Béthanie ti enn ti vilaz ki ti trwa kilomet ar Jérusalem. (Jean 11:18) Ti ariv enn maler laba de-trwa semenn avan lamor Jésus. Lazare, enn parmi bann bon kamarad Jésus, san atann, ti tom bien malad ek ti mor.

Kan Jésus ti fek tann sa nouvel-la, li ti dir so bann disip ki Lazare ti pe dormi, ek ki li ti ena lintansion pou al lev li. (Jean 11:11) Me so bann disip pa ti tro konpran ki li ti pe rod dir, alor Jésus ti dir zot: “Lazare inn mor.”​—Jean 11:14.

Kat zour apre lanterman, Jésus ti ariv Béthanie ek ti esey rekonfort ser Lazare ki ti apel Marthe. Marthe ti dir: “Si to ti la, mo frer pa ti pou mor.” (Jean 11:17, 21) Jésus ti dir li: “Momem rezireksion ek lavi. Sa kikenn ki ena lafwa an mwa-la, pou regagn lavi mem si li mor.”​—Jean 11:25.

Pou montre ki sa bann parol-la pou realize vremem, Jésus ti koste ar tom ek ti kriye: “Lazare, sorti deor!” (Jean 11:43) Tou dimounn ti etone kan sa zom ki ti’nn mor-la ti sorti deor.

Avan sa rezireksion-la, Jésus ti resisit omwin de dimounn. Enn fwa li ti resisit enn tifi ki ti mor​—tifi Jaïrus. Zis avan ki Jésus ti relev li, Jésus ti dir ki sa tifi-la osi ti pe dormi.​—Luc 8:52.

Remarke ki Jésus ti konpar lamor Lazare ek tifi Jaïrus toulede kouma enn somey. Se enn konparezon apropriye. Kifer? Somey se enn leta kot nou pa konn nanye ek donn bien lide ki nou pa pe ni gagn douler ni nou pe soufer. (Ecclésiaste 9:5; get lankadre  “Lamor Li Kouma enn Somey Profon.”) Bann premie disip Jésus ti bien konpran dan ki kondision bann mor ete vremem. Encyclopedia of Religion and Ethics dir:  “Pou bann disip Jésus, lamor ti kouma enn somey ek tom ti kouma enn plas pou repoze . . . pou bann ki’nn mor me ki ti ena lafwa.” a

Sa rekonfort nou kan nou kone ki bann mor pe dormi dan tom ek zot pa pe soufer. Alor, lamor nepli enn mister ek li nepli fer nou per.

Mem si nou profit enn bon somey aswar, kisannla ti pou kontan dormi pou touletan? Ki lasirans nou ena ki bann ki pe dormi dan tom pou regagn lavi​—parey kouma Lazare ek tifi Jaïrus ti regagn lavi?

Job ti poz sa kestion-la kan li ti kone ki li pre pou mor: “Si enn zom mor, eski li kapav reviv?”​—Job 14:14.

Kan li ti koz ar Bondie Tou-Pwisan, Job ti reponn so prop kestion kan li ti dir: “To pou apel mwa, ek mo pou reponn twa. To pou atann avek inpasians pou trouv travay ki to lame finn fer.” (Job 14:15) Job ti sir ki Jéhovah ti pe atann avek inpasians zour kot Li pou resisit So bann serviter fidel. Eski Job ti pe atann enn kitsoz inposib? Non.

Bann rezireksion ki Jésus ti fer ti montre dan enn fason kler ki Bondie ti donn li pouvwar lor lamor. Ofet, Labib dir ki asterla Jésus ena “lakle lamor.” (Révélation 1:18) Alor, parey kouma li ti donn lord pou avans ros ki ti devan tom Lazare, Jésus koumadir pou ouver lantre tou bann tom.

Plizir fwa Labib koz lor sa promes rezireksion la. Enn anz ti rasir profet Daniel: “To pou repoze, me to pou leve pou gagn to par kan lafin bann zour vini.” (Daniel 12:13) Jésus ti dir bann Sadiseen setadir bann sef Zwif ki pa ti krwar dan promes rezireksion: “Zot dan lerer, parski zot pa konn ni bann Lekritir ni pouvwar Bondie.” (Matthieu 22:23, 29) Lapot Paul ti dir: “Mo ena lesperans an Bondie . . . ki pou ena enn rezireksion bann dimounn ki zis ek bann dimounn inzis, toulede.”​—Actes 24:15.

Kan eski pou ena rezireksion bann zis ek bann inzis? Anz-la ti dir Daniel ki ti enn dimounn zis, ki li ti pou releve “kan lafin bann zour vini.” Marthe osi ti krwar ki so frer, Lazare, ti pou “resisite kan pou ena rezireksion dan dernie zour.”​—Jean 11:24.

Labib montre ki ena enn lien ant sa “dernie zour[-la]” ek regn Rwayom Christ. Paul ti ekrir: “Parski li [Christ] bizin regne ziska ki Bondie inn met tou bann lennmi anba so lipie. Ek nou dernie lennmi, lamor, pou detrir net.” (1 Corinthiens 15:25, 26) Sa se enn bon rezon kifer nou bizin priye pou ki Rwayom Bondie vini ek pou ki volonte Bondie fer lor later. b

Parey kouma Job ti bien kone, Bondie anvi resisit bann mor. Kan sa zour-la pou arive, lamor vremem pou disparet. Ek zame personn pa pou redemande: ‘Eski tou fini avek lamor?’