Jairo ti ne avek quadriplégie spastique, enn paralizi serebral. a Akoz sa, li pena kontrol lor preske tou parti so lekor. So servo pa kapav avoy bann signal so bann misk, akoz sa so lame ek so lipie pliy lor zotmem. Parfwa, Jairo telman bouze ki li bles limem. Bann ki akote li osi kapav blese si zot pa fer atansion. Malerezman, akoz sa, parfwa bizin atas so lipie ek so lame ar so fotey roulant pou ki sa pa arive.

Jairo ti bien soufer amezir so lekor devlope. Kan li ti ena trwa mwa, li ti koumans gagn bann konvilsion ki ti fer li perdi konesans. Bien souvan, mo mama ti may li bien for ek ti galoupe ti al lopital, parski li ti panse Jairo fini mor.

Avek letan, Jairo so bann lezo ti koumans deforme parski ti pe tro ser li. Kan li ti ena 16 an, so basin ti disloke ek li ti bizin fer enn gran loperasion lakwis, laans, ek basin. Mo ankor rapel kouma apre so loperasion, toule aswar Jairo ti pe kriye telman li ti gagn douler.

Lefe ki Jairo pa kapav bouz ditou, toulezour li bizin fie lor lezot pou ed li fer tou kitsoz, kouma par exanp manze, abiye, ek mont lor lili. Se mo mama ek mo papa ki ed li fer tousala. Mem si touletan Jairo bizin led, souvan mo bann paran rapel li ki so lavi pa depann zis lor bann dimounn, me osi lor Bondie.

Mo bann paran Temwin Zeova, ek zot inn lir bann zistwar Labib avek Jairo depi ki li tibaba. Zot ti kone ki enn dimounn pli ere kan li ena enn bon relasion avek Bondie. Jairo ti pieze dan enn lekor feb ek bien souvan li ti gagn bann kriz. Me kanmem sa, li ti kapav ena enn vre lespwar konsernan lavenir. Selman, mo bann paran souvan ti demann zotmem si Jairo ti konpran bann verite ki ena dan Labib.

Enn zour, kan Jairo ti ankor zanfan, mo papa ti demann li: “Jairo, koz ar mwa silteple.” Apre li ti dir Jairo: “Si to vremem kontan mwa, to pou koze!” Kan mo papa ti sipliy li pou dir omwin enn mo, Jairo so lizie ti ranpli ar larm. Mem si li ti  pe fer zefor pou dir de-trwa mo, nou ti pe kapav tann zis bann son ki li ti pe fer avek so lagorz. Mo papa ti santi li koupab parski li ti fer Jairo plore. Me reaksion Jairo ti montre ki li ti konpran seki mo papa ti’nn dir li. Se zis ki li pa ti kapav koze.

Depi bien avan, mo bann paran ti remarke ki parfwa Jairo ti bouz so lizie vit-vit pou esey fer zot konn seki li panse ek so bann santiman. Jairo ti agase kan li ti trouve ki pa touletan ki lezot ti pe konpran li. Me kan mo bann paran ti arive konpran bann signal ki li ti pe fer avek so lizie ek donn li seki li bizin, Jairo ti fer enn gran sourir. Se so fason dir mersi.

Pou ki nou kapav kominik pli bien avek Jairo, enn ortofonist ti konsey nou lev nou de lame lao kan nou demann li reponn wi ouswa non. Lame drwat vedir wi, lame gos non. Koumsa, li ti pou kapav dir seki li resanti kan li fixe enn lame ladan.

Trwa fwa par an, bann Temwin Zeova fer bann lasanble, kot fer bann diskour baze lor Labib ek kot boukou dimounn asiste. Touletan Jairo ti bien kontan pandan diskour ki ti fer pou bann ki ti pou batize. Enn zour, kan Jairo ti ena 16 an, mo papa ti demann li: “Jairo, eski to anvi pran batem?” Deswit, li ti get lame drwat mo papa, seki ti montre ki li bien anvi batize. Apre, mo papa ti demann li: “Eski dan lapriyer to’nn promet Bondie pou servi Li pou touletan?” Ankor enn fwa, Jairo ti get lame drwat mo papa. Li kler ki Jairo ti fini vwe so lavi ar Zeova.

Apre plizir konversasion lor Labib, li ti kler ki Jairo ti konpran seki enn batem Kretien reprezante. Alor, an 2004, li ti reponn kestion pli inportan: “Eski ou finn vwe ou lavi ar Bondie pou fer so volonte?” Jairo ti reponn kan li ti lev so lizie lao. Li ti fini fer kone ki li ti pou dir wi koumsa. Alor, li ti pran batem ek li ti vinn enn Temwin Zeova laz 17 an.

An 2011, Jairo ti gagn enn nouvo fason kominike​—enn komputer ki kontrole avek lizie. Sa laparey-la ti detekte bann mouvman so lagrin lizie pou li kapav ouver bann icon lor lekran. Kan li bat so lizie ouswa fixe zot lor enn icon, se koumadir li pe servi enn mouse pou klik lor sa icon-la. Ti kree enn program kot ti ena bann desin pou ed  Jairo kominike. Kan li bat so lizie lor enn ladan, program-la konverti desin-la, fer li vinn enn fraz ek apre enn lavwa elektronik lir li.

Amezir ki konesans Jairo lor Labib ti ogmante, so dezir pou ed lezot pou rapros zot ar Bondie osi ti ogmante. Pandan letid familial ki baze lor Labib ki nou fer toule semenn, souvan li ti get mwa, get so komputer apre li ti reget mwa. Se so fason pou fer mwa rapel ki mo bizin ekrir bann repons ki li kapav servi pou reponn pandan size kestion-repons dan nou bann renion.

Dan renion, li pran letan pou rod lor lekran pou klik lor icon ki bizin, ek lerla tou dimounn kapav tann so lavwa elektronik. Li fer enn gran sourir a-sak fwa li ankouraz bann manb kongregasion dan sa fason-la. Alex, enn zenn kamarad Jairo, dir: “Touletan mo inpresione kan mo tann Jairo so bann komanter lor bann size Biblik.”

Jairo servi so lizie osi pou partaz so krwayans ar lezot. Li klik lor foto enn zardin kot bann dimounn tou ras ek bann zanimo pe viv ansam dan lape. Kan li fer sa, so komputer dir: “Labib promet ki later pou vinn enn paradi kot pou nepli ena maladi ek lamor, Revelasion 21:4.” Si bann ki ekout li manifeste lintere, li reklike ek sann fwa-la so komputer dir: “Eski ou ti pou kontan etidie Labib avek mwa?” Nou ti etone kan nou granper ti aksepte sa linvitasion-la. Mo ti extra kontan pou trouv Jairo, avek led enn lot Temwin, pe ansegn nou granper Labib tigit-tigit! Nou granper ti bien kontan kan li ti batize an Out 2014, dan lasanble rezional dan Madrid.

Bann profeser dan lekol Jairo ti trouv bien so gran zel pou Bondie. Rosario, enn so bann ortofonist, ti dir: “Si enn zour mo ena pou rant dan enn relizion, mo pou vinn enn Temwin Zeova. Mo’nn trouve kouma lafwa Jairo inn donn so lavi enn vre sans, malgre so sitiasion difisil.”

Touletan lizie Jairo reyone ar lazwa kan mo lir sa promes Labib la ar li: “Seki bwate pou sote kouma enn serf, ek lalang enn kikenn ki pa kapav koze pou kriye avek lazwa.” (Izai 35:6) Mem si parfwa li dekouraze, laplipar ditan so moral bon. Sa li posib zis parski so lavi tourn otour Bondie ek so bann kamarad Kretien. So regar pozitif lor lavi ek so gran lafwa montre ki malgre nou lavi difisil, si nou pe servi Zeova nou lavi ena enn sans ek nou zwaye.