Wi. Bondie gagn traka so bann serviter ki malad. Get ki Labib dir konsernan enn serviter Bondie ki ti fidel: “Zeova pou soutenir li lor so lili douler.” (Psom 41:3) Si ou ena enn maladi kronik, kitfwa sa trwa pwin ki mansione apre la kapav ed ou:

1.   Priye pou gagn lafors pou andire. Ou kapav gagn “lape Bondie ki depas tou lintelizans,” ek gras-a sa ou pou mwins strese ek sa pou ed ou pou andire.​—Filipien 4:6, 7, NTKM.

2.   Res pozitif. Labib dir: “Enn bon limer ed enn dimounn pou geri, me tristes fer enn dimounn perdi tou so lafors.” (Proverb 17:22, Bible en français courant) Esey kanmem gard ou sourir, parski sa pou ed ou dan bann zour kot ou moral pa bon, ek anplis sa pou ena enn bon lefe lor ou lasante.

3.   Ranforsi ou lespwar pou lavenir. Lespwar kapav ed ou pou trouv lazwa mem si ou ena enn maladi kronik. (Romin 12:12) Labib predir ki pou ariv enn lepok kot “okenn abitan pa pou dir: ‘Mo malad.’” (Izai 33:24) Lerla, Bondie pou geri bann maladi kronik ki bann dokter pa kapav geri azordi. Par exanp, gete kouma Labib dekrir kouma bann vie dimounn pou revinn zenn ek ena enn bon lasante: “Ki so lapo vinn pli fre ki dan so zenes; ki li regagn lafors ki li ti ena kan li ti zenn.”​—Zob 33:25.

 Remark: Mem si bann Temwin Zeova rekonet ki Bondie ed bann dimounn, zot osi rod bann tretman medikal pou bann maladi kronik. (Mark 2:17) Me selman, nou pa ankouraz okenn tretman spesifik; nou panse ki sakenn bizin deside ki li anvi fer dan sa domenn-la.