Eski ou panse ki bann kitsoz pou ameliore dan lavenir? Boukou dimounn esey res pozitif malgre bann gro problem ki zot gagne azordi. Eski nou kapav vremem atann ki bann kitsoz pou ameliore dan lavenir? Wi! Labib donn nou enn vre lespwar pou lavenir.

•  Ki lespwar Labib donn nou?

•  Eski lespwar ki Labib donn nou li tro zoli pou ki li vre?

•  Kouma seki Labib promet pou realize?

•  Kan eski sa pou arive?

•  Kouma lespwar ki Labib done kapav ed ou azordi?

 Labib rekonet ki limanite pe fer fas avek bann extra gro problem. Me selman, li promet ki sa bann problem-la pa pou kontign fatig nou pou touletan. Anou get de-trwa lexanp presi.

•   Problem: Bann dimounn ki pena lakaz

   Seki Labib dir: “Zot pou ranz bann lakaz ek zot pou res ladan.”​—Izai 65:21.

   Seki savedir pou lavenir: Bann dimounn pou ena zot prop lakaz.

•   Problem: Pena travay ek lamizer

   Seki Labib dir: “Bann ki mo’nn swazir pou profit maximum tou travay zot lame.”​—Izai 65:22.

   Seki savedir pou lavenir: Tou dimounn pou satisfe ek kontan travay ki zot fer.

•   Problem: Linzistis

   Seki Labib dir: “Bann prins zot, zot pou gouverne kouma bann prins pou lazistis.”​—Izai 32:1.

   Seki savedir pou lavenir: Pou tir tou linzistis, ki li rasial, sosial ek ekonomik, ek pou tret tou dimounn parey.

•   Problem: Mank manze ek lafaminn

   Seki Labib dir: “Pou ena sereal an-abondans lor later; lao lor bann montagn, pou ena enn gran labondans.”​—Psom 72:16.

   Seki savedir pou lavenir: Tou dimounn pou kapav gagn bann manze ki bon pou lasante, ek sa an-abondans. Personn pa pou al dormi vant vid ouswa soufer akoz mank manze.

•   Problem: Krim ek violans

   Seki Labib dir: “Sakenn pou asiz anba so pie rezin ek anba so pie fig, ek pa pou ena personn ki fer zot per.”​—Mishe 4:4.

   Seki savedir pou lavenir: Tou dimounn pou santi zot an sekirite, parski bann ki fer lemal pou disparet, ek “bann dimounn zis pou posed later.”​—Psom 37:10, 29.

•   Problem: Lager

   Seki Labib dir: “Enn nasion pa pou lev lepe kont enn lot nasion, ek zot pou nepli aprann lager.”​—Izai 2:4.

   Seki savedir pou lavenir: Pou ena lape partou lor later. (Psom 72:7) Personn pa pou plore parski zot inn perdi enn kikenn ki zot kontan akoz lager, ek personn pa pou vinn enn refizie akoz lager.

•   Problem: Maladi

   Seki Labib dir: “Okenn abitan pa pou dir: ‘Mo malad.’”​—Izai 33:24.

   Seki savedir pou lavenir: Personn pa pou soufer akoz zot andikape ouswa malad. (Izai 35:5, 6) Labib promet ki ‘pa pou ena lamor.’​—Revelasion 21:4, Nouvo Testaman Dan Kreol Morisien, NTKM.

•   Problem: Dega dan lanvironnman

   Seki Labib dir: “Dezer ek landrwa sek pou bien kontan, ek laplenn kot nanye pa pouse pou dan lazwa ek pou bourzone kouma safran.”​—Izai 35:1.

   Seki savedir pou lavenir: Later antie pou vinn enn paradi kot tou dimounn pou kapav reste, parey kouma Bondie ti anvi depi koumansman.​—Zenez 2:15; Izai 45:18.

 Kitfwa, samem ou pe panse. Selman, nou ankouraz ou pou aprann plis lor seki Labib dir lor lavenir. Kifer? Parski ena enn diferans ant bann promes ki Labib fer ek bann promes ki bann dimounn fer. Bann promes ki ena dan Labib vinn depi Bondie. Ala seki fer sa gran diferans-la:

•   Nou kapav fer Bondie konfians. Labib dir ki Bondie “zame koz manti.” (Tit 1:2, NTKM) Anplis, zis Bondie tousel ki ena kapasite pou predir lavenir. (Izai 46:10) Dan Labib ena boukou lexanp ki montre ki tou seki Bondie predir touletan realize. Pou gagn plis linformasion, get video Kouma Nou Kapav Sir ki Labib Dir Laverite?

•   Bondie ena pouvwar pou regle nou bann problem. Labib dir ki Bondie ena pouvwar pou fer “tou seki li anvi.” (Psom 135:5, 6, Psom an Kreol Morisien, PKM) Seki vedir ki nanye pa pou kapav anpes Bondie realiz so bann promes. Anplis Bondie anvi ed nou, parski Li kontan nou.​—Zan 3:16.

 Ou kapav demann oumem, ‘Si Bondie anvi ed nou ek ki Li ena pouvwar pou fer li, kifer nou pe pas par sa kantite problem-la?’ Pou reponn sa kestion-la, get video Kifer Bondie Permet Soufrans?

 Bondie pou servi so Rwayom, enn gouvernman ki dan lesiel pou realiz so bann promes. Li finn swazir Zezi Kris pou regne dan sa Rwayom-la, ek Li finn donn li lotorite pou okip later ek bann dimounn ki viv lor la. Kan Zezi ti lor later, li ti geri bann dimounn malad, nouri bann ki ti gagn fin, kontrol letan, ek mem resisit bann mor. (Mark 4:39, NTKM; 6:41-44, NTKM; Lik 4:40, NTKM; Zan 11:43, 44, NTKM) Gras-a sa, Zezi finn montre ki li pou fer antan-ki lerwa dan Rwayom Bondie.

 Get video Ki Ete Rwayom Bondie? pou aprann plis lor kouma Rwayom Bondie pou fer ou gagn bann benediksion.

 Biento! Kouma nou kapav sir? Labib ti predir ki ti pou ena bann sign ki ti pou montre ki Rwayom Bondie pe koumans regne lor later. (Lik 21:10, 11, NTKM) Seki pe arive dan lemond azordi, montre ki seki Labib ti predir pe realize.

 Pou aprann plis, lir lartik “Kan Eski Rwayom Bondie Pou Regne lor Later?”

 Enn ekrivin Labib ti konpar lespwar ki Labib done kouma “enn lank solid ek stab ki tini nou pou lavi.” (Ebre 6:19, NTKM) Parey kouma enn lank bato gard bato-la stab pandan enn siklonn, lespwar solid ki ena dan Labib pou lavenir, kapav ed nou pou fer fas ar nou bann problem azordi. Nou lesperans li enn proteksion pou nou, lor plan emosionel, mantal ek mem fizik.​—1 Tesalonisien 5:8, NTKM.