Naoko, ki nou ti mansione dan premie lartik, ti dir ki kitsoz ti ed li gagn viktwar lor sigaret, “Kan mo’nn aprann laverite lor Bondie so bann kalite ek so proze, sa inn ed mwa pou sanz mo lavi.” Seki li’nn aprann trouv dan Labib. Li vre ki Labib pa koz ditou lor taba, me li ed nou konpran kouma Bondie konsider sigaret. a Pou boukou, se sa konesans-la ki’nn pous zot pou reziste ouswa pou aret fime. (2 Timothée 3:16, 17) Anou examinn trwa move lefe sigaret ek anou gete ki Labib dir lor la.

Dan taba, ena enn ladrog ki apel nikotinn. Se enn parmi bann ladrog ki bann dimounn pa kapav san pase, enn fwa ki zot inn koumans pran sa. Nikotinn kapav ena de lefe. Li kapav exsit ner enn dimounn ek anmemtan fer li santi koumadir li lor enn niaz. Kan enn dimounn fime, sa nikotinn-la mont dan so servo bien-bien vit, plizir fwa. Sak kout li rise, li pe respir enn doz nikotinn. Enn kikenn ki fim enn pake sigaret par zour, an mwayenn li respir 200 doz nikotinn, enn doz bien for ki ninport ki ladrog. Pena enn lot ladrog parey kouma nikotinn. Kifer sa? Lefe ki bann fimer respir sa doz-la toulezour, li vinn enn ladrog ki zot nepli kapav san pase. Enn fwa ki fimer-la inn vinn depandan, si li pa donn so lekor nikotinn ki li pe rode, so lekor reklam sa.

Labib ed nou pou ena enn bon fason panse lor sa size-la kan li dir: “Eski zot pa kone ki si zot livre zotmem ar enn dimounn pou obeir li kouma enn esklav, zot esklav sa dimounn ki zot pe obeir la?” (Romains 6:16) Kan enn dimounn pa kapav san pas sigaret, so bann panse ek so bann aksion domine zis par sa. Lerla, bien vit li vinn enn esklav sa pratik degradan la. Me, Bondie, ki apel Jéhovah, anvi ki nou liber nou, pa zis ar sa bann pratik ki fer nou lekor ditor la, me osi ki gat nou lespri, setadir nou dispozision mantal. (Psaume 83:18; 2 Corinthiens 7:1) Alor, kan enn dimounn so rekonesans ek so respe pou Jéhovah koumans grandi, li rekonet ki Jéhovah merit seki pli bon. Li rekonet osi ki li pa pou kapav donn Bondie seki meyer, si limem li ankor touzour esklav enn labitid ki bien danzere. Kan enn dimounn realiz sa, li gagn volonte pou reziste bann dezir ki kapav fer li ditor.

Olaf, ki res l’Allemagne, ti koumans fime laz 12 an ek se 16 an apre ki li’nn reisi aret sa move labitid-la. Li ti panse ki nanye pa pou ariv li si li fim enn sigaret. Me plis bann lane pase, li ti nepli kapav san pas sa, ni ena enn kontrol lor la. Li rakonte: “Enn fwa, mo ti nepli ena sigaret. Mo ti telman an mank ki mo’nn ramas tou bann mego dan enn sandriye. Mo’nn tir tou taba ki ena ladan, mo’nn roul li dan enn papie lagazet pou fer enn sigaret. Kan mo pans sa asterla, mo rann mwa kont ki mo’nn fer enn kitsoz bien degoutan.” Me, kouma li’nn reisi aret sa move labitid-la? Li dir: “Enn kitsoz  bien inportan se dezir pou fer Jéhovah plezir. Lamour ki Jéhovah ena pou bann dimounn ek lesperans ki Li donn nou, inn donn mwa lafors pou liber mwa ar sa depandans-la, enn fwa pou tou.”

Liv The Tobacco Atlas dir ki bann resers siantifik inn prouve ki sigaret afekte preske tou organn dan lekor enn dimounn, ek sa kapav fer li mor pli vit. Laplipar dimounn kone ki sigaret koz bann maladi ki pa kontazie kouma kanser, malad leker, ek poumon. Me dapre Lorganizasion Mondial Lasante, sigaret li koz osi bann maladi grav ki kontazie kouma par exanp tiberkiloz.

Atraver so Parol, Labib, Jéhovah ansegn nou pou ena enn bon pwindevi lor lavi, nou lekor, ek nou bann kapasite. So Garson Jésus ti met laksan lor la kan li ti dir: “To bizin kontan Jéhovah to Bondie avek tou to leker ek avek tou to nam ek avek tou to lespri.” (Matthieu 22:37) Li kler ki Bondie anvi ki nou servi bien nou lavi ek nou lekor ek ki nou tret zot avek respe. Amezir ki nou aprann lor Jéhovah ek so bann promes, nou aprann kontan Li, ek apresie tou seki Li’nn fer pou nou. Sa pous nou pou res lwin ar ninport ki kitsoz ki kapav sali nou lekor.

Jayavanth, enn dokter Indien, ki’nn fime pandan 38 an dir: “Atraver bann zournal medikal mo’nn aprann bann danze ki ena kan fime. Mo ti kone ki se enn move kitsoz, ek mo ti konsey mo bann pasian pou aret sa move labitid la. Me momem mo pa ti pe kapav arete, mem si mo’nn seye plis ki sink-sis fwa.” Me ki’nn ed li arete alafin? Li dir: “Se mo letid Labib ki’nn ed mwa aret fime. Sa dezir pou fer Jéhovah plezir la inn motiv mwa pou aret fime deswit.”

Lafime ki enn dimounn expire kan li fime, ek lafime ki sigaret prodir zot bien danzere pou lasante. Kan nou respir sa lafime-la, sa kapav fer nou gagn kanser ek lezot maladi. An realite, sak lane 600,000 non-fimer, laplipar madam ek zanfan mor akoz sa. Dapre enn rapor ki Lorganizasion Mondial Lasante finn fer, li dir ki mem si enn non-fimer li expoze ar zis enn ti doz lafime sigaret, sa kapav danzere pou so lasante.

 Dapre Jésus, lamour pou nou prosin setadir nou fami, kamarad, ek tou bann dimounn ki otour nou li vinn zis apre lamour ki nou ena pou Bondie. Li ti dir: “To bizin kontan to prosin kouma tomem.” (Matthieu 22:39) Si nou kontign fer enn kitsoz ki fer nou bann pros ditor, nou pa pe montre lamour pou nou prosin. Okontrer, vre lamour pous nou pou swiv sa konsey Labib-la: “Ki sakenn kontign rod lintere so kamarad, pa so prop lintere.”​—1 Corinthiens 10:24.

Get seki Armen ki viv an Arménie dir: “Mo fami ti afekte par sigaret, akoz sa zot ti sipliy mwa pou aret fime. Me mo pa ti oule aksepte ki sigaret kapav afekte zot.” Ki’nn sanz so fason panse? Li dir: “Mo konesans lor Labib ek lamour pou Jéhovah finn ed mwa pou aret fime ek rekonet ki sigaret li enn danze, pa zis pou mwa, me osi pou bann dimounn ki otour mwa.”

Enn konesans lor Labib finn ed Olaf, Jayavanth, ek Armen pou liber zot ar enn move labitid ki ti pe fer zotmem ek lezot osi ditor. Si zot finn reisi vink sa labitid-la, se pa zis parski zot finn kone ki sigaret fer zot ek zot bann pros ditor, me se parski zot finn devlop enn lamour pou Jéhovah ek enn dezir pou fer Li plezir. Premie Jean 5:3 met laksan lor rol bien inportan ki lamour zwe dan sa domenn-la. Li dir: “Ala seki vedir lamour Bondie: swiv so bann komannman; ek pourtan so bann komannman pa lour.” Li vre ki li pa touzour fasil pou obeir bann prinsip Biblik, me kan enn dimounn ena enn gran lamour pou Bondie, li pa pou trouv sa lour pou obeir.

Azordi boukou dimounn zot bann esklav sigaret. Me, atraver enn program lansegnman mondial, Jéhovah pe ed bann milyon dimounn pou liber zot ar sa move labitid-la. (1 Timothée 2:3, 4) Biento, par mwayin so Rwayom ki dan lesiel​—enn gouvernman ki dirize par so Garson, Jésus Christ​—Jéhovah pou eliminn sa sistem komersial ki gourman kas la parski se sa ki’nn fer bann milyon dimounn vinn esklav sigaret. Li pou tengn sigaret ek Li pou aret sa lepidemi ki pe fane partou la, dan enn fason definitif. Li pou fer bann dimounn obeisan vinn parfe lor plan fizik ek mantal.​—Isaïe 33:24; Révélation 19:11, 15.

Si to pe lite pou aret fime, pa bes lebra. Amezir ki to aprann kontan Jéhovah ek ena mem pwindevi ki Li lor sigaret, to pou gagn volonte ki bizin pou reisi to lalit. Bann Temwin Jéhovah pou bien kontan donn twa enn led pratik personel pou ed twa aprann ek met an pratik bann prinsip Biblik. To kapav san poursan sir ki si to anvi ki Jéhovah ed twa pou aret fime, Li pou donn twa lafors ki to bizin.​—Philippiens 4:13.