Apre bann lager ouswa enn kidnapping, boukou dimounn ti vinn esklav bann Romin. Bann Romin ti vann zot ek zame zot pa finn gagn sans pou retrouv zot lakaz ek zot fami.

Boukou esklav ti travay amor dan bann minn alor ki bann labourer dan karo ek bann ki ti fer travay domestik zot, zot sitiasion ti inpe pli bon. Li posib ki ti fors bann esklav pou met enn lasenn an feray dan zot likou. Lor sa lasenn-la ti ekrir ki si sa esklav-la sove ek enn kikenn retourn li kot so proprieter, sa dimounn-la ti pou gagn enn rekonpans. Ki ti ariv bann esklav ki ti sove plizir fwa? Lor zot fron, zot met ti mark alfabet F pou fugitivus setadir fizitif.

Liv Philémon dan Labib dir ki lapot Paul ti ranvway Onésime​—enn esklav ki ti sove kot so met, Philémon. Mem si Philémon ti ena tou drwa pou pini Onésime dan enn fason sever, Paul ti demann li pou ‘akeyir’ Onésime akoz lamour Kretien ek lamitie ki zot ti ena.​—Philémon 10, 11, 15-18.

Phénicie, ki dapre sertin, koresponn ar Liban zordi, ti bien renome pou so kouler violet. Apel li osi pourpre Tyrienne akoz lavil Tyr. Salomon, lerwa ansien Israël, ti fer enn travayer ki sorti Tyr rekouver bann meb dan so tanp avek “lalenn kouler violet.” (2 Chroniques 2:13, 14)

Sa lepok-la, parmi tou bann kouler, se kouler violet ki ti ena plis valer. Kifer? Se sirtou parski so prodiksion ti demann boukou travay. Dabor, bann peser ti bizin ramas enn bon kantite kokiyaz, ki apel Murex. a Ti bizin plis ki 12,000 kokiyaz pou gagn ase kouler pou enn sel linz. Apre sa, zot ti tir laser ki dan sa kokiyaz-la, koumsa zot ti kapav anlev bann glann ki prodir bann kouler. Bann fabrikan ti azout disel ar sa bann glann-la ek ti met tousala dan soley, anplener, pou trwa zour. Apre, zot ti met sa dan enn gran resipian, zot ti azout delo lamer, zot ti kouver li ek zot ti les sa lor enn ti dife pandan plizir zour.

Pandan plizir santenn lane, atraver komers ek kolonizasion, bann Fenisien finn kapav gard zot biznes kouler ek talan ki zot ena pou prodir sa. Bann dimounn finn trouv bann obze ki ti servi pou prodir kouler violet otour Lamer Méditerranée ek mem bien lwin dan lwes, setadir dan Cadix, l’Espagne.