SOLEY ti pe leve ek bann premie reyon lalimier ti pe ekler laplenn otour Jéricho. Rahab ti pe get par so lafnet. Enn gran larme ti’nn rasanble lor sa laplenn-la​—larme Israël. Letan zot koumans enn lot lamars otour lavil Jéricho, par deryer zot enn lapousier leve ek ankor enn fwa tann son bann tronpet bien for.

Rahab ti res dan Jéricho; ek li ti bien konn so bann sime, so bann lakaz, so bann bazar ek so bann laboutik ki ti bien frekante. Li ti konn ankor pli bien bann dimounn ki ti res laba. Li ti kapav santi kouma sa bann dimounn-la ti pe gagn pli per amezir bann zour ti pe pase ek ki Israël ti pe kontign sa seremoni bizar-la, setadir mars otour lavil Jéricho enn fwa par zour. Selman, letan Rahab ti tann son zot tronpet rezone dan bann sime ek bann plas piblik, li pa ti per ouswa dezespere parey kouma so pep.

Rahab ti pe gete letan sa larme-la ti koumans so lamars boner setiem zour. Omilie bann solda Izraelit, li ti trouv bann pret ki ti pe sonn tronpet ek ki ti pe sarye lars sakre ki ti reprezant prezans zot Bondie, Jéhovah. Kitfwa nou kapav mazinn Rahab inn poz so lame lor enn lakord rouz vif ki pe apandan ar so lafnet ki trouv dan gran miray Jéricho. Sa lakord-la ti rapel Rahab ki li ek so fami ti ena lespwar pou gagn lavi sov kan sa lavil-la ti pou detrir. Eski Rahab ti enn tret? Antouka, pa pou Jéhovah; Li ti konsider Rahab kouma enn madam ki ena enn gran lafwa. Anou retourn dan koumansman zistwar Rahab, ek gete ki nou kapav aprann ar so lexanp.

Rahab ti enn prostitie. Dan lepase, sa ti telman sok sertin biblis, ki zot ti pretann ki sanse li ti zis an sarz enn ti loberz. Me Labib ase kler ek li pa kasiet sa realite-la. (Josué 2:1; Hébreux 11:31; Jacques 2:25) Dan sosiete Kananeen, kitfwa bann dimounn ti konsider travay ki Rahab ti fer kouma enn kitsoz ase respektab. Selman, kiltir kot enn dimounn inn grandi pa kapav anpes so konsians​—kapasite ki Jéhovah inn met dan nou tou pou fer diferans ant seki bon ek seki move​—travay kouma bizin. (Romains 2:14, 15) Rahab kitfwa ti konn bien ki li ti pe amenn enn move lavi. Sirman, parey kouma boukou dimounn ki pe amenn sa kalite lavi-la zordi, Rahab ti santi li dan enn piez ek li pa ti ena lezot swa si li ti anvi swagn so fami.

Pena dout ki Rahab ti bien anvi amenn enn pli bon lavi. Landrwa kot li ti reste ti ranpli avek violans ek limoralite, parmi ti ena osi linses ek bestialite. (Lévitique 18:3, 6, 21-24) Larelizion ti an gran parti responsab pou bann move kitsoz ki ti ena dan Jéricho. Dan bann tanp ti ankouraz prostitision, ek ti bril bann zanfan vivan an sakrifis dan ladorasion bann bondie demoniak kouma Baal ek Molek.

Jéhovah ti trouv bien seki ti pe pase dan Canaan. Ek parski bann dimounn dan Canaan ti pe fer boukou move kitsoz, Jéhovah ti dir: “Sa pei-la li inpir, ek mo pou amenn pinision pou so pese lor li, ek pei-la pou vomi so bann abitan.” (Lévitique 18:25) Ki sa lexpresion “pinision  pou so pese” la inplike? An zeneral, Jéhovah ti fer sa promes-la ar Israël: “Pena dout, Jéhovah to Bondie tigit-tigit pou tir sa bann nasion-la devan twa.” (Deutéronome 7:22) Plizir siek avan, Jéhovah ti promet pou donn fami Abraham sa later-la, ek “Bondie . . . pa kapav koz manti.”​—Tite 1:2; Genèse 12:7.

Selman, Jéhovah ti osi donn lord ki sertin nasion dan sa pei-la ti pou bizin detrir net. (Deutéronome 7:1, 2) Jéhovah, antan ki “Ziz lor later antie,” ek ki zis, ti’nn lir dan leker tou sa bann dimounn-la. Li ti konn bien ki kantite zot ti’nn bien deside pou fer seki move ek pou amenn enn lavi imoral. (Genèse 18:25; 1 Chroniques 28:9) Me kouma Rahab ti konsider sa, lefe ki li ti bizin viv dan enn lavil ki ti’nn kondane? Esey panse ki Rahab ti resanti kan li ti tann bann kitsoz ki Israël inn fer. Li ti aprann ki Bondie Israël ti gid so pep​—enn nasion ki ti an esklavaz​—pou gagn viktwar lor larme l’Égypte, larme pli pwisan ki ti ena sa lepok-la. Ek asterla Israël ti pre pou atak Jéricho! Pourtan, bann dimounn ki ti res dan sa lavil-la ti kontign fer seki move. Nou trouve kifer kan Labib koz lor bann dimounn ki ti viv dan mem lepok ki Rahab, li dir ki zot “bann ki ti dezobeir.”​—Hébreux 11:31.

Rahab ti diferan. Amezir bann lane inn pase, li’nn kapav reflesi lor bann kitsoz ki li’nn tande Israël inn fer ek lor Bondie Israël, Jéhovah. Vremem, Jéhovah ti bien diferan ar bann bondie Kananeen! Li, Li ti lager pou so pep olie ki Li ti fer zot ditor, Li ti elev nivo moral so bann adorater olie ki Li ti degrad zot. Pou sa Bondie-la, bann madam ti ena valer. Li pa ti tret zot kouma bann sinp lobze sexiel ki’nn fer pou vande ek aste ouswa servi zot dan bann ladorasion degradan. Kan Rahab ti aprann ki Israël ti lot kote Jourdain, ek ki li ti’nn pare pou atak Jéricho, sirman li ti trakase ek ti demann limem ki ti pou ariv so pep. Eski Jéhovah ti remark Rahab ek ti apresie so bann kalite?

Zordi, ena boukou dimounn kouma Rahab. Zot ena linpresion ki zot inn rant dan enn piez, ek zot pe bizin amenn enn lavi ki’nn pran tou zot dignite ek zot lazwa; zot ena linpresion ki zot invizib ek ki zot pa vo nanye. Lexanp Rahab rasir nou ek rapel nou ki personn pa invizib pou Bondie. Mem si nou santi nou bien ba, “Li pa lwin ar sakenn parmi nou.” (Actes 17:27) Li bien pre ar nou, Li bien anvi donn enn lesperans tou bann ki ena lafwa an Li, ek Li pe atann kan Li pou fer sa. Eski Rahab ti ena lafwa?

De-trwa zour avan ki Israël ti mars otour Jéricho, de etranze ti tap laport Rahab. Sa de misie-la pa ti anvi ki lezot remark zot, me dan sa lavil kot ti ena boukou tansion la, boukou dimounn ti lor zot gard ek ti pe veye si zame kit espion Izraelit vini. Rahab, ki ti enn bon obzervatris, kitfwa pa’nn tarde pou kone kisannla sa de misie-la. Pou Rahab, sa pa ti nouvo ki bann dimounn bizar tap so laport. Me sa de misie-la ti pe zis rod enn plas pou reste​—zot pa ti pe rod servis enn prostitie.

 An realite, sa de misie-la ti bann espion Izraelit. Zot komandan, Josué, ti’nn avoy zot pou konn pwin for ek pwin feb bann dimounn dan Jéricho. Jéricho ti premie lavil dan Canaan ki Israël ti pou atake ek kitfwa li ti lavil ki ti pli for. Josué ti zis anvi konn bann difikilte ki li ek so bann zom ti pou bizin fer fas. Pena dout ki sa bann espion-la ti swazir lakaz Rahab par expre. Konpare ar lezot plas, bann dimounn pa ti pou tro kas latet ar bann etranze dan lakaz enn prostitie. Kitfwa sa bann espion-la ti atann osi gagn kit linformasion ki ti pou ed zot, kan bann dimounn ti pou koze.

Labib dir ki Rahab “ti akeyir bann mesaze avek lospitalite” (Jacques 2:25) Li ti amenn zot kot li, ek mem si li ti ena bann dout lor zot lidantite ek li pa ti kone kifer zot la, li ti aksepte ki sa bann zom-la res kot li. Kitfwa li ti atann pou aprann plis lor zot Bondie, Jéhovah.

Me enn sel kout, bann mesaze lerwa Jéricho ti’nn ariv devan so laport! Nouvel ti’nn fane ki bann espion Israël ti’nn vinn kot Rahab. Ki Rahab ti pou fer? Si li ti protez sa de etranze-la, eski li pa ti pou met so lavi ek lavi tou so fami an danze? Eski bann dimounn dan Jéricho pa ti pou touy zot tou, si li ti les sa bann lennmi-la kot li? Dan enn lot kote, kitfwa asterla Rahab ti’nn fini konn lidantite sa bann zom-la. Si li ti’nn fini kone ki Jéhovah bien pli bon ki so bann bondie, eski sa pa ti enn lokazion pou li pran pozision pou Jéhovah?

Rahab ti ena tigit letan mem pou reflesi, me li ti ena boukou lide ek li ti azir vit. Li ti fer bann espion-la kasiet parmi bann brans pie lin ki li ti’nn met sek lor so lakaz. Apre sa, li ti dir bann mesaze lerwa: “Wi, sa bann zom-la ti vinn kot mwa, me mo pa ti kone kot zot sorti. Ek kan ti pe koumans fer nwar ek ti’nn ariv ler pou ferm laport, sa bann zom-la finn sorti. Me mo pa kone kot zot finn ale. Me degaze swiv zot, zot pou reisi trap bannla.” (Josué 2:4, 5) Mazinn Rahab pe get reaksion bann mesaze lerwa. Kitfwa li ti pe demann limem si bannla pa pe tann so leker bate vit-vit?

So plan ti marse! Bann zom lerwa ti degaze al dan direksion larivier Jourdain. (Josué 2:7) Rahab sirman ti pous enn soupir kan bannla ti fini ale. Sa bann move dimounn-la pa ti merit konn laverite ek par enn sinp stratezi, li’nn reisi fer zot al dan enn lot direksion ek li’nn sap lavi bann serviter Jéhovah ki ti inosan.

Rahab ti degaze retourn lor so lakaz ek ti dir sa de espion-la seki li’nn fer. Li ti osi revel enn linformasion bien inportan: So pep ti’nn dekouraze ek ti pe per larme Israël. Sirman sa bon nouvel-la ti fer bann espion-la bien kontan. Sa bann move  Kananeen-la ti pe koumans per pouvwar ki Jéhovah, Bondie Israël ti ena! Apre sa, seki Rahab ti dir ena enn pli gran linportans pou nou. Li ti dir: “Jéhovah, zot Bondie, Limem Bondie lao dan lesiel, ek anba lor later.” (Josué 2:11) Seki li’nn tande lor Jéhovah ti ase pou ansegn li omwin enn kitsoz: Bondie Israël ti merit gagn so konfians. Li ti ena lafwa an Jéhovah.

Rahab ti sir ki Jéhovah ti pou fer So pep gagn viktwar. Alor li ti sipliy sa bann espion-la pou ena pitie pou li, pou ki li ek so fami gagn lavi sov. Sa bann espion-la ti aksepte ek zot ti dir Rahab ki seki finn pase bizin res sekre ek ki li ti bizin osi apandan enn lakord rouz ar so lafnet ki ti dan miray Jéricho, pou ki bann solda kapav protez li ek so fami.​—Josué 2:12-14, 18.

Nou kapav aprann enn leson bien inportan lor lafwa ar lexanp Rahab. Kouma Labib dir: “Lafwa ne apartir sa kitsoz ki nou finn tande la.” (Romains 10:17) Li ti tann bann kitsoz sir konsernan pouvwar ek lazistis Jéhovah, alor li ti ena lafwa ek konfians an Li. Azordi, nou kapav gagn pli boukou linformasion lor Jéhovah. Eski nou pou fer zefor pou aprann konn Li ek pou ena lafwa an Li, gras-a seki nou aprann dan so Parol, Labib?

Sa de espion-la ti swiv konsey Rahab ek ti desann par so lafnet avek enn lakord ek zot ti sove dan direksion bann montagn. Dan lenor Jéricho ti ena boukou kavern kot sa bann espion-la ti kapav kasiet. Ek kan ti pou nepli ena danze, zot ti pou kapav retourn kot Israël ti pe kanpe ek transmet bon nouvel ki zot ti gagne ar Rahab.

Enn tipe apre, pena dout ki pep Jéricho ti pe mor-de-per kan zot ti aprann ki par enn mirak, Jéhovah ti aret larivier Jourdain ek ti permet Israël travers larivier ki ti’nn sek. (Josué 3:14-17) Me pou Rahab, sa nouvel-la ti enn lot prev ki li ti ena rezon pou met so lafwa an Jéhovah.

Apre sa, Israël inn koumans mars otour Jéricho​—pandan sis zour, zot ti fer enn letour sak zour. Asterla inn ariv setiem zour, ek sannla ti diferan. Kouma nou ti trouve dan koumansman sa lartik-la, sa lamars-la ti koumanse boner gramatin, ek apre ki larme Israël ti’nn anserkle lavil, zot ti kontign mars otour Jéricho plizir fwa. (Josué 6:15) Ki bann Izraelit ti pe fer?

Finalman, alafin sa setiem lamars-la lor setiem zour, larme-la ti arete. Zot ti aret sonn tronpet. Ti ena enn silans total. Kitfwa ti ena enn gran tansion dan lavil. Apre sa, kan Josué inn donn signal, larme Israël inn lev zot lavwa pou premie fwa ek inn kriy bien for. Eski bann gard ki ti lor miray Jéricho ti pe panse ki sa kriye-la ti enn fason bizar pou atak lavil? Si wi, zot pa’nn bizin reflesi pandan lontan. Sa gro miray-la inn koumans tranble anba zot lipie. Li’nn tranble, li’nn fann ek li’nn tonbe​—li’nn kraze anba! Selman, amezir lapousier disparet, trouv enn parti miray ankor intak. Lakaz Rahab ankor pe tini dibout, parski Rahab finn ena lafwa. Esey mazine ki li’nn resanti kan li’nn trouve ki Jéhovah inn protez li! a So fami inn gagn lavi sov!​—Josué 6:10, 16, 20, 21.

Bann Izraelit osi ti respekte Rahab pou so lafwa. Kan zot ti trouv lakaz Rahab pe tini dibout parmi enn miray ki ti detrir net, zot ti kone ki Jéhovah ti avek li. Rahab ek so fami ti gagn lavi sov kan Jéhovah inn detrir sa move lavil-la. Apre sa lager-la, Rahab ti gagn permision pou res pre ar kanpman Israël. Avek letan, Rahab ti form parti dan nasion Zwif. Li ti marye avek enn misie ki ti apel Salmôn. Zot garson, Boaz, ti enn zom ki ti ena enn gran lafwa. Li ti marye avek Ruth, enn Moabit. b (Ruth 4:13, 22) Lerwa David ek plitar Lemesi, Jésus Christ, ti bann desandan sa fami ki ti ena enn gran lafwa la.​—Josué 6:22-25; Matthieu 1:5, 6, 16.

Zistwar Rahab montre ki, nou tou nou ena valer devan Jéhovah. Li trouv nou tou, Li lir dan nou leker, ek Li kontan kan Li trouv mem enn tigit lafwa parey kouma ti ena dan leker Rahab. So lafwa ti pous li pou fer bann aksion. Parey kouma Labib dir, Bondie ti “deklar Rahab kouma enn dimounn zis, akoz so bann aksion.” (Jacques 2:25) Nou pou azir avek sazes si nou imit so lafwa!