Fason Viv Bann Vegann—Ki Labib Dir lor La?
Dan lemond antie, boukou dimounn interese pou konn plis lor fason viv bann vegann.
“Vegann se enn fason panse ek enn fason viv kot bann dimounn fer tou seki zot kapav pou pa fer ditor bann zanimo. Zot pa manz nanye ki sorti dan bann zanimo, ni met bann linz ki’nn fer ar lapo bann zanimo. Zot pa servi nanye ki ena enn lien ar bann zanimo.”—The Vegan Society.
Sertin dimounn vinn vegann, pa zis parski zot gagn traka bann zanimo, me osi parski zot anvi protez lanatir, amelior zot lasante, ouswa zot fer sa pou bann rezon relizie.
“Vegann se pa zis enn fason manze, kouma bann rezim ki bann dimounn abitie fer. Pou sertin dimounn, se enn krwayans, se bann prinsip moral, ek enn fason viv pou ki lemond vinn meyer.”—Britannica Academic.
Eski fason viv bann vegann kapav rezoud bann problem ki ena lor later? Ki Labib dir lor la?
Seki nou Kreater panse lor bann dimounn ek bann zanimo
Labib dir ki, pou nou Kreater, Zeova, a bann dimounn pli siperyer ki bann zanimo. Li’nn donn bann dimounn responsabilite pou “kontrol” bann zanimo. (Zenez 1:27, 28) Bondie inn mem donn bann dimounn permision pou manz bann zanimo. (Zenez 9:3) Selman, li pa dakor ki bann dimounn maltret bann zanimo.—Proverb 12:10.
Dapre Labib, sakenn kapav deside si li pou manz laser ouswa non; se enn desizion personel. b Nou desizion pa inflians seki Bondie panse lor nou. (1 Korintien 8:8) Ninport ki desizion enn dimounn pran konsernan manze, fode pa nou kritik so desizion.—Romin 14:3.
Enn pli bon lavenir
Labib dir ki, fason ki nou viv pa pou rezoud bann problem ki ena dan lemond. Kifer? Parski sa bann problem-la se bann problem politik, sosial, ek ekonomik, ek okenn imin pa kapav rezoud zot. Labib dir:
“Pa kapav dres seki’nn vinn traver.”—Ekleziast 1:15.
Se nou Kreater ki pou rezoud sa bann problem-la. Labib dir seki Bondie pou fer:
“Ek mo ti trouv enn nouvo lesiel ek enn nouvo later; parski ansien lesiel ek ansien later finn disparet, ek nepli ena lamer.”—Revelasion 21:1.
Bondie pou ranplas bann gouvernman imin, setadir “ansien lesiel,” par “enn nouvo lesiel,” setadir so gouvernman ouswa Rwayom ki dan lesiel. So Rwayom pou detrir “ansien later,” setadir bann move dimounn, ek li pou diriz lor “enn nouvo later,” setadir bann dimounn ki aksepte so lotorite.
Se zis kan Rwayom Bondie pou dirize ki bann dimounn pou kapav viv anpe ar bann zanimo ek lanatir.—Izai 11:6-9.
a Zeova, se nom Bondie.—Psom 83:18.
b Labib donn nou lord pou “pa servi disan.” (Zistwar Bann Zapot 15:28, 29) Savedir ki fode pa nou bwar disan ouswa manz laviann bann zanimo ki pa’nn sengne; fode pa osi ki nou manz bann manze ki ena disan ladan.
Ena Osi
LEZOT LARTIK
Enn Vre Lespwar pou Lavenir
Kifer ena enn diferans ant bann promes ki Labib fer ek bann promes ki bann dimounn fer?
ESSENTIAL BIBLE TEACHINGS
Kifer Bondie Ti Kree Later?
Nou planet ranpli ar bann kitsoz ki extra zoli. Li’nn met li distans ki bizin ar soley ek Li fer li tourne lor enn bon vites. Kifer Bondie inn fer sa kantite zefor-la pou kree enn later?
