Labib koz lor bann kitsoz ki ti pou montre koumansman “lafin-dimonn.” (Matie 24:3, NTKM) Labib apel sa peryod-la “bann dernie zour” ouswa “lepok lafin.” (2 Timote 3:1; Daniel 8:19)

 Labib koz lor diferan kitsoz ki pou arive anmemtan. Tou sa bann kitsoz-la ti pou enn “sign” bann dernie zour. (Lik 21:7, NTKM) Anou get sertin lexanp:

 Lager partou dan lemond. Zezi ti predir: “Nasion pou lev kont nasion, rwayom kont rwayom.” (Matie 24:7, NTKM) Revelasion 6:4 koz lor enn dimounn ki pe mont enn seval ek ki ti gagn permision pou “retir lape lor later.” Li reprezant lager.

 Lafaminn. Zezi ti predir ki “pou ena lafaminn.” (Matie 24:7, NTKM) Liv Revelasion koz lor enn lot dimounn ki pe mont enn seval avek enn balans dan so lame. Li reprezant lafaminn ki pou ena dan boukou landrwa.​—Revelasion 6:5, 6, NTKM.

 Bann gran tranbleman-de-ter. Zezi ti dir ki pou ena “bann tranbleman-de-ter dan enn landrwa apre lot.” (Matie 24:7; Lik 21:11, NTKM) Akoz sa bann tranbleman-de-ter-la, lamor ek soufrans ti pou ogmante kouma zame nou pa finn trouve avan.

 Bann maladi. Zezi ti dir ki pou ena “bann lepidemi.”​—Lik 21:11, NTKM.

 Krim. Mem si touletan finn ena bann krim, Zezi ti predir ki dan bann dernie zour “lemal pou ogmante.”​—Matie 24:12, NTKM.

 Bann dimounn pou detrir later. Revelasion 11:18 ti predir ki bann dimounn pou “detrir later” par zot fason azir. Bann dimounn ti pou violan, me sirtou zot ti pou detrir lanvironnman.

 Bann dimounn pou vinn pli pir. Labib ti predir ki bann dimounn “pou ingra, zot pa pou fidel, . . . zot pa pou dakor ant zotmem, zot pou met bann fos lakizasion lor lezot, zot pa pou konn kontrol zot, zot pa pou ena okenn pitie, zot pa pou kontan seki bon, zot pou bann tret, zot pou ena latet dir, zot pou ranpli ar lorgey.” (2 Timote 3:1-4) Ti kapav dekrir sa lepok-la kouma enn “lepok kritik, difisil pou siporte” parski latitid bann dimounn ti pou vinn pli pir.

 Bann fami pou koumans kase. Labib ti predir ki boukou dimounn “pa pou ena okenn lafeksion natirel” pou zot fami ek ki bann zanfan ti pou “dezobeir zot paran.” (2 Timote 3:2, 3)

 Lamour pou Bondie pou diminie. Zezi ti predir: “Lamour boukou dimounn pou diminie.” (Matie 24:12) Zezi ti pe rod dir ki laplipar bann dimounn pou nepli kontan Bondie. Labib ti dir osi ki dan bann dernie zour, bann dimounn ti pou ‘kontan plezir, olie kontan Bondie.’ (2 Timote 3:4, NTKM)

 Bann relizion pou azir dan enn fason ipokrit. Dan 2 Timote 3:5, Labib ti predir ki bann dimounn pou fer sanblan ki zot pe ador Bondie, me an realite zot pa pou viv dapre so bann prinsip.

 Bann profesi Labib pou vinn pli kler. Liv Daniel ti predir ki dan “lepok lafin,” boukou dimounn pou koumans konpran laverite ki ena dan Labib. Zot pou osi konpran pli bien bann profesi.​—Daniel 12:4.

 Travay predikasion dan lemond. Zezi ti predir: “Bonn Nouvel Rwayom Bondie pou anonse partou dan lemonn.”​—Matie 24:14, NTKM.

 Bann dimounn pa pou kas latet. Zezi ti predir ki bann dimounn pa ti pou pran kont bann prev ki montre ki lafin pe koste. (Matie 24:37-39, NTKM) Pli pir, Labib ti dir ki sertin pou trouv sa bann prev-la bien bet ek ki zot pou boufonn bann dimounn ki krwar ladan. (2 Pier 3:3, 4, NTKM)

 Tou bann profesi pou realize. Zezi ti dir ki nou pou kone ki nou pe viv dan bann dernie zour parski tou bann profesi ti pou realize anmemtan.​—Matie 24:33, NTKM.

 Wi. Bann levennman dan lemond ek kronolozi ki ena dan Labib montre ki bann dernie zour finn koumanse an 1914. Mem lane, Premie Lager Mondial ti koumanse. Pou trouve kouma bann levennman dan lemond montre ki nou pe viv bann dernie zour, get sa video-la:

 An 1914, Rwayom Bondie finn koumans regne dan lesiel. Enn parmi bann premie kitsoz ki sa Rwayom-la inn fer, se pous Satan ek so bann demon depi dan lesiel ek avoy zot lor later. (Revelasion 12:7-12, NTKM) Nou kapav trouv linflians Satan dan move latitid ki bann dimounn ena ek bann move aksion ki zot fer. Tousala fer ki bann dernie zour zot enn “lepok kritik, difisil pou siporte.”​—2 Timote 3:1.

 Boukou dimounn soufer akoz sa lepok difisil la. Zot trakase parski zot trouve ki bann dimounn nepli kone kouma pou viv bien ansam. Sertin per ki lavenir vinn pli pir, ek ki ariv enn moman kot tou dimounn rod detrir so kamarad.

 Parkont, ena sertin ki ena enn lespwar mem si zot pe soufer akoz seki pe arive dan lemond. Zot sir ki biento Rwayom Bondie pou regle tou bann problem ki ena dan lemond. (Daniel 2:44; Revelasion 21:3, 4, NTKM) Avek pasians, zot atann ki Bondie realiz so bann promes. Sa bann parol Zezi la rekonfort zot: “Me dimoun ki persevere ziska lafin pou sove.”​—Matie 24:13, NTKM; Mika 7:7.