Problem Delo dan Lemond—Ki Labib Dir lor La?
Nou tou nou bizin delo prop pou viv. Me kouma António Guterres Sekreter Zeneral dan l’Organisation des Nations Unies inn dir: “Akoz kantite delo ki bann dimounn pe servi pe kontign ogmante dan lemond, ena enn gro problem delo.” Pou plizir milyar dimounn, li deza pa fasil pou gagn delo prop pou bwar.
Strdel/AFP via Getty Images
Eski enn zour pou ena ase delo pou tou dimounn? Ouswa eski nou pou touletan fer fas ar bann problem delo? Ki Labib dir lor la?
Ki promes Labib fer lor delo?
Labib dir ki enn zour pou nepli mank delo. Savedir ki pou ena delo prop an-abondans.
“Dan dezer, delo pou sorti avek enn gran presion, ek pou ena bann larivier dan bann laplenn kot nanye pa pouse. Ek later sek pou vinn kouma enn lamar ki kouver ar rozo, ek kot pa ti ena ditou delo, pou vinn kouma bann lasours delo.”—Izai 35:6, 7.
Kifer nou kapav krwar sa promes-la? Anou get enn detay dan Labib konsernan fason ki’nn kree nou planet.
Ki Labib dir konsernan later ek sik delo (water cycle)?
‘Bondie pa’nn kree later pou nanye, me Li’nn form li pou ki dimounn res lor la.’—Izai 45:18.
Parski Bondie inn kree later pou ki kontign ena lavi lor la, li finn met anplas bann sistem natirel pou ki kapav gagn delo prop an-abondans.
“[Bondie] fer bann gout delo mont lao; zot vinn lavaper ek apre zot vinn lapli; lerla, lapli tonbe depi bann niaz; li tom lor tou dimounn.”—Zob 36:27, 28.
Sa bann verse-la dekrir kouma Bondie inn met anplas enn sistem natirel ki fiab pou resikle ek fourni delo. Delo ki ena lor later ek dan lamer evapore ek vinn lavaper. Lerla sa lavaper-la form bann niaz, ek apre sa lapli tonbe. Ek sa fer an-sort ki bann dimounn ek bann zanimo kontign gagn delo prop.—Ekleziast 1:7; Amos 5:8.
“Alor vremem, mo pou donn zot bann gro lapli dan lepok ki bizin, ek later pou donn so prodiksion, ek pie dan karo pou raport so frwi.”—Levitik 26:4.
Bondie ti promet pou beni bann Izraelit, ki ti bann planter. Li ti fer zot gagn lapli regilierman pou ki zot kapav gagn enn zoli rekolt. Li kone pou ki bann plant pous bien, zot bizin lapli regilierman.
Seki Bondie inn fer lontan pou bann Izraelit, biento li pou fer sa pou later antie. (Izai 30:23) Me pou linstan, dan boukou pei pe kontign mank delo prop ek sa pe kontign anpire. Anplis problem-la li pa zis akoz lapli pa tom ase. Ki bann solision Labib done konsernan bann problem delo ki nou gagne azordi?
Kouma eski problem delo pou regle?
Labib montre nou ki se atraver so Rwayom ki Bondie pou regle tou bann problem ki afekte nou planet, mem problem delo ki ena azordi. (Matie 6:9, 10) Rwayom Bondie se enn gouvernman dan lesiel ki pou diriz later. (Daniel 2:44; Revelasion 11:15) Anplis, tou problem ki bann gouvernman imin pa’nn reisi regle, gouvernman Bondie pou regle zot, setadir li pou tir tou bann kitsoz ki fer nou gagn problem delo.
Problem: Akoz sanzman klima, ena enn debalansman dan sik delo. Lerla sa fer nou gagn bann gran lasesres. Nou gagn osi bann gran inondasion, swa akoz lapli toransiel swa akoz nivo lamer monte.
Solision: Rwayom Bondie pou repar tou bann dega ki’nn fer dan lanvironnman pou ki nou planet kapav refer. Bondie inn promet: “Gete! Mo pe fer tou kitsoz nouvo.” (Revelasion 21:5) Pou ena delo an-abondans dan bann landrwa ki bien sek, ek sa pou permet ki ena lavi dan bann landrwa ki azordi extra sek ek kot pa kapav viv. (Izai 41:17-20) Rwayom Bondie, ki dan lame Zezi Kris, pou osi ena kontrol lor lafors lanatir.
Kan Zezi ti lor later, li ti kalme enn gro tanpet. Kan li ti fer sa, li’nn donn nou enn lide ki li kapav fer gras-a pouvwar ki Bondie inn donn li. (Mark 4:39, 41) Kan Zezi pou regne lor later antan ki lerwa dan Rwayom Bondie, pou nepli ena okenn katastrof natirel. Bann dimounn pa pou bizin per okenn katastrof parski zot pou konn vre lape ek sekirite.
Problem: Bann dimounn ki pa reflesi lor konsekans zot bann aksion ek bann gran konpagni ki zis pans pou fer boukou kas zot polie bann larivier, bann lak ek bann delo souterin. Sa osi kontribie ki ena enn mank delo prop.
Solision: Bondie pou netway nou planet ek li pou refer bann larivier, bann lak, lamer, ek later revinn prop. Nou planet later pou vinn enn paradi. Dan enn fason poetik, Labib dir: “Dezer ek landrwa sek pou bien kontan, ek laplenn kot nanye pa pouse pou dan lazwa ek pou bourzone kouma safran.”—Izai 35:1.
Ki pou ariv bann ki pa kas latet ar lanvironnman ek ar zot prosin? Bondie promet “pou detrir bann ki pe detrir later.”—Revelasion 11:18; Proverb 2:21, 22.
Problem: Bann dimounn pa pe zer bann resours delo kouma bizin. Zot fer boukou gaspiyaz ek zot servi boukou plis delo ki later kapav prodir.
Solision: Gras-a so Rwayom, se volonte Bondie ki pou “fer lor later,” pa volonte bann dimounn egois. (Matie 6:9, 10) Rwayom Bondie pou donn bann dimounn meyer ledikasion ki ena. Izai 11:9 dir: “Vremem later pou ranpli avek konesans Zeova.” a Gras-a sa konesans ki pli siperyer-la, ek lamour pou Bondie ek pou so bann kreasion, bann dimounn pou kapav pran swin nou zoli planet ek so bann resours natirel dan enn fason parfe.
Pou konn plis lor seki Rwayom Bondie pou fer, get lartik “Ki Rwayom Bondie Pou Fer?”
Lir liv Izai sapit 35 dan Labib pou trouve kouma later pou vinn enn paradi.
Get video Kifer Bondie Ti Kree Later? pou aprann kifer Bondie inn kree later ek bann dimounn.
a Zeova se nom Bondie. (Psom 83:18) Get lartik “Kisannla Zeova Ete?”
Ena Osi
ESSENTIAL BIBLE TEACHINGS
Ki Ete Rwayom Bondie?
Pandan so minister lor later, Zezi ti ansegn lor Rwayom Bondie plis ki ninport ki lezot size. Pandan plizir siek, so bann disip finn priye pou ki sa Rwayom-la vini.
KISANNLA NOU ETE?
Demann enn Vizit
Gagn repons enn kestion dan Labib, ouswa aprann plis lor bann Temwin Zeova.
