KONTIGN VEYE!
Bann Milyon Dimounn Pe Bizin Sove Depi Ikrenn
Le 24 Fevriye 2022, Larisi inn koumans anvayir Ikrenn. Akoz sa, bann milyon dimounn inn bizin kit zot pei parski zot lavi an-danze. a
“Bann bom ti pe eklate partou. Mo pa kone kouma pou explik sa me mo ti pe gagn extra per. Kan nou ti aprann ki ti ena bann trin ki ti pe ed bann dimounn pou kit landrwa, nou ti desid pou ale nou osi. Nou ti bizin kit tou deryer nou ek sakenn parmi nou ti kapav amenn zis enn sak. Nou ti kapav pran zis nou bann papie, bann medsinn, delo, ek inpe manze. Lerla, nou’nn al pran trin alor ki bann bom ti pe eklate otour nou.”—Nataliia, Kharkiv, Ikrenn.
“Ziska dernie ler, nou ti panse ki pa pou ena lager. Mo ti tann bann bom pe eklate dan sertin landrwa, ek bann lafnet ti pe tranble. Mo ti desid pou ale, ek pou pran zis bann kitsoz ki inportan. Mo’nn kit lakaz 8:00 gramatin ek mo’nn pran enn trin pou al Lviv ek depi laba mo’nn pran enn bis pou al Pologn.”—Nadija, Kharkiv, Ikrenn.
Dan sa lartik-la
Pou ki rezon bann dimounn inn bizin kit zot pei?
Parski Larisi inn anvayir Ikrenn, bann milyon dimounn inn bizin kit zot pei. Me selman, Labib koz lor bann lezot rezon kifer ena sa bann problem-la:
Bann gouvernman dan lemond antie pa’nn reisi donn bann dimounn seki zot bizin. Souvan bann gouvernman servi zot lotorite pou kontrol ek fer dominer ar bann dimounn.—Ekleziast 4:1; 8:9.
Satan, ‘sef ki diriz lemonn,’ ena enn move linflians lor bann dimounn parski kouma Labib dir: “Lemonn antie li dan pouvwar Lemal.”—Zan 14:30, NTKM; 1 Zan 5:19, NTKM.
Pandan tou sa bann lane-la, bann dimounn inn konn tou kalite problem. Me aster, nou pe viv seki Labib apel “bann moman difisil dan bann dernie tan.” (2 Timote 3:1, NTKM) Dan sa bann dernie tan-la, pou ena bann lager, bann katastrof natirel, lafaminn, ek bann lepidemi. Ek akoz sa, bann dimounn pou bizin kit zot landrwa.—Lik 21:10, 11, NTKM.
Kotsa bann refizie kapav gagn lespwar?
Labib montre nou ki nou Kreater, Zeova, b Li enn Bondie ki ena lamour ek konpasion pou bann refizie ek bann dimounn ki’nn bizin kit zot lakaz. (Deteronom 10:18) Bondie promet ki Li pou servi so gouvernman ki dan lesiel, setadir Rwayom Bondie, pou regle bann problem ki bann refizie gagne. Ek sa Rwayom-la pou ranplas tou gouvernman ki ena lor later. (Daniel 2:44; Matie 6:10, NTKM) Zeova pou osi servi so Rwayom pou detrir Satan. (Romin 16:20, NTKM) Sa Rwayom-la pou diriz lor later antie, ek pou nepli ena okenn divizion ant bann pei. Limanite an-antie pou form enn sel fami ki ini. Personn pa pou bizin kit zot lakaz parski Labib promet: “Sakenn pou asiz anba so pie rezin ek anba so pie fig, ek pa pou ena personn ki fer zot per, parski sa parol-la finn sorti dan labous Zeova, sef bann larme.”—Mika 4:4.
Zis Rwayom Bondie ki kapav regle problem ki bann refizie gagne. Ek Zeova pou servi so Rwayom pou tir tou bann problem ki pous bann dimounn pou vinn bann refizie. Anou get de-trwa lexanp:
Lager. “[Zeova] finn aret lager ki ena partou dan lemond.” (Psom 46:9, PKM) Pou dekouver kouma Bondie pou aret tou bann lager, lir lartik « La paix dans le monde : Comment sera-t-elle établie ? »
Fer dominer ek laviolans. “[Zeova] pou delivre zot ar bann ki pe fer dominer ar zot ek li pou tir zot dan violans.” (Psom 72:14) Pou konpran kouma bann dimounn kapav sanz bann move latitid ki zot finn ena pandan bien lontan, lir bann lartik ki ena anba tit “Nou Kapav Gagn Laviktwar lor Laenn.”
Lamizer. “[Zeova] donn sekour bann pov ki vinn get li.” (Psom 72:12, PKM) Pou kone ki Bondie pou fer pou tir lamizer, lir lartik « Peut-on espérer un système économique plus juste ? »
Lafaminn. “Pou ena sereal an abondans lor later.” (Psom 72:16) Pou kone kouma Bondie pou tir lafaminn, lir lartik « Plus jamais la faim dans le monde ? »
Eski Labib kapav ed bann refizie?
Wi. Labib pa zis donn bann refizie enn lespwar pou lavenir, me li osi ed zot pou fer fas ar bann problem ki zot pe gagne depi asterla-mem.
Prinsip Labib: “Enn dimounn naif krwar tou seki li tande, me enn dimounn ki ena enn bon zizman, reflesi bien lor sak pa ki li fer.”—Proverb 14:15.
Seki savedir: Pans lor bann danze ki kapav ariv ou ek kouma ou kapav protez ou. Fer atansion ar bann dimounn ki kapav rod explwat ou parski ou dan enn nouvo landrwa.
Prinsip Labib: “Alor, si nou ena manze pou nouri nou ek linz pou abiye, li ase.”—1 Timote 6:8, NTKM.
Seki savedir: Pa res konsantre lor bann kitsoz materyel. Ou pou plis ere kan ou kontant ou ar seki ou ena.
Prinsip Labib: “Alor tou seki zot anvi ki lezot fer pou zot, fer parey pou lezot osi.”—Matie 7:12, NTKM.
Seki savedir: Ena pasians ek zantiyes. Si ou ena sa bann kalite-la, li pou pli fasil pou bann dimounn dan ou nouvo landrwa pou respekte ek aksepte ou.
Prinsip Labib: “Pa rann lemal pou lemal.”—Romin 12:17, NTKM.
Seki savedir: Pa rod tir vanzans kan lezot maltret ou. Sa pou zis fer bann kitsoz vinn pli pir.
Prinsip Labib: “Pou tou kitsoz mo ena kouraz gras-a Bondie ki donn mwa lafors.”—Filipien 4:13.
Seki savedir: Met Bondie an premie dan ou lavi ek priye Li. Li kapav ed ou pou fer fas ar ou bann problem.
Prinsip Labib: “Pa trakase pou okenn kitsoz, me dan tou kitsoz, par lapriyer ek siplikasion avek bann remersiman, demann Bondie seki zot bizin; ek lape Bondie ki depas tou konesans pou protez zot leker ek zot lespri par mwayin Kris Zezi.”—Filipien 4:6, 7.
Seki savedir: Dan ninport ki sitiasion ou ete, demann Bondie pou donn ou lape lespri. Lir lartik « Philippiens 4:6, 7—“Ne vous inquiétez de rien” ».
a Enn zour apre ki sa lager-la inn koumanse, l’Agence des Nations Unies pour les réfugiés (UNHCR) inn dir ki sa sitiasion-la, se sitiasion pli grav ki zot inn kone. Dan lespas 12 zour, plis ki de milyon dimounn dan Ikrenn finn sove pou al dan bann lezot pei, ek anviron enn milyon dimounn finn al kasiet dan bann lezot landrwa dan Ikrenn.
b Nom Bondie se Zeova. (Psom 83:18) Get lartik “Kisannla Zeova Ete?”
Ena Osi
ESSENTIAL BIBLE TEACHINGS
Ki Ete Rwayom Bondie?
Pandan so minister lor later, Zezi ti ansegn lor Rwayom Bondie plis ki ninport ki lezot size. Pandan plizir siek, so bann disip finn priye pou ki sa Rwayom-la vini.
