom malad ek to pe reflesi si li pou regagn so lasante. Li normal ki to anvi ena enn bon lasante ek ki bann dimounn ki to kontan osi ena enn bon lasante. Dan Labib, ena lexanp sertin dimounn malad ki ti anvi kone si zot lasante pou ameliore. Par exanp, Lerwa Ahazia, garson Ahab ek Zezabel, ti pe reflesi si li ti pou bien apre ki li’nn blese. Plitar, Benn-Adad, Lerwa Siri, ti tom malad ek ti anvi kone si li ti pou geri.—2 Lerwa 1:2; 8:7, 8.

² Labib rakonte ki dan lepase, parfwa Zeova ti geri bann dimounn par enn mirak ek ti mem fer so bann profet resisit sertin dimounn ki ti mor. (1 Lerwa 17:17-24; 2 Lerwa 4:17-20, 32-35) Zordi, sertin dimounn ki malad kitfwa demann zotmem si Bondie pou fer kitsoz pou geri zot osi.

3-5. Ki Zeova ek Zezi kapav fer, ek ki bann kestion nou pou examine?

 ³ Zeova ena pouvwar lor lasante bann dimounn. Li’nn pini sertin dimounn kan Li’nn fer zot gagn enn maladi. Par exanp, ti ena Faraon dan lepok Abraam, ek plitar ti ena Miriam, ser Moiz. (Zenez 12:17; Nonb 12:9, 10; 2 Samiel 24:15) Zeova ti pini bann Izraelit par bann “maladi ouswa ple” kan zot pa ti fidel anver Li. (Deteronom 28:58-61) Dan lezot lokazion, Zeova finn protez so pep pou ki zot pa tom malad. (Exod 23:25; Deteronom 7:15) Li’nn mem geri sertin parmi zot. Par exanp, Li ti geri Zob ki ti bien malad ek ki ti anvi mor.—Zob 2:7; 3:11-13; 42:10, 16.

⁴ Nou sir ki Zeova ena pouvwar pou geri bann ki malad. Zezi osi kapav fer sa. Kan li ti lor later, li ti geri bann ki ti gagn lalep ouswa ki ti gagn epilepsi. Li ti geri bann aveg ek bann ki ti paralize. (Lir Matie 4:23, 24; Zan 9:1-7) Sa bann mirak-la ed nou pou ena konfians ki, dan lavenir, Zezi pou akonpli bann kitsoz extraordiner dan lemond nouvo. Lerla, “okenn abitan pa pou dir: ‘Mo malad.’”—Izai 33:24.

⁵ Me, si nou ena enn maladi grav, eski nou kapav atann ki Zeova ouswa Zezi geri nou par enn mirak asterla? Ki nou bizin reflesi kan nou swazir enn tretman?

6. Ki Labib dir konsernan bann mirak ki bann Kretien ti fer dan premie siek?

⁶ Dan premie siek, Zeova, par so lespri sin, ti swazir bann Kretien ki pou regn avek Zezi dan lesiel. Zeova ti donn sertin parmi sa bann Kretien-la kapasite pou fer bann mirak. (Zistwar Bann Apot 3:2-7; 9:36-42) Par exanp, zot ti kapav geri bann dimounn ek ti koz diferan lang. (1 Korintien 12:4-11) Me plitar, ti nepli ena sa bann mirak-la, parey kouma Labib ti anonse. (1 Korintien 13:8) Alor, azordi, nou pa kapav atann ki Zeova fer enn mirak pou geri nou, ouswa pou geri bann dimounn ki nou kontan.

7. Kouma Psom 41:3 ankouraz nou?

⁷ Me si to malad, Zeova pou rekonfort twa ek pou soutenir twa, parey kouma Li’nn fer pou so bann serviter dan lepase. Lerwa David ti ekrir: “Ere sa kikenn ki montre konsiderasion anver enn tipti la; zour ki pou ena maler, Zeova pou fer li sape. Zeova pou protez li ek pou gard li vivan.” (Psom 41:1, 2, NW.) Biensir, David pa ti pe rod dir ki enn bon dimounn ki ti viv dan sa lepok-la pa ti pou mor zis parski li ena konsiderasion pou enn ti dimounn. Alor, kouma Zeova ti pou ed sa bon dimounn-la? David ti explike: “Zeova pou soutenir li lor so lili douler; wi to pou sanz so lili net pandan  so maladi.” (Psom 41:3, NW.) Zeova kone exakteman seki so bann serviter pe andire, ek Li pa bliye zot. Li kapav donn zot kouraz ek sazes. Zeova inn osi fer nou lekor dan enn fason kot li kapav geri par limem.

8. Dapre Psom 41:4, ki David ti demann Zeova kan li ti bien malad?

⁸ Dan Psom 41, David koz lor lepok kan li ti bien malad ek ki li ti santi li feb ek trakase. Li paret ki sa lepok-la, so garson Absalom ti pe rod vinn lerwa dan so plas. David ti telman malad ki li pa ti kapav aret Absalom. David ti kone ki li ti pe gagn sa bann problem familial la akoz so pese avek Bat-Sheba. (2 Samiel 12:7-14) Alor, ki li ti fer? Li ti priye, li ti dir: “A Zeova, montre mwa to faver. Geri mwa parski mo finn fer pese kont twa.” (Psom 41:4, NW.) David ti kone ki Zeova finn pardonn so pese, ek li finn kont lor Bondie pou gagn led pandan so maladi. Me eski David ti pe atann ki Zeova geri li par enn mirak?

9. (a) Ki Zeova ti fer pou Lerwa Izkiya? (b) Ki David ti atann Zeova fer pou li?

⁹ Li vre ki parfwa Bondie finn swazir pou geri bann dimounn. Par exanp, kan Lerwa Izkiya ti pre pou mor, Zeova ti geri li, ek li’nn viv ankor 15 an. (2 Lerwa 20:1-6) Me David pa ti atann okenn mirak. Okontrer, li ti atann pou gagn led Zeova parey kouma Zeova ti pou ed “sa kikenn ki montre konsiderasion anver enn tipti la.” David ti ena bann bon relasion avek Zeova. Akoz sa li’nn kapav demann Zeova pou gagn rekonfor ek pou pran li swin pandan so maladi. Li ti demande osi ki so lekor gagn lafors pou li kapav geri. Nou kapav demann Zeova pou ed nou dan mem fason.—Psom 103:3.

10. Ki ti ariv Trofim ek Epafrodit, ek ki sa ansegn nou?

¹⁰ Dan premie siek, lapot Pol ek lezot Kretien ti ena pouvwar pou fer bann mirak. Me pa tou bann Kretien ki ti gagn gerizon par bann mirak. (Lir Zistwar Bann Apot 14:8-10.) Lapot Pol ti geri papa Pibliyis ki ti gagn lafiev ek enn infeksion bien grav. Pol “ti priye, ti poz lame lor li, ek ti geri li.” (Zistwar Bann Apot 28:8, NW.) Me Pol pa ti geri tou dimounn ki li ti kone. Enn parmi so bann kamarad ki apel Trofim, ti akonpagn li dan enn vwayaz misioner. (Zistwar Bann Apot 20:3-5, 22; 21:29) Kan Trofim ti malad, Pol pa ti geri li. Trofim finn bizin aret vwayaz avek Pol, ek finn res dan lavil Mile ziska ki li degaze. (2 Timote 4:20) Enn lot kamarad Pol, ki apel Epafrodit, ti tom malad ek ti manke mor. Me Labib pa dir ki Pol ti geri li.—Filipien 2:25-27, 30.

11, 12. Ki nou kone konsernan Lik, ek kouma sirman li’nn ed Pol?

¹¹ Lik ti enn dokter, ek li ti vwayaz avek Pol. (Zistwar Bann Apot 16:10-12; 20:5, 6; Kolosien 4:14) Li paret ki li ti swagn Pol ek lezot ankor kan zot ti malad pandan zot vwayaz misioner. (Galat 4:13) Parey kouma Zezi ti dir, bann ki “malad” bizin dokter.—Lik 5:31.

¹² Lik pa ti zis enn dimounn ki kontan donn konsey lor lasante. Li ti enn dokter kalifie. Labib pa dir kotsa ni kan Lik  ti gagn so formasion. Me Labib dir ki Pol ti avoy bann salitasion ar Lik pou kongregasion Kolos. Alor, li posib ki Lik ti gagn enn formasion dan enn lekol medikal dan Laodise, enn lavil pre ar Kolos. Anplis, kan Lik ti ekrir so Levanzil ek liv Zistwar Bann Apot, li ti servi bann lexpresion medikal bien presi. Ek parski li ti enn dokter, li finn rakont plizir resi kot Zezi ti geri bann dimounn.

13. Ki nou bizin rapel avan ki nou donn ouswa nou aksepte enn konsey an rapor avek nou lasante?

¹³ Zordi, pena okenn frer ki kapav fer bann mirak ek geri nou. Me parski bann frer anvi ed nou, sertin kitfwa kapav donn nou bann konsey, mem si nou pa demann zot. Biensir, bann konsey pa pou fer nou ditor. Par exanp, Pol ti ankouraz Timote pou bwar inpe divin. Timote ti ena bann problem lestoma, kitfwa parski li ti’nn bwar enn delo polie. * (Get not.) (Lir 1 Timote 5:23.) Me nou bizin fer atansion. Enn frer kapav rod konvink nou pou pran enn medsinn ouswa enn plant medikal. Ouswa li kapav rod konvink nou pou manz ouswa pa manz sertin manze. Kitfwa li kapav dir nou ki sa finn ed enn manb so fami ki ti ena mem problem ki nou. Me, sa pa vedir ki sa pou ed nou osi. Nou bizin rapel ki mem si boukou dimounn servi enn medsinn ouswa swiv enn tretman, sa kapav kanmem fer ditor.—Lir Proverb 27:12. *

14, 15. (a) Ar ki kalite dimounn nou bizin fer atansion? (b) Ki nou kapav aprann dan Proverb 14:15?

¹⁴ Nou tou nou anvi ena enn bon lasante pou kapav profit lavi ek travay dir pou Zeova. Me, parski nou inparfe, nou pa kapav evit tou maladi ki ena. Kan nou malad, ena boukou tretman nou kapav swiv, ek nou gagn drwa swazir nou tretman. Malerezman, sertin dimounn ek sertin konpagni dir ki zot finn trouv enn tretman ki pou geri nou maladi. Zot dir sa parski zot anvi gagn boukou kas. Zot kapav dir osi ki boukou dimounn finn swiv sa tretman-la ek zot inn bien. Si nou malad, kitfwa nou pou anvi esey ninport ki tretman ki pou ed nou santi nou bien ek viv pli lontan. Me fode pa nou bliye konsey ki ena dan Parol Bondie, ki dir: “Enn dimounn naif krwar tou seki li tande, me enn dimounn ki ena enn bon zizman, fer atansion kot li met so lipie.”—Proverb 14:15.

¹⁵ Si nou enn dimounn ki fer atansion, setadir si nou ena sazes, nou pa pou  krwar tou kitsoz, sirtou si sa dimounn ki pe donn nou konsey la pena formasion medikal ki bizin. Li bon nou demann noumem: ‘Li pe dir ki sa vitaminn-la, sa plant-la, ouswa sa rezim-la finn ed bann dimounn, me eski mo sir ki vremem sa finn ed zot? Mem si sa finn ed zot, kouma mo kone ki sa pou ed mwa? Eski mo bizin fer plis resers ek koz avek bann dimounn ki kalifie pou tret mo problem lasante?’—Deteronom 17:6.

16. Ki nou bizin reflesi kan nou pran bann desizion konsernan nou lasante?

¹⁶ Kan nou pe deside ki test medikal nou pou fer ouswa ki tretman nou pou aksepte, nou bizin servi nou “bon sans.” (Tit 2:12, NW.) Se enn kitsoz ki bien inportan sirtou si test ou tretman medikal-la paret bien bizar. Eski dimounn-la kapav explike kouma sa test-la ouswa sa tretman-la marse? Eski so explikasion etranz? Eski boukou dokter dakor ki sa test-la ouswa sa tretman-la kapav geri dimounn? (Proverb 22:29) Kitfwa enn kikenn kapav dir nou ki finn dekouver enn medsinn dan enn landrwa bien lwin, ek ki bann dokter pankor konn sa medsinn-la. Me eski ena bann prev ki sa  medsinn-la existe? Ena dimounn ki ofer mem bann tretman ki servi bann ingredian sekre ouswa ki servi enn lafors ki personn pa kone. Sa kapav bien danzere. Rapel bien: Bondie dir nou ki fode pa nou servi bann pouvwar mazik ouswa sirnatirel.—Deteronom 18:10-12; Izai 1:13.

17. Ki kitsoz li normal nou anvi?

¹⁷ Komite santral dan premie siek ti avoy enn let bann Kretien dan bann kongregasion pou dir zot ki bann kitsoz zot bizin rezete. Alafin sa let-la, komite santral ti ekrir: “Si zot fer bien atansion pou rezet sa bann kitsoz-la, zot pou prospere. Nou swet zot enn bon lasante!” (Zistwar Bann Apot 15:29, NW.) Mem si sa bann dernie parol-la ti zis enn lot fason pou dir orevwar, sa rapel nou ki li normal ki nou anvi ena enn bon lasante.

18, 19. Ki kitsoz nou pe atann avek inpasians konsernan lemond nouvo?

¹⁸ Akoz nou linperfeksion, nou pa kapav evit tou maladi. Ek kan nou malad, nou pa atann ki Zeova fer enn mirak pou geri nou. Me nou kapav atann avek konfians kan Zeova pou geri nou net dan lavenir. An Revelasion 22:1 ek 2, lapot Zan ti koz lor “delo lavi” ek “bann pie lavi” ki pou geri tou dimounn. Sa pa vedir ki ena plant ki nou kapav servi asterla ouswa dan lemond nouvo pou geri nou bann maladi. Okontrer, sa reprezant tou seki Zeova ek Zezi pou fer pou ki nou kapav viv pou touletan.—Izai 35:5, 6.

¹⁹ Nou pe atann avek inpasians kan sa lepok extraordiner la pou arive. Me pou linstan, nou sir ki Zeova kontan sakenn parmi nou ek ki Li konpran seki nou resanti kan nou soufer. Parey kouma David, nou sir ki si nou malad, Zeova pa pou abandonn nou. Li pou touletan pran swin bann ki servi Li avek fidelite.—Psom 41:12.