PRINSIP LABIB: “Siport zot kamarad, e si zot ena kit repros . . . kouma Lesegner finn pardonn zot, zot ousi pardone.”​—Kolosien 3:13.

Ki sa vedir? Labib konpar pese ar enn det ek pardon kan nou kennsel enn det. (Lik 11:4) Enn liv referans dir ki dan bann Lekritir mo Grek ki’nn servi pou tradir “pardone” vedir “anil enn det ek pa re-demann sa ankor.” Alor, kan nou desid pou pardonn enn kikenn nou pa pou demann li repar sa ditor ki li’nn fer la. Mem si nou dispoze pou pardone sa pa vedir ki nou aksepte konportman ouswa ferm lizie lor ditor ki sa dimounn-la inn fer nou. Okontrer, nou desid pou pa gard okenn rankinn mem si nou kapav ena “kit repros” kont li.

Eski li ankor ena valer? Antan ki bann imin inparfe, nou tou fer pese. (Romin 3:23) Se akoz sa ki li bon nou pardonn lezot parski to-ou-tar nou pou bizin ki lezot pardonn nou. Anplis, kan nou dispoze pou pardone, li pou dan nou lavantaz. Kouma?

Si nou res ankoler, gard rankinn ek nou pa pardone, sa fer noumem ditor. Sa bann santiman negatif la kapav fer nou perdi nou lazwa ek fer nou vinn malere. Nou kapav osi gagn bann problem lasante bien grav. Dapre enn rapor ki Dr. Yoichi Chida ek Andrew Steptoe, enn Profeser Sikolozi ti fer dan Journal of the American College of Cardiology, zot inn tir sa konklizion-la: “Bann resers montre kan enn dimounn ankoler ek ena laenn sa kapav fer li gagn malad leker.”

Me dan enn lot kote, anou gete ki bann lavantaz nou gagne kan nou pardone. Kan nou pardonn lezot avek tou nou leker, nou prezerv linite ek lape ek anmemtan nou pe gard bann bon relasion avek lezot. Me pli inportan, nou pe imit Bondie ki pardonn bann ki repanti ek ki atann nou’si nou fer parey.​—Mark 11:25; Efezien 4:32; 5:1.