Paul, enn dimounn marye ki ena de zanfan, dir: “Kan ti ena ogmantasion zeneral dan pri bann lartik dan nou pei, manze ti vinn ser ek rar. Nou ti fer lake pandan plizir lertan, me souvan ti nepli ena manze avan mem ki nou ti ariv devan. Bann dimounn ti vinn bien meg akoz zot ti mank manze, ek sertin ti tom sek lor semin. Pri bann kitsoz debaz ti ogmante bien vit ek ti kout plizir milyon ek apre plizir milyar. Finalman, larzan lokal ti nepli ena valer. Mo ti perdi kas ki mo ti garde labank, mo kas lasirans, ek mo pansion.”

Pou ki so fami sirviv, Paul ti konpran ki li bizin servi so “sazes pratik.” (Proverb 3:21) Li explike: “Mo ti enn elektrisien, me mo ti aksepte ninport ki travay ki mo ti gagne, mem si mo ti gagn mwins kas. Sertin ti pey mwa avek manze ouswa bann kitsoz pou lakaz. Si mo ti gagn kat bar savon, mo ti servi de ek mo ti vann de. Enn fwa mo ti gagn 40 ti-pousin. Kan zot inn grandi, mo ti vann zot ek mo ti aste 300 ti-pousin ankor. Plitar mo ti esanz 50 poul pou de bal lapoud may 110 liv. Avek sa, mo’nn nouri mo fami ek plizir lezot fami pandan enn bon bout letan.”

Paul ti osi kone ki pli bon kitsoz enn dimounn kapav fer, se met so konfians dan Bondie. Bondie ed nou kan nou fer seki Li demann nou. Pou gagn seki nou bizin pou viv, Zezi ti dir: “Aret trakase; parski . . . zot Papa kone zot bizin sa bann kitsoz-la.”​—Lik 12:29-31, NW.

Malerezman, Satan, gran lennmi Bondie, pe anbet laplipar dimounn ek fer zot krwar ki zot bizin santre zot lavi lor seki zot bizin lor plan fizik. Bann dimounn bien trakase konsernan seki zot bizin, ki li neseser ouswa non, ek zot fer latet-lipie pou gagn bann kitsoz ki zot pa vremem bizin. Boukou dimounn fer bann det ek inn bizin soufer  pou konpran ki “sa dimounn ki pran prete la li esklav sa dimounn ki’nn pret li la.”​—Proverb 22:7.

Sertin dimounn pran bann desizion ki fer zot ditor. Paul dir: “Boukou dimounn dan landrwa finn kit zot fami ek zot bann kamarad pou al deor parski zot panse laba pli bon. Sertin finn ale san okenn papie imigrasion valid ek pa’nn kapav gagn enn travay. Souvan zot bizin kasiet lapolis ek dormi lor semin. Zot pa ti donn Bondie lokazion pou ed zot. Me mwa ek mo fami nou ti bien deside pou fer fas ar bann problem finansie ansam avek led Bondie.”

Paul dir osi: “Zezi ti dir: ‘Pa bizin trakase pou dime, les dime get so zafer. Traka enn zour li ase pou zordi.’ Alor, sak zour, mo ti zis priye Bondie pou ki Li ‘donn nou azordi dipin ki nou bizin’ pou ki nou kapav sirviv. Ek Bondie ti ed nou, parey kouma Zezi ti promet. Pa touletan nou ti gagn seki nou ti plis kontan. Enn zour, mo ti fer lake pou aste manze me mo pa ti kone seki ti pe vande. Kan mo ti ariv devan, mo ti trouve ti ena yaourt. Selman, mo pa kontan manz yaourt. Me se enn manze, alor nou ti manz yaourt sa swar-la. Mo rekonesan anver Bondie parski pandan tou sa letan-la zame mo fami pa’nn al dormi san manze.” a

“Asterla nou pe reisi zwenn le-debout. Me avek seki’nn ariv nou, nou’nn konpran ki pli bon remed kont bann traka se fer Bondie konfians. Zeova b pou touletan ed nou tanki nou kontign fer zefor pou fer so volonte. Nou’nn trouve ki Psom 34:8 bien vre: ‘Goute e gete konbien [“Zeova,” NW] li bon. Bienere bann ki swazir so proteksion.’ Akoz sa, nou pa per pou fer fas ar bann difikilte ekonomik.

“Aster nou konpran ki se pa gras-a travay ouswa larzan ki enn dimounn sirviv, me seki li bizin se ena manze. Nou bien anvi trouv sa promes Bondie la realize: ‘Pou ena lagrin sereal an-abondans lor later.’ Antretan, ‘si nou ena manze pou nouri nou ek linz pou abiye, li ase.’ Nou gagn kouraz parski Labib dir: ‘Ki lamour pou larzan pa determinn zot lavi, kontant zot avek seki zot ena, parski Bondie finn dir “Zame mo pa pou kit twa, ni abandonn twa.” Akoz samem nou kapav dir avek konfians, “[“Zeova,” NW], limem mo sekour, Mo pa pou per nanye.”’” c

Nou bizin vremem ena lafwa pou ‘mars avek Bondie’ parey kouma Paul ek so fami. (Zenez 6:9) Si asterla ouswa dan lavenir nou fer fas ar bann gran kriz finansie, Paul so lafwa ek so sazes pratik ansegn nou bann leson inportan.

Me ki nou kapav fer si nou trakase akoz bann problem familial?