Mo’nn grandi pandan lepok lager sivil, dan enn lavil ki apel Rmaysh, ki trouv pre ar frontier Israël ek Liban. Sertin souvenir ankor fre dan mo memwar, kouma par exanp explozion bann minn ki’nn antere dan later ek bann viktim inosan ki pena lame ouswa lipie. Lavi ti dir ek partou ti ena krim ek violans.

Nou fami ti swiv Legliz Maronit, enn parmi bann Legliz Katolik. Mo Papa ti pe travay dir pou nouri nou fami 12 dimounn, me Mama ti fer sir ki tou bann zanfan al legliz. Avek letan, mo’nn koumans realize ki legliz, parey kouma lasosiete an zeneral, pa ti pe soutenir bann ki dan difikilte.

Pandan mo ladolesans, mo’nn koumans interese ar kung fu. Mo’nn fer bann lantrennman bien strik. Avek letan mo’nn bien konn lager, donn kout-pwin kout-pie, ek mo ti bien konn servi diferan zarm. Mo ti dir momem: ‘Mo pa kapav aret bann lager, me omwin mo kapav esey aret bann dimounn violan.’ Si mo ti trouv de dimounn pe lager, deswit mo ti rant omilie. Mo ti sofe vit, ek enn ti zafer ti kapav fer mwa ankoler. Bann dimounn partou dan sid Liban ti per mwa, parski mo ti pe fer mo prop lager kont linzistis ek violans.

An 1980, mo’nn rant dan enn klib kung fu, dan Beyrouth. Toulezour bom ek roket ti pe eklate. Malgre sa, mo ti kontign al lantrennman. Ala kouma mo lavi ti deroule: manze, bwar, ek viv kouma Bruce Lee, enn akter Sino-Ameriken ek enn sanpion kung fu. Mo ti tay mo seve ek marse parey kouma li. Mo ti mem imit fason ki li ti kriye kan li ti lager. Zame ti ena enn sourir lor mo figir.

Mo lobzektif se vinn enn exper kung fu dan la Chine. Enn swar, alor ki mo ti pe antrene for-for pou mo vwayaz dan la Chine, mo’nn tann laport tape. Enn kamarad ti vinn vizit mwa ansam avek de Temwin Jéhovah. Anplas-anplas, kouma mo ti ete, avek mo linz karate nwar ek transpirasion ki pe koule lor mo lekor, mo’nn dir zot:  “Mo pa konn nanye lor Labib.” Mo pa ti ena okenn lide, ki apartir sa moman-la, mo lavi ti pou sanze net.

Bann Temwin inn montre mwa atraver Labib kifer bann dimounn par zotmem zame zot pou reisi tir tou linzistis ek violans ki ena lor later. Zot inn explik mwa ki se Satan Lediab ki vre responsab tou sa bann problem-la. (Révélation 12:12) Seki ti inpresionn mwa se zot lasirans ek zot kalm. Ek sa ti bien tous mwa kan zot ti montre mwa ki Bondie ena enn nom. (Psaume 83:18) Zot inn montre mwa osi 1 Timothée 4:8, ki dir: “Lantrennman fizik li itil pou enn tigit kitsoz, me latasman pou Bondie li itil pou tou kitsoz, parski li ena promes pou lavi asterla ek lavi ki pou vini.” Sa bann parol-la finn ena enn gran lefe lor mo lavi.

Malerezman, mo fami inn dir sa bann Temwin-la aret vini ek se koumsa ki mo’nn perdi kontak avek zot. Malgre sa, mo ti bien deside pou aret fer kung fu ek pou koumans etidie Labib. Mo bann frer pa ti kontan ditou, me mo ti bien deside pou rod bann Temwin Jéhovah ek pou etidie Labib avek zot.

Partou mo’nn rod bann Temwin Jéhovah, me mo pa’nn reisi trouv zot. Antretan, mo papa inn mor san ki mo ti atann, anplis nou fami finn konn bann lezot maler ankor. Tousala ti rann mwa bien tris. Mo’nn koumans travay dan enn konpagni konstriksion. Enn zour enn koleg travay ki apel Adel, inn aret mwa ek inn demann mwa kifer mo pe paret tris koumsa. Li’nn koumans koz lor lesperans rezireksion ki trouv dan Labib. Pandan nef mwa, avek boukou pasians ek bonte, sa Temwin-la inn etidie Labib avek mwa.

Amezir ki letid ti pe avanse, mo’nn koumans realize ki mo ti bien bizin fer bann gran sanzman dan mo personalite. Pa ti fasil ditou! Mo ti touletan lor ner, ek fasilman dimounn ti kapav provok mwa. Seki mo’nn aprann dan Labib inn ed mwa pou kontrol mo koler ek pa azir lor enn kout tet. Par exanp, Jésus donn nou enn bon konsey dan Matthieu 5:44: “Kontign kontan zot bann lennmi ek priye pou bann ki persekit zot.” Ek Romains 12:19 donn sa lavertisman-la: “Pa tir vanzans zotmem, . . . parski finn ekrir: ‘Jéhovah dir: “Vanzans pou mwa; mwa ki pou fer zot peye.’” Sa bann verse-la ek lezot verse ankor inn ed mwa, tigit-tigit, pou resanti lape o-fon momem.

Mem si koumansman, mo fami pa ti dakor ki mo etidie avek bann Temwin Jéhovah, avek letan zot inn aprann respekte bann Temwin. An realite, enn parmi mo bann frer inn koumans ador Jéhovah ansam avek mwa, ek mo Mama inn defann nou lafwa avek lezot, ziska so lamor.

Jéhovah finn beni mwa kan Li finn donn mwa enn madam extraordiner, enn madam fidel, Anita, ki dan servis aplintan ansam avek mwa. Depi 2000, Anita ek mwa nou viv dan lavil Eskilstuna, la Suède, kot nou kapav ed bann proklamater pou ansegn Labib bann dimounn ki koz Arab.

Mo leker ankor touzour fermal kan mo trouv bann dimounn soufer akoz violans. Me asterla ki mo konn vre rezon kifer ena violans, ek mo kone ki biento Bondie pou tir tousala, sa donn mwa enn vre lazwa ek lape.​—Psaume 37:29.