Kan mo pans mo lanfans, souvan bann bon souvenir revinn dan mo lespri. Mo bann paran ek mwa, nou ti pe viv dan lakanpagn, dan lesid la France. Mo papa ti fer enn balans pou mwa, ek mo ti kontan galoupe dan zardin. An 1966, bann Temwin Jéhovah ti vizit nou ek mo papa ti gagn bann long konversasion avek zot. Apre zis set mwa, li’nn deside pou vinn enn Temwin. Bien vit mo mama finn swiv so lexanp ek mo’nn grandi dan enn fami kot ena boukou lamour.

Se enn tipe apre ki nou’nn retourn l’Espagne, pei kot mo bann paran sorti, ki mo’nn koumans gagn bann problem lasante. Mo ti ena linpresion ki kikenn pe donn mwa kout kouto dan mo de lame ek mo de seviy. Pandan de-z-an mo pa kapav konte komie dokter nou’nn al gete. Finalman, nou’nn tom lor enn rhumatologue bien renome. Dan enn fason bien serye li’nn dir mo mama: “Inn tro tar.” Li’nn dir li ki mo ena enn lartrit kronik ek ki mo sistem iminiter pe atak ek pe detrir bann selil ki an bonn sante. Akoz sa mo bann zwintir anfle ek mo gagn douler. Kan mo mama inn tann sa li’nn koumans plore. Mo ti ena di-z-an sa lepok-la. Mem si mo pa’nn konpran preske nanye, mo’nn realize ki dokter-la ti pe anons mo mama enn move nouvel.

Dokter-la inn dir mo mama fer mwa swiv enn tretman dan enn kouvan pou bann zanfan malad. Zour ki mo’nn met lipie dan sa kouvan-la, mo’nn gagn extra per kan mo’nn trouv sa bann batiman bien som la. Bann reliziez ti bien strik: Zot ti koup mo seve ek zot ti donn mwa enn vie iniform. Avek larm mo ti demann momem: ‘Kouma mo pou viv isi?’

Mo bann paran ti ansegn mwa pou servi Jéhovah, akoz sa mo ti refiz partisip dan bann seremoni Katolik ki ti pe fer dan kouvan. Me bann reliziez-la pa ti arive konpran kifer mo ti refize. Mo’nn sipliy Jéhovah pou pa abandonn mwa. Bien vit, mo’nn santi so proteksion, koumadir enn bon papa pe ser mwa bien for dan so lebra.

Mo bann paran ti gagn permision pou rann mwa enn ti vizit dan Samdi. Zot ti amenn bann piblikasion  Biblik pou mo lir pou ki mo lafwa res for. Normalman bann zanfan pa ti kapav ena zot prop liv. Me bann reliziez-la ti les mwa gard sa bann liv-la ek mo Labib osi. Sak zour mo ti lir mo Labib. Anplis mo ti koz lor mo lesperans avek bann lezot tifi. Mo ti explik zot kouma enn zour nou pou viv pou touletan dan Paradi lor later, kot personn pa pou malad. (Révélation 21:3, 4) Parfwa mo ti santi mwa bien tris, bien tousel. Me mo ti kontan ki mo lafwa ek mo konfians an Jéhovah ti pe vinn deplizanpli for.

Apre sis long mwa, bann dokter inn retourn mwa lakaz. Mem si mo leta pa ti ameliore, mo ti kontan pou retrouv mo bann paran. Mo bann lezo ti diforme ankor plis, ek mo ti pe extra soufer. Mo ti bien feb kan mo’nn rant dan ladolesans. Pourtan, laz 14 an, mo’nn pran batem. Mo ti bien deside pou fer tou seki mo kapav pou servi mo Papa Jéhovah. Me, parfwa mo ti ankoler avek Li. Mo ti demann Li: “Kifer mwa? Silteple geri mwa. To pa trouve kouma mo pe soufer?”

Peryod ladolesans ti bien difisil pou mwa. Mo ti bizin aksepte ki mo leta pa ti pou ameliore. Sak fwa, mo ti konpar mwa ar mo bann kamarad ki ti ena enn bon lasante, ki ti ena tou zot lenerzi. Konpare ar zot, mo ti santi mwa inferyer ek mo ti res dan mo kwin. Me, mo fami ek mo bann kamarad finn soutenir mwa. Mo rapel Alicia ki ti 20 an pli gran ki mwa ek ki avek letan finn vinn enn vre kamarad. Li’nn ed mwa pou pa trouv zis mo maladi me plito pou interese avek lezot olie ki mo res konsantre lor mo bann problem.

Laz 18 an, mo’nn retom bien malad. Zis pou asize pou asiste bann renion ti koumadir enn montagn pou mwa. Sa ti pran tou mo lenerzi. Malgre sa, kot mwa, mo ti profit tou mo “letan lib” pou etidie Labib an profonder. Liv Job ek Psaumes inn ed mwa pou konpran ki se sirtou lor plan spiritiel, pa lor plan fizik, ki Jéhovah protez nou asterla. Gras-a bann lapriyer ki mo ti pe fer toulezour mo’nn gagn “sa pwisans ki plis ki seki normal la” ek “lape Bondie ki depas tou panse.”​—2 Corinthiens 4:7; Philippiens 4:6, 7.

Laz 22 an, mo’nn bizin aksepte ki asterla mo pou pas tou mo lavi dan enn fotey roulant. Mo ti per atansion regar bann dimounn sanze anver mwa ek zot trouv mwa zis kouma enn tifi malad lor enn fotey roulant. Me “sa malediksion-la” an realite inn vinn enn benediksion parski sa fotey roulant-la inn ed mwa retrouv inpe mo lindepandans. Mo kamarad Isabel ti ankouraz mwa pou fixe lobzektif pou fer 60 er dan predikasion ansam avek li, pou enn mwa.

Koumansman, mo ti trouv sa lide-la bien komik. Me avek led Jéhovah, soutien mo fami ek mo bann kamarad, mo’nn reisi. Mo ti telman okipe ki mo pa’nn trouv sa mwa-la pase. Anplis, mo’nn rann mwa kont ki mo’nn reisi vink mo laper ek mo bann konplex. Mo ti telman kontan ki an 1996 mo’nn desid pou fer pionie permanan ek pas 90 er sak mwa dan predikasion. Se enn parmi bann meyer desizion ki mo’nn kapav pran. Sa finn fer mwa vinn pli pros avek Jéhovah ek finn mem ranforsi mwa lor plan fizik. Predikasion inn ed mwa pou partaz mo lafwa avek boukou dimounn ek ed sertin pou vinn bann kamarad Bondie.

An 2001, mo’nn fer enn gran aksidan larout ek mo de lipie inn kase. Alor ki mo ti pe korde ar douler lor mo lili lopital, mo’nn fer enn lapriyer sinser dan mo leker: “Silteple, Jéhovah, pa abandonn mwa!” Deswit apre, enn madam ki ti lor enn lot lili akote mwa, ti demann mwa: “Eski ou enn Temwin Jéhovah?” Mo pa ti ena lafors pou reponn, mo’nn zis bouz latet. Li’nn dir mwa: “Mo konn zot! Souvan mo lir zot bann magazinn.” Sa inn bien rekonfort mwa. Mem dan leta kot mo ti ete, mo’nn kapav temwagn pou Jéhovah. Se enn gran loner!

Kan mo’nn inpe bien, mo’nn deside pou pres ankor inpe plis. Avek mo de lipie dan plak ek lor mo fotey roulant, mo mama inn amenn mwa get bann dimounn dan sa ward kot mo ti ete la. Toulezour, nou ti al vizit de-trwa malad, nou ti pran zot nouvel, ek nou ti kit bann piblikasion ar zot. Apre sa bann vizit-la, mo ti fatige, me Jéhovah ti donn mwa lafors ki mo bizin.

 Dan bann dernie lane ki’nn pase, mo bann douler inn vinn ankor pli for. Anplis, lamor mo papa inn ogmant mo soufrans. Malgre sa, mo fer zefor pou res pozitif. Sak fwa ki li posib, mo esey pas enn ti moman avek mo bann kamarad ek mo fami. Sa ed mwa bliye inpe mo bann problem. Ek kan mo tousel, mo lir, etidie Labib, ouswa pres par telefonn.

Mo esey profit bann ti plezir bien sinp kouma par exanp, enn ti labriz lor mo figir ek parfin bann fler. Sa pous mwa pou ena rekonesans. Riy enn bon kout, sa se enn lot kitsoz ki mars extra bien. Enn zour dan predikasion, mo kamarad ki ti pe pous mwa lor mo fotey roulant la, inn arete pou pran enn not. Enn sel kout mo fotey inn koumans desann an-pik lor enn ladesant ek mo’nn tap anplin ar enn loto lor parking. Nou toulede nou’nn gagn enn sok, me kan nou’nn trouve ki nanye pa’nn arive, nou’nn kas enn gran riye.

Ena boukou kitsoz ki mo pa kapav fer. Se bann swe ki biento pou realize. Souvan, mo ferm mo lizie ek mo ouver “lafnet” ki fer mwa trouv lemond nouvo ki Bondie inn promet. (2 Pierre 3:13) Mo trouv mwa pe marse, mo ena enn bon lasante ek mo pe profit lavi maximum ki kapav. Mo pran aker bann parol Lerwa David: “Met to lespwar an Jéhovah; pran kouraz ek ena enn leker for.” (Psaume 27:14) Mem si mo lekor inn vinn deplizanpli frazil, Jéhovah inn fer mwa vinn for. Mo’nn kontign trouv lafors dan mo febles.