Avan tou, pran kouraz avek sa bann parol-la: Bondie trouv bann soufrans ki ena zordi ek Li anvi tir tou soufrans. (Psom 72:13, 14) Dan so Parol, Labib, Bondie promet ‘pou soulaz bann ki pe soufer.’ Kan Li pou fer sa? “Kan Lesegner Zezi retourne depi dan lesiel avek so bann anz bien pwisan, . . . [li] pou vanz kont bann ki pa konn Bondie e ki pa obeir Bonn Nouvel nou Segner Zezi Kris.” (2 Tesalonisien 1:7, 8) Zezi pou retourne dan lavenir ek pou vanz kont bann ki pa’nn obeir Bondie. Labib apel sa lager-la “gran zour Bondie Toupwisan,” ouswa Armagedonn.​—Revelasion 16:14, 16.

Dan sa lager-la, Bondie pa pou servi bann dimounn, me Li pou servi so Garson, Zezi Kris, ek lezot anz bien pwisan. Sa larme dan lesiel la pou detrir tou bann dimounn ki pe fer dominer ar lezot.​—Izai 11:4; Revelasion 19:11-16.

Seki Bondie panse lor lager pa’nn sanze zordi. Li ankor konsider lager kouma enn mwayin pou detrir bann ki pe fer dominer ar lezot. Me parey kouma listwar montre, se zis Bondie tousel ki ena drwa deside kan pou fer lager ek kisannla pou al lager. Kouma nou’nn trouve, Bondie inn fini deside ki se dan lavenir ki pou ena enn lager ki pou detrir tou bann move dimounn. Ek se so Garson, Zezi Kris ki pou lager pou vanz kont bann ki pe fer dominer ar lezot. Sa vedir ki bann  lager ki ena zordi pena soutien Bondie, mem ki kantite bon lintansion bann dimounn ki pe fer sa bann lager ena.

Anou get enn lexanp: Mazinn de frer ki’nn koumans lager kan zot papa pa la. Zot aret lager pou enn ti moman ek zot telefonn zot papa. Enn garson-la pretann ki se so frer ki’nn koumans lager. Lot frer-la dir ki se so frer ki’nn koumanse. Toulede pled zot ka ek sakenn atann ki zot papa pran zot par. Me apre ki papa-la inn tann toulede, li dir zot aret lager ek atann ki li rant lakaz pou regle problem-la. Zot arete pou enn ti moman. Me enn tipe apre zot rekoumanse. Kan papa-la rant lakaz, li ankoler avek toulede zanfan. Li pini zot parski zot pa’nn obeir li.

Azordi, bann nasion ki pe lager souvan demann Bondie pou soutenir zot. Me Bondie pa pran par personn. Okontrer, Li dir dan enn fason bien kler dan Labib: “Pa rann lemal pou lemal,” ek “pa rod tir vanzans zotmem.” (Romin 12:17, 19) Anplis, Li’nn fer bann imin kone ki zot bizin “atann avek pasians” ziska ki Li pran bann aksion kan pou ena Armagedonn. (Psom 37:7) Alor, kan bann nasion lager olie ki zot atann Bondie, zot montre ki zot arogan. Ek sa pa fer Li plezir. Akoz sa, pandan Armagedonn, Bondie pou montre so koler ek pou regle bann konfli ki ena ant bann nasion enn sel kout. Li pou “aret [bann] lager ki ena partou dan lemond.” (Psom 46:9; Izai 34:2) An realite, Armagedonn se lager ki pou aret tou bann lager.

Kan Rwayom Bondie pou dirize, limanite pou konn boukou benediksion. Enn parmi se ki pou nepli ena lager. Dan so lapriyer model, Zezi ti koz lor sa Rwayom-la ouswa sa gouvernman-la. Li ti dir: “Fer to regn vini, realiz to volonte lor later kouma dan lesiel.” (Matie 6:10) Rwayom Bondie pa pou zis eliminn lager me li pou derasinn seki pous bann dimounn lager, setadir lemal. a (Psom 37:9, 10, 14, 15) Alor, eski sa etonn nou ki bann disip Zezi pe atann avek inpasians bann benediksion ki Rwayom Bondie pou fer zot gagne?​—2 Pier 3:13.

Me, ki kantite letan ankor nou bizin atann avan ki Rwayom Bondie tir tou soufrans ek detrir bann move? Realizasion bann profesi Labib montre ki nou pe viv “dan bann dernie tan.” (2 Timote 3:1-5) b Ek sa bann dernie tan-la pou fini kan pou ena Armagedonn.

Parey kouma inn mansione avan, bann ki pou mor dan sa lager final la se bann ki refiz “obeir Bonn Nouvel [lor] nou Segner Zezi Kris.” (2 Tesalonisien 1:8) Me nou rapel ki Bondie pa anvi personn mor, mem pa enn move dimounn. (Ezekiel 33:11) Li “pa anvi ki enn parmi zot tonbe [“mor,” NW]” dan sa lager final la. Akoz sa, avan ki lafin vini Li pe fer tou pou ki Bonn Nouvel lor Zezi Kris “anonse partou dan lemonn, kouma enn temwagnaz pou tou bann nasion.” (2 Pier 3:8, 9; Matie 24:14; 1 Timote 2:3, 4) Azordi gras-a predikasion bann Temwin Zeova dan lemond antie, bann dimounn pe gagn lokazion konn Bondie ek obeir Bonn Nouvel lor Zezi Kris. Koumsa zot kapav trouv sa lepok kot pou nepli ena lager la.