Si ou abitie ekout linformasion, sirman ou finn remarke ki bien souvan dimounn servi relizion pou fer bann move kitsoz. Pa tou relizion ki sorti kot vre Bondie. (Matthieu 7:15) An realite, relizion finn met boukou dimounn dan lerer.​—Lir 1 Jean 5:19.

Malgre sa, Bondie trouv bann dimounn sinser ki kontan seki bon ek vre. (Jean 4:23) Li pe invit sa bann kalite dimounn la pou aprann laverite ki sorti dan so Parol, Labib.​—Lir 1 Timothée 2:3-5.

Jéhovah pe rasanble bann dimounn ki sorti dan diferan relizion. Kouma Li pe fer sa? Se kan Li ansegn zot laverite ek montre zot pou kontan sakenn zot kamarad. (Mika 4:2, 3) Alor, nou kapav rekonet bann ki pratik vre relizion par fason ki zot pran swin sakenn zot kamarad.​—Lir Jean 13:35.

Bann ki pratik vre relizion, zot lafwa ek zot fason viv baze lor Labib. (2 Timothée 3:16) Zot onor nom Bondie. (Psaume 83:18) Zot fer tou dimounn kone ki Rwayom Bondie limem sel lespwar pou limanite. (Daniel 2:44) Zot imit Jésus kan zot les zot “lalimier briye,” setadir kan zot fer seki bon anver zot prosin. (Matthieu 5:16) Alor, nou kapav rekonet bann vre Kretien par bann vizit ki zot fer lakaz par lakaz pou partaz bon nouvel lor Rwayom Bondie.​—Lir Matthieu 24:14; Actes 5:42; 20:20.