KONTIGN VEYE!

Bann Siantis Inn Bouz Revey Lafin Dimond Pli Devan—Ki Labib Dir lor La?

ZWE

Le 24 Zanvie 2023, bann siantis ti met Revey Lafin Dimond a pli pre ar minwi, ki reprezant lafin sa lemond-la.

“‘Revey Lafin Dimond’ reprezant danze ki bann imin pe fer fas akoz zot pe detrir zotmem. Mardi, bann siantis ti bouz sa revey-la pli pre ar minwi, ek sa zame inn arive avan. Zot inn fer sa akoz bann levennman kouma lager dan Ikrenn, laper ki gagn enn lager nikleer, ek bann kondision klimatik ki bien danzere.”—AFP International Text Wire.
“Mardi, bann siantis ti dir ki zot inn bouz ‘Revey Lafin Dimond’ lor 90 segonn avan minwi. Se pli pre ki limanite inn trouv li ar so destriksion.”—ABC News.
“Enn group siantis internasional inn averti ki azordi, ena enn pli gran risk ki limanite detrir limem.”—The Guardian.

Eski limanite ek nou planet pou detrir biento? Eski nou bizin per seki pou arive dan lavenir? Ki Labib dir lor la?

Ki pou arive dan lavenir?

Dapre Labib, “later pou res pou touletan” ek pou ena bann dimounn ki pou “viv lor la pou toultan.” (Ekleziast 1:4; Psom 37:29, Psom an Kreol Morisien) Alor, bann imin pa pou detrir later ouswa fer later vinn enn plas kot nanye pa kapav viv.

Parkont, Labib koz lor enn lafin. Par exanp, li dir ki “lemond pe disparet.”—1 Zan 2:17.

Pou kone ki Labib pe rod dir kan li koz lor lafin dimond, lir lartik « La fin du monde est-elle proche ? Qu’est-ce que l’apocalypse ? »
Pou kone seki Labib dir lor bann levennman ki pou arive dan lemond ek kan sa pou arive, lir lartik « Quand la fin du monde viendra-t-elle ? »

Res pozitif

Labib kapav ed nou pou res pozitif malgre bann problem ki ena dan lemond. Kouma?

Labib donn nou bann konsey ki kapav ed nou dan nou lavi toulezour. (2 Timote 3:16, 17) Par exanp, lir lartik « Comment ne pas vous laisser submerger par l’inquiétude » pou gete kouma Labib kapav ed ou pou res pozitif malgre bann problem ki ena dan lavi.
Labib donn nou enn lespwar sir pou lavenir. (Romin 15:4) Li explike exakteman seki nou kapav atann aster-la ek dan lavenir, ek sa ed nou pou res pozitif malgre seki pe arive dan lemond azordi.

Pou konn plis lor Labib, nou invit ou pou gagn enn letid Labib gratis.

a “Revey Lafin Dimond, se enn revey ki averti bann dimounn ki kantite nou pre pou detrir nou lemond avek bann teknolozi danzere ki nou-mem nou’nn fer. Li enn sinbol ki rapel nou, ki bann problem nou bizin regle pou nou kapav sirviv.”—Bulletin of the Atomic Scientists.