Seki Samuel, Teresa, ek Magdalene inn dir montre ki bann dimounn priye pou plizir kitsoz. Sertin priye avek bann pli bon mobil ki lezot. Ena dimounn zot lapriyer vremem sinser; parkont ena lezot ki zot lapriyer li zis enn routinn. Par exanp sertin priye pou pas zot lexame, pou zot lekip prefere gagne, pou Bondie ed zot dan zot lavi fami ouswa pou lezot kitsoz. Me, mem si zot priye pou diferan rezon, plizir milyon dimounn trouve ki li inportan zot priye. Bann sondaz montre ki mem bann dimounn ki pa form parti dan okenn relizion, priye regilierman.

Eski ou priye? Si wi, pou ki kitsoz ou priye? Mem si ou abitie priye ouswa non, kitfwa ou demann oumem: ‘Eski sa fer nou dibien kan nou priye? Eski kikenn ekout nou lapriyer?’ Enn ekrivin ti dir ki lapriyer li zis “enn form terapi . . . koumadir ou pe koz avek ou pwason dan lakwariom.” Sertin dokter osi pans koumsa. Zot dir ki lapriyer li kouma enn “medsinn.” Eski bann ki priye fer sa zis par routinn ouswa eski se enn pratik ki ed zot pou santi zot bien?

Selman, Labib montre ki lapriyer li plis ki enn terapi. Li dir ki ena enn kikenn ki vremem ekout nou lapriyer si nou priye kouma bizin ek pou bann kitsoz ki bizin. Eski sa li vre? Anou get bann prev.