Alona dir: “Kan mo tann lasirenn, mo leker koumans bate for-for ek mo galoupe pou al kasiet dan enn plas kot nou proteze kont bann bom. Me mem laba mo trakase. Kan mo deor li pli pir, parski pena okenn plas pou kasiet. Enn fwa, kan mo ti pe marse lor semin, mo’nn koumans plore ek mo pa ti pe kapav respire. Se apre plizir lertan ki mo’nn kalme. Apre sa, lasirenn ti re-deklanse.”

Lager se enn parmi bann diferan danze ki ena. Par exanp, ou kapav gagn enn gran sok kan ou aprann ki ou ouswa enn manb ou fami inn gagn enn maladi bien grav. Ek lezot per seki pou arive dan lavenir, ek sa kapav fer zot trakase. Zot demann zotmem: ‘Eski nou bann zanfan ouswa bann ti-zanfan pou bizin viv dan enn lemond kot ena lager, violans, polision, sanzman klimatik, ek bann lepidemi?’ Kouma nou kapav fer fas ar sa bann traka-la?

Lefe li kone bann move kitsoz arive, kan li trouv enn danze, “enn dimounn ki ena bon zizman kasiet.” (Proverb 27:12) Ek parey kouma nou esey protez nou lasante fizik, nou bizin pran bann dispozision pou protez nou lasante mantal ek afektif. Bann divertisman violan ek bann linformasion ki montre bann zimaz orib, kapav fer nou ek nou bann zanfan gagn ankor plis traka. Mem si nou evit get sa bann  zimaz-la, sa pa vedir ki nou pa pran kont seki pe arive. Bondie pa’nn kree nou lespri dan enn fason pou ki nou kontign pans lor seki pa bon. Okontrer, nou bizin ranpli nou lespri avek “tou seki vre, . . . zis, . . . pir, . . . admirab.” Si nou fer sa, “Bondie lape” pou fer nou lespri ek nou leker res anpe.​—Filipien 4:8, 9.

Enn vre lafwa ed nou fer fas ar bann traka. Labib ankouraz nou pou “res lor [nou] gard pou [nou] kapav priye.” (1 Pier 4:7, NW.) Nou kapav demann Bondie so led pou gagn sazes ek kouraz pou kapav fer nou best. Parski nou kone “ki li ekout nou lapriyer, nou sir ki li pou donn nou seki nou demann li.”​—1 Zan 5:15.

Labib montre ki se pa Bondie me Satan ki “gran sef” lemond ek ki “lemond antie li dan pouvwar sa kikenn ki move la.” (Zan 12:31; 1 Zan 5:19, NW.) Akoz sa, Zezi pa ti servi enn langaz sinbolik kan li ti ankouraz nou pou priye pou ki Bondie “delivre nou ar sa kikenn ki move la.” (Matie 6:13, NW.) Alona dir: “Sak fwa ki sa lasirenn-la deklanse, mo demann Zeova ed mwa pou kontrol mo bann santiman. Mo mari osi telefonn mwa ek priye avek mwa. Lapriyer vremem ede.” Kouma Labib dir: “[“Zeova,” NW] pre pou ed dimounn ki apel li e dimann so led ar sinserite.”​—Psom 145:18.

Dan so Sermon lor Montagn, Zezi ti ansegn so bann disip pou priye: “Ki to regn vini.” (Matie 6:10) Rwayom Bondie pou tir tou bann traka pou touletan. Atraver Zezi, “Prins lape,” Bondie pou “aret lager ki ena partou dan lemond.” (Izai 9:6; Psom 46:9) “Li [Bondie] pou rann zizman parmi boukou pep . . . Enn nasion pa pou lev lepe kont enn lot nasion, ek zot nepli pou aprann lager. . . . Pa pou ena personn ki pou fer zot per.” (Mika 4:3, 4) Bann fami ki ere “pou ranz bann lakaz ek zot pou res ladan, zot pou plant bann karo rezin ek zot pou manz zot bann frwi.” (Izai 65:21) “Ek okenn abitan pa pou dir: ‘Mo malad.’”​—Izai 33:24.

Azordi, malgre komie prekosion nou pran, li pa touletan posib pou evit “bann levennman ki nou pa atann” ouswa evit trouv nou dan enn move plas dan enn move moman. (Ekleziast 9:11) Depi plizir siek, lager, violans, ek maladi pe kontign touy bann dimounn. Ki lespwar ena pou sa bann viktim inosan la?

Plizir milyon dimounn​—zis Bondie kone komie zot ete​—pou regagn lavi. Antretan, zot an sekirite dan memwar parfe Bondie, ziska zour kot “tou dimounn ki dan tom . . . pou sorti.” (Zan 5:28, 29) Kan Labib koz lor rezireksion, li rasir nou ki “sa lesperans la, li kouma enn lank solid ek stab ki tini nou lavi.” (Ebre 6:19) Ek Bondie “finn donn lasirans tou dimounn par aksion ki li finn fer, li finn relev [Zezi] parmi bann mor.”​—Zistwar Bann Apot 17:31.

Me, asterla, mem bann ki pe esey fer Bondie plezir pou gagn bann traka. Kan zot pe fer bann kitsoz pratik, vinn pros ar Bondie atraver lapriyer, ek ena lafwa solid dan bann promes Bondie, Paul, Janet, ek Alona pe reisi fer fas ar bann traka. Parey kouma Li’nn fer pou bannla, “ki Bondie, lasours lesperans, ranpli zot ar lazwa ek lape par lafwa ki zot ena dan li.”​—Romin 15:13.