Toutlong Labib ena plizir profesi bien detaye. Okenn dimounn pa kapav predir lavenir an detay. Alor, realizasion bann profesi Biblik konvink nou ki Labib se Parol Bondie.​—Lir Zozie 23:14; 2 Pier 1:20, 21.

Bann profesi Labib ki’nn fini realize donn nou enn bon rezon pou ena lafwa dan Bondie. (Ebre 11:1) Zot osi fer nou ena konfians ki Bondie pou realiz so promes konsernan enn lavenir meyer. Alor, bann profesi Labib donn nou enn vre lesperans.​—Lir Psom 37:29; Romin 15:4.

Sertin profesi averti bann serviter Bondie pou pran bann aksion. Par exanp dan premie siek, kan bann Kretien ti trouv sertin profesi pe realize, zot ti kit Zerizalem. Laplipar so bann abitan ti rezet Zezi, akoz sa plitar sa lavil-la ti detrir. Me bann Kretien zot, zot ti bien lwin ek an sekirite.​—Lir Lik 21:20-22.

Azordi, bann profesi ki’nn akonpli montre ki biento Rwayom Bondie pou detrir tou bann rwayom ek bann gouvernman imin. (Daniel 2:44; Lik 21:31) Alor, li irzan ki sak dimounn fer seki bizin depi asterla mem pou gagn faver Zezi Kris, Lerwa ki Bondie inn etabli.​—Lir Lik 21:34-36.